Zefania
2 Fatua lö ifalua gangetulania Lowalangi,
Fatua lö tohare ngaluo andrö hulö guliho nitöri nangi,
Fatua lö itörö ami alitö wönu Yehowa,+
Fatua lö göna khömi wönu Yehowa,
3 Miʼalui Yehowa,+ he yaʼami si so fangide-ngideʼö ba gulidanö,
Samalua amakhoitania* satulö.
Mifalua zatulö, ba miʼokhögö wangide-ngideʼö.
Maʼatö telumöʼö* ami na tohare wönu Yehowa.+
4 Börö me muröi dania mbanua Gaza;
Ba tobali banua si lö niha-niha Gasekalo.+
Mufofanö nono mbanua Gasoto ba zi maʼökhö,
Ba mudeha mbanua Nekerona.+
5 ”Alai niha si toröi ba zinga nasi, soi niha Gereti!+
No iwaʼö Yehowa wa hasambalö ihuku ami.
Ududugö göi Ganaʼana, banua niha Wilisiti,
Irege lö hadöi si toröi ba daʼö.
6 Tobali dania benua soduʼu mbanua si so ba zinga nasi,
Ba so ba daʼö mbaʼa nikhao khö ndra kubalo hegöi kandra mbiri-biri nifazökhi moroi ba gara.
7 Daʼö dania zi tobali banua niha Yehuda si toröi.+
Ba daʼö manga ira.
Ba nomo si so ba Gasekalo mörö ira ba zi bongi.
8 ”No urongo wangoʼaya moroi ba Moabi+ ba fangailasi moroi ba niha Gamoni,+
Sangoʼaya ono mbanuagu ba sametaʼu yaʼira si fao faʼasiliyawa ba worabu banuara.”+
9 Börö daʼö möi ba hölu Yehowa samatörö saradadu zorugo, Lowalangi ndraono Gizaraʼeli,
”Faya wa no sauri ndraʼo na lö tobali simane Sodoma dania Moabi,+
Ba tobali simane Gomora niha Gamoni,+
Nahia safönu duʼu sodoi, tanö soʼasio ba tanö si mate sagötö faʼara.+
Möi dania nono mbanuagu si toröi ba worabu yaʼira,
Ba möi soigu andrö si toröi ba worabu banuara.
10 Daʼa zulö khöra ba waʼasiliyawara,+
Börö me no laʼoʼaya ba no fayawa ira ba nono mbanua Yehowa samatörö saradadu zorugo.
11 Ifetaʼu ira* Yehowa,
Börö me ihori dania fefu lowalangi si so ba gulidanö.
12 He yaʼami niha Gaitiofia, ba mbawa wödagu mate ami.+
13 Ifazawa dangania gamaudu tanö yöu ba wangohori Asiria.
Ibaliʼö tanö si lö niha-niha mbanua Niniwe+ ba si lö idanö simane tanö si mate.
14 Oya ngawalö gurifö awö gutu ndruʼu si toröi ba mbanua daʼö.
Mörö wofo pelikan hegöi bogo ba zinga gehomonia si no adudu.
Terongo li wofo* moroi ba zandrela.
So gadudula föna mbawandruhö,
Ba no muröi manö mbagolö eresi andrö ba nangi awö deu.
15 Daʼa mbanua sasiliyawa sangumaʼö wa lö hadöi sametaʼu yaʼia,
Sangumaʼö tödönia, ’Yaʼo zabölö pade, lö hadöi si tola molawa yaʼo.’
Muhokha mbu niha sangila yaʼia.
Tobali ia naha wemörö gutu ndruʼu.
Dozi niha sanörö daʼö, laʼoʼaya ba lafalikhö-likhö högöra.”*+