Halöwö Zinenge
22 ”Yaʼami ira ama hegöi ira talifusö fefu, mifondrondrongo wehedegu.”+ 2 Me larongo fahuhuo ia ba li Heberaiʼo, itugu ahono ira ba imane, 3 ”Niha Yahudi ndraʼo,+ si tumbu ba Dareso ba Gilikia,+ hizaʼi ba mbanua daʼa tefahaʼö ndraʼo khö Gamalieli.+ Ifahaʼö ndraʼo moloʼö faʼabeʼe Goroisa Moze+ niʼoʼö ndra tuada, ba owölö-ölö sibai ndraʼo khö Lowalangi simane yaʼami fefu maʼökhö.+ 4 Me mböröta, ufakao zanörö Lala Zoʼaya irege ubunu ira. Uböbö ba ubeʼe ba gurunga he ira alawe hegöi ira matua.+ 5 Tola lafaduhuʼö ira ere sebua hegöi ira sondröniaʼö. Moroi khöra utema göi zura-sura sanandrösa khö ndra talifusöda ba Ndramaseko. Ba lala so ndraʼo weʼamöi mamöbö yaʼira ba uʼohe ba Yeruzalema enaʼö lahuku.
6 ”Hizaʼi, me arakhagö urugi Ndramaseko, mato talu laluo, izumaigö so haga moroi ba mbanua samasui yaʼo.+ 7 Aefa daʼö alabu ndraʼo ba urongo li siʼao imane, ’He Saulo, he Saulo, hana wa öfakao ndraʼo?’ 8 Utema linia, ’He Soʼaya, haniha ndraʼugö?’ Aefa daʼö imane khögu, ’Yesu ndraʼo, niha Nazareta, nifakaomö.’ 9 Laʼila göi haga andrö niha si fao khögu, hizaʼi lö larongo li zi fahuhuo khögu. 10 Aefa daʼö manofu ndraʼo, ’Hadia zinangea ufalua Soʼaya?’ Itema ligu Soʼaya, ’Ozizio, aeʼe ba Ndramaseko. Ba daʼö laʼombakhaʼö khöu fefu hadia zi no uhonogöi enaʼö öfalua.’+ 11 Hizaʼi, lö uʼila-ila niha, börö waʼatakile haga andrö. Wa ofeta ndraʼo ba Ndramaseko börö me lagogohe dangagu si fao khögu.
12 ”Aefa daʼö, so samösa zotöi Anania, niha sangataʼufi Lowalangi moloʼö Oroisa Moze. Sökhi gamuatania lawaʼö ira niha Yahudi si toröi ba daʼö, 13 möi ia ifalukhaisi ndraʼo. Mozizio ia ba zingagu imane, ’He talifusögu Saulo, yaʼöʼila niha mangawuli!’ Iʼanemaiʼö uʼila niha ba oroma khögu ia.+ 14 Imane khögu, ’No ifili ndraʼugö Lowalangi ndra tuada enaʼö aboto ba dödöu gohitö dödönia, ba wamaigi niha satulö andrö+ ba öfondrondrongo linia, 15 börö me yaʼugö zamaduhuʼö khönia ba niha fefu ngawalö niʼilau hegöi nirongomö.+ 16 Tobali, hadia nasa nibaloimö? Bayagö ndraʼugö idanö ba sasai ndraʼugö moroi ba horöu+ ba angaröfili döinia.’+
17 ”Hizaʼi, me no mangawulido ba Yeruzalema,+ me mangandrödo ba gosali, alua khögu gangilata. 18 Oroma khögu me mohede Zoʼaya, ’Aliokö wofanö moroi ba Yeruzalema börö me lö lafondrondrongo wamaduhuʼömö sanandrösa khögu.’+ 19 Aefa daʼö umane, ’He Soʼaya, laʼila wa yaʼodo andre mböröta zi möi ba nahia waʼowulo* misa, sondraʼu yaʼira ba samöbözi niha si faduhu tödö khöu.+ 20 Fao göi dödögu me laduwagö ndro Zitefano samaduhuʼö khöu, ba no mozizio ndraʼo ba daʼö ba wozago baru zamunu yaʼia.’+ 21 Hizaʼi imane Soʼaya, ’Ofanö, börö me yaʼo zamatenge yaʼugö ba soi sagaröu.’”+
22 Lafondrondrongo manö ia irege awai iwaʼö daʼö, ba muʼao ira, ”Miheta niha simane daʼa moroi ba gulidanö! Tenga sinangea auri ia!” 23 Börö me muʼao-ao ira, latiboʼö mbarura tanö baero ba lafazawili gawu-gawu ba dalu mbanua,+ 24 iʼandrö kafalo zaradadu andrö enaʼö laʼohe Waulo bakha ba naha zaradadu, lasekhegö ia ba laleasi enaʼö aboto ba dödö gafalo zaradadu andrö hana wa muʼao-ao ira khönia simane daʼö. 25 Me lafosindro ia enaʼö laleasi, imane Faulo khö zaradadu si zizio ba daʼö, ”Hadia tola mileasi niha Romawi* si lö niʼetuʼö huku?”+ 26 Me irongo daʼö saradadu andrö, möi ifatunö khö gafalonia, ”Hadia zomasiʼö öfalua khönia? Yaʼia andre niha Romawi.” 27 Ifahatö ia kafalo zaradadu andrö ba imane khö Waulo, ”Hadia niha Romawi ndraʼugö?” Itema li, ”Yaʼia.” 28 Imane zui kafalo zaradadu andrö, ”Ebua zi no ubeʼe enaʼö tobali ndraʼo ono mbanua Romawi.” Imane Faulo, ”Na yaʼodo, iʼotarai me tumbu.”+
29 Iʼanemaiʼö lawuwu ira furi saradadu sanekhegö yaʼia ba ataʼu gafalo zaradadu andrö me no aboto ba dödönia wa Faulo niratenia andrö niha Romawi.+
30 Mahemolunia, enaʼö iʼila hadia sibai mbörö wa latandrawaisi Waulo ira niha Yahudi, iʼefasi Waulo, aefa daʼö ikaoni ndra kafalo gere hegöi ira Sangetuʼö Huku enaʼö owulo ira. Lö ara, iʼohe Waulo fönara.+