Halöwö Zinenge
20 Me no alö saʼae waʼakaliru andrö, ikaoni ndra nifahaʼö Faulo ba wamarou tödöra. Aefa daʼö mangona ia numalö ba Makedonia. 2 Me no aefa itörö mbanua andrö ba wamarou tödö ndra nifahaʼö, ofeta ia ba Yunani. 3 Toröi ia ba daʼö tölu waŵa waʼara. Hizaʼi no irongo zi lö sökhi niʼera-era niha Yahudi+ khönia na moloyo ia ba Ziria, börö daʼö ihalö gangetula mangawuli ia, itörö Makedonia. 4 Fao awönia Zofatero ono Wiro moroi ba Mberea, Arisaro+ hegöi Sekundro moroi ba Desalonika, Gayo moroi ba Derebe, Timoteo,+ Tikhiko+ ba Terofimo+ moroi ba Provinsi Asia. 5 No ladari-dari wofanö ba labaloi ndraʼaga ba Deroa. 6 Hizaʼi, moloyo ndraʼaga moroi ba Wilifi me no aefa Gowasa Roti si Lö Mufaruka Ragi.+ Ba me no aefa lima hari, maʼondrasi ira ba Deroa. Toröiga fitu hari ba daʼö.
7 Ba ngaluo si oföna ba migu daʼö, me fao ndraʼaga wemanga, ibörögö fahuhuo khöra Waulo börö me mofanö ia mahemolunia. Lö ibato fahuhuo irugi talu mbongi. 8 Oya wandru ba mbateʼe tanö yawa ba nahia waʼowuloma. 9 So samösa nono matua sotöi Eutikho si dadao ba zandrela. Me fahuhuo Waulo, abölö sibai wemörönia ba aekhu ia si tou moroi ba lote si tölu tika waʼalawa, me lafazawa ia no mate. 10 Hizaʼi möi tou Waulo, ifalögu ia ba dötöʼa nono matua andrö ba italagui+ imane, ”Böi mibusi tödö, lö si mate ia.”*+ 11 Aefa daʼö, ifuli ia si yawa Faulo, iboboto roti ba labörögö wemanga. Itohugö zui fahuhuo irugi moluo, aefa daʼö mofanö ia. 12 Laʼohe nono matua no mege me no ifuli auri ia, ba terara sibai dödöra.
13 Aefa daʼö, oföna möiga ba göfa ba moloyo ndraʼaga ba mbanua Gaso. Ba daʼö mafaondragö Waulo moloʼö si no iwaʼö khöma, börö me omasi ia wanörö tanö weʼamöi ba mbanua andrö. 14 Me ifalukhaisi ndraʼaga ba mbanua Gaso, faoga ba göfa numalö ba Mitilene. 15 Mahemolunia, moloyoga moroi ba daʼö numalö ba Hulo Khio. Sara wongi aefa daʼö, tebatoga sabata ba Zamo, ba mahemolu daʼö, ofetaga ba Miletusi. 16 Ihalö gangetula Faulo, lö tebato ia ba Efeso+ enaʼö lö ahori ginötönia ba Provinsi Asia. Aösö-aösö ia enaʼö na tola, irugi Yeruzalema+ ba luo Gowasa Fendrakose.
17 Hewaʼae simanö, me so ia ba Miletusi, ifaʼoheʼö goroisania ba Nefeso, ba ikaoni ndra satua sokubaloi ba mbanua niha Keriso ba daʼö. 18 Me ofeta ira, imane khöra, ”No aboto ba dödömi hewisa waʼaurigu me awena sibai mofanödo ba Provinsi Asia.+ 19 Mohalöwö ndraʼo tobali sawuyu Lowalangi* si fao fangide-ngideʼö,+ feʼe hegöi famakao si göna yaʼo börö zi lö sökhi niʼera-era niha Yahudi. 20 Lö utaha wangombakha fefu hadia ia zi sökhi khömi,* mazui ba wamahaʼö yaʼami föna niha sato+ hegöi ba nomo-omo misa.+ 21 Uhaogö ufaduhuʼö ba niha Yahudi hegöi ba niha Yunani sanandrösa ba wamalalini era-era+ khö Lowalangi ba famati khö Zoʼaya yaʼita Yesu.+ 22 Hiza, börö geheha niʼamoniʼö andrö wa möido ba Yeruzalema hewaʼae lö uʼila hadia zalua khögu ba daʼö. 23 Awai niʼilagu ero sambua banua utörö, no hauga kali ifaduhuʼö khögu eheha niʼamoniʼö wa no tobara-bara fönagu wamakao hegöi kurunga.+ 24 Hewaʼae simanö, lö ba dödögu nosogu.* Sabölö moguna yaʼia daʼö fagohi ndraʼo enaʼö tola ukhamö gamozua+ ba uʼasiwai halöwö nibeʼe Zoʼaya Yesu khögu, famaduhuʼö turia somuso dödö sanandrösa ba waʼasökhi dödö sebua* moroi khö Lowalangi.
25 ”Iadaʼa uwaʼö khömi, lö saʼae faʼila bawa ita, dozi si no manema turia Wamatörö Lowalangi moroi khögu. 26 Maʼökhö andre, ukaoni ami tobali samaduhuʼö, wa lö horögu ba ndro niha fefu.+ 27 Börö me lö nitahagu wangombakha khömi fefu gohitö dödö Lowalangi.+ 28 Mifaigi-faigi dödömi+ ba fefu nikubaloi, börö me nifataro geheha niʼamoniʼö ami tobali sondröniaʼö+ ba wokubaloi banua niha Keriso khö Lowalangi,+ niʼölinia ba ndro Nononia samösa.+ 29 Uʼila na no mofanö ndraʼo, so moroi baero nasu gatua sagamuʼi si möi khömi,+ lö sökhi wamatöröra nikubaloi. 30 Baero daʼö, so moroi ba gotaluami zamaʼema famahaʼö selungu enaʼö fao khöra ndra nifahaʼö.+
31 ”Andrö böi miförö, mitörö-törö tödömi, bongi maʼökhö sagötö ba zi tölu fakhe+ lö uböhöli wameʼe khömi mene-mene si fao tawa hörö. 32 Iadaʼa, utouʼö ami khö Lowalangi hegöi ba daromalinia sanandrösa ba waʼasökhi dödönia sebua,* yaʼia daʼö taromali si möi fangabölömi ba fao ami niha niʼamoniʼö ba wanema ondröita.+ 33 Lö irai utötöna wirö, anaʼa, mazui nukha moroi haʼökhö manö.+ 34 Miʼila samösa wa tangagu andre zangalui soguna khögu+ hegöi soguna ba niha si fao khögu. 35 Gofu hadia ia, no uforomaʼö khömi na taforege wohalöwö simane daʼa,+ hasambalö mitolo zambö faʼabölö, ba böi olifu ami wehede Zoʼaya Yesu me iwaʼö, ’Ohahau dödö ba wameʼe+ moroi ba wanema.’”
36 Me no aefa iwaʼö daʼö, labalöduhini tou danö ba mangandrö ira. 37 Adöʼu-döʼu ira wege-ege, latalagui mbagi Waulo ba laʼuma ia. 38 Abu sibai dödöra mendrua manö me iwaʼö wa lö faʼila bawa ira saʼae.+ Aefa daʼö, lafasao ia ba göfa.