Nisura Luka
4 Aefa daʼö, fahöna khö Yesu geheha niʼamoniʼö me no iröi Nidanö Yoridano. Itema wanuturu lala moroi ba geheha sagötö feʼasonia ba danö si mate+ 2 ba zi 40 hari waʼara, aefa daʼö itandraigö ia Afökha.+ Sagötö daʼö lö manga ia irege taraso khönia waʼolofo ba gafuriata. 3 Imane khönia Afökha, ”Na ono Lowalangi ndraʼugö, hede ba gara andre enaʼö tobali roti.” 4 Itema linia Yesu imane, ”So ba zura, ’Tenga ha ba gönia auri niha.’”+
5 Aefa daʼö iʼohe ia Afökha ba hili salawa sibai. Iforomaʼö khönia fefu wamatörö gulidanö andre ba zi lö arara.+ 6 Imane zui Afökha, ”Ubeʼe khöu wamatörö daʼa fefu awö lakhöminia, börö me no tebeʼe ba dangagu+ ba tola manö ubeʼe ba niha somasido. 7 Hizaʼi, na mangalulu ndraʼugö khögu sakali manö, tobali okhötau fefu daʼö.” 8 Imane Yesu, ”So ba zura, ’Ha khö Yehowa* Lowalangiu mangalulu ndraʼugö ba öfosumange ia, ba ha khönia öbeʼe halöwö niʼamoniʼö.’”+
9 Aefa daʼö, iʼohe ia Afökha ba Yeruzalema ba mbumbu gosali. Imane khönia, ”Na ono Lowalangi ndraʼugö, fazaumbaʼö si tou,+ 10 börö me so ba zura, ’Ifatenge ndra malaʼikania ba wolumöʼö yaʼugö,’ 11 ba ’Lataya tangara ndraʼugö enaʼö lö tetutu gaheu ba gara.’”+ 12 Itema linia Yesu, ”So göi ba zura, ’Böi tandraigö Yehowa* Lowalangiu.’”+ 13 Me no aefa itandraigö Yesu, iröi ia Afökha ba ibaloi ginötö si tefaudu.+
14 Me no fahöna khö Yesu geheha niʼamoniʼö, mangawuli ia ba Galilaia.+ No tehöngö duriania si sökhi ba zi fasui banua andrö. 15 Ibörögö mamahaʼö ia ba nahia waʼowulo* ba lafosumange ia fefu niha.
16 Aefa daʼö, mofanö ia ba Nazareta,+ ba daʼö teʼebuaʼö ia mböröta. Simane si toʼölö ifalua ba luo Sabato, möi ia ba nahia waʼowulo.+ Me mosindro ia ba wombaso, 17 ba labeʼe khönia gölu-gölu zura Yesaya samaʼeleʼö. Ibokai gölu-gölu zura andrö, ibaso ayati daʼa, 18 ”So khögu geheha Yehowa,* börö me yaʼia zamataro* yaʼo ba wanuriaigö turia somuso dödö ba niha si numana. Ifatenge ndraʼo ba wangombakha wa teʼefaʼö niha niʼosawuyu, niha sauʼa ifuli laʼila niha, ba teʼefaʼö niha nifakao,+ 19 hegöi ba wanuriaigö inötö wamahowuʼö Yehowa yaʼira.”*+ 20 Aefa daʼö, igölugö gölu-gölu zura andrö, ifuli khö zohalöwö ba modadao ia. Fefu niha si so ba nahia waʼowulo andrö, oi lafaigi ia. 21 Imane khöra, ”Maʼökhö andre, no alua ayati sawena mirongo.”+
22 Ibörögö lasuno ia niha sato ba ahöli-höli dödöra wamondrongo fehede omasiö niwaʼönia.+ Lamane, ”Hadia tenga ono Yosefo ia andrö?”+ 23 Imane khöra, ”Tatu manö mifanandrösa khögu gamaedola daʼa, ’He doto, fadöhö ua ndraʼugö,’ ba mimane, ’No marongo hadia nifaluamö ba Gafanauma.+ Falua göi zimane daʼö ba daʼa, ba mbanuamö.’” 24 Itohugö wangumaʼö, ”Sindruhu niwaʼögu khömi, lö lafosumange zamaʼeleʼö ba mbanuania.+ 25 Duma-dumania, ato sibai lakha mbanua ba ndraono Gizaraʼeli ba götö Gelia. Me lö saekhu deu tölu fakhe a matonga waʼara, alua lofo sabölö-bölö ba zi sagörö tanö Gizaraʼeli.+ 26 Hizaʼi, lö tefatenge Gelia khöra. Awai tefatenge ia ha khö lakha mbanua Zarefa ba mbanua Zidona.+ 27 Simanö göi ba götö Gelisa samaʼeleʼö. Ato sibai zobou auri ba Gizaraʼeli. Hizaʼi, samösa lö nifadöhönia, ha Naʼema, niha Ziria andrö.”+ 28 Me larongo daʼö, mofönu khönia fefu niha si so ba nahia waʼowulo.+ 29 Laʼohe ia baero mbanua andrö si so ba hili. Lasöbi ia ba zinga mbaho enaʼö lafazaumba ia si tou. 30 Hizaʼi, itörö manö gotalua niha sato ba mofanö ia moroi ba daʼö.+
31 Aefa daʼö, mofanö ia ba Gafanauma, ba Galilaia. Ifahaʼö niha ba luo Sabato.+ 32 Ahöli-höli dödöra lagu wamahaʼönia+ börö me famahaʼönia andrö moroi khö Lowalangi.* 33 So niha si göna malaʼika si lö sökhi ba nahia waʼowulo andrö. Muʼao ia,+ 34 ”Hana wa möiʼö ba daʼa Yesu niha Nazareta?+ Hadia ba wangohori yaʼaga? Uʼila haniha ndraʼugö, Niʼamoniʼö andrö moroi khö Lowalangi.”+ 35 Hizaʼi, ihangöi ia Yesu, ”Honogöʼö, hetaʼögö ba mboto niha daʼö!” Maoso malaʼika si lö sökhi andrö, iʼolobigö tou ba danö niha andrö fönara ba mofanö ia, lö ifakao saʼae. 36 Ahöli-höli dödöra fefu ba faoma lamane, ”Hadia wehede daʼa? Börö waʼabölö hegöi kuasonia, ifofanö malaʼika si lö sökhi, ba mofanö ira!” 37 Tehöngö duriania ba zi fasui banua andrö.
38 Moroi ba nahia waʼowulo daʼö, möi Yesu ba nomo Zimoni. Tefaudu göna faʼaukhu sabölö-bölö nina matua Zimoni me luo daʼö ba laʼandrö khö Yesu enaʼö ifadöhö ia.+ 39 Mosindro Yesu ba zingania, ifadöhö ba taya waʼaukhunia andrö. Iʼanemaiʼö maoso ia, ilau mondrino ba ibeʼe göra.
40 Me no aekhu luo, laʼohe khö Yesu fefu niha sofökhö si so ba nomo, gofu hadia wökhöra. Ifadöhö ira fefu, itufa högöra ero samö-samösa.+ 41 Ato niha nifadöhönia, ifofanö malaʼika si lö sökhi ba mbotora. Muʼao ndra malaʼika si lö sökhi andrö, ”Ono Lowalangi ndraʼugö.”+ Hizaʼi, ihahagö ba lö itehe fahuhuo ira,+ börö me laʼila wa yaʼia andrö Keriso.+
42 Me no tumbu luo, mofanö ia ba nahia si lö niha-niha.+ Hizaʼi, ibörögö ato niha sangalui yaʼia. Me falukha ira, laforege wanaha yaʼia enaʼö lö iröi ira. 43 Hizaʼi imane khöra, ”Hasambalö möido uturiaigö duria somuso dödö sanandrösa ba Wamatörö Lowalangi ba mbanua böʼö misa. Daʼö mbörö wa tefatenge ndraʼo.”+ 44 Börö daʼö, möi ia ituriaigö duria somuso dödö ba nahia waʼowulo* ba Yudea.