Nisura Yohane
4 Me iʼila Yesu* wa no larongo ira Farizaiʼo wa abölö ato nifahaʼö hegöi nibayagönia idanö+ moroi khö Yohane, 2 (sindruhunia tenga Yesu zamayagö idanö hizaʼi ira nifahaʼönia) 3 mofanö ia moroi ba Yudea numalö ba Galilaia. 4 Itörö mbanua Zamaria. 5 Ofeta ia ba zi sambua banua ba Zamaria nifotöi Sikhara, sahatö ba danö nibeʼe Yakobo khö nononia Yosefo.+ 6 So ba daʼö mbaʼa Yakobo.+ Börö waʼerege dödö ba lala, modadao Yesu ba zinga mbaʼa* andrö. Me luo daʼö, mato bözi 12 waʼalawa luo.*
7 Aefa daʼö, tohare samösa ndra alawe Zamaria ba wanaʼu idanö. Imane khönia Yesu, ”Hadia tola uʼandrö khöu nidanö?” 8 (Me luo daʼö, no mofanö ndra nifahaʼönia mowöli gö ba mbanua sebua.) 9 Imane ira alawe andrö, ”Hewisa wa tola öʼandrö khögu nidanö, yaʼugö niha Yahudi ba yaʼo niha Zamaria?” (Si toʼölönia, lö fariawö niha Yahudi ba niha Zamaria.)+ 10 Imane Yesu, ”Na öʼila mbuala moroi khö Lowalangi+ awö niha sangandrö idanö andre khöu, tatu manö öʼandrö khönia nidanö ba ibeʼe khöu nidanö fangorifi.”+ 11 Itema li, ”Lö hadöi khöu timba fanaʼu nidanö Pa, ba abakha sibai mbaʼa daʼa. Na simanö, hezo tola ösöndra nidanö fangorifi andrö? 12 No ibeʼe khöma mbaʼa daʼa tuama Yakobo. Moroi ba daʼa ihalö gönia idanö hegöi iraononia awö gurifönia. Lö abölö ebua ndraʼugö moroi khönia lö?” 13 Imane Yesu, ”Gofu haniha zamadu idanö daʼa hasambalö ifuli owökhi dödönia. 14 Hizaʼi, gofu haniha zamadu idanö nibeʼegu andre dania, lö irasoi waʼowökhi dödö.+ Idanö nibeʼegu andrö tobali umbu nidanö ba dödönia ba sameʼe faʼauri si lö aetu.”+ 15 Imane ira alawe andrö, ”He Pa, beʼe khögu nidanö daʼö, enaʼö lö owökhi dödögu saʼae ba lö mangörö-ngörö ndraʼo wanaʼu idanö ba daʼa.”
16 Imane Yesu, ”Ae kaoni woʼomou, akha möi ia ba daʼa.” 17 Itema li, ”Lö hadöi foʼomogu.” Imane Yesu, ”Atulö niwaʼömö, lö foʼomou. 18 No dalima saʼae woʼomou, ba tenga foʼomou ndra matua si fao khömö iadaʼa. Atulö niwaʼömö.” 19 Imane ira alawe andrö, ”Samaʼeleʼö ndraʼugö andre Pa.+ 20 Ba hili andre lafosumange Lowalangi ira tuama me föna, hizaʼi miwaʼö ba Yeruzalema mufosumange Lowalangi.”+ 21 Imane khönia Yesu, ”Yafaduhu dödöu, samuza inötö dania, tenga ba hili andre mazui ba Yeruzalema mifosumange Lowalangi. 22 Lö miʼila haniha nifosumangemi.+ Na yaʼaga, maʼila haniha nifosumangema börö me moroi ba niha Yahudi iʼotarai fangorifi andrö.+ 23 Hewaʼae simanö, so dania ginötönia, ba no irugi inötönia iadaʼa wa dozi samosumange sindruhu lafosumange Nama moloʼö fanuturu lala geheha niʼamoniʼö ba tefaudu ba zindruhu, börö me iʼalui Ama niha samosumange yaʼia simane daʼö.+ 24 Lowalangi andrö Eheha,+ ba niha samosumange yaʼia lö tola löʼö lafosumange moloʼö fanuturu lala moroi ba geheha niʼamoniʼö ba tefaudu ba zindruhu.”+ 25 Imane ira alawe andrö, ”Aboto ba dödögu wa tohare dania Mesia nifotöi Keriso andrö. Na tohare ia, iʼombakhaʼö khöma fefu hadia ia.” 26 Imane Yesu, ”Yaʼo niha andrö, si fahuo-huo khöu.”+
27 Ba ginötö daʼö tohare ndra nifahaʼönia. Tokea ira me laʼila fahuo-huo ia ba ndra alawe. Hizaʼi, lö sanofu hadia mbörö ba hana wa fahuo-huo ia khö ndra alawe andrö. 28 Aefa daʼö, iröi tou rumbi nidanö khönia ira alawe andrö, möi ia miyomo ba mbanua ifatunö ba niha sato, 29 ”Miʼaine, mifaigi niha sangombakha khögu fefu zi no ufalua. Te yaʼia andrö Keriso!” 30 Tohare niha sato moroi ba mbanua, möi laʼondrasi ia.
31 Gasa-gasa daʼö, laforege wangumaʼö khönia ira nifahaʼö, ”Ae manga Samahaʼö.”+ 32 Imane, ”So gögu yaʼi, ba lö miʼila hadia.” 33 Oi zara lamane ira nifahaʼö, ”Hadia so zameʼe gönia mege?” 34 Imane Yesu, ”Daʼö gögu yaʼia wamalua somasi zamatenge yaʼo+ hegöi ba wangasiwai halöwö nibeʼenia khögu.+ 35 Mimane wangumaʼö öfa waŵa tö mbaŵa wamasi, hizaʼi uwaʼö khömi: Mifaigi no aʼusö nowi ba tola mubasi.+ Iadaʼa, 36 no latema luora samasi ba laʼowuloi mbua ba waʼauri si lö aetu, irege faoma ohahau dödö zanaru hegöi samasi.+ 37 Sindruhu niwaʼö ba gamaedola: Samösa zananö ba samösa zamasi. 38 Ufatenge ami ba wamasi si lö nitarumi. No laforege wohalöwö niha böʼö, ba yaʼami zanema bua moroi ba waʼerege dödöra.”
39 Ato niha Zamaria ba mbanua andrö samati khö Yesu börö me ifaduhuʼö khöra ira alawe andrö wangumaʼö, ”No iʼombakhaʼö khögu fefu zi no irai ufalua.”+ 40 Me falukha ira khö Yesu, laʼandrö khönia ira niha Zamaria enaʼö toröi ia khöra, ba toröi ia ba daʼö dua hari waʼara. 41 Lua-luania, ato zi faduhu tödö ba wehedenia, 42 ba lamane khö ndra alawe andrö, ”Faduhu dödöma iadaʼa, tenga ha börö wehedemö. No marongo samösa ba aboto ba dödöma wa niha daʼa sindruhu sangorifi ösi gulidanö.”+
43 Me no aefa dua hari, mofanö ia moroi ba daʼö numalö ba Galilaia. 44 Sindruhunia, no iwaʼö Yesu wa lö lafosumange zamaʼeleʼö ba mbanuania.+ 45 Hizaʼi, me ofeta ia ba Galilaia, latemaʼö ia niha sato, börö me no laʼila fefu nifalua Yesu me möi ira ba gowasa ba Yeruzalema.+
46 Aefa daʼö, möi ia zui ba Kana ba Galilaia, ba daʼö no irai ibaliʼö nidanö tobali agu.+ So ba daʼö samösa zohalöwö ba gödo razo, mofökhö nononia ba Gafanauma. 47 Me irongo tohare Yesu moroi ba Yudea numalö ba Galilaia, ifalukhaisi Yesu iʼandrö enaʼö ifadöhö nononia, börö me arakhagö mate nononia andrö. 48 Imane khönia Yesu, ”Lö faduhu dödömi na lö miʼila dandra hegöi sahöli-höli dödö.”+ 49 Imane sohalöwö ba gödo razo andrö, ”He Soʼaya, ae khögu ba nomo fatua lö mate nonogu.” 50 Imane khönia Yesu, ”Angawuli, no döhö* nonomö.”+ Faduhu dödö ndra matua andrö ba wehede Yesu ba mofanö ia. 51 Ba wangawulinia, tohare ndra sawuyunia ba wangombakha wa no döhö nononia. 52 Manofu ia khöra hauga bözi ibörögö alö wökhö nono andrö. Lamane, ”Bözi satu waʼalawa luo* menewi alö waʼaukhunia.” 53 Itörö tödönia wa tefaudu ba ginötö daʼö me imane Yesu, ”No döhö nonomö.”+ Faduhu dödönia hegöi ösi nomonia maʼafefu. 54 Daʼö dandra sahöli-höli dödö si mendrua+ nifalua Yesu me möi ia ba Galilaia iʼotarai Yudea.