Naamwi Kaari Awuuliwa Muru, Kaahikhala Misiyonaariya

Kiyariwe mu 1951, o Viena, Austriya. Kinnuupuwela wi miyaano kaari mwaana awuuliwa muru. Emusi aka yaari a Katolika nave miyaano kaanamweemererya Muluku nave tho kaanavekela wiiliwiili. Vaavaa kaaryaakano iyaakha 9, apapa aka yaahipacerya omuhuserya Piipiliya ni Anamoona a Yehova, voocharela tho amama yaahipacerya ophwanyeyavo va yoohuserya eyo.

Mwawaakuveya, naahipacerya opaka makupa a muloko Döbling, o Viena. Miyaano ni amusi aka naanapaka ichu sincipale vamoha. Naanamwaalakhanya Piipiliya, naanoonela mithukumano nave naanalapa ntoko awiiveleela mmithukumano sa ekulucu. Opacerya kiri nahano, apapa aka yaanakikhaviherya okhalano onthamwene woolipa ni Yehova. Awo ilukuluku soothene yaanavekela wi miyaano ni mukhwaaka nikhale mapiyoneera. Nyenya mu elukuluku yeele, eyo hiyaari yoolakelela aka.

ECHU EKIKHAVIHENRYE WI KIKHALE PIYONEERA

Kirino iyaakha 14, mu 1965, kaahipatisiwa. Nyenya wa miyaano, olaleerya naari nikacamiho woona wi koona okhala woovila oloca ni achu yaawo kihaasuwenlaaka. Nave tho kaanawaniha ni miyoonelo sa ohikhala echu enevo, nave kaachuna wi asinthamwene oothene ekoonelekemo. Mwawiihiiha, elukuluku vakhaani ohoolo waya kimanle opatisiwa, kaahipacerya omaliha elukuluku ni asinthamwene yaawo ehinamurumeela Yehova. Tiwi kaanakhalano yawuupuxerya ya murima yoohokola, woona wi kaanasuwela wi hiyaari yaphaama omaliha elukuluku yincipale ni achu yaawo ahinamusivela Yehova. Nyenya miyaano nkaarino ikuru sa otoroka. Tiheeni yaakikhavihenrye?

Variyari va elukuluku yeeyo, murokora mmoha a iyaakha 16, awiichaniwa Dorothée aahithaamela muloko ahu. Miyaano kaahitikhiniheya ni mvai awe mmuteko woolaleerya wa empa ni empa. Miyaano kaari awunnuwelavo ompwaha owo; nyenya kaahanle vakhaani ohiya olaleerya. Kaahuupuwela: ‘Asitiithi aka Akristu, nyenya Dorothée anamurumeela Yehova mukhateiye. Owo onakhala ni amama awe yaawo eri awiiceliwa naamwi hiiha owo ilukuluku soothene onnaya mmuteko woolaleerya!’ Yootakiherya awe yaahikiceenyerya opaka sincipale ntakhara Yehova. Nave naahikhala asinthamwene mmuteko woolaleerya. Voocharela, naahirumeela vamoha ntoko mapiyoneera ookilaatheya. Voopacerya, naahirumeela ntoko mapiyoneera awiichuuwela, olelo esuweliwe wi muteko wa opiyoneero wookhaviherya. Osivela wa Dorothée ntakhara muteko woolaleerya waari echu yoovaheryana. Aari yoowo aakikhavihenrye okhalano yoohuserya aka ya Piipiliya yoopacerya. Moovira wa elukuluku, waanakhala wookhweya ovaanela ni achu mu empa ni empa, mmuxeweni ni mapuro makina.

Mu eyaakha aka yoopacerya ya opiyoneera wookilaatheya, munna mmoha o Austriya awiichaniwa Heinz aahithaamela muloko ahu. Owo aahusenrye eparipari o Kanata vaavaa aamuxekuryeiye munna awe yoowo aari Namoona a Yehova. Voocharela, aahithanliwa wi arumeele ntoko piyoneero avameekhaaya mmuloko ahu wo Vienna. Vaavaa naasuwelannaahu, miyaano kaahipacerya omuchuna. Nyenya owo aachuna okhala misiyonaariyu, nave miyaano nkaarino yoolakelela ya okhala misiyonaariya. Mwawiihiiha, woopaceryani kaanavitha miyoonelo saka wa yoowo. Nyenya ovinrevo elukuluku, hiyaano naahaakamelana, ohoolo waya naahithelana nave naahititelela orumeela vamoha ntoko mapiyoneero o Austriya.

ECHU EKIKHAVIHENRYE OKHALANO YOOLAKELELA YA OKHALA MISSIYONAARIYA

Heinz wiiliwiili aanaloca wi aachuna okhala misiyonaariyu. Awo hayintonko okikhinyererya wi kikhaleno yoolakelela emohamoha, nyenya awo yaakipakela makoho yaawo yaakikhaviherya wuupuwelela vooloca sa yeeyo. Ntoko yootakiherya: “Woona wi hinaano anamwane, Apwanne nnanwerya opaka sincipale ntakhara Yehova?” Wa nthowa na wuuliwa muru, kaanoova okhala misiyonaariya. Eparipari wi kaarumeela ntoko piyoneera, tiwi yoolakelela ya okhala misiyonaariya koona okhala yoovilaxa wa miyaano. Nyenya Heinz aari oopixa murima ni miyaano nave aahititelela okikhaviheryaka wuupuwelela vooloca sa yeeyo. Owo aahikiceenyerya otikitheryeya ohiya mu woova waka, nyenya mmukhalelo kaahaalaaka owerya waakhaviherya achu. Ekano yeela yaari yaphaamaxa wa miyaano.

Vakhaani vakhaani, kaahipacerya okhalano nchuno na okhala misiyonaariya. Mwawiihiiha naahirepela epetisau ntakhara Exikola ya Kiliyati. Nyenya munna yoowo aarumeela mu nikhuuru na efiliyali aahiloca wi yaamukhala phaama kaakhwanihaka oloca phaama enkelesi. Miyaano kaahiviriha iyaakha raru kiilipixeryaka weerano yeeyo. Voocharela, mu yootutuxa ahu, naahaakhela nwopelo wi nakhaviherye muloko wa elocelo servo-croata o Salzpurko, Austriya. Elocelo yeela yaari yoovila, nyenya naahiwerya okhalano soohuserya sincipale. Nacokochela vamoha, noorumeela iyaakha khumi napiili, ophitaanyeryavo eyaakha emoha mmuteko wa weeceeca.

Mu 1979, naahinwopwa wi niye o Pulkariya ntoko wi naakuminhe ifeeriya. Muteko woolaleerya weiwe wanawatiihiwa. Mwawiihiiha, hiyaano hinaalaleerya mu ifeeriya seiya. Nyenya naahihusihiwa mukhalelo oveleela soolaleeryiwa ikhaani khaani wa arokora athanu yaawo yaakhala epooma yo Sofiya, otokweene wa elapo yeele. Miyaano kaari awoovaxa, nyenya Yehova aahikikhaviherya mu etesikinasau yeele. Arokora yaale weiwe yaanakhala va yawoopiha ya owaleliwa naamwi hiiha yaari oolipa murima ni oohakalala. Woona yeeyo yaahikivaha ororomela wi kipake owetha waka mu etesikinasau vyakala ya mmarehereryo a Yehova.

Elukuluku vakhaani ohoolo waya, naahirepela epetisau wanaawiili ntakhara Exikola ya Kiliyati, nave ekwaha ela naahinwompwa. Hiyaano nuupuwela wi exikola eyo enaya okhala mu elocelo ya enkelesi o Estatu Unitu. Mu Novempuru a 1981 yaahipacerya Exikola ya Kiliyati o efiliyale yo Alemanya. Mwawiihiiha, Exikola yaari mu elocelo yo Alemanya, yeeyo yeerinhe okhala wookhweya wa miyaano. Nyenya teevi yaahaala okhala etesikinasau?

NRUMEELAKA MU ELAPO YEEYO YAASAREN’YE NI IKHOCO

Naahirumihiwa wi narumeele o Keniya! Nyenya efiliyale yaahinikoha waakhanle wi naanwerya othaamela mu elapo yawaacamela o Ukanta. Iyaakha khumi sivirale, epooma yo Ukanta yaahimwaryiwa ni okuxiwa ni anakhoco yaawo yaahooleliwa ni mutokweene iichaniwa Idi Amin. Mu eyaakha yoocharela, ohoolela wawe waahitannyerya okhwa wa mamilyawu aachu ni waahiruuhela ohooxeya wa mamilyawu aachu akina. Voocharela, mu 1979 olamulelo wo Ukanta waahihooxeya tho ni omwareya okina. Nkinawerya othariha mukhalelo kaaryaaka awoova wa nthowa na othaamela elapo yeeyo yaasaren’ye ikhoco. Nyenya Exikola ya Kiliyatiyaahinirehererya wi nimuroromele Yehova. Mwawiihiiha, naaheemererya etesikinasau yeela.

Ekumi o Ukanta yaari yoovila. Mu Anuário a 2010 Heinz oothariha mukhalelo wa elapo yeele ariki: “Miteko mincipale, ntoko itankhi sa maahi ni reeti a komunikasawu, saahinanarihiwa . . . Wiiphiwa ni wiiyeryiwa waari wawunlaana xaxaxa ohiyu . . . Muchu ari oothene aakhala vaate vawe, awehereryaka, nave avekelaka wiiliwiili wi ohiyu ovire phaama ehiphin’ye aleco oohiichaniwa.” Moohipwacha makacamiho yaala, anna o Ukanta yaahititelela omurumeela Yehova moohakalala!

Mu 1982, naahiphiya o Kampala epooma etokweene yo Ukanta. Mu miyeeri soopacerya mithanu, naakhala vaate va Sam ni Christina Waiswa vamoha ni anaawe athanu ni achu akina axexe a mweemusini. Wiiliwiili awo pahiru yaapaka yoolya ekwaha emoha va nihikuni, naamwiihiiha yaari ooreheryeya okawana ni hiyaano yavakhaani yeeyo yaakhalaayano. Elukuluku nimalinhaahu ni emusi yeela yoonihusiha sincipale inikhavihenrye mu etesikinasau ahu. Ntoko yootakiherya, naahihuserya opharihela iliitru vakhaani sa maahi wi nirape ni opharihela yaawo olatrina. Mu 1983, Naahiphwanya empa mpairu yookhapeleleya o Kampala nave naahithaamela weiwo.

Hiyaano naanasiveliwa olaleerya o Kampala. Miyaano kinnuupuwela wi, pahiru mu mweeri mmoha naanakawa soolaleeryiwa opwaha 4.000! Yaphaama tiwi achu yaanaakhulela phaama. Awo yaanamucicimiha Muluku nave yaanachuna ovaanela vooloca sa Piipiliya. Mmoha ti mmoha a hiyaano aaneeciha soohuserya sa Piipiliya 10 ophiyerya 15. Nave hiyaano noohuserya sincipale orweela wa oohuserya ahu a Piipiliya. Ntoko yootakiherya, naanatikhiniheya vancipale ni mukhalelo aya waphaama. Isumana soothene yeeca ni meco yaayaaka mmithukumano, nyenya hiyiikhupanyerya nave ilukuluku soothene yaakhala oohakalala.

Mu 1985 ni 1986, waaheereya owanawana okina tho wa anakhoco o Ukanta Ikwaha piili. yaari yawunlaana owoona anamwane yaatenxe akapuchi. Awo yaanaphariheliwa ntoko atoropa nave tho yaanalapa mu ikontorole, elakelelaka taani aahaala ovira. Naayaaka mmuteko woolaleerya naanamveka Yehova wi anikhaviherye okhalano murima woomaleelaya, okhala amiruku ni osepa sawoopiha. Nave Yehova aanaakhula mavekelo ahu. Naanamphwanya muchu ooniherya nchuno ophiyerya wi nihinuupuwela woova wahu.

Naanasiveliwa waalaleerya anamarwa yaawo yaakhala o Ukanta. Ntoko yootakiherya naaneeciha yoohuserya ni totore mmoha iichaniwa Murat Ibatullin ni amwaariye Dilbar. Awo yaari o Tartaristau o Rusiya. Mutheli yoola oopatisiwa nave onnamurumeela Yehova moororomeleya ophiyerya olelo. Kaahikhalano tho ekari ya omusuwela muthiyana mmoha oniichaniwa Tetyana Vileyska, onakhala o Ukraniya yoowo aarino muupuwelo wa wiisiipha. Amanle opatisiwa Tetyana aahikookela o Ukraniya nave ohoolo waya aahikhaviherya otaphulela soolaleeriwa sahu mu elocelo yo Ukraniya.a

ETESIKINASAU EVYAANI

Mu 1991 vaavaa naaryaahu mu ifeeriya o Austriya efiliyale ya elapo yeeyo yaahiloca ni hiyaano nave enivaha murici muvyaani orumeela o Pulkariya. Emanle ekhoco o Europa muteko ahu waaheemereryiwa o Pulkariya. Ntoko kiloncaaka, naari mu elapo yeele vaavaa muteko ahu waakhwatihiwaaya nave naahikuxa moovitheya soolaleeriwa ikina. Nyenya vano naahirumiheliwa weiwo ni yoolakelela ya olaleerya.

Anna yaahinileela wi niye Opulkariya. Mwawiihiiha hinaarino ekari ya okookela o Ukanta, wi nakuxe ichu sahu ni waalaanya asinthamwene. Ohiya yeeyo, naaya o Peteli yo Alemanya, nikuxa ekaaro nnapwaha niyaaka o Pulkariya. Naahithanliwa wi nikhaviherye nikhuuru na alaleeryi 20 o Sofiya.

O Pulkariya naahihoolela makacamiho mancipale. Yoopacerya hinaasuwenle elocelo ohiya yeeyoru, saarivo pahiru soolaleeriwa piili mu elocelo ya o Pulkariya: A Verdade Que Conduz à Vida Eterna ni Liivuru Aka A Myaha Sa Piipiliya. Waanakhala tho woovila opaceriha yoohuserya ya Piipiliya. Moohipwacha makacamiho yaala nikhuuru nahu nikhaani naanatitelela olaleerya mwa mvai. Achu a ekerexa ya Ortotokisa hiyaasiveliwe, nave tivaavaa nto yaakhumelenlaayavo makacamiho.

Mu 1994 muteko wa Anamoona a Yehova waahikhwatiihiwa nave achu yuupuwela wi naachu oomwareya. Anna akina yaahiwaleliwa. Maxornalista yaanamwaramwaxa sawootha elocaka wi Anamoona a Yehova ennaahiya anamwane aya ekhwaaka nave ennaaceenyerya achu akina a mmalapelo aya wiisiipha. Mu elukuluku yeele waanakhala woovila olaleerya. Achu ancipale yaari oowali yaananikhuwelela owiichana mapulisiya naari ophiyerya tho yaananivorya ichu. Oruuha soolaleeriwa mu ilapo ikina hiwaawereyavo. Nave tho waari woovila waalukaara nipuro ntakhara mithukumano. Mu elukuluku ekina pulisiya aaphiya aakanyerya ni ohiiha muthukumano ahu wa muceche. Waari woohiyana ni o Ukanta achu o Ukanta yaari oonthamwene nave yaanachua omuhuserya Piipiliya. Mwa yeeyo hinaakhovelenle okhalihiwa moonanara ni mwawiiciwa vancipale. Tiheeni yaanikhavihenrye ovilela ni mukhalelo yoola?

Oviriha elukuluku yincipale ni anna vamoha ni arokora waahinikhaviherya vancipale. Awo yaanasivela eparipari nave yaanathamelela okhala vamoha ni yaawo weiwo. Hiyaano naari awiiwanana vancipale nave naanakhapelelana mukina ni mukhwaawe. Eyo yoonihusiha wi wakhala wi ninnaasivela achu nnahaala okhala oohakalala mu etesikinasau vyakala.

Ivinrevo iyaakha vakhaani echu saahitorokeya. Mu 1998, muteko ahu waaheemereriwa wanaawiili nave soolaleeriwa sincipale saahikhalawo mu elocelo ya Opulkariya. Mu 2004 ipa ivyaani sa ifiliyaale saahiveleeliwa. Olelo o Pulkariya sookhalawo miloko sawaakhwana 57 ni alaleeryi 2.953, mu eyaakha evirale ya 2024 achu awaakhwana 6.475 yaahiphiya va yawuupuxerya. Kaawuupuwelaka wi mu elukuluku yakhai pahiru yaariwo arokora athanu o Sofiya nave vano sookhalawo miloko mithanu naxexe, nohoona wi chiryeene ‘mukhaani aahikhala ncikhwi.’—Yes. 60:​22, TNM.

NIHOOLELAKA MAKACAMIHO AHU

Variyari va okumi aka kaahikalano makacamiho mancipale a okumi. Mu ikwaha sincipale mametiku yaahoona wi kookhalano ereca ya wiipa. Ekwaha ekina yaahooniwa ereca yawiipa mmuruni mwaka nave waanachuneya wooperaariwa. Voocharela kaahiya o Intiya weiwo kaamalinhaaka iwora 12 kipakiwaka operasau makupa yaawo yaawiipale. Naahikhala o Peteli ya o Intiya ophiyerya kipenunwe nave naahikookela mu etesikinasau ahu o Pulkariya.

Mu elukuluku ene yeele, Heinz aahikhalano ereca yawiichaniwa Huntington awo yaahikhalano makacamiho a weeca oloca ni wiicikinya. Vaavaa ereca yaatepaaya awo pahiru yaachuna nikhaviheryo naka. Ikwaha ikina kaaniisoona okhalano murici mutokweene nave kaanakhala awoova ohiwerya otitelela waakhapelela yaawo. Nyenya mmiravo mmoha awiichaniwa Bobi ikwaha sincipale aanamukuxa Heinz wi yalaleerye. Heinz haawerya oloca phaama naari ocikinya miwono ni meco. Naamwiihiiha Bobi huuliwa muru olapa vamoha ni yoowo mmuteko wooleleerya. Ilukuluku soothene kaamuchunaaka muchu wi akikhaviherye ni Heinz, kaanasuwela wi Bobi aahaala okikhaviherya. Miyaano ni Heinz naahilakelela ohikhalano anamwane mu elukuluku yeela nyenya Bobi aari mwaana yoowo Yehova aanivanheiye mu elukuluku yeeyo naachunaahu!—Mar. 10:​29, 30.

Heinz tho aahihoolela ereca ya kanser. Moothananiha aiyaka oosiveliwa ekhwile mu 2015. Okhwa waya waahikithananiha vancipale. Waari woovila weemererya wi awo haayari tho vamoha ni miyaano. Nyenya mmuupuweloni mwaka awo yaari akumi! (Luka 20:38) Variyari va nihiku kinnuupuwela masu aya ooreera ni ikano saphaama awo yaakivahaaya. Kinnathamalela vancipale iyaakha nimalinhaahu vamoha nimurumeelaka Yehova.

KINNATHAMALELA NTHOWA NA YEHOVA OKIKHAVIHERYA ILUKULUKU SOOTHENE

Makacamiho oothene kihoolenlaaka Yehova aanakivaha ikuru wi kivilele. Owo tho ookikhaviherya ovootha wuuliwa muru nave kikhala misiyonariya awaasivela achu. (2 Tim. 1:7) Nnikhaviheryo na Yehova miyaano ni murokoraka aka nri mmuteko wa elukuluku yoothene. Owo ni aiyawe enarumeela mu ekulucu ya elocelo eniichaniwa sérvia o Europa. Mavekelo apapa aka yaapankaaya mu iyaakha sincipale muculi ahaakhuliwa!

Omuhuserya Pipiiliya onnakikhaviherya okhalano murecele. Mmikhalelo soovila koohuserya ovekela “ vancipale” hiiha ntoko Yesu eenreiye. (Luka 22:44) Osivela ni oreera murima wa anna ni arokora a muloko aka o Sofiya eri maakhulo a mavekelo aka. Awo ilukuluku soothene ennakiwopa wi nipake echu ni yaawo nave ennakooniherya wi ennakisivela. Eyo ennakihakalaliha vancipale.

Onnakisivela vancipale wuupuwelela sa ovinya mookhaani. Ikwaha ikina kinnaanyiherya elapo evyaani: asitiithi aka yeemenle ohoolo wa empa ahu ni mukhalelo aya yaaraayano erikimuthelanaru, murokora aka arehereryaka yoolya, Heinz eemenle ni kavalo awe. Waanyiherya seiho sinnakirakameliha muupuwelo wooheseya nave murima aka onnasareya ni omuthamalela Yehova.

Vaavaa kinuupuwelaaka soothene kihoolenlaaka ni yeeyo Yehova onaroromeliheiye omwaahiyu, kinniisoona ntoko Tavite yoowo orempe mu Salmu 27:​13, 14 wi: “Ti woowi kaahaalaaka okhalawo kahaarino nroromelo Wi koone oreera murima wa Yehova mu elapo ya akumi? Onweherye Yehova; Okhale akuru ni oolipa murima. Aa, onweherye Yehova.”