Nisura Luka
5 Samuza maʼökhö, me fasösö niha wangondrasi Yesu ba wamondrondrongo taromali Lowalangi, no mozizio Yesu ba danau Genesare.*+ 2 Iʼila dua rozi dundraha ba ngöfi, hizaʼi no möi tou zi fagai ba lasasai ndrialara.+ 3 Möi ia yawa ba dundraha si sara, yaʼia daʼö tundraha Zimoni, ba iʼandrö khö Zimoni enaʼö iʼalukhaini fandröndröu maʼifu moroi ba ngöfi. Aefa daʼö, modadao ia ba ibörögö ifahaʼö niha sato moroi ba dundraha andrö. 4 Me no aefa fahuhuo ia ba niha sato, imane khö Zimoni, ”Ohe dundraha daʼa ba zabakha, ba daʼö mibeʼe tou ndrialami.” 5 Itema linia Simoni, ”He Samahaʼö, no sara wongi marase ndraʼaga, ba lö hadöi sahuluga.+ Hizaʼi, me no öwaʼö ba uʼoʼö.” 6 Lö ara me no labeʼe tou ndrialara, oya sibai ahulu ira iʼa ba ibörögö asika ndriala.+ 7 Lakaoni nawöra ba dundraha tanö böʼö ba wangandrö tolo. Tohare ira ba faoma lafoʼösi dundraha si dua rozi irege arakhagö ahöndrö. 8 Me iʼila daʼa Fetero, ituhi danö föna Yesu imane, ”Böi fahatö ndraʼugö khögu Soʼaya, börö me niha sebua horö ndraʼo.” 9 Ahöli-höli dödönia hegöi si fao khönia, börö me simane daʼö waʼoya gahuluara, 10 simanö göi nawö Zimoni wohalöwö yaʼia daʼö Yakobo ba Yohane ono Zebedaiʼo.+ Hizaʼi, imane Yesu khö Zimoni, ”Böi ataʼufi. Iʼotarai iadaʼa tobali samaʼuʼu niha ndraʼugö.”+ 11 Aefa daʼö, laʼohe dundrahara ba ngöfi. Laröi fefu hadia ia ba laʼoʼö ia.+
12 Ba ginötö tanö böʼö, me so Yesu ba zi sambua banua, so samösa ndra matua safönu bou auri! Me iʼila Yesu, ituhi danö ba iʼangaröfili, ”He Soʼaya, na omasiʼö, tola öfadöhö ndraʼo.”+ 13 Iʼoroʼö dangania Yesu ba ibabaya. Imane, ”Omasido! Yadöhö ndraʼugö.” Iʼanemaiʼö taya mbou aurinia ba ginötö daʼö.+ 14 Aefa daʼö, ifaretakö ia Yesu enaʼö lö ifatunö ba niha böʼö. Imane khönia Yesu, ”Ofanö, ba ae foromaʼö ndraʼugö khö ndra ere. Beʼe zumange si no itatugöi Moze,+ si tobali tandra wa no döhö ndraʼugö.”+ 15 Hizaʼi, itugu tehöngö duria Yesu ba ato niha si tohare ba wamondrongo fehedenia ba enaʼö ifadöhö wökhöra.+ 16 Hewaʼae simanö, asese möi ia ba zi lö niha-niha, ilau mangandrö.
17 Samuza maʼökhö me mamahaʼö Yesu, so ndra Farizaiʼo hegöi samahaʼö Oroisa Moze si dadao ba daʼö. Tohare ira moroi ba mbanua Galilaia ba Yudea hegöi Yeruzalema. No ibeʼe Yehowa* kuaso khö Yesu ba wamadöhö.+ 18 Me luo daʼö, so zolohe khönia ira matua sombuyu-mbuyu töla si so ba gaso. Laforege wolohe yaʼia bakha ba nomo gamaudu föna Yesu.+ 19 Hizaʼi tebai latörö börö waʼato niha. Börö daʼö, manöi ira ba dete zagö, labokai ba ladada tou ndra matua sombuyu-mbuyu töla andrö fabaya gasonia, tefaudu föna Yesu. 20 Börö me iʼila wamatira, imane Yesu khö zombuyu-mbuyu töla andrö, ”No teʼefaʼö horöu.”+ 21 Ibörögö lafadunö-dunö daʼö ira Farizaiʼo hegöi sangila amakhoita ba lamane, ”Haniha ia andrö wa barani iʼoʼaya Lowalangi? Si tola mangefaʼö horö ha Lowalangi!”+ 22 Aboto ba dödö Yesu zi so ba gera-erara. Andrö imane khöra, ”Hana wa simane daʼö gera-erami? 23 Hezo zabölö aoha wangumaʼö, ’No teʼefaʼö horöu,’ mazui, ’Faoso ba ofanö’? 24 Hizaʼi, enaʼö aboto ba dödömi wa so kuaso ba Nono niha ba wangefaʼö horö ba gulidanö . . . ” Aefa daʼö, imane khö zombuyu-mbuyu töla andrö, ”Faoso, fazawa gasomö, ba angawuli ba nomo.”+ 25 Mozizio niha andrö fönara, ifazawa gasonia, aefa daʼö mangawuli ia ba nomo ba isuno Lowalangi. 26 Ahöli-höli dödö niha ba lasuno Lowalangi. Börö waʼahöli dödöra faoma lamane, ”Lö irai taʼila zimane daʼa!”
27 Mofanö Yesu ba iʼila samösa zanugi pajak sotöi Lewi si dadao ba gödo pajak. Imane khönia Yesu, ”Aine oʼö ndraʼo.”+ 28 Mosindro Lewi, iröi fefu hadia ia ba iʼoʼö Yesu. 29 Aefa daʼö, ifalua gowasa sebua ba nomonia Lewi nihenaigönia khö Yesu, ba ato zanugi pajak hegöi niha tanö böʼö si fao khöra wemanga.+ 30 Börö daʼö, ibörögö mukökö ndra Farizaiʼo hegöi sangila amakhoita khö ndra nifahaʼö Yesu. Lamane, ”Hana wa fao ami wemanga khö ndra sanugi pajak awö zebua horö?”+ 31 Itema lira Yesu, ”Tenga ba niha sabölö moguna doto, hizaʼi ba niha sofökhö.+ 32 Tenga ba wogaoni niha satulö möi ndraʼo, hizaʼi ba wogaoni niha sebua horö enaʼö lafalalini gera-erara.”+
33 Lamane khö Yesu, ”Asese fuasö nifahaʼö Yohane ba mangandrö ira soroi ba dödö, simanö göi nifahaʼö ndra Farizaiʼo. Hizaʼi, nifahaʼömö manga ira ba mamadu.”+ 34 Imane Yesu, ”Tebai mifaso zi fahuwu khö marafule enaʼö fuasö ira sagötö fefaora lö? 35 Hizaʼi, na irugi dania inötö tehalö marafule+ andrö moroi khöra, awena ba daʼö fuasö ira.”+
36 Ifatunö khöra gamaedola: ”Na so mbaru satua si no asika, lö hadöi labeʼe balo-balonia nukha si bohou. Na so zamalua daʼö, asika dania mbalo-balonia ba lö moadu ba nukha satua andrö.+ 37 Simanö göi, lö hadöi sangiröʼö agu si bohou ba naha* satua. Na ifalua daʼö, tola manö aboto nahania börö nagu si bohou no mege ba aduwa. Aefa daʼö tekiko nahania. 38 Si sökhinia, laʼiröʼö nagu si bohou ba naha si bohou. 39 Lö somasi mamadu agu si bohou na no aefa ibadu nagu si no ara börö imane dania, ’Abölö ami nagu si no ara andrö.’”