2 Moze
8 Ba imane Yehowa khö Moze, ”Aeʼe falukhaisi Waraʼo. Fatunö khönia, ’Daʼa niwaʼö Yehowa: ”Tehegö mofanö nono mbanuagu enaʼö lafosumange ndraʼo.+ 2 Na lö ötehegö mofanö ira, ba uʼasogö dalaho ba wamakao soimö.+ 3 Afönu talaho Nungo Nidanö Nilo, ba möi yomo ba gödo razo khöu, ba mbateʼemö, ba naha wemörömö, ba nomo ndra sohalöwö khöu hegöi ba nono mbanuamö, bakha ba naha wamogö roti hegöi ba karawa naha wamaruka roti.+ 4 Ba yaʼugö hegöi ira sohalöwö khöu awö nono mbanuamö maʼafefu, ihawui ami talaho andrö.”’”
5 Aefa daʼö imane Yehowa khö Moze, ”Fatunö khö Gaʼaroni, ’Halö ziʼomö ba fazawa gamaudu nungo nidanö fefu, mbombo, awö mbaʼa nidanö enaʼö tohare dalaho ba lahawui Miserai.’” 6 Ba ifazawa ziʼonia Aʼaroni ba gamaudu nidanö ba Miserai. Lö ara, tohare dalaho soya ba lahawui Miserai. 7 Ba lafalua göi zimane daʼö ira segebua elemu ba Miserai, laʼogunaʼö waʼabölöra si tobini. Laʼasogö dalaho ba lahawui Miserai.+ 8 Aefa daʼö, imane Faraʼo khö Moze ba Aʼaroni, ”Utehegö mofanö nono mbanuami ba wameʼe sumange nitunu khö Yehowa. Börö daʼö, miʼandrö khö Yehowa enaʼö lö ihawui ndraʼo saʼae talaho andrö hegöi ono mbanuagu.”+ 9 Imane Moze khö Waraʼo, ”Lau, uʼoʼö niwaʼömö. Uʼandrö khö Lowalangi enaʼö iheta fefu dalaho daʼa ba gödo razo khöu, simanö göi ba nomo ndra sohalöwö khöu awö nono mbanuau. Ha ba Nungo Nidanö Nilo so dalaho daʼö fefu. Tola öfatunö hawaʼara ufalua daʼö.” 10 Imane Faraʼo, ”Mahemolu.” Imane Moze, ”Lau. Ufalua daʼö enaʼö aboto ba dödöu wa lö hadöi simane Lowalangima Yehowa.+ 11 Lö saʼae tefakao ndraʼugö, ira sohalöwö khöu, ono mbanuau, hegöi ba nomo misa börö dalaho andrö. Ha ba Nungo Nidanö Nilo+ so dalaho daʼö fefu.”
12 Me no mofanö Moze faoma Aʼaroni föna Waraʼo, mangandrö Moze khö Yehowa enaʼö iheta fefu dalaho andrö niʼasogönia khö Waraʼo.+ 13 Ifondrondrongo Yehowa wangandrö Moze, ba mate fefu dalaho si so ba nomo, ba golayama hegöi ba danö Miserai. 14 Ba laʼowuloi gamatela dalaho andrö ira niha Miserai ba fahöna waʼoya irege aböu oboula soi daʼö. 15 Me iʼila Faraʼo lö hadöi saʼae talaho, ifuli zui abeʼe högönia*+ ba lö ifondrondrongo wehede Moze hegöi Aʼaroni, simane niwaʼö Yehowa.
16 Imane zui Yehowa khö Moze, ”Waʼö khö Gaʼaroni, ’Fazawa ziʼomö ba bözi tou danö, ba tobali di awu fefu gawu-gawu ba Miserai.’” 17 Ba lafalua daʼö. Ifazawa ziʼonia Aʼaroni ba ibözi tou danö. Ba tobali di awu fefu gawu-gawu ba Miserai sangusu niha hegöi urifö.+ 18 Latandraigö lafalua zimane daʼö ira segebua elemu, laʼogunaʼö waʼabölöra si tobini. Latandraigö wangaʼasogö di,+ hizaʼi tebai lafalua. Fefu ndri awu andrö lahawui niha awö gurifö. 19 Börö daʼö lamane ira segebua elemu andrö khö Waraʼo, ”Faʼabölö* Lowalangi daʼö!”+ Hizaʼi, lö tebulö waʼabeʼe högö* Waraʼo ba lö ifondrondrongo niwaʼö Moze hegöi Aʼaroni, simane niwaʼö Yehowa.
20 Ba imane Yehowa khö Moze, ”Mahemolu sihulö wongi, aeʼe ba Nungo Nidanö Nilo. Möi Waraʼo ba daʼö. Na tohare ia ba fatunö khönia, ’Daʼa niwaʼö Yehowa: ”Tehegö mofanö nono mbanuagu enaʼö lafosumange ndraʼo. 21 Na lö ötehegö mofanö nono mbanuagu, ba uʼasogö ndri segebua* sangahawui yaʼugö, ira sohalöwö khöu, ono mbanuau hegöi ba nomo misa. Fefu nomo ba Miserai afönu di segebua, simanö göi ba danö. 22 Ba luo daʼö, ulumöʼö Gosena, nahia si toröi ono mbanuagu. Lö hadöi di segebua ba daʼö.+ Awena dania öʼila wa yaʼodo Yehowa zi so ba danö daʼö.+ 23 Ufaböʼöni zalua ba nono mbanuagu moroi ba nono mbanuamö. Mahemolu alua dandra sahöli-höli dödö andre.”’”
24 Ba ifalua daʼö Yehowa. Oya sibai ndri segebua sangahawui gödo Waraʼo, omo ndra sohalöwö khönia hegöi tanö Miserai maʼasagörö.+ Tekiko soi daʼö börö ndri segebua.+ 25 Ba gafuriata imane Faraʼo khö Moze hegöi Aʼaroni, ”Miʼofanö, mibeʼe zumange nitunu khö Lowalangimi, hizaʼi ba daʼa manö.” 26 Imane Moze, ”Tebai. Ogoro dania niha Miserai na laʼila zumange nitunu nibeʼema khö Lowalangima Yehowa.+ Na mabeʼe zumange nitunu ba zanehe ira, hasambalö latebuga kara. 27 Lö tola löʼö möi ndraʼaga ba danö si mate ba wameʼe sumange nitunu khö Lowalangima Yehowa, simane niwaʼönia khöma. Tölu hari maʼogunaʼö ginötö weʼamöi ba daʼö.”+
28 Imane Faraʼo, ”Tola mofanö ami ba danö si mate ba wameʼe sumange nitunu khö Lowalangimi Yehowa. Hizaʼi, böi mifandröndröu ami. Miʼandrö khö Lowalangi enaʼö iheta fefu ndri daʼa.”+ 29 Imane Moze, ”Na no mofanö ndraʼo ba daʼa, ba uʼandrö khö Yehowa. Mahemolu, aheta fefu ndri daʼa ba gödo razo khöu, ba nomo ndra sohalöwö khöu hegöi ba nono mbanuau. Hizaʼi, böi fadaulu-daulu ndraʼaga. Tehegö mofanö nono mbanuama ba wameʼe sumange nitunu khö Yehowa.”+ 30 Aefa daʼö mofanö Moze föna Waraʼo ba mangandrö ia khö Yehowa.+ 31 Ifalua Yehowa niʼandrö Moze, ba moloi fefu ndri segebua andrö ba gödo Waraʼo, ba nomo ndra sohalöwö khönia, hegöi ba nono mbanuania. Sambua lö si toröi. 32 Ba ifuli zui abeʼe högö Waraʼo, lö itehegö mofanö ndraono Gizaraʼeli.