Famaʼeleʼö Nitema Yohane
6 Uʼila Nono Mbiri-biri+ andrö ibokai sambua wamotandro si fitu ngawua.+ Aefa daʼö, urongo me muʼao samösa moroi ba gotalua kerubi si daöfa,+ hulö weʼugu-ugu mbanua linia imane, ”Aine!” 2 Ba uʼila sageu kudo safusi.+ Si fakudo yawania no iʼohe wana sinali ba no tebeʼe khönia dakula.+ Mofanö ia ba wokalaisi udunia irege möna ia.+
3 Me ibokai wamotandro si dua Ono Mbiri-biri andrö, urongo li kerubi si dua+ imane, ”Aine!” 4 Aefa daʼö tohare kudo tanö böʼö, hulö waʼoyo galitö mbunia. Tetehegö khö zi fakudo yawania ba wangeheta faʼatulö ba gulidanö, enaʼö faoma labunu nawöra niha. Tebeʼe khönia sara wöda sebua.+
5 Me ibokai wamotandro si tölu+ Ono Mbiri-biri andrö, urongo li kerubi si tölu+ imane, ”Aine!” Aefa daʼö uʼila kudo saitö. Si fakudo yawania no igogohe waliʼera.* 6 Aefa daʼö, urongo li siʼao moroi ba gotalua kerubi si daöfa andrö imane, ”Saliter gandru bölinia sambua dinar,*+ ba tölu liter barli bölinia sambua dinar. Böi alimagösi wanikha zaitu faoma agu.”+
7 Me ibokai wamotandro si öfa Ono Mbiri-biri andrö, urongo li kerubi si öfa+ imane, ”Aine!” 8 Ba uʼila kudo si no afusi hoho. Töi zi fakudo yawania Faʼamate, ba igoʼö-goʼö ia Lewatö* moroi ba zahatö. Tetehegö khöra wamatörö si sambua niʼoʼöfa ulidanö ba wamunu niha faoma föda sanau, faʼambö balazo,+ fökhö si möi famunu ba urifö samuʼi ba gulidanö.+
9 Me ibokai wamotandro si lima Ono Mbiri-biri andrö, uʼila ndro+ niha nibubunu ba gamaudu naha wanunu sumange+ börö woloʼö taromali Lowalangi hegöi fanuriaigö turia somuso dödö.+ 10 Muʼao ira, ”He Lowalangi Fondrege Zalawa, niʼamoniʼö ba satulö,+ hawaʼara tö nasa öbaloi? Hawaʼara öhuku niha si toröi ba gulidanö ba ösulöni waʼamatema?”+ 11 Aefa daʼö, tebeʼe khöra zamösana mbaru sebua safusi.+ Teʼombakhaʼö göi khöra wa lö ara tö molombase ira irege moʼahonoa waʼato nawöra sawuyu ba talifusöra nibubunu simane yaʼira.+
12 Ba uʼila me ibokai wamotandro si önö andrö Ono Mbiri-biri, ba alua ndruru danö sabölö-bölö. Ogömi luo hulö nukha saitö* ba oyo mbaŵa maʼasambua simane do.+ 13 Agatoru ndröfi moroi ba dalu mbanua, simane na atoru mbua ara sataha nifadögö nangi sabölö-bölö. 14 Taya dalu mbanua hulö na lagölugö gölu-gölu zura.+ Laheta fefu hili awö hulo moroi ba nahania.+ 15 Aefa daʼö, razo-razo ba gulidanö, sebua faka, kumandru zaradadu, niha si kayo, niha sabölö, ba fefu zawuyu awö niha niʼefaʼö, labiniʼö ira ba dögi narö hili hegöi ba gotalua gara segebua ba hili.+ 16 Lö labato wangumaʼö ba hili hegöi ba gara andrö, ”Langögö ndraʼaga.+ Biniʼö ndraʼaga moroi khö zi dadao ba dadaoma andrö,+ ba lumöʼöga moroi ba wönu Nono Mbiri-biri,+ 17 börö me no irugi inötö wönura sabölö-bölö.+ Haniha zi tola manaögö?”+