Matai’o
3 Aefa daʼö, möi manuriaigö Yohane Samayagö Idanö ba danö si mate ba Yudea, 2 imane, ”Mifalalini gera-erami, börö me no ahatö Wamatörö Lowalangi ba zorugo.” 3 Yohane andre nitötöi Yesaya samaʼeleʼö me imane, ”So li niha si ao-ao ba danö si mate, ’Mihenaigö lala khö Yehowa! Mihaogö lala sadölö khönia.’” 4 No mobaru bulu gondra Yohane, ba böbö löwinia moroi ba guli gurifö. Tamo gönia ba wewani gatua. 5 Aefa daʼö, laʼondrasi ia niha moroi ba Yeruzalema, Yudea maʼasagörö, hegöi banua si fasui Idanö Yoridano. 6 Ibayagö ira idanö* ba Yoridano, ba oi zara lafatunö horö nifaluara föna niha sato.
7 Me iʼila ato ndra Farizaiʼo ba Sadukaiʼo si möi ba daʼö, imane khöra, ”Yaʼami maʼuwu gulö sobiso, haniha zangumaʼö wa tola teʼefaʼö ami moroi ba wönu Lowalangi andrö dania? 8 Börö daʼö, miforomaʼö ba mbua-buami wa mifalalini gera-erami. 9 Böi miwaʼö tödömi wa tola teʼefaʼö ami börö me ngaʼötö Gaberahamo ami. Sindruhunia, na omasi Lowalangi, tola ibeʼe ngaʼötö khö Gaberahamo moroi ba gara andre. 10 No muhenaigö wato ba mbörö geu. Andrö, fefu geu si lö mowua si sökhi laʼobö ba latiboʼö ba galitö. 11 Ubayagö ami idanö börö me mifalalini gera-erami, hizaʼi niha si tohare aefa ndraʼo ibayagö ami faoma eheha niʼamoniʼö ba alitö. Abölö ebua kuasonia moroi khögu, ba tenga sinangea uheta zandralania. 12 No igogohe dambila ba ihaogö naha wamöbörö. Ifaʼanö gandru ba halasa, ba fefu guliho itunu ba galitö si tebai mubunu.”
13 Aefa daʼö, tohare Yesu moroi ba Galilaia, möi ia ba Nidanö Yoridano ba iʼandrö khö Yohane enaʼö ibayagö ia idanö. 14 Hizaʼi, lö edöna ifalua niwaʼönia andrö Yohane ba imane, ”Sindruhunia, yaʼugö zombayagö yaʼo idanö. Hana wa möiʼö khögu?” 15 Itema linia Yesu, ”Falua manö, simanö sa zinangea khöda ba woloʼö satulö andrö.” Lö ara ba ifalua daʼö Yohane. 16 Me no aefa tebayagö idanö Yesu, iʼanemaiʼö kalua ia moroi ba nidanö. Ba ginötö daʼö göi, teboka mbanua si yawa ba iʼila Yohane geheha Lowalangi si möi khö Yesu, hulö marafadi. 17 Ba terongo li moroi ba mbanua si yawa imane, ”Onogu daʼa, niʼomasiʼögu, waʼomasigu ia.”