2 Moze
21 ”Daʼa gangetula huku si lö tola löʼö öfatunö khöra:+
2 ”Na miʼöli samösa zawuyu moroi ba niha Heberaiʼo,+ tobali ia sawuyumi sagötö zi önö fakhe. Hizaʼi ba ndröfi si fitu, miʼefasi ia lö böli.+ 3 Na ha samösa ia me awena tobali ia sawuyumi, ba ha yaʼia niʼefasi. Hizaʼi, na so woʼomonia me tobali ia sawuyumi, ba mifaogö khönia. 4 Na ifangowalu ia sokhö yaʼia, ba tumbu moroi khö woʼomonia andrö nono matua mazui ono alawe, tobali tana khö zokhö yaʼia woʼomonia ira alawe awö nononia fefu. Ba ginötö muʼefasi zawuyu daʼö, ha yaʼia zi tola mofanö.+ 5 Hizaʼi, na lö omasi mofanö zawuyu andrö ba imane, ’Uʼomasiʼö zokhö yaʼo, foʼomogu awö ndraonogu. Lö omasido mofanö,’+ 6 iʼohe ia sokhö yaʼia ba itendroʼö zawuyu andrö ba mbawandruhö mazui ba döla-döla mbawandruhö. Aefa daʼö, itögi dalinga zawuyu andrö ba Lowalangi sindruhu zamaduhuʼö.* Ba tobali ia sawuyu sagötö faʼara.
7 ”Na so nono alawe nifamawa namania tobali sawuyu, lö teʼefaʼö ia simane na muʼefasi zawuyu ira matua. 8 Na lö omasi khönia zokhö yaʼia ba lö ibaliʼö foʼomonia ba döi, hizaʼi omasi ia ifamawa ba niha böʼö, tebai ifamawa ia sokhö yaʼia ba niha baero börö me no isawö mbuʼusa linia sokhö yaʼia. 9 Na ibeʼe nihalö zawuyu andrö khö nononia, enaʼö simane ononia zawuyu andrö ba wamaigi zokhö yaʼia. 10 Na ifuli mangowalu nono zokhö yaʼia, tebai iböhöli wameʼe balazo, nukha, ba ifalua woʼömönia ba waʼorudu+ khö woʼomonia si oföna. 11 Na lö ibeʼe khö woʼomonia zi tölu ngawalö andrö, tola mofanö ia ba lö hadöi si tobali foʼömönia.
12 ”Na so zamözi awönia irege mate, hasambalö labunu ia.+ 13 Hizaʼi na lö iʼodödögö wamunu niha daʼö, ba itehegö alua daʼö Lowalangi, tola moloi ia ba nahia si no utatugöi.+ 14 Na so zamunu awönia börö waʼabao dödönia ba niha daʼö,+ hasambalö labunu ia hewaʼae na moloi ia ba naha wanunu sumange khögu ba wangalui folumöʼö.+ 15 Niha samözi amania mazui inania, hasambalö labunu ia.+
16 ”Na so zanagö niha+ ba ifamawa mazui laʼila wa no itaha niha,+ hasambalö labunu ia.+
17 ”Niha sangelifi amania mazui inania, hasambalö labunu ia.+
18 ”Na so darua zi faʼudu, ba itebu nawönia faoma kara mazui itezu* ba lö mate niha daʼö hizaʼi iʼofökhöi irege tebai ifazawa ia ba naha wemörönia, daʼa zinangea mufalua: 19 Na tola mosindro ba mamake siʼo niha nibözi andrö, lö lahuku niha samözi yaʼia. Hizaʼi, moguna iʼasogö mbalazo niha daʼö ofeta döhö ia ba tola mohalöwö saʼae.
20 ”Na so zamözi sawuyunia ira matua mazui ira alawe faoma siʼo irege mate, hasambalö labunu ia.+ 21 Hizaʼi, na mate zawuyu daʼö mahemolunia mazui ba zi dua wongi, lö lahuku niha daʼö börö me no taya zawuyunia niʼölinia faoma kefe.
22 ”Na so niha si faʼudu ba latimba ndra alawe sanabina irege tumbu nononia hewaʼae tenga inötö waʼatumbu nasa,+ ba lö si mate* ndra alawe daʼö mazui ononia si tumbu, niha si fasala daʼö zamuʼa niʼandrö woʼomo ndra alawe andrö. Faʼebuania enaʼö si fao dödö zangetuʼö huku.+ 23 Hizaʼi na mate ndra alawe daʼö mazui ononia, noso wangali noso,+ 24 hörö wangali hörö, ifö wangali nifö, tanga wangali danga, ahe wangali gahe,+ 25 sakhozi wangali zakhozi, sokho wangali zokho, selezitö wangali zelezitö.
26 ”Na so zamözi hörö zawuyunia ira matua mazui sawuyunia ira alawe irege balunö, itehegö mofanö zawuyu andrö si tobali fangali ba hörönia.+ 27 Na so zamözi sawuyunia ira matua mazui sawuyunia ira alawe irege adeha nifö, itehegö mofanö zawuyu andrö si tobali fangali ba nifönia.
28 ”Na so zawi sanandru ira matua mazui ira alawe irege mate, sawi daʼö latebu faoma kara irege mate.+ Tebai muʼa nagolenia ba lö lahuku zokhö sawi andrö. 29 Na so zawi sasese fatandru ba lö ikuru sokhö yaʼia hewaʼae no lafangelama irege ibunu samösa ndra matua mazui ira alawe, latebu faoma kara zawi daʼö irege mate ba labunu göi zokhö yaʼia. 30 Hizaʼi, na laʼandrö khö zokhö urifö andrö enaʼö ibeʼe zi tobali höli nosonia, ibeʼe simane faʼebua si no latatugöi khönia. 31 Simanö göi huku nifatörö ba zokhö sawi sanandru ono matua mazui ono alawe. 32 Na itandru zawuyu ira matua mazui sawuyu ira alawe, sokhö sawi daʼö ibuʼa 30 ngawua firö* khö zokhö sawuyu andrö, ba sawi daʼö latebu faoma kara irege mate.
33 ”Na so zamokai tögi si no mubalugö mazui ikhao ba lö ibalugö irege aekhu bakha zawi mazui kalide, 34 ibeʼe wogati+ khö zokhö urifö, ba tobali tana khönia gurifö si no mate andrö. 35 Na so zawi samunu sawi niha böʼö, ba laʼamawa zawi sauri ba labagi dua mbölinia. Labagi dua göi zawi si no mate. 36 Hizaʼi, na no iʼila sokhö sawi andrö wa asese fatandru zawinia ba lö ikuru, ibeʼe sageu zawi si tobali fogati ba tobali tana khönia zawi si no mate andrö.