2 Moze
9 Aefa daʼö, imane Yehowa khö Moze, ”Aeʼe falukhaisi Waraʼo. Fatunö khönia, ’Daʼa niwaʼö Yehowa, Lowalangi niha Heberaiʼo: ”Tehegö mofanö nono mbanuagu enaʼö lafosumange ndraʼo.+ 2 Na lö nasa ötehegö mofanö ira ba öʼalui daha-tahara, 3 yaʼo Yehowa, uʼogunaʼö dania waʼabölögu+ ba wamunu uriföu. Göna fökhö sabölö-bölö+ kudomi, kalide, ondra, sawi, nambi hegöi biri-biri. 4 Yaʼo Yehowa zamabali urifö ndraono Gizaraʼeli moroi ba gurifö niha Miserai, irege lö hadöi si mate gurifö ndraono Gizaraʼeli.”’”+ 5 No itatugöi Yehowa hawaʼara ifalua daʼö. Imane, ”Mahemolu ifalua daʼö Yehowa ba soi daʼa.”
6 Ifalua daʼö Yehowa mahemolunia. Ahori mate fefu gurifö niha Miserai,+ hizaʼi sageu na so zi mate gurifö ndraono Gizaraʼeli. 7 Ifatenge niha Faraʼo ba wamareso salua, ba sageu lö hadöi si mate gurifö ndraono Gizaraʼeli. Hizaʼi, lö tebulö waʼabeʼe högö* Waraʼo, lö itehegö mofanö ndraono Gizaraʼeli.+
8 Imane Yehowa khö Moze hegöi Aʼaroni, ”Mihalö nawu ba miʼondrua tanga wangai. Föna Waraʼo dania, akha ifazawili nawu daʼö Moze ba dalu mbanua. 9 Ba muzawili nawu daʼö dania ba zi sagörö tanö Miserai. Na göna nawu daʼö ba mboto niha hegöi ba gurifö, ba tobali faosa sonana.”
10 Ba lahalö nawu, aefa daʼö ifazawili nawu andrö Moze föna Waraʼo. Ba tobali faosa sonana nawu daʼö ba niha hegöi ba gurifö. 11 Tebai lafalukhaisi Moze ira segebua elemu ba Miserai, börö me göna göi ira faosa simane si göna ba niha Miserai tanö böʼö.+ 12 Hizaʼi, itehegö manö abeʼe högö* Waraʼo Lowalangi Yehowa ba lö ifondrondrongo wehede Moze hegöi Aʼaroni simane si no iwaʼö Yehowa khö Moze.+
13 Aefa daʼö imane Yehowa khö Moze, ”Mahemolu sihulö wongi aeʼe falukhaisi Waraʼo. Fatunö khönia, ’Daʼa niwaʼö Yehowa Lowalangi niha Heberaiʼo: ”Tehegö mofanö nono mbanuagu enaʼö lafosumange ndraʼo. 14 Na lö ötehe, uʼasogö khöu wamakao, khö ndra sohalöwö khöu hegöi ba nono mbanuau enaʼö aboto ba dödöu wa lö hadöi simane yaʼo ba zi sagörö ulidanö.+ 15 Sindruhunia tola manö uʼogunaʼö waʼabölögu* ba wanguhuku yaʼugö hegöi ono mbanuau faoma fökhö sabölö-bölö. Hasambalö ahori ami ba gulidanö. 16 Hizaʼi, utehegö nasa auri ndraʼugö enaʼö tola uforomaʼö waʼabölögu ba enaʼö teʼombakhaʼö döigu ba zi sagörö ulidanö.+ 17 Hewaʼae simanö, lö aheta khöu waʼasiliyawa ba lö ötehegö mofanö nono mbanuagu. 18 Simane daʼa waʼalawa luo mahemolu, utorugö deu esi sabölö-bölö si lö irai alua sagötö waö-waö Miserai. 19 Börö daʼö waʼö ba niha, akha labeʼe ba gandra guriföu awö gokhötau maʼafefu si so baero enaʼö telumöʼö ira. Dozi niha hegöi urifö si so baero ba si lö telumöʼö, hasambalö mate na göna ira teu esi.”’”
20 Ira sohalöwö khö Waraʼo sataʼu khö Yehowa, iʼanemaiʼö lafatenge ba nomo zawuyura ba labeʼe guriföra bakha ba gandra. 21 Hizaʼi, niha si lö moʼameʼegö tödö fehede Yehowa, latehegö manö baero so zawuyura hegöi uriföra.
22 Imane Yehowa khö Moze, ”Fazawa ziʼomö ba dalu mbanua, enaʼö aekhu deu esi ba zi sagörö tanö Miserai.+ Aekhu deu daʼö ba niha fefu, ba gurifö, hegöi ba zinanö si so ba mbenua.”+ 23 Ba ifazawa ziʼonia Moze ba dalu mbanua, ba aekhu deu esi ibeʼe Yehowa si fao feʼugu-ugu mbanua ba alitö* samözi tanö. Lö iböhöli Yehowa wanorugö teu esi ba danö Miserai. 24 Abölö-bölö sibai deu esi andrö, ba lö tebato galitö wanöri-nöri tanö. Sagötö waö-waö Miserai, lö irai alua zimane daʼö.+ 25 Tekiko fefu zi so ba mbenua börö deu esi andrö. Ahori mate fefu niha, urifö, sinanö, ba eu.+ 26 Ha ba danö Gosena lö aekhu deu esi ba zi so iraono Gizaraʼeli.+
27 Ba ifatenge niha Faraʼo ba wogaoni Moze hegöi Aʼaroni. Imane khöra, ”Fasala ndraʼo. Atulö Yehowa. Yaʼo zi fasala, simanö göi nono mbanuagu. 28 Na öʼandrö khö Yehowa enaʼö iböhöli deu esi awö weʼugu-ugu mbanua andre, utehegö saʼae mofanö ami. Lö utaha ami.” 29 Imane Moze, ”Na mofanö ndraʼo moroi ba mbanua daʼa, ufazawa dangagu ba wangandrö khö Yehowa. Ba tebato deu esi awö gari mbanua andre enaʼö aboto ba dödöu wa Yehowa zangokhögö ulidanö.+ 30 Hizaʼi no aboto ba dödögu, aefa daʼö dania, lö miʼataʼufi Lowalangi Yehowa, he yaʼugö ba simanö göi ndra sohalöwö khöu.”
31 No ahori döla rami* hegöi barli, börö me luo daʼö arakhagö mubasi mbua barli ba mobowo döla rami. 32 Hizaʼi, lö tekiko gandru* börö me tenga inötönia waʼatumbu.* 33 Aefa daʼö, mofanö Moze föna Waraʼo. Möi ia baero mbanua daʼö ba mangandrö ia khö Yehowa. Awena tebato deu, feʼugu-ugu mbanua ba teu esi.+ 34 Ba me no iʼila Faraʼo wa no tebato deu, feʼugu-ugu mbanua awö deu esi, ifuli zui abeʼe högönia*+ hegöi ira sohalöwö khönia. Lafuli lafalua horö. 35 Simane si no iwaʼö Yehowa khö Moze, lö tebulö waʼabeʼe högö* Waraʼo ba lö ifofanö ndraono Gizaraʼeli.+