Nisura Mareko
5 Aefa daʼö larugi yefo nasi ba mbanua niha Gerasa.+ 2 Me awena sibai möi tou Yesu ba dundraha, tohare samösa ndra matua nifakao malaʼika si lö sökhi iʼotarai lewatö, ifalukhaisi Yesu. 3 Ba lewatö andrö toröi ia. Samösa lö si tola mamöbö yaʼia me luo daʼö, hewaʼae laʼogunaʼö rate. 4 No asese laböbö ia faoma rate hegöi bilagu. Hizaʼi, tola iʼetuʼö rate ba ifatö mbilagu andrö. Lö hadöi niha sabölö si tola manaha yaʼia. 5 Bongi maʼökhö muʼao-ao ia ba lewatö hegöi ba hili misa. Ifesokho mbotonia faoma kara. 6 Me iʼila Yesu moroi ba zaröu, fagohi ia ituhi danö föna Yesu.+ 7 Ebua linia weʼao imane, ”He Yesu, Ono Lowalangi Fondrege Zabölö, hana wa möiʼö ba daʼa? Ae ba hölu ba döi Lowalangi wa lö öfakao ndraʼo.”+ 8 Wa iwaʼö wehede daʼö börö me imane khönia Yesu, ”Ae baero moroi ba niha daʼö malaʼika si lö sökhi.”+ 9 Manofu khönia Yesu, ”Haniha döimö?” Itema li, ”Töigu Legio, börö me ato ndraʼaga.” 10 Iforege wangandrö khö Yesu enaʼö lö ifofanö malaʼika si lö sökhi andrö moroi ba mbanua daʼö.+
11 Me luo daʼö, so ngawawa mbawi+ si manga-manga ba hili.+ 12 Laʼandrö khönia ira malaʼika si lö sökhi andrö, ”Fatengega ba mbawi daʼö.” 13 Itehegö khöra Yesu. Möi baero malaʼika si lö sökhi andrö moroi ba mboto niha daʼö, lafatewu ira ba mbawi, mato 2.000 ngaʼeu waʼoya. Aefa daʼö manaoka fefu mbawi andrö moroi ba hili lafazaumba ira si tou ba nasi. 14 Moloi zanaro bawi ba lafatunö zalua andrö ba mbanua sebua hegöi ba zi fasui yaʼira. Tohare fefu niha ba wamaigi hadia zalua.+ 15 Lafalukhaisi Yesu ba laʼila niha nifakao malaʼika si lö sökhi andrö, no modao-dao ia, no ifake nukha ba lö owöhö ia saʼae. Me laʼila daʼö oi so waʼataʼura. 16 Niha si no mangila, ladunö-dunö ba niha sangondrasi hadia zalua ba niha sofökhö daʼö hegöi ba mbawi andrö. 17 Laʼandrö khö Yesu enaʼö mofanö ia moroi ba mbanuara.+
18 Me möi Yesu ba dundraha, iʼandrö khönia niha nifakao malaʼika si lö sökhi no mege enaʼö fao ira.+ 19 Hizaʼi lö itehe khönia Yesu ba imane, ”Fuliʼö ba nomomi, ba tutunö fefu hadia nifalua Yehowa* khöu awö waʼahakhö dödö si no ötema.” 20 Mofanö niha daʼö, itutunö ba mbanua Dekafoli* fefu nifalua Yesu khönia. Ahöli-höli dödö zamondrongo.
21 Ifuli zui möi Yesu yefo nidanö, itörö dundraha. Me awena irugi zinga nasi,+ ato zangondrasi yaʼia. 22 Aefa daʼö, so samösa zohalöwö ba nahia waʼowulo* sotöi Yaʼiro si möi ba daʼö. Ituhi danö föna Yesu me falukha ira.+ 23 Hauga kali iforege khö Yesu, ”Abölö-bölö wökhö* nonogu alawe. Uʼandrö khöu ae ba nomogu, tufa tangau ia+ enaʼö döhö faböi mate.” 24 Ba möi Yesu, fao ira wofanö. Ato niha soloʼö yaʼia ba ladegeni ia moroi furi.
25 So ba daʼö ndra alawe sendro talu,+ no 12 fakhe+ göna khönia wökhö daʼö. 26 No oya itöröi zameʼe dalu-dalu, hizaʼi tefakao sibai waʼaurinia labeʼe. No ahori woʼölönia, hizaʼi lö döhö wökhönia, itugu abölö-bölö. 27 Me irongo duria sanandrösa khö Yesu, möi ia ba gotalua niha sato. Ihatöʼö ia moroi furi ba wombambaya ahe mbaru Yesu,+ 28 börö me iwaʼö tödönia, ”Na ubabaya manö gahe mbarunia, hasambalö döhö ndraʼo.”+ 29 Iʼanemaiʼö döhö wökhö andrö khönia. Irasoi ba mbotonia wa no döhö wökhö si tobali fangabu dödönia.
30 Taraso khö Yesu wa so waʼabölö+ saheta ba mbotonia. Ifakhölö ia wamaigi niha sato ba wanofu, ”Haniha zombambaya ahe mbarugu?”+ 31 Lamane ira nifahaʼönia, ”He Samahaʼö, hadia lö öʼila wa fasösö sibai niha furimö? Tobali, hana wa ösofu, ’Haniha zombambaya yaʼo?’” 32 Hewaʼae simanö, ifakhölö ia Yesu ba wamaigi haniha zombambaya yaʼia. 33 Iʼondrasi Yesu ira alawe andrö si fao faʼataʼu ba fanizi-nizi börö me iʼila hadia zalua ba mbotonia. Ituhi danö föna Yesu ba iʼombakhaʼö zindruhu. 34 Imane khönia Yesu, ”He onogu, no ifadöhö ndraʼugö famatimö. Ofanö, yaʼohahau dödöu.+ No döhö wökhö samakao yaʼugö.”+
35 Me fahuhuo nasa Yesu, so ösa niha si tohare moroi ba nomo Yaʼiro lamane, ”No mate nonomö! Böi saʼae fakao Zamahaʼö andrö.”+ 36 Hizaʼi, me irongo daʼö Yesu, imane khö Yaʼiro, ”Böi busi dödöu. Amati manö.”+ 37 Lö itehegö fao khönia gofu haniha manö baero Wetero, Yakobo, ba Yohane talifusö Yakobo.+
38 Me larugi nomo Yaʼiro, iʼila niha sato sibai ba daʼö, laduhugö wege-ege ba mangenu-ngenu ira.+ 39 Me möi ia bakha ba nomo imane khöra, ”Hana wa mege-ege ami ba kaliru sibai? Tenga si mate nono andre, ha si mörö.”+ 40 Ibörögö laʼigi-igiʼö Yesu niha sato. Hizaʼi, iʼandrö khöra enaʼö möi ira baero fefu. Ha satua nono andrö hegöi ira nifahaʼönia zi fao khö Yesu ba wangondrasi ono daʼö. 41 Igogohe danga nono daʼö imane, ”Talita kumi,” na lafoʼeluaha ia: ”He ono alawe, uwaʼö khöu, faoso!”+ 42 Iʼanemaiʼö maoso nono alawe andrö ba mowaö-waö ia. (No 12 fakhe ndröfinia.) Ahöli-höli dödö zatuania irege tebai lataha waʼomuso dödöra. 43 Hizaʼi, hauga kali iwaʼö khöra* Yesu enaʼö lö lafatunö zalua andre ba niha.+ Iwaʼö göi khöra enaʼö labeʼe gö nono andrö.