Nisura Yohane

7 Aefa daʼö, itöröi nasa Galilaia Yesu. Lö omasi ia möi ba Yudea börö me laʼalui lala wamunu yaʼia+ ira niha Yahudi. 2 Me luo daʼö, no arakhagö irugi inötö Gowasa Nose Lowalangi*+ ba niha Yahudi. 3 Lamane khönia ira akhinia ono matua,+ ”Aeʼe ba Yudea enaʼö laʼila nifaluamö ira nifahaʼöu. 4 Lö ibiniʼö si samösa niha nifaluania na omasi ia tehöngö. Börö me öfalua daʼa, oromaʼö ndraʼugö ba niha gulidanö.” 5 Sindruhunia, lö mamati khönia ndra akhinia.+ 6 Andrö imane khöra Yesu, ”Lö irugi inötönia khögu nasa,+ na ba khömi tola hawaʼara manö. 7 Lö hadöi dane-dane waʼafatiu dödö niha gulidanö khömi, hizaʼi fatiu dödö niha gulidanö khögu börö me ufaduhuʼö wa lö sökhi gamuatara.+ 8 Miʼae manö ba gowasa daʼö. Lö nasa möido me lö irugi inötögu.”+ 9 Me no aefa iwaʼö khöra daʼö, toröi ia nasa ba Galilaia.

10 Me no mofanö ndra akhinia ba gowasa daʼö, awena möi ia, ibiniʼö wofanö ba lö hede-hedenia. 11 Laʼalu-alui ia ira niha Yahudi ba gowasa daʼö. Lamane, ”Hezo niha daʼö?” 12 Ato göi zamadunö-dunö yaʼia. So zangumaʼö, ”Yaʼia niha si sökhi.” Tanö böʼö lamane, ”Löʼö, samaelungu niha ia.”+ 13 Hizaʼi, ataʼu ira wamadunö-dunö yaʼia föna niha sato börö ndra niha Yahudi.+

14 Me no irugi mamatonga wamaluara owasa andrö, möi Yesu bakha ba gosali ba mamahaʼö ia. 15 Ahöli-höli dödö niha Yahudi ba lamane, ”Hana wa oya iʼila nösi Mbuku Niʼamoniʼö niha daʼa?+ Lö irai tefahaʼö ia ba zekola agama.”*+ 16 Itema lira Yesu, ”Nifahaʼögu andre tenga moroi khögu, hizaʼi famahaʼö zamatenge yaʼo.+ 17 Niha samalua somasi Lowalangi aboto ba dödönia hadia famahaʼö moroi khö Lowalangi+ daʼa mazui moroi ba wangera-ngeragu samösa. 18 Haniha zi fahuhuo moroi ba wangera-ngerania, daʼö no sangalui lakhöminia samösa. Hizaʼi, haniha zangodödögö enaʼö tefolakhömi zamatenge yaʼia,+ daʼö niha si fahuhuo ba zindruhu ba lö falimosa ba dödönia. 19 No ibeʼe khömi Moze Goroisa lö?+ Hizaʼi, samösa lö ba gotaluami si no moloʼö Oroisa Moze andrö. Hana wa edöna mibunu ndraʼo?”+ 20 Latema linia, ”Te no möi ba dödöu Gafökha. Haniha zomasi mamunu yaʼugö?” 21 Itema lira Yesu, ”Ha sambua nifaluagu ba ahöli-höli dödömi fefu. 22 Simane daʼa, no ibeʼe khömi Moze goroisa sanandrösa ba wosuna.+ Tenga daʼö geluahania moroi khö Moze goroisa andrö, hizaʼi moroi khö ndra tuania me föna.+ Andrö wa misuna niha ba luo Sabato. 23 Na misuna niha ba luo Sabato enaʼö lö misawö Goroisa Moze, hana wa mofönu sibai ami me ufadöhö niha ba luo Sabato?+ 24 Böi mihuku niha moloʼö niʼila hörö, hizaʼi miʼatulöʼö wanguhukumi andrö.”+

25 Aefa daʼö, ibörögö so ösa niha Yeruzalema sangumaʼö, ”Hadia tenga daʼa niha sedöna labunu?+ 26 Mifaigi atö, fahuhuo ia föna zato ba lö hede-hedera khönia. Alai no laʼila ira sondröniaʼö wa yaʼia andrö Keriso. 27 Aboto ba dödöda hezo moroi niha daʼa.+ Sindruhunia, na tohare Keriso lö sangila hezo moroi mbörötania.” 28 Me mamahaʼö Yesu ba gosali, muʼao ia, ”Miʼila haniha ndraʼo, ba no aboto ba dödömi hezo uʼotarai. Tenga ba zomasi dödögu wa tohare ndraʼo,+ hizaʼi sindruhu-ndruhu so zamatenge yaʼo ba lö miʼila haniha ia.+ 29 Uʼila haniha ia,+ börö me tohare ndraʼo tobali salahinia ba yaʼia zamatenge yaʼo.” 30 Ibörögö laʼalui lala ba wondraʼu yaʼia,+ hizaʼi samösa lö si tola mombambaya yaʼia, börö me lö irugi inötönia.+ 31 Hewaʼae simanö, ato moroi ba gotalua niha sato andrö zamati khönia.+ Lamane, ”Na tohare Keriso, oya dandra sahöli-höli dödö nifaluania lö? Hadia tenga daʼö nifalua niha andrö iadaʼa?”

32 Larongo ira Farizaiʼo wa ato niha samadunö-dunö Yesu, andrö lafatenge zohalöwö ira Farizaiʼo hegöi kafalo gere ba wondraʼu yaʼia. 33 Aefa daʼö imane Yesu, ”Lö ara tö ginötögu wefao khömi, fatua lö ufulido khö zamatenge yaʼo.+ 34 Na miʼalui ndraʼo ba lö misöndra, ba tebai möi ami ba zi so yaʼo.”+ 35 Faoma lamane ira niha Yahudi, ”Hana, hezo möi ia irege tebai tasöndra ia? Hadia möi ia ba niha Yahudi si no muzawili ba gotalua niha Yunani ba ifahaʼö niha Yunani? 36 Hadia geluaha me iwaʼö, ’Na miʼalui ndraʼo ba lö misöndra, ba tebai möi ami ba zi so yaʼo’?”

37 Ba ngaluo safuria, ngaluo sebua ba gowasa andrö,+ mosindro Yesu ba muʼao ia, ”Na so zowökhi tödö, miʼondrasi ndraʼo ba wamadu idanö.+ 38 Dozi samati khögu tobali ia simane niwaʼö ba ayati daʼa: ’Moroi ba dödönia mangumbu nidanö fangorifi.’”+ 39 Eluaha niwaʼönia yaʼia daʼö sanandrösa ba geheha niʼamoniʼö nitema niha samati khönia. Irugi me luo daʼö, lö nasa nibeʼe khöra geheha andrö+ börö me lö mufolakhömi Yesu.+ 40 So ösa zamondrongo fehede daʼö lamane, ”Sindruhu-ndruhu wa Samaʼeleʼö nifabuʼu ia andrö.”+ 41 Tanö böʼö lamane, ”Yaʼia andrö Keriso.”+ So göi zangumaʼö, ”Tenga moroi ba Galilaia tohare Keriso lö?+ 42 Hadia tenga no iwaʼö Buku Niʼamoniʼö wa Keriso andrö maʼuwu Dawido+ moroi ba Mbetilekhema,+ banua Dawido?”+ 43 Faböʼö-böʼö niwaʼö niha sanandrösa khönia. 44 So ösa zomasi mondraʼu yaʼia, hizaʼi lö si tola mombambaya yaʼia.

45 Mangawuli ndra sohalöwö andrö ba lasofu khöra ira kafalo gere hegöi ira Farizaiʼo lamane, ”Hana wa lö miʼohe ia ba daʼa?” 46 Lamane ira sohalöwö, ”Lö irai maʼila so niha si fahuhuo simane daʼö.”+ 47 Aefa daʼö lamane ira Farizaiʼo, ”Alai göi na no ifaelungu ami. 48 Lö sondröniaʼö mazui ira Farizaiʼo si no mamati khönia lö?+ 49 Niha si göna fangelifi ndra niha daʼa, si lö mangila Oroisa Moze.” 50 Samösa moroi ba gotaluara zi no irai falukha khö Yesu sotöi Nikodemo imane khöra, 51 ”Hadia tenga no so ba Goroisa Moze wa tebai tahuku niha fatua lö tafondrondrongo ba taʼila gamuatania?”+ 52 Latema li, ”Tenga niha Galilaia ndraʼugö lö? Fareso manö Mbuku Niʼamoniʼö ba öʼila dania wa tenga moroi ba Galilaia tohare zamaʼeleʼö.”*