Enero

Jesús “okitak on siuakaualtsintli” niman sakin “okiknelij” (Luc. 7:13). San ika, xsan okimachili ika okikneli, yej okiteititi ika okikneli. Kanaj ika yemanki tlajtojli okijli: “Maka xchoka”. San ika, xsan iuan otlajto, yejua okiyolitili ikonetsin niman “okimaktilij” (Luc. 7:​14, 15). ¿Tlenon techmachtia yejuin milagro tlen Jesús okichiuj? Techmachtia kenon uelis tikteititiskej ika tikimikneliaj akin nomijkatiaj. Ijkon ken Jesús, tla tikitaj tlenon panoua toyeualiyan, kema uelis tikteititiskej ika tikimikneliaj akin nomijkatiaj. Sakin, noijki uelis tikteititiskej ika titeikneliaj tla tikijtouaj niman tikchiuaj itlaj tlen makinpaleui niman makinyolseui akin noyolkokouaj (Prov. 17:17; 2 Cor. 1:​3, 4; 1 Ped. 3:8). Tla tikchiua itlaj inpampa niman tla tikimijlia maski san se ome tlajtojli, uelis melak titepaleuis. w23.04 5, 6 párrs. 13-15

Maski Jesús kimati ika iamigo Lázaro yonomikili, yejua ok nokaua ome tonajli kampa nemiya niman sakin yauj Betania. Ijkuak Jesús ajsi Betania, Lázaro ikuikaya naui tonajli ika omik. Jesús xnimantsin oajsik pampa kinekiya kichiuas itlaj tlen melak kinyolpaktiskia iamigos niman tlen melak kiueyiteneuaskia toTajtsin (Juan 11:​6, 11, 17). Tlen Jesús okichiuj techmachtia tlen noneki tikchiuaskej imiuan toamigos. Ijkuak María niman Marta oontlatitlankej makijlitij Jesús tlen panotoya, xokitlajtlanilijkej makimitati. San okijlikej ika iamigo Lázaro yopeujka kualo (Juan 11:3). Ijkuak Lázaro omik, Jesús ueliskia kiyolitiskia desde kampa nemiya. San ika, okinek yas Betania niman ijkon komintaskia María niman Marta pampa kuajli imiuan nouikaya. ¿Tejua tikpiya se moamigo akin sa kinektika mitspaleuis maski xtiktlajtlanilia? Tla kema, kuakon kuajli tikmatstika ika yejua mitspaleuis ijkuak onias ajmantli (Prov. 17:17). Tla tikchiuaj ken Jesús, tiyeskej ken yejon amigo. w23.04 10 párrs. 10, 11

Ijkuak itlaj tikixnamiktokej, uelis tiknemiliskej ika Jehová xkeman kikuepas tlaltikpaktli se xochitlalpan. ¿Yejon kijtosneki ika xchikaujtok totlaneltok? Ka. Matikonteneuakan yejuin. Ijkuak melak youejkauj kiyaujtika, kanaj uelis tiknemiliskej ika xok kisas tonaltsintli. San ika, tonaltsintli nochipa kisa. Noijki ijkon, ijkuak melak titajmanaj, uelis tikmachiliskej ika Jehová xkeman kikuepas tlaltikpaktli se xochitlalpan. San ika, tla chikaujtok totlaneltok, kuajli tikmatstoskej ika Jehová kichiuas tlen yokijto (Sal. 94:​3, 14, 15; Heb. 6:​17-19). Tla chikauak tikpiyaj totlaneltok itech tlen Jehová kichiuas ika tlayekapan, nochipa chikauak tiktekichiuiliskej Jehová. Noijki noneki chikaujtos totlaneltok para titenojnotsaskej. Ijkuak tikimijliaj tlaltikpakchanejkej ika toTajtsin kikuepas tlaltikpaktli se xochitlalpan, miyekej kinemiliaj ika yejon melak kualtsin kakisti, san ika, xkinemiliaj tla melauak nochiuas (Mat. 24:14; Ezeq. 33:32). Maka keman matiometlamatikan itech tlen toTajtsin kichiuas, ijkon ken kichiuaj tlaltikpakchanejkej. Tla xtiknekij tiometlamatiskej, noneki nochipa tikchikauaskej totlaneltok. w23.04 27 párrs. 6, 7; 30 párr. 14

¿Kemantika yotimotlajtoltijka tla toTajtsin kinnankilia moteoyouan? Tla kema, xsan tejua ijkon yotimotlajtoltijka. Miyekej tokniuan kijtouaj ika ijkon yonotlajtoltijkaj, niman más ijkuak itlaj kixnamiktokej. Tla titlajyouijtokej, kanaj tejuamej noijki xueli tikitaj kenon Jehová kinnankilia toteoyouan. ¿Tleka uelis kuajli tikmatstoskej ika Jehová kinnankilia iteoyouan itekipanojkauan? Biblia kuajli techijlia ika Jehová melak techtlasojtla niman techpatiojkaita (Ageo 2:7; 1 Juan 4:10). Ika yejon, techijlia matiknotsakan niman matiktlajtlanilikan matechpaleui (1 Ped. 5:​6, 7). Yejua kineki techpaleuis para nochipa nisiuj itech matinemikan niman matikxikokan nochi tlen tikixnamikij. Biblia miyekpa kijtoua ika Jehová okinnankili itekipanojkauan ijkuak okinotskej. ¿Tikilnamiki yakaj akin Jehová okinankili? w23.05 8 párrs. 1-4

María kuajli nouikaya iuan Jehová, yejua kuajli kixmatstoya iTlajtol toTajtsin niman xsan kichiatoya ika José makichikauili itlaneltok. Noijki, kitaya kemanon uelis kuajli tlanemilis (Luc. 2:​19, 51). Pampa María kuajli nouikaya iuan Jehová, kuajli tesiuauj katka. Ipan yejuin tonaltin, miyekej tokniuan siuamej nokojtiliaj kichiuaskej ijkon ken María. Matikitakan tlen ipan onochiuj tokniuj Émiko, yejua kijtoua: “Ijkuak xininonamiktiaya, san no nejua nikitaya tlenon nikchiuas para nikchikauas notlaneltok. San ika, ijkuak oninonamikti, noueuentsin kichiuaya teoyotl topampa niman nochipa kitaya kenon machikaujto totlaneltok. Onikitak ika san chikaujtoya notlaneltok ipampa tlen kichiuaya noueuentsin. Kuakon, nonekiya san noselti nikchikauas notlaneltok. Ika yejon, aman nikita kemanon san noselti ninemis niman ijkon nikchiuilis teoyotl Jehová, nikpouas iTlajtol niman itech nitlanemilis” (Gál. 6:5). Nokniuan siuamej akin yonemonamiktijkej, tla nemokojtiliaj nemouikaskej iuan Jehová, nemoueuentsitsinuan más mechtlasojtlaskej niman mechpatiojkaitaskej (Prov. 31:30). w23.05 21 párr. 6

Tejuamej xtikmojkaitaj toTajtsin desde ijkuak tiuajtlakatij, noneki tomajmachtiskej ijkon tikchiuaskej. Niman uelis ijkon tikchiuaskej tla tikitaj tlen toTajtsin okichijchiuj. “Itechkopa nochi on tlajtlamach” ueli tikitaj ika Jehová tlamachilise, kojtik niman ika melak techtlasojtla. Nochi yejon kichiua más matiktlakaitakan niman matiktlasojtlakan (Rom. 1:20). Noijki techpaleuis matikmojkaitakan Jehová tla nochipa tiknotsaj. Ijkuak ijkon tikchiuaj, más kuajli tikixmatij. Nochipa ijkuak tiktlajtlaniliaj matechpaleui matitlaxikokan, titlanemiliaj itech kenon yejua melak kojtik. Ijkuak tiktlasojkamachiliaj ika okitemakak iKoneuj topampa, tikilnamikij ika melak techtlasojtla. Niman ijkuak tiktlajtlaniliaj matechijli tlenon tikchiuaskej pampa tikixnamiktokej tlen ouijtika, tikilnamikij ika melak tlamachilise. Ijkuak ijkin tiknotsaj Jehová, techpaleuiya más matiktlakaitakan niman maka matiknekikan tikchiuaskej itlaj tlen uelis kichiuas maka sa iuan matouikakan. w23.06 15 párrs. 6, 7

San Jehová kinamiki makintemaka tlanauatiltin, niman desde yeuejkaui yokualijlijtiaj ikalpan tlenon noneki kichiuas. Matontlanemilikan itech tlen okichiuj grupo akin tlayekanaya ipan kachtopa siglo. Tokniuan okijtokej ika noneki timelajkanemiskej itech yejuin: 1) ika noneki san Jehová tikueyichiuaskej niman xnoneki tikinueyichiuaskej tajtsitsintin, 2) ika noneki tikpatiojkaitaskej yestli niman 3) ika xnoneki tiauilnemiskej (Hech. 15:​28, 29). ¿Kenon uelis tikteititiskej ipan yejuin tonaltin ika ijkon tikchiuaj? San Jehová matikueyichiuakan niman matiktlakamatikan. Jehová okinnauati israelitas ika san yejua makiueyichiuakan (Deut. 5:​6-10). Ijkuak Diablo okitlatlatak, Jesús okijto ika noneki san Jehová tikueyichiuaskej (Mat. 4:​8-10). Yejua ika, tejuamej xtikinueyichiuaj tajtsitsintin. Xtikinueyichiuaj akin tlayekanaj ipan tlaneltokiltin, políticos noso akin melak kimixmatij. Tejuamej san tikueyichiuaj akin nochi okichijchiuj (Apoc. 4:11). w23.07 14, 15 párrs. 3, 4

Satanás niman akin kinyekana san tlanemilijtokej itech sexo niman pornografía (Efes. 4:19). Yejua ika, noneki más matiktlakaitakan Jehová niman matiktlalkauikan tlen xkuajli. Proverbios capítulo 9, tlajtoua itech omemej siuamej, se akin tlamatki niman okse akin xtlamatki. Yejuin siuamej akin tikinteneuaskej kinnotsaj akin “xe ixtojtomij”. Yeskia kentla kinnotsaskiaj imiuan matlakuatij inchan (Prov. 9:​1, 4-6). San ika, xsan noijki ontlamij akin kalakij inchan yejuin siuamej. Kachtopa matitlajtokan itech siuatl akin xtlamatki (Prov. 9:​13-18). Yejua xpinaujkayo niman “on telpokamej yejuan xe ixtojtomij kimijlia: ‘¡Xuajlakan nikan!’”. Ijkon kinyoleua iuan achijtsin manoyolpaktikan. ¿Niman kenon ontlamij akin kalakij ichan? “Onxinij miktlan”. Intech yejuamej ijkin noijtoua: “Tla sen tlakatl kalaki ichan on siuatl, kijtosneki kajsi ojtli yejuan kuikas kampa mikis” (Prov. 2:​11-19). Proverbios 5:​3-10 kiteneua okse siuatl akin noijki “tekajkayaua” niman kijtoua ika “on yejuan iuan nokajkayaua kenon siuatl, kinextia mikilistli”. w23.06 22 párrs. 6, 7

Tokniuan tlayekankej noneki kiteititiskej ika teasikamatij (1 Tim. 3:​2, 3). Noijki, se tlayekanketl xkichia nochipa manoseli tlen kijtoua san pampa yejua akin más iueyi. Kimatstika ika iespíritu Jehová uelis kiyekanas maski san akinon niman ijkon makijto itlaj tlen uelis kichiuas manotlapejpeni tlen tepaleuis. Tla miyekej tlayekankej itlaj kitlapejpeniaj niman tlen okitlapejpenijkej kiteititia ika kitlakamatstokej itlanauatiluan toTajtsin, se tlayekanketl akin teasikamati noneki ijkon kichiuas maski yejua xijkon tlanemilia. ToTajtsin melak techteochiuas tla tikteititiaj ika titeasikamatij. Yejua uelis kichiuas más kuajli matouikakan imiuan tokniuan niman ika toyojlo matinemikan ipan tlanechikojli. Maski ipan ikalpan toTajtsin tinochimej tlamantik ken titlanemiliaj niman oksekan tiualeuaj, san sekan tikueyichiuaj Jehová. Niman tiyolpakij pampa tikmatstokej ika tikchiujtokej ijkon ken toTajtsin, akin melak teasikamati. w23.07 25 párrs. 16, 17

Daniel kuajli nomachtiaya pampa kinekiya kimatis tlen melauak. Noijki, ouel okimasikamat teotlajtoltin pampa yolyemanki katka. Kimatstoya ika Jehová kinmaka tlamachilistli akin kixmatij niman kintlakamatij itlanauatiluan (Dan. 2:​27, 28). Okiteititi ika yolyemanki katka ijkuak okitlajtlanili Jehová makipaleui (Dan. 2:18). Daniel kuajli onomachti iTlajtol toTajtsin. Kuajli kitaya tlen kijtouayaj amatlajkuiloltin tlen ionkatkaj ijkuak yejua nemiya (Jer. 25:​11, 12; Dan. 9:2). ¿Kenon uelis tikchiuaskej ijkon ken yejua? Xkita tleka tikneki tikinmasikamatis teotlajtoltin. ¿Tikchiuasneki pampa tikneki tikixmatis tlen melauak? Tla kema, Jehová mitspaleuis (Juan 4:​23, 24; 14:​16, 17). San ika, sekimej nomachtiaj Biblia pampa kinekij kinextiskej itlaj tlen makiteititi ika xualeua itech toTajtsin. Kinekij san no yejuamej kijtoskej tlenon kuajli niman tlenon xkuajli, niman ijkon kichiuaskej tlen yejuamej kuelitaj. Kuakon, tejuamej noneki tomachtiskej teotlajtoltin pampa tiknekij tikmatiskej tlen melauak. w23.08 9, 10 párrs. 7, 8

Kanaj uelis tikchiatoskej tlen xkeman nochiuas tla san tikitstokej ika oksekimej ueli kichiuaj tlen tejuamej xtiuelij (Gál. 6:4). Tla nochipa ijkon titlanemiliaj, kanaj uelis peuas totlatlaniskej imiuan oksekimej niman titenexikolitaskej (Gál. 5:26). Ijkuak tikyejyekouaj tikchiuaskej tlen oksekimej kichiuaj, kanaj tiknekiskej tikchiuaskej tlen xok tiuelij. Xtlanemili itech yejuin: Biblia kijtoua ika ijkuak yakaj uejkaui kichia itlaj, melak najmana (Prov. 13:12). Kuakon, más techajmanas tla tikchiaj itlaj tlen xkeman nochiuas. Yejon ueliskia techsiauitis niman kichiuas yolik matiakan ipan ojtli tlen teuika kampa onka nemilistli. Maka xchiua tlen Jehová xok mitstlajtlanilia. Xkilnamiki ika yejua xkeman mitstlajtlanilis xmaka itlaj tlen xtikpiya (2 Cor. 8:12). Maka xmajmana, Jehová xsan kitstika tla xtiijkon ken oksekimej (Mat. 25:​20-23). Yejua kipatiojkaita ika tejua tiktekichiuilia ika nochi moyojlo, ika itech timelajkanemi niman ika titlaxikoua. w23.08 29 párrs. 10, 11

¿Kenon okinankili Jehová tlen okitlajtlanili Sansón? Ika se milagro, okichiuj mauajkisa atl. Ijkuak Sansón oatlik, “okipix yolchikaualistli niman fuerza” (Juec. 15:19). Nesi ika yejuin ameyajli ok onkatka ijkuak Jehová okichiuj ika Samuel makijkuilo libro de Jueces. Kanaj ijkuak israelitas kitayaj yejuin ameyajli kilnamikiyaj ika tla nopaleuiyaj itech Jehová, yejua kinpaleuiskia ijkuak kixnamiktoskiaj tlen ouijtika. Ijkon ken Sansón, tinochimej noneki tiktlajtlaniliskej Jehová matechpaleui. Maski miyek ueli tikchiuaj noso tikpiyaj se ueyi tekitl ipan ikalpan, noneki matechpaleui. Noneki tikilnamikiskej ika xnochi ueli tikchiuaj niman ika san tla Jehová techpaleuiya uelis kuajli tonkisaskej. Sansón oksejpa okajsik kojtilistli ijkuak okonik atl tlen Jehová okimakak. Noijki ijkon, totlaneltok chikaujtos tla tiktekitiltiaj nochi tlen Jehová techmaka (Mat. 11:28). w23.09 4 párrs. 8-10

Xnemili ika tijkaki kenon yakaj xkuajli tlajtoua itech Jehová noso kijtoua ika xkuajli tlen Biblia temachtia. ¿Tlenon tikchiuaskiaj? Uelis tiktlajtlaniliskej Jehová matechmaka iespíritu santo niman noijki matechmaka tlamachilistli para kuajli titenankiliskej. ¿Niman tlenon uelis tikchiuaskej tla tikitaj ika kanaj xkuajli ken otitenankilijkej? Oksejpa matitlajtokan iuan Jehová niman matiknemilikan tlenon uelis tikchiuaskej ijkuak oksejpa ijkon topan nochiuas. Tla ijkon tikchiuaj, Jehová techmakas espíritu santo niman ijkon xnimantsin tikualaniskej niman tikteititiskej ika tiyolyemankej. Seki tlaxeloltin itech Biblia uelis techpaleuiskej matitlajtokan ika yolyemanilistli ijkuak itlaj tikixnamikiskej noso san kinekiskej techkualaniskej. Espíritu santo uelis kichiuas matikimilnamikikan yejon tlaxeloltin (Juan 14:26). Tlen tiknextiaj ipan Proverbios techpaleuiya matikteititikan ika tiyolyemankej (Prov. 15:18). Noijki techititiaj kenon techpaleuis tla xnimantsin tikualanij ijkuak tikixnamikij tlen ouijtika (Prov. 10:19; 17:27; 21:23; 25:15). w23.09 15 párrs. 6, 7

Apóstol Pedro chikauak okitekichiuili Jehová miyek xiujtin. Otenojnots iuan Jesús, okinnojnots akin xkeman kinnojnotsayaj niman teuan katka itech Grupo akin tlayekana. San ika, ijkuak sa achijtsin poliuiya para mikiskia, Jehová okijli makichiua itlaj okse. Kanaj ipan xiuitl 62 niman 64, toTajtsin okichiuj makimijkuilo ome cartas: 1 niman 2 Pedro (2 Ped. 1:​13-15). Pedro okimijkuilo yejuin ome cartas ijkuak tokniuan kixnamiktoyaj “miyek tlajtlamach tetlatlatalistli” (1 Ped. 1:6). Miyekej tlakamej akin xkuajkualtin kimijlitoyaj tokniuan tlen xmelauak niman kinekiyaj ika ipan tlanechikojli maka manoueyichiua toTajtsin ken nonekiya (2 Ped. 2:​1, 2, 14). Tokniuan akin chantiyaj Jerusalén kitaskiaj kenon “tlamis nochi tlajtlamach”. Kijtosnekiya ika kitaskiaj kenon romanos kipopoloskiaj Jerusalén niman itemplo (1 Ped. 4:7). Kuajli tikmatstokej ika tlen Pedro okijkuilo melak okinpaleui tokniuan mayolmelajkanemikan maski kixnamiktoyaj tlen ouijtika niman manoyektlalikan ipampa tlen sakin kixnamikiskiaj. w23.09 26 párrs. 1, 2

Miyekpa tejuamej noijki tomajmachtiaj titetlakamatiskej ijkuak tikixnamikij tlen ouijtika. Matikonnemilikan tlen opanok ijkuak opeuj COVID-19. Otechijlikej maka sa matosentlalikan ipan kaltin kampa tosentlaliaj niman maka matitenojnotsakan techajchan. ¿Kenon otimomachili? ¿Ouijtika otikitak titetlakamatis? Maski san kenon, melak omitspaleui pampa otitetlakamat, otinen nisiuj intech tokniuan niman otikyolpakti Jehová. Aman, xok más ouijtika tikitaskej tikchiuaskej maski san tlenon techijliskej ijkuak yejkos ueyi tlajyouilistli. Tla titetlakamatij, kanaj uelis timakisaskej (Job 36:11). Tejuamej tiktlakamatij Jehová pampa tiktlasojtlaj niman tiknekij mayolpaki touan (1 Juan 5:3). Xkeman uelis tikuepiliskej Jehová nochi tlen yejua yokichiuj topampa (Sal. 116:12). San ika, onka tlen kema uelis tikchiuaskej: tiktlakamatiskej Jehová niman akin yejua yokintekitlali. Ijkuak titetlakamatij, tikteititiaj ika titlamachilisejkej, niman ijkuak titlamachilisejkej tikyolpaktiaj Jehová (Prov. 27:11). w23.10 11 párrs. 18, 19

Tla se ángel mitsnotsaskia, ¿tijkakiskia? Ipan yejuin tonajli se ángel kinnotstika “on yejuan chanejkej ipan in tlaltikpaktli de nochi tribus, de nochi raza, de nochi kech sesekneka tlajtoltin, niman nochi países”. ¿Tlenon kijtoua? “Xtlakaitakan Dios, niman xkueyilikan […]. Xmauistilikan on yejuan okitlalij on cielo, on tlaltikpaktli, on mar niman on ameyaltin” (Apoc. 14:​6, 7). Tinochimej noneki tikueyichiuaskej Jehová. Yejua toTajtsin akin melauak. ¡Sajnoye tiktlasojkamatij ika ueli tikueyichiuaj ipan iueyi teopan! ¿Tlenon kijtosneki iteopan Jehová niman kanon noteneua ipan Biblia? Iteopan toTajtsin xse kajli, kineskayotia nochi tlen yokichiuj Jehová niman ijkon uelis tikueyichiuaskej ken kinamiki. Niman Jehová san kiselis ken tikueyichiuaj tla tikneltokaj tlen okichiuj Jesús topampa. Ipan kachtopa siglo, apóstol Pablo okintlajkuilouili tokniuan hebreos akin chantiyaj Judea niman okimijli seki itech ken Jehová kineki matikueyichiuakan. w23.10 24 párrs. 1, 2

Ipan 522 ijkuak xpeuaya xiuitl 1, intlauelikniuan judíos okichiujkej maka sa makichijchiuakan iteopan Jehová. San ika, Zacarías okimijli judíos ika Jehová kinpaleuiskia ika iespíritu santo niman ijkon matlamikan intekiyo. Ipan 520, tekiuaj Darío okichiuj oksejpa manochijchiua iteopan Jehová, noijki okinmakak seki tomin judíos niman okinnauati tekiuajkej akin nisiuj nemiyaj ika makinpaleuikan (Esd. 6:​1, 6-10). Jehová okimijli judíos ika tla nokojtiliayaj kichijchiuaskej iteopan, yejua kinpaleuiskia (Ageo 1:​8, 13, 14; Zac. 1:​3, 16). Yejua ika, ipan 520 ijkuak xpeuaya xiuitl 1, judíos oksejpa opeuj kichijchiuaj teopan niman otlankej san ipan kanaj makuijli xiuitl. Maski okixnamijkej tlen ouijtika, onokojtilijkej kichiuaskej tlen toTajtsin kintlajtlaniliaya. Yejua ika, Jehová okinmakak tlenon ika kichijchiuaskej teopan. Ijkon, ouel okiueyichiujkej Jehová ika nochi inyojlo (Esd. 6:​14-16, 22). w23.11 15 párrs. 6, 7

Maski miyekej yokikakkej kenon tlajtouaj itech Abrahán, xmiyek kimatij itech yejua. San ika, tejuamej kema tikixmatij. Biblia kijtoua ika yejua “sen tajtli para nochimej on yejuan kineltokaj Dios” (Rom. 4:11). ¿Kanaj noijki uelis tikchiuaskej tlen Abrahán okichiuj niman tikpiyaskej totlaneltok ijkon ken yejua okipix? Kema uelis. Tla tikitaj tlenon okichiuj Abrahán, techpaleuis matitlaneltokakan ijkon ken yejua otlaneltokak. Yejua okichiuj tlen toTajtsin okijli: uejka oyaj, melak ouejkauj san onokajkalti niman hasta okinek kiuentlalis ikoneuj, Isaac. Ijkon okiteititi ika chikauak kipiaya itlaneltok. Ipampa itlaneltok niman ipampa tlen okichiuj, okiyolpakti Jehová niman iuan onouikak (Sant. 2:​22, 23). Jehová kineki ika tinochimej matikyolpaktikan niman iuan matouikakan. Yejua ika, okichiuj ika apóstol Pablo niman Santiago makijkuilokan ipan Biblia tlen okichiuj Abrahán. w23.12 2 párrs. 1, 2

Tokniuan siuamej, xyejyekokan kuajli xmonotsakan imiuan oksekimej. Yejuin itlaj tlen noneki tikchiuaskej akin tikchiuaj ken Cristo. Santiago, inomachtijkauj Jesús, okijto yejuin tlen nesi ipan texto tlen aman tikitstokej. Tla kuajli tijkakij akin technojnotstika, tikititiskej ika tikasikamatij (1 Ped. 3:8). Tla xmás otikasikamat tlen mitsijlitika akin mitsnojnotstika, itlaj xtlajtolti. San ika, xchiua ika tlakaitalistli niman achto titlanankilis kuajli xnemili tlenon tikijtos (Prov. 15:28). Xmotlajtolti: “¿Tlen nikijtos melauak niman teyolchikaua? ¿Kiteititia ika nitetlakaita niman ika niteiknelia?”. Xtlanemili intech tokniuan akin chikauak kipiyaj intlaneltokil niman kuajli nonotsaj imiuan oksekimej, niman xchiua ijkon ken yejuamej (Prov. 31:26). Kuajli xkinkaki kenon tlajtouaj. Xmomajmachti kuajli titenotsas niman tikitas ika más kuajli timouikas imiuan oksekimej. w23.12 21 párr. 12

Ijkuak xkuajli tomachiliskej, Jehová uelis kintekitiltis tochanejkauan, toamigos noso tlayekankej para techpaleuis. Yemelak, ijkuak melak xkuajli tomachiliaj pampa itlaj tikixnamiktokej, tiknekiskiaj san toselti tinemiskej. Kuakon, ¿tlenon uelis tikchiuaskej para tokauiliskej matechpaleui Jehová? Maka matikintlalkauikan oksekimej. Ijkuak san toselti tinemij, san tiknemilijtokej tlen tikixnamiktokej. Niman yejon uelis kichiuas matiktlapejpenikan tlen xkuajli. Yemelak, tinochimej kemantika tiknekij san toselti tinemiskej, más ijkuak tikixnamikij itlaj tlen melak teajman. San ika, tla nochipa toselti tinemij, tikteititijtoskiaj ika xtiknekij matechpaleui Jehová. Kuakon, noneki tokauiliskej matechpaleuikan tochanejkauan, toamigos niman tlayekankej. Matikilnamikikan ika Jehová kintekitiltijtika niman ijkon techititis ika touan nemi (Prov. 17:17; Is. 32:​1, 2). w24.01 23, 24 párrs. 12, 13

Nazareos xueliskiaj notekiliskej intson pampa ijkon kiteititiayaj ika san Jehová ueliskia kinnauatis niman ika kichiuaskiaj nochi tlen yejua kineki. Melak teajman ika kemantika israelitas xkitlakaitayaj niman xkipaleuiayaj akin nazareo katka. Akin nazareos katkaj nonekiya melak yolchikaujkej yeskej para xkichiuaskej ken oksekimej niman kichiuaskej tlen yokijlijkaj Jehová (Amós 2:12). Ijkuak tiktlakamatij Jehová, noijki oksekimej kitaj ika tejuamej xtijkomej ken yejuamej. Kemantika noneki toyolchikauaskej niman ijkon tikteijliskej ika tiiteixpantijkauan Jehová kampa titekitij noso kampa tomachtiaj. Niman aman tikitaj ika más yotlaijtlakauj niman miyekej kichiuaj tlen melak xkuajli, ika yejon, kemantika ouijtika tikitaj tikchiuaskej tlen kijtoua Biblia niman titenojnotsaskej itech iTekiuajyo toTajtsin (2 Tim. 1:8; 3:13). San ika, matikilnamikikan ika melak tikyolpaktiaj Jehová ijkuak tokojtiliaj xtijkomej yeskej ken akin xkitekichiuiliaj (Prov. 27:11; Mal. 3:18). w24.02 16 párr. 7; 17 párr. 9

Matitlanemilikan itech tlanechikojli tlen onkatka Roma, kampa nemiyaj tlatlamantikej tokniuan. Sekimej judíos katkaj, niman okimititijkaj ika nonekiya kitlakamatiskej iTlanauatil Moisés. San ika, noijki nemiyaj tokniuan akin oksekan ualeuayaj niman tlamantik okinmiskaltijkej. Kanaj ompa nemiyaj sekimej tokniuan akin esclavos katkaj, niman sekimej ka. Niman kanaj noijki ompa nemiyaj sekimej akin kinpiayaj esclavos. ¿Tlenon kinpaleuiskia más manotlasojtlakan maski tlatlamantikej? Apóstol Pablo yejuin okimijli: “Xmoselikan cada se iuan oksekimej”. ¿Tlenon okijtosnek? Ijkuak nikan kijtoua “xmoselikan” kijtosneki ika yakaj tikselis ika nochi moyojlo, ken ijkuak yakaj teselia ichan noso kiselia yakaj ken iamigo. Matontlanemilikan itech tlen Pablo okichiuj. Yejua okijli Filemón kenon nonekiya kiselis Onésimo, se esclavo akin ocholojtejka de ichan. Okijli: “Xseli ken nejua tinechseliskia” (Filem. 17). Priscila niman Áquila más kimatiyaj itech iTlajtol toTajtsin xijkon ken Apolos, san ika, kuajli okiselijkej niman imiuan okuikakej (Hech. 18:26). Maski nochimej yejuin tokniuan tlatlamantikej katkaj, xokinokauilijkej itlaj makinxelo. Yejuamej otlaxikojkej niman kuajli onoselijkej. w23.07 6 párr. 13

Tla tiktlasojtla Jehová, tiknektos itech timosentemakas. Niman yejuin tlasojtlalistli tlen tikmachilia xsan panos, pampa ijkuak más tikixmatstias Jehová niman ijkuak más tikpiyas “tlamatkilistli [noso tlamachilistli] niman kajsikamatilistli”, yejuin tlasojtlalistli más ueyixtias (Col. 1:9). Ijkuak opeuj timomachtia Biblia, otikasikamat ika 1) Jehová melauak nemi, 2) Jehová okichijchiuj Biblia ika iespíritu santo niman 3) yejua kitekitiltia ikalpan para kichiuas tlen yejua kineki. Yakaj uelis nosentemakas itech Jehová tla ikimatstok tlen temachtia Biblia, tla ikintlakamatstok iTlanauatiluan toTajtsin niman tla yopeuj tenojnotsa (Mat. 28:​19, 20). Noijki noneki melak kitlasojtlas Jehová niman kinektos san yejua kitekichiuilis ika nochi iyojlo. ¿Tejua ijkon itikchiujtika? w24.03 4, 5 párrs. 6-8

Abigaíl ononamikti iuan Nabal, se tlakatl akin Biblia kijtoua ika melak tlauele katka niman kichiuaya tlen xkuajli (1 Sam. 25:3). Ijkuak tinemis iuan yakaj akin ijkon, xmás uelis tiyolpakis. Sejpatipan, David, akin tekiuajtiskia Israel, kinekiya kimiktis Nabal pampa okiuijuikalti niman okinuijuikalti tlakamej akin iuan kistinemiyaj (1 Sam. 25:​9-13). Ijkuakon, Abigaíl ueliskia kinemilis kikauas Nabal niman kikauilis ika David makimikti. San ika, xijkon okichiuj, yejua okijlito David makitlapopolui Nabal (1 Sam. 25:​23-27). ¿Tleka ijkon okichiuj? Abigaíl melak kitlasojtlaya Jehová, niman noijki melak kitlakaitaya tlen Jehová kinemilia itech namiktilistli. Yejua kimatstoya ika toTajtsin melak kitlakaitaya namiktilistli. Ika yejon, yejua okitato David, okitlajtlanili makitlapopolui maski yejua xtlaj okichiujka, niman okitlajtlanili maka makimikti iueuentsin niman akin iuan chantiyaj. w24.03 16 párrs. 9, 10

¿Nemi yakaj ipan motlanechikol akin nokojtilijtika kikauas seki tlemach niman ijkon más chikauak kitekichiuilis Jehová? ¿Tikixmati se telpochtli akin nokojtilijtika xkichiuas ken akin imiuan nomachtia? ¿Tikixmati yakaj akin ichanejkauan kitlauelitaj pampa melajkanemi itech Jehová? Tla tikita ika yakaj itlaj kixnamiktika, uelis tikyolchikauas niman tikijlis ika melak tikpatiojkaita tlen kichiua niman ijkon kitekichiuilis Jehová (Filem. 4, 5, 7). Jehová kimatstika ika melak tiknekij tikyolpaktiskej niman ika tiknektokej tijkauaskej seki tlemach niman ijkon tikchiuaskej tlen otikijlijkej ijkuak otosentemakakej. Noijki melak techyolpaktia ika techkauilia matikititikan ika tiktlasojtlaj (Prov. 23:​15, 16). Kuakon, nochipa matiktekichiuilijtokan Jehová niman nochipa matokojtilijtokan más kuajli tiktekichiuiliskej. w24.02 18 párr. 14; 19 párr. 16

Matikonnemilikan ika tinemij itlamiyan xiuitl 29. Jesús kemach opeuj tenojnotsa. Yejua niman inan yauej kampa ononamiktilok ne Caná. Nesi ika María kinpaleuijtoya akin nonamiktijtoyaj. María nimantsin konta ikoneuj niman kijlia: “Xok kipiyaj vino” (Juan 2:​1-3). ¿Tlenon kichiua Jesús? Atl kikuepa vino tlen melak “uelik” (Juan 2:​9, 10). Jesús okichiuj más miyek milagros ijkuak otenojnotstinen. Okikuik kojtilistli tlen Jehová okimakak para kinpaleuis miyekej tlaltikpakchanejkej. Sejpatipan, okintlakualti 5,000 tlakamej niman ipan okse tonajli okintlakualti 4,000 tlakamej. Ijkuak okichiuj yejuin ome milagros, kanaj okintlakualti ipantsin 27,000 tlaltikpakchanejkej, tla tikinpouaj siuamej niman kokonej akin ompa nemiyaj (Mat. 14:​15-21; 15:​32-38). Noijki, ijkuak Jesús okichiuj yejuin milagros, okinpajti akin kualouayaj (Mat. 14:14; 15:​30, 31). w23.04 2 párrs. 1, 2

Ijkuak tikixnamikij tlen ouijtika, kanaj tikmachiliaj ika xok tikojtikej niman ika xok kuajli titlanemiliaj. Ijkon ken Elías, kanaj san tiknektoskej tikochtoskej (1 Rey. 19:​5-7). Kanaj nonekis yakaj matechpaleui niman ijkon tiktekichiuiliskej Jehová. Yejua techijlia ika techpaleuis ijkon ken kijtoua tlaxelojli tlen aman tikitstokej. Ijkuak tekiuaj David okixnamik tlen ouijtika niman ijkuak itlauelikniuan kinekiyaj kimiktiskej, okitak ika Jehová iuan nemiya, yejua ika, ijkin okijli: “Tinechkitskia ikan ipoder moyekma” (Sal. 18:35). Jehová miyekpa kichiua ika oksekimej matechpaleuikan niman ijkon techititis ika xtechkauas. Matikonteneuakan tlen ipan onochiuj David. Ijkuak yejua melak najmantoya, iamigo, Jonatán, okitato niman okiyolchikauato (1 Sam. 23:​16, 17). Niman ijkuak Elías melak xkuajli nomachiliaya, Jehová okitekitilti Eliseo niman ijkon makipaleui (1 Rey. 19:​16, 21; 2 Rey. 2:2). w24.01 23, 24 párrs. 10-12

Jehová kuelita kitemakas niman techmaka miyek tlen kuajli. Niman noijki yejon tlen kichiua siuatl akin kineskayotia “tlamatkilistli” akin noteneua ipan Proverbios capítulo 9. Yejua nochi yokichiuj: yokiyektlali mesa, yokikxitij nakatl niman yokitlali vino (Prov. 9:2). Noijki, Proverbios 9:4 niman 5 kijtoua ika tlamatkilistli kinnotsa akin xiixtojtomij niman kimijlia: “Xuajlakan, xkuakij notlakual”. ¿Tleka noneki tijkakiskej yejuin siuatl akin kineskayotia tlamatkilistli? Pampa Jehová kineki kintlajpiyas ikoneuan niman kinmakas tlamatkilistli. Yejua xkineki matitlajyouikan para tikmatiskej ika itlaj xkuajli. Ika yejon, “toTEKO kimpaleuiya niman kinmanauiya on yejuan melajkanemij” (Prov. 2:7). Tla tiktlakaitaj Jehová tiknekiskej tikyolpaktiskej niman tikchiuaskej tlen technauatia. Yejuin kichiua matiyolpakikan (Sant. 1:25). w23.06 23 párrs. 14, 15

Maski xuelis miyek tikchiuaskej ken tikuelitaskiaj niman ijkon tiktekichiuiliskej Jehová, kuajli tikmatstokej ika yejua kipatiojkaita tlen tikchiuaj ipampa. ¿Kenon tikmatij yejuin? Ipampa tlen Jehová okijli teotlajtoketl Zacarías. Yejua okijli makichijchiua se corona ika oro niman plata tlen judíos akin onokaujkaj Babilonia okitemakakej (Zac. 6:11). Yejuin kualtsin corona kimilnamiktiskia ika yejuamej melak kuelitayaj kitemakaskej tlen kipiayaj (Zac. 6:14). Kuakon, kuajli tikmatstokej ika Jehová xkeman kilkaua tlen tejuamej tikchiuaj ipampa niman ijkon tiktekichiuiliskej maski tikixnamikij tlen ouijtika. Tikmatstokej ika ipan itlamiyan tonaltin ok tikixnamiktoskej miyek tlen ouijtika niman ika más tlaijtlakauis (2 Tim. 3:​1, 13). San ika, xnoneki tijkauiliskej ika yejon matechajmankamikti. Matikilnamikikan tlen Jehová okimijli itekipanojkauan ipan itonaluan Ageo: “Nejua nemouan ninemi […]. Maka xmomojtikan” (Ageo 2:​4, TNM; Ageo 2:5). Tejuamej kuajli tikmatstokej ika tla tokojtiliaj tikchiuaskej tlen Jehová kineki, yejua touan nemis. w23.11 19 párrs. 20, 21

Nochi tlen xkuajli okichiuj apóstol Pedro ueliskia xnoijkuilos ipan Biblia, san ika, toTajtsin okichiuj manoijkuilo niman ijkon techmachtis itlaj tlen ueyi kijtosneki (2 Tim. 3:​16, 17). Ijkuak tomachtiaj itech Pedro, se tlakatl akin tlajtlakole niman kimachiliaya tlen tejuamej tikmachiliaj, tikitaj ika Jehová xkichia maka keman matopopolokan. Yejua kineki maka matosiaujkauakan niman matitlaxikokan maski titlajtlakolejkej. ¿Tleka xnoneki tosiaujkauaskej? Pampa maski tiknemiliaj ika itlaj xok tikchiuaj, sakin oksejpa uelis tikchiuaskej. San ika, kema uelis tikchiuaskej tlen kuajli. Tinochimej tikijtouaj noso tikchiuaj itlaj niman sakin toyolkuepaj, san ika, tla xtosiaujkauaj, Jehová techpaleuis matiktlakamatikan (1 Ped. 5:10). Ken Jesús okikneli Pedro maski onopopolo, uelis techpaleuis matiktekichiuilijtokan Jehová. w23.09 20, 21 párrs. 2, 3

Jesús ueliskia kipajtiskia Lázaro, ken okijto Marta ipan tlaxelojli tlen aman tikitstokej. San ika, yejua kinekiya kichiuas okse itlaj tlen más temojkatlachialtiskia. Jesús kijlia Marta: “Mokniu oksejpa yoliuis”. Niman noijki kijlia: “Nejua nikinyoliuitia on yejuan yomikkej niman nikinmaka nemilistli oksejpa” (Juan 11:​23, 25). Kema, toTajtsin yokimakak kojtilistli Jesús para teyolitis. Jesús yokiyolitijka se ichpokakonetl akin kemach yomijka niman noijki se telpochkonetl akin kemach yomijka (Luc. 7:​11-15; 8:​49-55). San ika ¿ueliskia kiyolitis yakaj akin ikipiaya naui tonajli ika yomijka niman akin itlalnakayo yopeujka ijtlakaui? María, okse ikniuj Lázaro, nonisiuiya itech Jesús niman noijki ijkon kijlia ken Marta: “NoTEKO, tla nikan tinemiskia, nokniu xmikiskia” (Juan 11:32). María niman oksekimej melak noyolkokouaj. Ijkuak Jesús kimita niman kinkaki ika melak chokatokej, yejua noijki noyolkokoua. Pampa kimasikamati iamigos, uajixayotejtemoua. Yejua kasikamati kenon melak teyolkoko ijkuak miki yakaj akin tiktlasojtlaj niman sa kinektika kipopolos mikilistli tlen melak techtlajyouiltijtika. w23.04 10, 11 párrs. 12, 13