Yohane
2 Dua hari aefa daʼö, alua walöwa ba Kana ba Galilaia, so göi ba daʼö nina Yesu. 2 Lakaoni göi Yesu awö ndra nifahaʼönia ba walöwa andrö.
3 Me arakhagö ahori nagu nibadu, imane inania khö Yesu, ”Ahori khöra nagu.” 4 Itema linia Yesu, ”He Ma,* hadia foʼömöda daʼö? Lö irugi inötögu nasa.” 5 Imane inania khö ndra sohalöwö, ”Miʼoʼö hadia manö niwaʼönia.” 6 So ba daʼö rumbi naha nidanö önö ngawua nifazökhi moroi ba gara, no lahenaigö ba wangehao boto simane si toʼölö lafalua ira niha Yahudi. Ero sambua rumbi tola monaha mato 44 mazui 66 liter idanö. 7 Imane khöra Yesu, ”Mifoʼösi rumbi andrö faoma idanö.” Ba lafoʼösi irugi afönu. 8 Imane zui, ”Mihalö maʼifu nösinia ba mibeʼe khö zondröniaʼö falöwa.” Ba möi lafasao. 9 Ibadu maʼifu nidanö andrö sondröniaʼö falöwa me no tobali agu. Lö aboto ba dödönia hezo moroi, hizaʼi laʼila ira sohalöwö. Aefa daʼö ikaoni marafule andrö sondröniaʼö falöwa. 10 Imane, ”Si toʼölönia oföna labeʼe nagu si sökhi, ba na no mabu niha awena labeʼe zambö baga. Hizaʼi, no öʼiröʼö manö nagu si sökhi irugi iadaʼa.” 11 Ifalua Yesu dandra sahöli-höli dödö si oföna sibai ba Kana ba Galilaia, irege oroma waʼamolakhöminia ba mamati ndra nifahaʼönia khönia.
12 Aefa daʼö, mofanö ia ba Gafanauma ba fao ninania, awö ndra akhinia ono matua hegöi ira nifahaʼönia, ba mato hauga hari toröi ira ba daʼö.
13 Möi Yesu ba Yeruzalema me arakhagö alua Gowasa Fasa ba niha Yahudi. 14 Me möi ia ba gosali, iʼila zamawa sawi, biri-biri, marafadi, hegöi sanukari kefe, no modadao ira. 15 Me no aefa ifazökhi mbözi-bözi moroi ba zinali, ifofanö baero zogale andrö fefu hegöi biri-biri ba sawi, aefa daʼö ifazawili gefe loga khö ndra sanukari kefe ba isoʼagö meza. 16 Imane göi khö ndra sogale marafadi, ”Miheta daʼa fefu! Böi mibaliʼö naha wogale nomo Namagu!” 17 Itörö tödö ndra nifahaʼönia ayati sangumaʼö, ”Faʼomasigu andrö ba nomo Namagu hulö hola-hola galitö ba dödögu.”
18 Börö daʼö lamane khönia ira niha Yahudi, ”Foromaʼö khöma dandra wa so kuaso khöu ba wamalua daʼa fefu.” 19 Itema lira Yesu, ”Midudugö gosali daʼa, ba ufuli ufazökhi ba zi tölu hari.” 20 Lamane ira niha Yahudi, ”Famazökhi osali daʼa 46 fakhe, hizaʼi ha tölu hari öʼamazökhiʼö?” 21 Sindruhunia, eluaha gosali niwaʼönia yaʼia daʼö botonia. 22 Me no aefa tesusugi ia moroi ba gotalua zi mate, itörö tödö ndra nifahaʼönia wa asese iwaʼö daʼö, irege faduhu dödöra ba ayati si no tesura hegöi ba wehede Yesu.
23 Me so ia ba Yeruzalema ba Gowasa Fasa, ato niha samati ba döinia me laʼila ngawalö dandra sahöli-höli dödö nifaluania. 24 Hizaʼi, lö afönu waʼafaduhu dödö Yesu khöra börö me aboto ba dödönia gamuata niha 25 ba lö moguna irongo wamaduhuʼö sanandrösa ba niha börö me iʼila nösi dödö niha.