1 Fetero
3 Yaʼami foʼomo ira alawe, miʼoʼö li woʼomomi ira matua, enaʼö na so zi lö moloʼö taromali, tola adöni dödöra börö gamuatami si sökhi hewaʼae lö hede-hede, 2 börö me lanehegö mbua-buami si sökhi safönu famosumange soroi ba dödö. 3 Böi miʼofönaiʼö waʼasökhi mboto niʼila hörö simane fondrandra bu, famake anaʼa mazui nukha sebua böli. 4 Hizaʼi, miʼokhögö waʼasökhi si tobini bakha ba dödö, mihaogö ami faoma gama-gama si tebai tekiko yaʼia daʼö faʼahono-hono ba fangide-ngideʼö, me daʼö zi sökhi ba wamaigi Lowalangi. 5 Simane daʼö göi ndra alawe sangataʼufi ba sanötöna khö Lowalangi me mböröta. Laʼoʼö li woʼomora ira matua, 6 simane Sara, iʼoʼö li Gaberahamo, ikaoni ”pa”* khö woʼomonia. Tobali ami ono Zara na lö miböhöli wamalua si sökhi ba lö ikalaisi ami faʼataʼu.
7 Simanö göi ami foʼomo ira matua, mihaogö-haogö khö woʼomomi ira alawe si fao faʼaboto ba dödö sagötö wefaomi. Ameʼegö tödö ira börö me sambö faʼabölö, amaedola mbowoa tanö salio aboto, me awömi ira ba wanema ondröita faʼauri moroi ba waʼasökhi dödö Lowalangi. Na löʼö, lö tefondrondrongo wangandrömi.
8 Ba gafuriata, enaʼö hasara dödömi, mirasoi zafökhö khö nawömi, faoma miʼomasiʼö nawömi simane ösi nomomi, mihakhösi tödö, ba böi fayawa. 9 Böi misulöni zi lö sökhi awönia si lö sökhi, mazui fangoʼaya awönia fangoʼaya. Hizaʼi, sulöni faoma fangandrö howu-howu börö me daʼö mbörö wa mufili ami enaʼö tola miʼokhögö howu-howu ondröita andrö.
10 So ba zura, ”Haniha zongomasiʼö faʼauri, ba omasi ia na ohahau dödönia, yamutaha lelania moroi ba wehede si lö sökhi hegöi bewenia moroi ba walimosa. 11 Yamuʼaröuʼö ia moroi ba zi lö sökhi ba yamufalua zi sökhi, yamugohi ba muʼalui waʼatulö. 12 Ifaigi-faigi Yehowa niha satulö ba ibeʼe mbörö dalingania ba wangandröra. Hizaʼi, lö omasi Yehowa ba niha samalua si lö sökhi.”
13 Haniha zamaʼala yaʼami na owölö-ölö ami wamalua si sökhi? 14 Na mitörö wamakao börö wamalua satulö, yaʼahowu ami. Böi miʼataʼufi na lafetaʼu ami ba böi aombö dödömi. 15 Mifaduhuʼö* ba dödömi wa Keriso andrö Soʼaya. Böi mamalö-malö mifaʼanö ami ba wameʼe fanema li na so zanofu khömi fanötöna niʼokhögömi. Hizaʼi, mihaogö wameʼe fanema li si fao sumange.
16 Mirorogö dödömi side-ide faböi taʼunö, enaʼö aila zangoʼaya yaʼami börö gamuatami si sökhi ba woloʼö Keriso. 17 Abölö sökhi tefakao ami börö wamalua si sökhi na itehegö Lowalangi, moroi na tefakao ami ba wamalua si lö sökhi. 18 Keriso manö niha satulö, mate ia salahi niha si lö atulö. Ha sakali mate ia ba wangeheta horö ba solohe yaʼami khö Lowalangi. Labunu ia ba waʼaniha ba teʼorifi ia ba mboto eheha. 19 Börö me boto eheha ia, yaʼia zamaʼema turia khö ndra malaʼika si so ba gurunga, 20 si lö moloʼö li Lowalangi ba götö Noakhi, me ebolo dödö Lowalangi ba wombaloi famazökhi owo, sangorifi niha si lö atoto moroi ba nidanö yaʼia daʼö dawalu niha.
21 Daʼö amaedola wombayagö idanö, sangorifi yaʼami iadaʼa börö wemaoso Yesu Keriso. Famayagö idanö tenga ba wangeheta daʼi nösi, hizaʼi ba wangandrö tödö side-ide si lö sinegu khö Lowalangi. 22 Me no möi Yesu ba zorugo, dumadao ia ba gambölö Lowalangi. Laʼoʼö linia ira malaʼika, ira samatörö hegöi si so kuaso.