2 Moze
13 Ba fahuhuo Yehowa khö Moze, 2 ”Miʼamoniʼö* khögu fefu nono matua siaʼa* ba ndraono Gizaraʼeli. Tana khögu nono matua siaʼa hegöi urifö si matua si oföna tumbu.”+
3 Ba imane Moze ba ndraono Gizaraʼeli, ”Maʼökhö andre, no iheta ami Yehowa ba waʼabölö dangania.+ Börö daʼö, mitörö-törö tödömi ngaluo daʼa,+ ngaluo waʼahetami ba danö Miserai, nahia wangosawuyu* yaʼami. Gofu hadia zi no mufaruka ragi, ba tebai miʼa. 4 Maʼökhö andre ba mbaŵa Abibi,*+ aheta ami ba danö Miserai. 5 Na no iʼohe ami Yehowa ba soi niha Ganaʼana, niha Kheti, niha Gamori, niha Hewi, ba niha Yebusi,+ yaʼia daʼö tanö si fahöna susu ba wewani+ si no ifabuʼu khömi simane hölunia khö ndra tuami,+ lö tola löʼö mifalua wanörö tödö ba zalua andre ba mbaŵa daʼa. 6 Miʼa roti si lö mufaruka ragi fitu hari waʼara.+ Ba ngaluo si fitu, mifalua gowasa khö Yehowa. 7 Miʼa roti si lö mufaruka ragi sagötö zi fitu hari,+ ba tebai so ragi ba zi fasuimi+ mazui hadia ia zi no mufaruka ragi. 8 Ba luo daʼö mifatunö ba ndraonomi, ’Wa tafalua daʼa, tandra wa tatörö tödöda nifalua Yehowa khöda me aheta ita ba Miserai.’+ 9 No iheta ami Yehowa moroi ba danö Miserai börö waʼabölö dangania. Andrö wa mufalua gowasa daʼa enaʼö lö olifu ami zalua andrö, hulö na no tesura ba dangami hegöi ba gangangomi.*+ Daʼö mbörö wa tola midunö-dunö goroisa Yehowa. 10 Böi zi lö mifalua gamakhoita daʼa ero röfi ba ginötö si no muhonogöi.+
11 ”Ba ginötö iʼohe ami Yehowa ba danö Ganaʼana, soi nifabuʼunia si no möi ia ba hölu khömi hegöi khö ndra tuami wa hasambalö ibeʼe khömi,+ 12 lö tola löʼö mibeʼe khö Yehowa nonomi siaʼa, simanö göi ziaʼa nono gurifömi si matua. Tana khö Yehowa fefu nono matua siaʼa hegöi urifö si matua.+ 13 Ero sageu ziaʼa nono galide, mibeʼe sageu mbiri-biri ba wosanu. Na lö misanu, ba mifatö mbagi galide andrö. Fefu göi nonomi siaʼa enaʼö misanu.+
14 ”Na manofu ndraonomi, ’Hadia geluaha daʼa?’ ömane khönia, ’No iheta ita Yehowa faoma tangania sabölö moroi ba danö Miserai, nahia wangosawuyu yaʼita.+ 15 Me abeʼe högö Waraʼo ba lö itehe mofanö ita,+ ibunu fefu nono siaʼa Yehowa ba danö Miserai, iʼotarai nono siaʼa ba niha ofeta ba ziaʼa nono gurifö.+ Daʼö mbörö wa hasambalö tabeʼe khö Yehowa ziaʼa guriföda si matua. Fefu göi nono siaʼa ba nösi nomoda hasambalö tasanu.’ 16 No iheta ita Yehowa ba danö Miserai faoma tangania sabölö. Na tafalua gowasa daʼa ba lö olifu ami zalua andrö, hulö na no tesura ba dangami hegöi ba gangangomi.”*+
17 Me itehegö Faraʼo mofanö ndraono Gizaraʼeli, lö ifatörö ira Lowalangi ba soi niha Wilisiti hewaʼae ahatö daʼö, börö me no iwaʼö, ”Na fasuwö ira, tola manö faböʼö gera-erara ba lafuli ira ba danö Miserai.” 18 Börö daʼö, iwaʼö Lowalangi ba ndraono Gizaraʼeli enaʼö latörö lala samasui, sanörö tanö si mate sahatö ba Nasi Soyo.+ No teʼoli ndraono Gizaraʼeli wofanö moroi ba danö Miserai, hulö ngawawa zaradadu. 19 Iʼohe göi döla Yosefo andrö Moze, börö me no ibeʼe ba hölu ngaʼötö ndraono Gizaraʼeli Yosefo mböröta. Imane Yosefo, ”Hasambalö itolo ami Lowalangi. Börö daʼö, mifabuʼu khögu wa miʼohe dölagu moroi ba daʼa.”+ 20 Mofanö ira iʼotarai Zukhota ba lafazökhi nosera ba Getama, ba zinga danö si mate.
21 Yehowa zi so tanö fönara ba wanuturu lalara. Ba zi maʼökhö, iʼogunaʼö döla lawuo,+ ba zi bongi iʼogunaʼö döla galitö enaʼö mohaga lalara. Daʼö mbörö wa tola mofanö ira ba zi maʼökhö hegöi ba zi bongi.+ 22 Lö tebulö fönara döla lawuo ba zi maʼökhö, simanö göi döla galitö na ba zi bongi.+