Muteke Wanaawiili Onthamwene Anyu ni Yehova

IYAAKHA soothene, ipucepuche soochuneya sinnakookiheriwa mmuloko Weekristu. Nkaanyiheryani “ohakalala wirimu” wa mmoha a yaala anakooka! (Luka 15:7, 10) Waakhanle wi mookookiheryiwa mmulokoni, muroromele wi Yesu, ankeelo, ni Yehova ari oohakalala vancipale owoonaani mukookenle mmulokoni wanaawiili. Nyenya, vaavaa munatekaanyu wanaawiili onthamwene anyu ni Yehova, munahaala ohoolela makacamiho. Taavi makina a yaawo, nave tiheeni enahaala wookhaviheryaani?

MAKACAMIHO TAANI?

Emanle okookela mmulokoni, ancipale annawaniha ni miyoonelo soohiphwanelela. Akhweya munamwiisoona ntoko Mwene Tavite. Naamwi akhurumuweliwe soocheka sawe, owo aaloca: “Soonanara saka sookaakeelela.” (Sal. 40:12; 65:3) Vaavaa muchu onakookeleiye wa Yehova, akina annatitelela owaniha ni miyoonelo sa wiiphwanyerya mathowa ni wuuliwa muru mu iyaakha sincipale. Isabelle, aahiikariwa mmulokoni mu iyaakha 20.a Owo ooloca: “Wa miyaano waari woovila weemererya wi Yehova aanwerya okilevelela.” Wakhala wi mookhulumuwa, onthamwene anyu ni Yehova onanwerya oceecheya wanaawiili. (Masi. 24:10) Muheemererye wi ela yeereye ni nyuwaano.

Akina anoona wi hewerya opaka yeeyo enachuneya wi ereherye onthamwene aya ni Yehova. Amanle okookiheryiwa mmulokoni, Antoine ooloca: “Waakhala wi miyaano kaahicuwala moomalela mukhalelo wa okhala ntoko Mukristu.” Nthowa na wiisoona mmukhalelo yoola, akina haniiveleela moomalela mmiteko soomunepani.

Wi niphwanaphwanihe, mwaanyiherye wi epahu yoonanariha empa emoha. Vaavaa mwaneene a empa onooneiye nikacamiho ohoolenleiye, owo onnakhala awuukhuwa wuupuwelaru pahi muteko onahaala ochuneya wi ateke empa eyo wanaawiili. Emohamoha tho enneereya ni nyuwaano vaavaa munapakaanyu yoocheka etokotoko yeeyo enananariha vancipale onthamwene anyu ni Yehova. Onahaala ochuneya wiilipixerya wi murehererye onthamwene anyu ni Yehova. Nyenya nyuwaano hamuni nwerye weerano yeela mukhatiinyu.

Yehova onnaniwopa: “Hankooni, nivarerye vamoha mwaha yoola.” (Isa. 1:18) Nyuwaano muhiilipixerya vancipale wi ‘murehererye mwaha’ ni Yehova nave owo onnoosivelaani nthowa na weerano yeela. Muupuwele: Yehova onanwerya opharihela yootakiheryaanyu wi aakhule waakaaha wa Satana!—Masi. 27:11.

Mu weerano yeela, nyuwaano moomwaacamela Yehova nave owo oolaiherya wi onahaala owaacamelaani tho. (Tiy. 4:8) Nyenya muhihakalale ni yeeyo pahiru akina analocaaya wi annahakalala owoonaani wi mookookela mmulokoni. Nyuwaano munaphwanela olipiha onthamwene anyu wa Tiithi ni nthamwene anyu, Yehova. Muni mweereno hai yeela?

MUTIKITHERYE SOOLAKELELA SEIHO MUNEERAANYU NWERYE WAAKHWANIHERYA

Mweererye otikitherya soolakelela seiho muneeraanyu nwerye waakhwaniherya. Muupuwele wi mathipelo a nroromelo nanyu aatitelela okhala oolipa—ela tiwi, nyuwaano nivano munnuupuwela mahusiheryo yaawo ari mathipelo a Mpiipiliyani ntakhara Yehova ni soolaiherya sawe soomwaahiyu. Nyenya vano nyuwaano munaphwanela okhalano yookhovelela yaphaama wanaawiili, ntoko yootakiherya, olaleerya moohihiyererya, ophiyaka mmithukumano, ni omalihaka elukuluku vamoha ni anna. Moone soolakelela ikina munaphwanelaanyu otikitherya.

Ilukuluku soothene nvekeleke wa Yehova. Tiithi anyu oosuwela wi miyoonelo sa wiiphwanyerya mathowa inanwerya oweerihaani nyuwo woona okhala woovila ovekela. (Aro. 8:26) Nyenya “mutitelele ovekela,” mmuleele Yehova wi munnachuna okhala nthamwene awe. (Aro. 12:12) Andrej onnuupuwela: “Miyaano kaaniisoona okhalano nthowa ni awuuliheya muru. Nyenya elukuluku yoothene kaavekelaaka, miyoonelo seiha saanavukuwa. Miyaano kaanakhalano murecele.” Waakhanle wi hamunasuwela echu ya ovekela, mmuhuserye Salumu 51 ni 65 yoowo onooniherya mavekelo a Mwene Tavite yaawo aapankeiye amanle ocharuwa.

Mmuhuserye Piipiliya moohihiyererya. Eyo enahaala olipiha nroromelo nanyu ni waaceererya osivela wanyu ni Yehova. (Sal. 19:7-11) Filipi onnathariha: “Nthowa na ohikhalano yookhovelela yaphaama ya omuhuserya Piipiliya yaakeeriha okhala ooceecheya omunepani ni omuhiciha Yehova. Miyaano nkaachuna opaka yoohesa emohamoha wanaawiili, mwawiihiiha kaalakelela opaka yoohuserya ya muchu mukhateiye ntoko naakiho naka.” Nyuwo tho munanwerya weerano emohamoha. Waakhanle wi hamunasuwela phaama iponto munachunaanyu ophitaanyerya mu yoohuserya anyu ya muchu mukhateiye, mumveke nikhaviheryo nthamwene anyu awiichwelavo omunepani.

Muteke wanaawiili onthamwene anyu ni anna ni arokora. Akina yaawo anakookela mmulokoni annakhala awoova yuupuwelaka wi anna anahaala onyeenyeya ni yaawo. Larissa onneemererya: “Miyaano kaaniisoona okhala awuuliheya muru. Kaahiisoona wi kaanuuliha muru muloko. Miyoonelo seiha saahimaliha elukuluku yincipale.” Muroromele wi atokweene a mmulokoni ni Akristu awiichwelavo annachuna wookhaviheryaani oteka wanaawiili onthamwene anyu ni Yehova. (Moone ekaaxa “Tiheeni Atokweene Anaphwanelaaya Weera?”) Awo ari oohakalala owoonaani mukookenle wa Yehova, nave anachuna wi mukhale oohakalala!—Masi. 17:17.

Muni nwerye hai waacamela muloko? Vamoha ni anna ni arokora, mphiyeke mmithukumanoni soothene, nave mpakeke makupa mmuteko woolaleerya. Ela eni yookhaviheryeeni hai? Felix ooloca: “Muloko waatepa ohakalala okookela waka mmulokoni. Kaahoona wi anna yaanatepa okisivela, oothene yaakikhaviherya wiisoona wi kaanapaka makupa wanaawiili, wiisoona wi kaahileveleliwa ni otitelela omurumeela Yehova.”—Moone ekaaxa “Tiheeni Munaphwanelaanyu Weera?”

MUHIVELAVELE!

Mu owaniha wanyu wi muteke onthamwene anyu ni Yehova, munaphwanela ororomela wi Satana onahaala otitelela oruuha “ipahu” mu iphiro sanyu. Owo onachuna wooceecheihani. (Luka 4:13) Mwawiihiiha munaphwanela wiirehererya ni olipiha nroromelo nanyu hiihaano.

Alocaka sa ipucepuche sawe, Yehova oolaiherya: “Soorimeela, nkaamwaavya; soohuwela, nkaamukookiha; soophoreya, nkaammaka makhwaca aya; sooceecheya, nkaamulipiha.” (Ezek. 34:16) Yehova ohaakhaviherya alapeli awe ancipale orehererya makupa aya oomunepani. Munaphwanela ororomela wi owo onnachuna wookhaviheryaani wi mutitelele oteka wanaawiili ni olipiha onthamwene anyu ni yoowo.

Tiheeni Atokweene Anaphwanelaaya Weera?

Nikhaviheryo na atokweene ti noochuneya wi alaleeryi yaawo ekookiheryiwe mmulokoni ewerye oteka wanaawiili onthamwene aya ni Yehova. Moone yeeyo atokweene anaphwanelaaya opaka wa yaawo.

Mwaalipihe yaawo. Murummwa Paulo aanasuwela wi namacheka yoowo acharunwe onanwerya oweryiwa ni “othanana woopwahasha.” (2 Kor. 2:7) Ti yawooneya wi owo onanwerya wiisoona okhala awuuliheya muru ni ooceecheya. Mwawiihiiha, Paulo aalopola muloko: “Mukhale munii mmukhurumuwele yoowo ni omulipiha.” Yaale akookiheryiwe mmulokoni annachuna nikhaviheryo wi eroromele wi annasiveliwa ni Yehova vamoha ni annaya a munroromeloni. Wi awo ehiceecheye ti yaphaama wa atokweene ilukuluku soothene waathamalela yaawo ni waavaha nikhaviheryo noophara muteko.

Mvekele ni yaawo. “Nivekelo na awookololowa murima ninnawerya sincipale.” (Tiy. 5:16) Larissa, yoowo oromoliwe wuupaceryani, ooloca: “Kaachekula ni atokweene a mmulokoni vooloca sa minikwa ni woova waka. Naavekela vamoha ntakhara miyaano. Kaahoona wi atokweene hiyaanyeenyen’ye ni miyaano. Awo yaanachuna okikhaviherya wi kirehererye onthamwene aka ni Yehova.” Theo onnathariha: “Mavekelo a atokweene a mmulokoni yaakeeriha ororomela wi Yehova chiryene onnakisivela nave onnoona yeeyo eri yaphaama wa miyo, ohiya pahiru soohesa saka.”

Mukhale asinthamwene aya. Yaawo akookiheryiwe mmulokoni anaphwanela opaka onthamwene mmulokoni. Mutokweene mmoha awiichaniwa Justin ooloca: “Mpharihele ekari eri yoothene wi mwaawope olaleerya vamoha ni nyuwaano, nave echu eri yoochuneyaxa, mwaaxekurya yaawo moohihiyererya. Opaka onthamwene ni yaawo echu yoochuneyaxa!” Mutokweene mukina, oniichaniwa Henry, ooloca: “Vaavaa anna akina mmulokoni anoonaaya wi atokweene annapaka onthamwene ni yaawo ekookiheryiwe mmulokoni, anahaala ochuna waatakiherya.”

Mwaakhaviherye awo ohuserya. Nthamwene yoowo awiichwelavo onanwerya omukhaviherya yoowo okookiheryiwe mmulokoni okhalano yookhovelela yaphaama ya ohuserya. Mutokweene mmoha awiichaniwa Darko ooloca: “Kinnasiveliwa okawana mihakhu soomunepani seiho kiphwannyaaka mu yoohuserya aka ya muchu mukhateiye nave kinnasiveliwa owooniha mukhalelo kinasiveliwaakano ni yoohuserya ya Piipiliya. Nave tho kinnalakana ohuserya vamoha mwaha woolipiha ni yoole okookiheryiwe mmulokoni.” Mutokweene mukina, awiichaniwa Clayton, ooloca: “Miyaano kinnaaceenyerya ophwanya saweereya sa Mpiipiliyani sa achu yaawo ahoolenle nikacamiho noolikana ni nawaya ni woona nihusiheryo taani anaphwanelaaya ohuserya.”

Mukhale mukukhuli aphaama. Yaawo akookiheryiwe mmulokoni aawoona atokweene yeerakano ichu ntoko athoriha. Vano, opwaha khalai, awo anaphwanela owoonaka ntoko akukhula. (Yer. 23:4) Mukhale awaakuva owiriyana nave mukhale ooreheryeya othamalela. Ilukuluku soothene muchekuleke ni yaawo. Moone yeeyo mutokweene awiichaniwa Marcus oneereiye vaavaa onapakeiye muteko wa okukhula: “Hiyaano ninnathokororya miruku sa Mpiipiliyani nave ninnaathamalela yaawo. Nave tho ninnaalipiha wi ninniirumiha ntakhara wiilipixerya apankaaya wi emukookele Yehova nave wi owo onniirumiha ni yaawo. Omakuchuwelo wa oxekurya woothene ninnaaleela nihiku taani nnahaalaahu okooka.”

a Masina makina mmwaha yoola aatorokiwa.