Sara Korindro

7 Iadaʼa, omasido ubeʼe wanema li moroi ba wanofu si no misura: Abölö sökhi ba ndra matua na lö ibabaya* ndra alawe. 2 Hizaʼi, börö me dozi banua so niha samalua amuata wohorö,* sökhi ba ndra matua na so woʼomonia ira alawe,+ simanö göi ndra alawe sökhi na so woʼomonia.+ 3 Yaʼami ira matua mibuʼa gömömi khö woʼomomi ira alawe, simanö göi ndra alawe mibuʼa gömömi khö woʼomomi ira matua.+ 4 Böi yaʼifatörö mbotonia ira alawe, foʼomonia ira matua zamatörö. Simanö göi woʼomo ira matua, böi yaʼifatörö mbotonia, foʼomonia ira alawe zamatörö. 5 Böi mitaha wamuʼa foʼömömi, hatö na no hasara dödömi wangai angetula ba zi lö arara, faböi mangoloi dödömi ba wangandrö. Aefa daʼö, mifuli zui orudu enaʼö böi itandraigö ami Satana börö me ambö khömi fanaha tödö. 6 Tola mifalua niwaʼögu andrö, hizaʼi tenga nifaso. 7 Utötöna enaʼö simane yaʼo fefu niha. Hewaʼae simanö, dozi niha latema howu-howu zamösana+ moroi khö Lowalangi, faböʼö howu-howu khö daʼa, ba faböʼö göi khö daʼö.

8 Ba niha si lö sangowalu mazui lakha mbanua, uwaʼö khömi wa abölö sökhi na lö tebulö ami simane yaʼo.+ 9 Hizaʼi na lö fanaha tödö, abölö sökhi mangowalu moroi na aekhu ami ba horö.+

10 Ba niha si no mangowalu, ubeʼe wanuturu lala, tenga moroi khögu hizaʼi moroi khö Zoʼaya. Foʼomo ira alawe tebai ifabali ia khö woʼomonia ira matua.+ 11 Na fabali, böi yamangowalu ia, ba na löʼö, yaʼorudu ia mangawuli khö woʼomonia ira matua. Simanö göi ndra matua, böi yamuröi ndra alawenia.+

12 Ba danö böʼö uwaʼö daʼa, hizaʼi tenga moroi khö Zoʼaya, moroi khögu:+ Na so dalifusö ira matua si so foʼomo ira alawe si tenga si sara lala wamati, ba omasi woʼomonia andrö fao ira, böi yamuröi woʼomonia ira alawe andrö. 13 Na so dalifusö ira alawe si so foʼomo ira matua si tenga si sara lala wamati, ba omasi woʼomonia andrö fao ira, böi yamuröi woʼomonia ira matua andrö. 14 Teʼamoniʼö woʼomo ira matua si tenga si sara lala wamati andrö börö woʼomonia ira alawe, ba teʼamoniʼö woʼomo ira alawe si tenga si sara lala wamati börö woʼomonia ira matua andrö. Na löʼö, raʼiö ndraonomi. Hizaʼi teʼamoniʼö ira iadaʼa. 15 Na edöna fabali woʼomo ira matua mazui ira alawe si tenga si sara lala wamati andrö, yafabali ia. Ba zimane daʼö, talifusö ira matua mazui talifusö ira alawe lö faböbö ira saʼae. No ibeʼe khömi waʼohahau dödö Lowalangi.+ 16 Yaʼami foʼomo ira alawe, hewisa wa miʼila tebai saʼae mitolo woʼomomi ira matua?+ Yaʼami foʼomo ira matua, hewisa wa miʼila tebai saʼae mitolo woʼomomi ira alawe?

17 Hewaʼae simanö, dozi niha enaʼö ifaudugö waʼaurinia ba nibeʼe Yehowa* yaʼia daʼö simane me ikaoni ia mböröta Lowalangi.+ Andrö wa ubeʼe wanuturu lala andre ba mbanua niha Keriso misa. 18 Na no lasuna zi samösa niha me tekaoni ia,+ böi yaʼibulöʼö ia saʼae, ba na lö nisuna ia me tekaoni, akha lö lasuna ia saʼae.+ 19 He na no lasuna hegöi na löʼö, lö moguna daʼö.+ Sabölö moguna yaʼia daʼö famalua oroisa Lowalangi.+ 20 Gofu hewisa waʼauri zi samösa niha me tekaoni ia, abölö sökhi na simane daʼö manö ia.+ 21 Hadia samösa sawuyu ami me tekaoni ami? Böi miʼabusi tödö daʼö.+ Na tola atö teʼefaʼö ami, ba miʼogunaʼö ginötö daʼö. 22 Sawuyu si no mukaoni tobali soloʼö khö Zoʼaya yaʼia daʼö niha si no muʼefaʼö si tobali tana khö Zoʼaya.+ Simanö göi na mukaoni niha niʼefaʼö tobali ia sawuyu Keriso. 23 Ebua mege mbölimi.+ Böi mibaliʼö ami sawuyu niha saʼae. 24 Yaʼami ira talifusö, gofu hewisa waʼauri zi samösa niha me tekaoni ia, böi yatebulö simane daʼö ia föna Lowalangi.

25 Iadaʼa ba zi lö sangowalu, lö nitemagu oroisa moroi khö Zoʼaya, hizaʼi börö me niha si tola mufaduhusi tödö ndraʼo, si no manema faʼahakhö dödö Zoʼaya, andrö ubeʼe mbua gera-eragu andre:+ 26 Börö me no so ita ba ginötö si lö sökhi, abölö sökhi ba ndra matua na simane daʼö manö ia iadaʼa. 27 Na no tefaböbö ami khö woʼomomi ira alawe, böi miʼalui lala wangefaʼö yaʼami.+ Na lö si tefaböbö, böi miʼalui woʼomomi ira alawe. 28 Na mangowalu ami, ba tenga horö nifaluami. Ba na möi nihalö nono alawe, tenga horö nifaluania. Hizaʼi, niha si no mangowalu oya itörö ia famakao mboto. Omasido na lö alua khömi zimane daʼö.

29 Baero daʼö yaʼami ira talifusö: Lö ara tö ginötö.+ Iʼotarai iadaʼa, niha si so foʼomo ira alawe, enaʼö hulö zi lö hadöi foʼomo ira alawe, 30 ba sege-ege enaʼö hulö zi lö mege-ege, ba somuso tödö enaʼö hulö zi lö faʼomuso dödö, niha sowöli enaʼö hulö zi lö mangokhögö, 31 ba sangogunaʼö ulidanö andre enaʼö hulö zi lö mangogunaʼö yaʼia, börö me si taya nösi gulidanö daʼa. 32 Omasido enaʼö aefa ami ba wangabu dödö. Ira matua si lö mangowalu, iʼosambuaʼö dödönia ba wangai halöwö Zoʼaya enaʼö tola iʼomusoiʼö dödö Zoʼaya. 33 Ira matua si no mangowalu iʼabusi tödö nösi gulidanö,+ enaʼö tola iʼomusoiʼö dödö woʼomonia, 34 irege oya niʼera-erania. Ira alawe si lö sangowalu hegöi ono alawe, teʼosambuaʼö wangera-ngerara ba wangai halöwö Zoʼaya+ enaʼö teʼamoniʼö mbotora hegöi fangera-ngerara. Hizaʼi, ira alawe si no mangowalu iʼabusi tödö nösi gulidanö, enaʼö tola iʼomusoiʼö dödö woʼomonia. 35 Si sökhi khömi wa uwaʼö daʼa, tenga ba wamöbö* tangami. Omasido ufarou dödömi ba wamalua si sökhi, enaʼö lö mangoloi dödömi ba wangai halöwö Zoʼaya.

36 Hizaʼi, na so zi lö sangowalu ba tebai itaha dödönia, ba no ikhamö döfinia, abölö sökhi na mangowalu ia. Tenga horö daʼö.+ 37 Na so zi tola manaha tödönia ba lö omasi ia mangowalu irege ihalö gangetula ba aro dödönia ba gangetula daʼö, no si sökhi nifaluania.+ 38 Hewaʼae simanö, niha sangowalu si sökhi nifaluania. Mendrua manö niha si lö mangowalu, sabölö sökhi nasa nifaluania.+

39 Ira alawe si no muhalö tefaböbö ia khö woʼomonia sagötö faʼauri woʼomonia ira matua.+ Na no mate* woʼomonia, tola mangowalu ia gofu haʼökhö zomasi ia, asala ba khö Zoʼaya.+ 40 Hizaʼi moloʼö yaʼo, abölö ohahau dödönia na lö mangowalu ia saʼae, ba faduhu dödögu wa so khönia geheha Lowalangi simane yaʼo.