MWAHA 7
Ewehereryo Yeeparipari wa Oosiveliwa Anyu Akhwile
Nnasuwela hai wi ovinya muukhwani onahaala weereya?
Yehova onoona hai vooloca sa waaviiha muukhwani achu ookhwa?
Taani onahaala oviihiwa muukhwani?
1-3. Mwiicani taani onaniikara oothene yeehu, nave ntakhara heeni othokororya yeeyo Piipiliya onahusiheiye ennaruuha ohakalala?
NKAANYIHERYANI wi nyu munamuchawa mwiicani ootakhala. Owo ti awuupa vancipale ni ooveya woopwahaani nyuwo. Nyuwaano moosuwela wi owo haanono ikharari nthowa nawi moomoona awiiphaka asinthamwene anyu akina. Moohipwacha wiilipixerya muneeraanyu wi muchawe, owo onnawaacamelaani. Hiwaavovo ewehereryo. Mootutuxa, onnarwa mvuluxa oosivela wi ookhaviheryeeni. Owo takuru ompwaha mwiicani anyu, nave onnaroromeliha wookhaviheryaani. Yeeyo enahaala oweerihaani okhala oohakalala!
2 Moophwanaphwana, nyuwo munnikariwa ni mwiicani ntoko yoowo. Oothene hiyo ninnikariwa. Ntoko nihusenryaahu mmwaha ovinre, Piipiliya onaloca wi okhwa ti mwiicani. Haavo a hiyo onawerya ochawa okhwa. Ancipale a hiyo noomoona mwiicani ola awiiphaka achu yaawo nnasivelaahu. Nyenya Yehova ta ikuru soothene opwaha okhwa. Owo ti Mvuluxa oosivela yoowo oonihenrye wi onanwerya omutoloxa mwiicani ola. Nave onnalaiherya omutoloxa khuluwi mwiicani ola, okhwa. Piipiliya onnahusiha: “Mwitxana òmaliherya ovothiwa ti okhwa.” (1 Korinto 15:26) Iho ti michaka yaphaama!
3 Hankooni nthokororye ti mwawiihai hiyaano nnoonaahu vaavaa muchu nnamusivelaahu akhwa. Othokororya ela enahaala onikhaviherya wiiwexexa echu yeeyo enahaala oneeriha okhala oohakalala. Yehova oolaiherya wi achu ookhwa enahaala okookela okhala akumi. (Isaiya 26:19) Awo enahaala okookiheryiwa okumi. Ela ti ewehereryo ya ovinya muukhwani.
AKHWA MUCHU NAAMUSIVELAAHU
4. (a) Ntakhara heeni othanana wa Yesu ni okhwa wa muchu oosiveliwa onnanihusiha echu vooloca sa muupuwelo wa Yehova? (b) Onthamwene taani wavameekhaaya Yesu aapankeiye?
4 Moohikhwa minikwa nyuwaano montoko omuyeleela oosiveliwa anyu muukhwani! Othanana, ni muupuwelo woohikhalano ewehereryo onniicela vancipale. Mu ilukuluku seiyo, hiyaano nnakhwela waavya Masu a Muluku wi niphwanye ohakararya. (Mwaalakhanye 2 Korinto 1:3, 4.) Piipiliya onnanikhaviherya wiiwexexa moonelo wa Yehova ni Yesu vooloca sa okhwa. Yesu, yoowo oonihenrye moophaameya mukhalelo wa Atiithi awe, aasuwela wiicela wa omuyeleela muchu muukhwani. (Yohani 14:9) Vaavaa Yesu aareiye o Yerusalemu, owo aanamuxekurya Lasaro ni arokora awe, Mariya ni Malita, yaawo yaakhala mmuceche wa Petaniya. Awo yaari asinthamwene. Piipiliya onii: “Yesu ànàkhwela Marta, munnawe Mariya ni Làzaro.” (Yohani 11:5) Ntoko nihusenryaahu mmwaha ovinre, Lasaro aakhwa.
5, 6. (a) Tiheeni Yesu enreiye vaavaa owo aareiye ni emusi ni asinthamwene oothanana a Lasaro? (b) Ntakhara heeni othanana wa Yesu onnanilipiha?
5 Yesu onne hai vaavaa nthamwene awe aakhwileiye? Piipiliya onnanleela wi Yesu aathanana vamoha ni amusi ni asinthamwene a Lasaro vooloca sa orimeela iwo. Va owoona, Yesu aathanana vancipale. Owo “àmoriwa ikharari ni aripiwa murima.” Voocharela vaya, “Yesu àhinla.” (Yohani 11:33, 35) Apwanne othanana wa Yesu waataphulela wi owo haarino ewehereryo? Hooye. Mwevelevelo, Yesu aanasuwela wi aahaala weera echu yootikiniha. (Yohani 11:3, 4) Nyenya, owo aahoona wiicela ni othanana nthowa na okhwa.
6 Mmukhalelo mukina, othanana wa Yesu onnanilipiha. Ela enanihusiha wi Yesu ni Atiithi awe, Yehova, anniica okhwa. Nyenya Yehova Muluku onnawerya omutoloxa mwiicani owo! Hankooni noone yeeyo Muluku eerinheiye wi Yesu apake.
“LÀZARO, KHUMELÀ VATE!”
7, 8. Ntakhara heeni okhwa wa Lasaro waakhanle ntoko hiwaarivo ewehereryo wa achu yoona, nyenya tiheeni Yesu eenreiye?
7 Lasaro aavithiwe mu nikhuku, nave Yesu aaveka wi niviihiwevo nluku naari vamulakoni. Malita aakhooca woona wi yaavira mahiku maxexe, mwiili wa Lasaro waapacerya wuuca. (Yohani 11:39) Mwa moonelo wa achu hiwaarivo ewehereryo.
8 Nluku nlo naaviihiwavo, nave Yesu aakhuwela ni masu matokotoko: “Làzaro, khumelà vate!” Tiheeni yeeren’ye? “Nave yole ari òkhwa àvinya.” (Yohani 11:43, 44) Munnawerya waanyiherya ohakalala wa achu yaari vaavale? Moohipwacha wakhala wi Lasaro aari munnaya, mmusi aya, nthamwene aya, naari mwaacamani aya, awo yaanasuwela wi owo aakhwa. Vanonto, Lasaro aari muchu mmohamoha yaamusuwenlaaya—eemenle variyari vaya wanaawiili. Eyo yoonen’ye okhala ntoko echu yoohiweryeya. Moohikhwa minikwa achu ancipale yaamukhupaarela Lasaro moohakalala. Mwawiihiiha okhwa wavoothiwa chiryene!
9, 10. (a) Yesu oonihenrye hai wi ti Yehova aaya omviiha Lasaro muukhwani? (b) Taavi ari mareeliho makina a waalakhanya saweereya sa Piipiliya vooloca sa ovinya muukhwani?
9 Yesu haalonce wi aapanke yootikhiniha ela ni ikuru sawe. Mu nivekelo nawe ahaakumve omwiichana Lasaro, owo aahooniherya mwawiiweyaxa wi Yehova taari Ehime ya ovinya muukhwani. (Mwaalakhanye Yohani 11:41, 42.) Hiyaari ekwaha yeelaru pahi yeeyo Yehova aapharihenleiye muteko ikuru sawe mmukhalelo ola. Ovinya muukhwani wa Lasaro ti emoha ya sootikhiniha thanu naxexe irempwe mu Masu a Muluku sa mukhalelo yoola.a Waalakhanya ni ohuserya saweereya seiya ti yoohakalaliha. Iho sinanihusiha wi Muluku haanono nthalu, nthowa nawi achu yaaviihiwe muukhwani anaphitaanyerya amiravo ni awuuluvala, alopwana ni athiyana, Aisarayeli ni oohikhala Aisarayeli. Chiryene ohakalala otokweene onalociwa mu saweereya seiya! Ntoko yawooniherya, vaavaa Yesu aamviihaleiye nahano muukhwani, asitiithi awe “yàtepa otikhina.” (Marko 5:42) Mweeparipari, Yehova aahaavaha nthowa na ohakalala nenlo yaawo yahaacuwalaaya.
10 Mweeparipari, achu oothene yaaviihiwe muukhwani ti Yesu aakhwa wanaawiili. Mano ela enataphulela wi waari mahaleene waaviiha awo muukhwani? Hooye. Chiryene saweereya seiya sa Piipiliya sinnathipela iparipari itokotoko nave sinnanivaha ewehereryo.
OHUSERYA MOORWEELA WA SAWEEREYA SA OVINYA MUUKHWANI
11. Yaweereya ya ovinya muukhwani wa Lasaro enacicimiherya hai eparipari erempwe mu Eklesiyaste 9:5?
11 Piipiliya onahusiha wi achu ookhwa “hanasuwelarue txhu.” (Eklesiyaste 9:5) Awo hari akumi o nipuro nikina nave hanasuwela echu. Yaweereya ya Lasaro ennooniherya yeela. Vaavaa aakookenleiye okhala mukumi, apwanne Lasaro aahaatikhiniha achu alocaka ichu sa wirimu? Naari aawoopopiha ni miyaha sawoopiha vooloca sa cukucha a mooro? Hooye. Piipiliya haanono masu ntoko yaawo oorweela wa Lasaro. Mahiku maxexe yaavinre Lazaro akhwile, owo ‘hasuwelaru etxhu.’ Lasaro aamurupa muukhwani.—Yohani 11:11.
12. Ntakhara heeni nnaphwanela ororomela wi oviihiwa muukhwani wa Lasaro woheereya chiryene?
12 Yaweereya ya Lasaro ennanihusiha tho wi ovinya muukhwani eparipari, tahi etheru. Yesu aamviihale Lazaro vamiithoni va muloko wa achu. Naari ahooleli a malapelo, yaawo yaamwiica Yesu, hiyaakhoonce yootikhiniha ela. Ohiya yeeyo awo yaaloca: “Nereni? Mulopwana ola [Yesu] onnera ineneryo sintxipale.” (Yohani 11:47) Achu ancipale yaaya omoona Lasaro aaviihiwe muukhwani. Ntoko yookhumelela, ancipale a yaawo yaamuroromela Yesu. Awo yaahoona wi Lasaro aari eneneeryo etokotoko yawii Yesu aarummwe ti Muluku. Eneneeryo eyo yaari yakuru vancipale ophiyerya wi ahooleli a malapelo Ayuuta oonanara murima yaalakana omwiipha Yesu ni Lasaro.—Yohani 11:53; 12:9-11.
13. Mathipelo taani nryaahuno wi nroromele wi Yehova onahaala waaviha achu ookhwa chiryene?
13 Mano ororomela wi achu ookhwa anahaala oviihiwa muukhwani ti watheru? Hooye, ntakhara Yesu oohusiha wi nihiku nikina “atxhu othene ari mmahiyeni” anahaala oviihiwa muukhwani. (Yohani 5:28) Yehova ti Mpatuxa a ikumi soothesene. Mano onahaala okhala woovila weemererya wi owo onnawerya wuuluula opatuxa okumi? Mwevelevelo soothesene siri sooweryeya wa Yehova. Owo onanwerya owuupuwela oosiveliwa ahu akhwile? Erimu yoosareya ni itheneeri soohaalakhanyeya, nyenya Muluku oosuwela nsina na etheneeri eri yoothene! (Isaiya 40:26) Yehova Muluku pahiru tonahaala owuupuwela oosiveliwa ahu akhwile nave owo ookhalano owerya wi aakookiherye okumi.
14, 15. Ntoko yooniheryiwaaya ni Yupu mwa yeeyo olonceiye, Yehova onoona hai vooloca sa waakookiherya okumi achu ookhwa?
14 Yehova onoona hai vooloca sa waaviiha achu ookhwa? Piipiliya onahusiha wi owo onnachuna wi aaviihe achu ookhwa. Yupu mulopwana oororomeleya, aakoha: “Mutxhu okhwile onnakòka akhala? Nto, miyano, kinan’wehererya ilukuluku saphaama.” Yupu aaloca sa owehererya ari mmahiyeni ophiyerya elukuluku yeeyo Muluku aahaaleiye omuupuwela. Owo aaloca wa Yehova: “Nyuwano munamukitxhana nave miyano kinamwakhula; Nyuwano munamwèliwa murima ni miyano, ntakhara mukipatunse.”—Yobi 14:13-15.
15 Nkuupuwelani! Yehova chiryene onnachuna waakookiherya okumi achu ookhwa mweelukuluku awe. Mano tahi yoohakalaliha ohuserya wi Yehova ookhalano yoochuna ela? Mano oviihiwa muukhwani wa muhoolo onahaala weereya hai? Taani onahaala oviihiwa muukhwani, nave woowi?
“OTHENE ARI MMAHIYENI”
16. Achu ookhwa anahaala oviihiwa wi ekhaleke mmakhalelo taani?
16 Miyaha sa Piipiliya vooloca sa ovinya muukhwani sinnanihusiha vancipale ntakhara ovinya muukhwani wa muhoolo. Achu yaawo yaakookiheryiwe okumi yaakookela okhala vamoha ni oosiveliwa aya. Ovinya muukhwani wa muhoolo onahaala okhala woophwanaphwana—nyenya waphaamaxa. Hiihaa ntoko nihusenryaahu Mmwaha 3, yookhwela ya Muluku ti yawii elapo yoothene yavathi ekhale parataiso. Mwawiihiiha achu ookhwa herwa eviihiwa wi ekhale ni okumi mu elapo yoosareya ikhoco, wiiphana, ni ireca. Awo anahaala okhalano ekari ya okhala a wiikhalelaru mmurecele ni makhalelo oohakalaliha mu elapo yeela.
17. Taani anahaala oviihiwa muukhwani?
17 Taani onahaala oviihiwa? Yesu aaloca wi “othene ari mmahiyeni aneraya yiwe nsu nawe, . . . anamukhumamo.” (Yohani 5:28, 29) Moophwanaphwana, Yawupulula 20:13, NN onii: “Nave enia yáveléla alipa-okhwa yawo yári mummo, nave okhwa ni Hade sáveléla alipa-okhwa yawo yári mummo.”(Vareryani Masu Awaaceererya, “Seol ni Hades Tiheeni?”) Mahiye ala aachu oothene anahaala omalihiwa. Oothene yaawo aniichuuwa mummo enarwa ekookela okhala akumi wanaawiili. Murummwa Paulo oriye: “Atxhu othene, aphama ni ònanara murima ananvinya mokhwani.” (Saweriwa T’arummwa 24:15) Mano eyo enataphulela heeni?
18. Taani anaphitaanyeryiwa variyari va “aphama” yaawo anahaala oviihiwa muukhwani, nave ewehereryo ela enoovolowelani mwawiihai?
18 “Aphama” anaphitaanyerya achu ancipale yaawo analociwa Mpiipiliyani yaakhanlewo Yesu ahaakumve orwa veelaponi yavathi. Nyuwo munanwerya wuupuwelela sa Noowa, Aaparahamu, Saara, Moose, Ruthi, Estere, ni akina ancipale. Akina a yaala alopwana ni athiyana a nroromelo annalociwa mu ecima 11 ya Ahepri. Nyenya “aphama” anaphitaanyerya tho arummwa a Muluku yaawo anakhwa mu elukuluku ahu. Nthowa na ewehereryo ya ovinya muukhwani, hiyaano nnanwerya okhala ootaphuwa vooloca sa woova okhwa.—Ahebri 2:15.
19. Mano “ònanara murima” taani, nave ekari taani Yehova onahaaleiye waavaha?
19 Hanka vooloca sa achu oothene yaale ahimurumeenle naari omwiiwelela Yehova nthowa noohimusuwela? Macikhwi aachu “ònanara murima” herwa ecuwaliwa. Awo tho anahaala oviihiwa muukhwani nave enarwa evahiwa elukuluku wi ehuserye vooloca sa Muluku eeparipari wi emurumeele. Moovira wa iyaakha masana khumi, achu ookhwa anahaala oviihiwa muukhwani nave enarwa evahiwa ekari wi emurumeele Yehova vamoha ni achu oororomeleya veelaponi yavathi. Ela enahaala okhala elukuluku yootikhiniha. Ela ti elukuluku yeeyo Piipiliya oniichaneiye Nihiku na Othoriha.b
20. Gehena tiheeni, nave taani onaya weiwo?
20 Apwanne eyo enataphulela wi achu oothene yaakhanlewo nave akhwile enarwa eviihiwa muukhwani? Hooye. Piipiliya oriye wi achu ookhwa akina ari mu “Gehena.” (Luka 12:5, NN) Gehena nsina na nipuro wayeehiwawo ikokhola naakhala ohico wa Yerusalemu akhalai. Miruchu ni ikokhola seeyeliwa weiwo. Miruchu saariheliwa weiwo, sooniwa ni Ayuuta ntoko soohiphwanelela ovithiwa ni ovinya muukhwani. Mwawiihiiha Gehena onasiphela opahuliwa woohimala. Naamwi Yesu ahaalaka okhalano muteko wa waathoriha achu akumi ni ookhwa, Yehova ti Mulipa Oothoriha ookuchula. (Saweriwa T’arummwa 10:42) Owo harwa aaviiha muukhwani achu yaawo onawooneiye okhala oonanara nave ahinachuna ocharuwa.
OVINYA MUUKHWANI WA WIRIMU
21, 22. (a) Mukhalelo taani mukina wa ovinya muukhwani orivovo? (b) Taani ori oopacerya waakhela ovinya muukhwani ntakhara okumi woomunepani?
21 Piipiliya tho onnaloca sa mukhalelo mukina wa ovinya muukhwani, ovinya ntakhara okumi wa wirimu ntoko yoopatuxiwa yoomunepani. Yawooniherya emoha pahiru ya mukhalelo ola wa ovinya muukhwani erempwe Mpiipiliyani, ti wa Yesu Kiristu.
22 Yesu amanle wiiphiwa, Yehova heemerenrye wi Mwanawe oororomeleya apwahiherye okhala mmahiyeni. (Salumu 16:10; Saweriwa T’arummwa 13:34, 35) Muluku aamviiha Yesu muukhwani, nyenya ohiya ntoko muchu. Murummwa Petro oothariha wi Kiristu “òkhwa mmwilini, nto òvinya mokhwani mmunepani.” (1 Pedro 3:18) Ela yaari echu yootikhiniha. Yesu aakhala mukumi wanaawiili ntoko muchu oomunepani aikuru! (Mwaalakhanye 1 Korinto 15:3-6.) Yesu aari oopacerya waakhela mukhalelo ola wa ovinya muukhwani wootikhiniha. (Yohani 3:13) Nyenya owo haahaala okhala oomaliherya.
23, 24. Taani yaawo anapaka makupa a “muhuwo mukhani” wa Yesu, nave ti achu ahai?
23 Asuwelaka wi moohilekela ahaala okookela wirimu, Yesu aaloca wa oomuchara awe oororomeleya wi onaya ‘orehererya mpuro’ wirimu ntakhara yaawo. (Yohani 14:2) Yesu aawiichana yaale anaya wirimu ntoko “muhuwo mukhani” sawe. (Luka 12:32) Achu akavi anaya opaka makupa a nikhuuru nla nikhaani na Akiristu oororomeleya? Mwawiiwanana ni Wupulula 14:1, murummwa Yohani onii: “Kàhonatho Eputxeputxhe [Yesu Kiristu] yemenle va mwako Siau. Ni yeyo yàkhalavo atxhu matxikhwi nsana nimoha ni matxikhwi makhumi masese ni masese [144.000] yarempwe vayutxi nsina na Eputxeputxhe ni na Atithi aya.”
24 Akiristu ala 144.000, ophitaanyerya arummwa ororomeleya a Yesu, anaviihiwa ntakhara okumi wa wirimu. Mano ovinya waya muukhwani oneereya liini? Murummwa Paulo oorepa wi eyo yaaya weereya mu elukuluku ya okooka wa Kiristu. (1 Korinto 15:23) Hiiha ntoko munahaalaanyu ohuserya Mmwaha 9, hiyaano vano nnakhala mu elukuluku yeeyo. Mwawiihiiha oohalela vakhaani a 144.000 yaawo anakhwa mmahiku ahu, mwawaakuveya annaviihiwa muukhwani ntakhara okumi wa wirimu. (1 Korinto 15:51-55) Achu ancipale anawehererya oviihiwa muukhwani muhoolo, wi ekhaleno okumi mu parataiso veelaponi yavathi.
25. Tiheeni enahaala othokororyiwa mu mwaha onacharela?
25 Ahee, Yehova chiryene onahaala omutoloxa mwiicani ahu, okhwa, nave onahaala omala okhala wookhala! (Mwaalakhanye Isaiya 25:8.) Vano nyuwo munanwerya okoha: ‘Ale anahaala oviihiwa muukhwani wi eye wirimu anaya weerawo heeni?’ Awo anahaala opaka makupa a olamulelo wootikiniha wa Omwene wa wirimu. Nnahaala ohuserya vancipale vooloca wa olamulelo yoowo mmwaha onacharela.
[Masu a vathi]
a Saweereya ikina inaphwanyeya mu 1 Mamwene 17:17-24; 2 Mamwene 4:32-37; 13:20, 21; Mateu 28:5-7; Luka 7:11-17; 8:40-56; Saweriwa T’arummwa 9:36-42; ni 20:7-12.
b Miselo sawaacereryeya vooloca sa Nihiku na Othoriha ni mathipelo a othoriha iwo, vareryani Masu Awaaceererya “Nihiku na Othoriha—Tiheeni?”.
PIIPILIYA ONAHUSIHA EHEENI
▪ Saweereya sa ovinya muukhwani sa Piipiliya sinnanivaha ewehereryo yeeparipari.—Yohani 11:39-44.
▪ Yehova ookhalano muunkhela wa waaviiha muukhwani achu wi ekookele okhalano okumi.—Yobi 14:13-15.
▪ Achu oothene ari mmahiyeni anahaala oviihiwa muukhwani.—Yohani 5:28, 29.
[Eruku va epaaxina 69]
Eliya aamviiha muukhwani mwaana a naamukhwele.—1 Mamwene 17:17-24
[Eruku va epaaxina 69]
Murummwa Petro aamviiha muukhwani Mukiristu iichaniwa Torika.—Saweriwa T’arummwa 9:36-42
[Eruku va epaaxina 69]
Oviihiwa muukhwani wa Lazaro waaruuha ohakalala otokotoko.—Yohani 11:38-44
[Eruku va epaaxina 75]
Parataiso, achu ookhwa anahaala oviihiwa nave enarwa ekhala vamoha ni oosiveliwa aya