Yesaya
56 Daʼa niwaʼö Yehowa:
2 Yaʼahowu niha samalua daʼa
Ba si lö mamöhöli wamalua yaʼia,
Samalua Sabato ba si lö manaʼunöisi ngaluo andrö+
Ba sanaha tangania enaʼö lö ifalua zi lö sökhi.
3 Böi lamane niha si fatewu samosumange Yehowa,+
’Hasambalö ifasambua ndraʼo Yehowa moroi ba nono mbanuania.’
Ba böi imane niha si lö ono,* ’Hiza! Hulö geu soköli ndraʼo.’”
4 Daʼa niwaʼö Yehowa ba niha si lö ono samalua sabato khönia,* soloʼö somasi ia ba si lö mamöhöli buʼusa linia:
5 ”Uhenaigö dania khöra sambua nahia hegöi töi ba nomogu,
Sabölö sökhi moroi ba nono matua hegöi ono alawe.
Ubeʼe khöra döi si lö tebulö,
Töi si lö irai taya.
6 Niha si fatewu samosumange Yehowa ba sangai halöwö khögu,
Sangomasiʼö töi Yehowa,+
Ba somasi möi enonigu,
Fefu zamalua Sabato ba si lö manaʼunöisi,
Ba si lö mamöhöli fawuʼusa li andrö khögu,
7 Uʼohe göi ira ba hili niʼamoniʼö andrö khögu+
Ba uʼomusoiʼö dödöra ba nomo wangandrö khögu.
Utema dania zumange nitunu hegöi sumange tanö böʼö nibeʼe ba naha wanunu sumange khögu.
Ba lafotöi dania nomogu andrö, omo wangandrö ba ngawalö soi.”+
8 Imane Yehowa Lowalangi Fondrege Zalawa, sangowuloi iraono Gizaraʼeli+ si no muzawili,
”Baero zi no uʼowuloi andre, uʼowuloi göi niha böʼö khönia.”+
9 Miʼowuloi ami, he yaʼami urifö si so ba danö hegöi si so ba gatua maʼafefu,
Miʼaine ba milau manga.+
10 No auʼa zanaro andrö+ ba lö khöra foʼameʼegö tödö.+
Hulö nasu si lö hede-hede ira ba si tebai mukau.+
Mörö ira ba faseha-sehanu; omasi sibai ira wemörö.
11 Hulö nasu soluʼa-luʼa ira;
Lö irai ahono dödöra ba zi no so.
Yaʼira andrö kubalo si lö mangila hadia ia,+
Ba oi zara latörö lalara zamösana;
Faoma laʼalui zohare ira ba lö latörö zindruhu lamane,
12 ”Miʼaine, daʼuhalö nagu,
Ba tabadu irege mabu ita.+
Fagölö ngaluo maʼökhö andre ba ngaluo mahemolu, ba abölö baga nasa moroi ba daʼö!”