2 Moze

11 Ba imane Yehowa khö Moze, ”Ufuli zui uhuku Waraʼo sakali tö hegöi Miserai. Aefa daʼö, awena dania itehegö mofanö ami.+ Ifofanö saʼae ami moroi ba daʼö.+ 2 Fatunö ba ndraono Gizaraʼeli iadaʼa, he ira matua hegöi ira alawe, enaʼö laʼandrö gama-gama anaʼa faoma firö ba niha Miserai si faola omo khöra.”+ 3 Ifarou dödö niha Miserai andrö Yehowa enaʼö lahakhösi tödö ndraono Gizaraʼeli. Lafosumange sibai göi Moze iadaʼa ba danö Miserai ira sohalöwö khö Waraʼo hegöi ono mbanuania.

4 Aefa daʼö imane Moze khö Waraʼo, ”Daʼa niwaʼö Yehowa: ’Ba zi talu mbongi dania, utöröi danö Miserai,+ 5 ba mate fefu dania nono siaʼa ba Miserai,+ iʼotarai ba nono Waraʼo siaʼa si dadao ba dadaoma waʼarazo ofeta ba nono siaʼa khö zawuyu ira alawe sanutu bua nowi, ba fefu ziaʼa nono gurifö.+ 6 Terongo dania wangeʼesi sabölö-bölö ba danö Miserai. Lö irai alua daʼö ba lö göi saʼae alua dania.+ 7 Hizaʼi, lö alua daʼö ba ndraono Gizaraʼeli hegöi ba guriföra. Lö naʼi ikhauni ira asu, ba daʼö öʼila dania hewisa wamaböʼöni Yehowa salua ba ndraono Gizaraʼeli moroi ba niha Miserai.’”+ 8 Imane göi Moze, ”Fefu zohalöwö ba Miserai hasambalö mangalulu ira khögu ba laʼandrö enaʼö aheta ndraʼaga ba daʼa, yaʼo hegöi soigu.+ Aefa daʼö, mofanö ndraʼo ba soi daʼa.” Ba mofönu sibai Moze me mofanö ia föna Waraʼo.

9 Aefa daʼö, imane Yehowa khö Moze, ”Lö ifondrondrongo wehedemö Faraʼo.+ Wa alua daʼö enaʼö oya ufalua nasa dandra sahöli-höli dödö ba danö Miserai.”+ 10 No anehe Waraʼo me lafalua dandra sahöli-höli dödö andrö ira Moze faoma Aʼaroni,+ hizaʼi itehegö Yehowa abeʼe högönia* irege lö itehegö mofanö ndraono Gizaraʼeli ba soinia.+