Yesaya
25 He Yehowa, yaʼugö Lowalangigu.
Ufolakhömi ndraʼugö, usuno döimö,
Börö me no öfalua zahöli-höli dödö,+
Ngawalö zi no öʼera-era* iʼotarai me mböröta;+
Lö si faröi ndraʼugö+ ba tola mufaduhusi tödö.
2 No öbaliʼö adudula gara mbanua sebua,
Banua si no mufasui öli tobali akhökhöla.
Lö hadöi saʼae banua si no lafobaʼa-baʼa ba niha baero;
Ba lö irai mufuli mufasindro mangawuli.
3 Daʼö mbörö wa lafolakhömi ndraʼugö soi sabölö;
Ba laʼataʼufi ndraʼugö soi samuʼi.+
4 Tobali ndraʼugö baʼa-baʼa ba niha si lö faʼabölö,
Baʼa-baʼa ba niha si numana si göna abula dödö,+
Nahia wolumöʼö moroi ba deu toho,
Nahia wolombase ba waʼaukhu zino.+
Ba ginötö mofönu niha samuʼi simane teu toho si göna ba dowa,
5 Öduhö mbawa niha baero ba waʼakalirura,
Simane faʼaukhu zino ba danö si mate.
Öduhö mbawa niha safaito irege lö manunö ira saʼae,
Simane faʼaukhu zino na ibalugö ia lawuo.
6 Ba hili daʼa,+ ifalua gowasa sebua Yehowa samatörö saradadu zorugo ba ngawalö soi,
Ibeʼe gö sabölö sökhi,+
Ö fondrege zi sökhi,*
Iʼasogö göi nagu si no mufili,*
Agu si no mutafi.
7 Ba hili andre, iheta* mbaʼa-baʼa sombalugö ngawalö soi
Hegöi balu-balu högö sombalugö ngawalö mado.
8 Iheta* waʼamate sagötö faʼara,+
Iʼosi dawa hörö ba mbawa niha fefu+ Lowalangi Yehowa Fondrege Zalawa.
Iheta wangoʼaya ba nono mbanuania ba zi sagörö ulidanö,
Börö me Yehowa samösa zangumaʼö.
9 Ba ngaluo daʼö lamane,
”Hiza! Daʼa Lowalangida!+
Daʼa Yehowa!
Khönia manötöna ita.
Miʼaine, dataʼomusoiʼö ba taʼowua-wuaʼö dödöda, börö me yaʼia zangorifi yaʼita.”+
10 Tanga Yehowa dania zolumöʼö* hili andre,+
Ba lahundra-hundra dania Moabi ba nahiania,+
Simane töla wakhe nihundra-hundra ba naha zi taʼunö.
11 Ifadölö dangania ba wamözi Moabi,
Simane niha solangi na ifadölö dangania ba wolangi,
Ba ihöndrögö waʼasiliyawa Moabi+
Ba waʼonekhe dangania.
12 Idudugö dania mbanuami
Si no mufasui towa salawa;
Idudugö irege fadaya tou ba danö ba tobali gawu-gawu.