2 Moze
20 Aefa daʼö, ibeʼe fefu goroisa daʼa Lowalangi:+
2 ”Yaʼo Yehowa Lowalangimi, si no mangeheta yaʼami ba danö Miserai, nahia wangosawuyu yaʼami.+ 3 Ha yaʼo zinangea mifosumange. Böi mifosumange* lowalangi tanö böʼö.+
4 ”Böi mifazökhi khömi nadu nitoto mazui adu si fakhili-khili si so ba dalu mbanua, ba gulidanö, mazui bakha ba nidanö.+ 5 Böi miʼangalulu ba böi adöni dödömi wamosumange yaʼia,+ börö me yaʼo Lowalangimi Yehowa zangumaʼö khömi enaʼö ha khögu mangalulu ami.+ Na so niha si fatuwu khögu, utehegö nononia, maʼuwunia hegöi mahonia ba wanaögö lua-lua zala nifaluania. 6 Hizaʼi, uforomaʼö waʼomasigu si lö faröi ba niha sangomasiʼö yaʼo ba soloʼö oroisagu irugi saribu ngaʼötö.+
7 ”Böi mitötöi döi Lowalangimi Yehowa ba waya.+ Hasambalö ihuku Yehowa niha sangogunaʼö töinia ba waya.+
8 ”Böi olifu ami wangamoniʼö luo Sabato.+ 9 Önö ngaluo tola mohalöwö ami,+ 10 hizaʼi ba ngaluo si fitu, luo sabato khö Yehowa Lowalangimi. Tebai mohalöwö ami, simanö göi ndraonomi maʼafefu, sawuyumi hegöi urifömi awö niha si fatewu si so ba mbanuami.*+ 11 Yehowa zamazökhi talu mbanua, ulidanö, asi, awö nösinia maʼafefu, ba molombase ia ba ngaluo si fitu.+ Daʼö mbörö wa ifahowuʼö ba iʼamoniʼö luo Sabato andrö Yehowa.
12 ”Fosumange namau awö ninau,+ enaʼö anau nosou ba danö nibeʼe Yehowa Lowalangiu khöu.+
13 ”Böi bunu niha.+
14 ”Böi ohorö.+
15 ”Böi anagö.+
16 ”Böi böbögö khö nawöu zi lö duhu.+
17 ”Böi isö nomo nawöu. Böi isö woʼomonia,+ sawuyunia, sawinia, kalidenia, mazui okhötania.”+
18 Ba larongo soi daʼö weʼugu mbanua awö li dorofe nifazökhi moroi ba dandru, ba laʼila göi gari mbanua faoma simbo ba hili daʼö. Ataʼu ira si fao fanizi-nizi ba lafandröndröu ira wezizio.+ 19 Ba lamane khö Moze, ”Yaʼugö manö zi fahuhuo khöma ba mafondrondrongo. Böi Lowalangi zi fahuhuo khöma faböi mate ndraʼaga.”+ 20 Imane Moze, ”Böi miʼataʼufi. Tohare Lowalangi sindruhu ba wamareso* yaʼami+ börö me omasi ia na lö tebulö miʼataʼufi ia ba lö mifalua horö.”+ 21 No mosindro manö niha sato moroi ba zaröu, hizaʼi ifahatö ia Moze ba lawuo saweʼe-weʼe andrö ba zi so Lowalangi sindruhu.+
22 Imane Yehowa khö Moze, ”Fatunö ba ndraono Gizaraʼeli, ’No miʼila samösa hewisa me fahuhuo ndraʼo khömi moroi ba zorugo.+ 23 Böi mifazökhi khömi nadu moroi ba ganaʼa mazui firö, börö me tebai mifosumange lowalangi böʼö baero ndraʼo.+ 24 Mifazökhi khögu naha wanunu sumange moroi ba dambu. Ba daʼö mibeʼe khögu zumange nitunu, sumange fangatulö, nambi, biri-biri, ba sawi. Gofu hezo nahia nifiligu enaʼö lö olifu ami döigu,+ tohare ndraʼo ba ufahowuʼö ami. 25 Na mifazökhi khögu nahia wanunu sumange moroi ba gara, böi mifake gara si no mutaba.+ Böi mifake wahö ba wamazökhi yaʼia. Na mifalua daʼö, raʼiö naha wanunu sumange andrö. 26 Böi mifake nora weʼamöi ba naha wanunu sumange khögu faböi oroma zaila ami.’