Halöwö Zinenge

2 Me alua Gowasa Fendrakose,+ owulo ndra nifahaʼö ba zi sambua nahia. 2 Me modadao ira, lö ladöna-döna ziʼugu moroi ba mbanua hulö nangi sabölö-bölö, ba terongo fefu yomo ba nomo andrö.+ 3 Laʼila zi hulö hola-hola galitö side-ide ba ahono ba högöra zamösana 4 ba fahöna khöra geheha niʼamoniʼö+ ba ibörögö fahuhuo ira ba li böʼö moloʼö niwaʼö geheha khöra.+

5 Me luo daʼö, so niha Yahudi satulö tödö moroi ba ngawalö soi si möi ba Yeruzalema.+ 6 Me larongo li siʼugu andrö, owulo ira fao faʼahöli-höli dödö börö me larongo fahuhuo ndra nifahaʼö ba ngawalö li si toʼölö laʼogunaʼö niha sato. 7 Ahöli-höli dödöra ba lamane, ”Hadia tenga niha Galilaia+ fefu niha si fahuhuo andrö? 8 Hizaʼi, hana wa tarongo fahuhuo ira ba li niʼilada iʼotarai me tumbu ita? 9 Yaʼita andre niha Waretia, niha Media,+ niha Gelama,+ ono mbanua Mezofotamia, Yudea, Kafadokia, Fondro hegöi Provinsi Asia,+ 10 Ferigia ba Fambilia, Miserai, banua Libia sahatö ba Girene, si fatewu moroi ba Roma, niha Yahudi ba si faböbö ba agama Yahudi,*+ 11 niha Gereta, ba niha Garabi. Hizaʼi, fahuhuo ira ba li niʼilada sanandrösa ba zahöli-höli dödö nifalua Lowalangi.” 12 Ahöli-höli dödöra fefu ba faoma lamane khö nawöra, ”Hadia geluaha daʼa?” 13 Hewaʼae simanö, so göi zangoʼaya, ”Te no mabu ira agu sami.”*

14 Hizaʼi, mozizio Wetero awö ndra sinenge si 11,+ ebua linia imane, ”Yaʼami niha Yudea hegöi banua Yeruzalema, mihaogö mifondrondrongo wehedegu andre. 15 Tenga si mabu ndra niha daʼa simane niwaʼömi andrö, awena bözi siwa sihulö wongi* iadaʼa. 16 Hizaʼi, no irai iwaʼö Yoeli samaʼeleʼö, 17 ’”Ba ngaluo safuria,” iwaʼö Lowalangi, ”Ufaduwa ösa gehehagu ba ngawalö niha fefu. Mamaʼeleʼö dania nonomi matua awö nonomi alawe, latema gangilata iraonomi si bohou ebua, ba mangifi dania ubeʼe zatua ba gotaluami.+ 18 Simanö göi khö zawuyugu ira matua hegöi ira alawe, ubeʼe ösa gehehagu ba luo daʼö ba mamaʼeleʼö ira.+ 19 Ufalua ngawalö zahöli-höli dödö ba dalu mbanua hegöi tandra ba gulidanö. So dania galitö, do, ba simbo. 20 Ogömi dania luo, ba oyo dania mbaŵa hulö ndro, aefa daʼö tohare luo Yehowa* sebua ba solakhömi. 21 Ba dozi niha soʼangaröfili töi Yehowa,* daʼö niʼorifi.”’+

22 ”Mifondrondrongo wehede daʼa yaʼami niha Gizaraʼeli: Yesu andrö niha Nazareta nifatenge Lowalangi. Oroma daʼa me iʼogunaʼö ia Lowalangi ba wamalua halöwö safönu faʼabölö, ngawalö zahöli-höli dödö hegöi tandra ba gotaluami+ simane si no aboto ba dödömi. 23 Niha daʼa nitouʼö ba dangami simane si no itehegö ba no iʼila Lowalangi,+ mibeʼe ba danga niha sebua horö enaʼö miʼosö ba döla geu aefa daʼö mibunu.+ 24 Hizaʼi, isusugi ia Lowalangi+ ba iʼefaʼö ia moroi ba mbilagu waʼamate börö me tebai iböbö manö ia faʼamate.+ 25 Imane Dawido sanandrösa khönia, ’Lö tebulö Yehowa* fönagu,* lö irai mangiwa ndraʼo börö me ba gambölögu so ia.* 26 Andrö wa omuso dödögu, ba fahuhuo mbawagu ba waʼowua-wua dödö. Afönu fanötöna waʼaurigu. 27 Börö me lö öröi ndraʼo ba Lewatö,* mazui ötehegö khö zawuyumö si lö faröi laʼila waʼatekiko.+ 28 No ötuturu lalagu saekhu ba waʼauri. No öʼomusoiʼö dödögu weʼaso tanö fönau.’+

29 ”Yaʼami ira talifusö, mitehegö khögu enaʼö lö sanaisi yaʼo ba wamatunö ngawalö zalua sanandrösa khö duada Dawido. No mate ba lakoʼo ia+ ba lö si taya lewatönia irugi mane maʼökhö. 30 Börö me samaʼeleʼö ia, ba aboto ba dödönia hölu niwaʼö Lowalangi khönia enaʼö so samösa ngaʼötönia* si dadao ba dadaomania.+ 31 Iʼila zalua miföna ba fahuhuo ia sanandrösa ba wemaoso Keriso, iwaʼö wa lö toröi ba Lewatö* Keriso ba lö tekiko* mbotonia.+ 32 No maʼila samösa me isusugi Yesu andrö Lowalangi.+ 33 Börö daʼö, me no teʼalawaʼö ia ba gambölö Lowalangi,+ ba no itema geheha niʼamoniʼö nifabuʼu Nama khönia,+ andrö göi ifaduwa khöma geheha simane nirongomi hegöi niʼilami. 34 Tenga ba zorugo möi Dawido, hizaʼi yaʼia samösa zangumaʼö, ’Yehowa* zangumaʼö khö Zoʼaya yaʼo, ”Dadao ba gambölögu, 35 irege ubeʼe tou barö gaheu zi faʼudu khöu.”’+ 36 Tobali, yafaduhu fefu dödö niha Gizaraʼeli wa Yesu andre nibunumi ba döla geu,+ Lowalangi zombaliʼö yaʼia Soʼaya+ ba Keriso.”

37 Me larongo daʼö, tofakha ba dödöra irege lamane khö Wetero hegöi khö ndra sinenge tanö böʼö, ”Yaʼami ira talifusö, hadia zinangea mafalua?” 38 Itema lira Fetero, ”Mifalalini gera-erami,+ ba mifabayagöʼö ami idanö+ ba döi Yesu Keriso ero samö-samösa enaʼö teʼefaʼö horömi,+ ba mitema dania mbuala yaʼia daʼö eheha niʼamoniʼö. 39 Buʼusa li+ ba wanöndra yaʼia tehenaigö khömi, ba ndraonomi hegöi ba niha fefu moroi ba soi böʼö yaʼia daʼö dozi nikaoni Yehowa,* Lowalangida.”+ 40 Oya nasa wehede niwaʼö Wetero ba wamaduhuʼö sindruhu. Ifangaösö ira, ”Milumöʼö ami moroi ba götö si lö sökhi andre.”+ 41 Börö daʼö, niha si fao tödö ba wehede Wetero labayagö ira idanö,+ ba monönö waʼato nifahaʼö me luo daʼö, mato 3.000 niha.+ 42 Lahaogö laʼameʼegö tödö wamahaʼö ndra sinenge, fariawö ira,* fao ira wemanga,+ ba lö laböhöli wangandrö.+

43 Ibörögö oya dandra nifalua ndra sinenge hegöi ngawalö zahöli-höli dödö irege ato niha zamosumange Lowalangi.+ 44 Fefu zi no faduhu tödö andrö owulo ira ba faoma mamuala ira khö nawöra. 45 Lafamawa fefu haratora,+ ba kefe daʼö labagi ba niha sato moloʼö soguna khöra zamösana.+ 46 Ero maʼökhö möi ira ba gosali, fao ira wemanga ba nomo ndra talifusö, labagi göra ba waʼomuso dödö ba si fao faʼomasi, 47 lasuno Lowalangi ba itugu laʼomasiʼö ira niha. Ero maʼökhö tedou waʼatora ibeʼe Yehowa* börö me monönö niha niʼorifi.+