2 Moze
31 Ba fahuhuo zui Yehowa khö Moze, 2 ”No ufili Mbesaleʼeli+ ono Guri ono Huri moroi ba mado Yehuda.+ 3 Ubeʼe khönia gehehagu niʼamoniʼö, faʼatua-tua, faʼaboto ba dödö, fangiʼila, ba onekhe fatuka, 4 ba wamazökhi duma-duma domosa sedöna muʼehaogö, mamazökhi gama-gama moroi ba ganaʼa, firö, ba tembaga, 5 lataba ba lafaʼanö gara sebua böli,+ ba oya ngawalö gama-gama moroi ba geu.+ 6 Ufataro göi Goholiabi+ ono Gahizamakhi moroi ba mado Dano ba wanolo yaʼia. Ubeʼe waʼatua-tua khö ndra tuka enaʼö tola lafalua niʼoroiʼögu khöu,+ yaʼia daʼö 7 ose waʼowulo,+ tawöla Famaduhuʼö,+ lagö-lagö dawöla,+ ba fefu gama-gama ba nose andrö, 8 meza+ awö gama-gamania, naha wandru moroi ba ganaʼa si sökhi awö gama-gamania,+ naha wanunu sumange somuhua,+ 9 naha wanunu sumange nitunu+ awö gama-gamania, baʼa nidanö awö duwu-tuwunia,+ 10 nukha si sökhi fanoso, baru niʼamoniʼö khö Gere Aʼaroni, baru ndraononia matua ba wangai halöwö tobali ere,+ 11 fanikha famataro,* ba sumange somuhua soguna ba naha niʼamoniʼö.+ Lafazökhi daʼö simane niʼoroiʼögu khöu.”
12 Aefa daʼö, imane Yehowa khö Moze, 13 ”Waʼö ba ndraono Gizaraʼeli, ’Sabölö moguna yaʼia daʼö mifalua zabato khögu+ börö me daʼö dandra mbuʼusa ligu khömi. Daʼö zamasugi ba dödömi götö-götö waʼara wa yaʼo Yehowa zangamoniʼö yaʼami. 14 Mifalua Zabato börö me niʼamoniʼö ngaluo andrö ba khömi.+ Mibunu niha sanawö oroisa sanandrösa ba zabato. Na so zohalöwö ba ngaluo daʼö, hasambalö mibunu.*+ 15 Önö ngaluo tola mohalöwö ami, hizaʼi ngaluo si fitu andrö sabato, ngaluo wolombase.+ Niʼamoniʼö ngaluo daʼö khö Yehowa. Gofu haniha zohalöwö ba ngaluo Sabato, hasambalö mibunu. 16 Enaʼö lafalua Zabato iraono Gizaraʼeli. Moguna latörö tödöra ginötö daʼö götö-götö waʼara. Daʼa mbuʼusa ligu si lö tebulö irugi zi lö aetu. 17 Sabato andre zi tobali tandra mbuʼusa li Yehowa ba ndraono Gizaraʼeli+ sagötö faʼara börö me önö hari wamazökhigu banua si yawa awö danö, hizaʼi molombase+ ndraʼo ba ngaluo si fitu.’”
18 Me no awai fahuhuo ia khö Moze ba Hili Zinaʼi, ibeʼe khönia Lowalangi dua görö gara wanura Famaduhuʼö,+ kara nisura Lowalangi faoma turunia.+