Nisura Luka
21 Me iʼila Yesu naha wameʼe tolo-tolo, inehe-nehegö niha si kayo sameʼe kefe ba daʼö.+ 2 Aefa daʼö, iʼila samösa lakha mbanua sameʼe si dombua loga side-ide böli.*+ 3 Imane, ”Sindruhu niwaʼögu khömi, abölö ebua nibeʼe lakha mbanua andre moroi khö ndra niha daʼö fefu.+ 4 Labeʼe zi töra moroi ba gokhötara. Hizaʼi, hewaʼae numana lakha mbanua daʼö, no ibeʼe fefu gefenia böli zoguna khönia menaʼö.”+
5 Aefa daʼö, so ösa niha si fahuhuo sanandrösa ba gosali si no muʼehaogö faoma kara si sökhi hegöi ngawalö gama-gama nibeʼe sumange.+ 6 Imane khöra Yesu, ”Ba ginötönia dania, fefu niʼilami andrö ahori tedudugö. Lö hadöi saʼae kara si falaete ba nawönia kara.”+ 7 Aefa daʼö manofu ira, ”He Samahaʼö, hawaʼara alua daʼa sindruhunia, ba hadia dandra waʼaluania?”+ 8 Imane, ”Miʼangelama, böi so zamaelungu yaʼami,+ börö me ato dania zangogunaʼö töigu ba lamane, ’Yaʼodo daʼö,’ ba, ’No ahatö ginötö.’ Böi miʼoʼö ira.+ 9 Baero daʼö, na mirongo so wasuwöta ba faʼalösökhi,* böi miʼataʼufi. Hasambalö alua daʼö, hizaʼi tenga nasa amozuania.”+
10 Aefa daʼö imane khöra, ”Maoso dania zi sambua soi isuwö soi böʼö,+ ba simanö göi zalua ero sambu-sambua famatörö.+ 11 Alua ndruru danö sabölö-bölö, lofo sabölö-bölö hegöi ngawalö wökhö.+ Alua dania zihokha mbu niha hegöi tandra sahöli-höli dödö moroi ba mbanua si yawa.
12 ”Hizaʼi fatua lö alua daʼö fefu, laraʼu ba lafakao ami,+ laʼohe ami ba nahia waʼowulo hegöi ba gurunga. Laʼohe dania ami föna ndra gubernur hegöi razo börö döigu.+ 13 Daʼö ginötö khömi ba wamaduhuʼö khöra. 14 Börö daʼö, mihalö gangetula ba dödömi wa lö mihenaigö miʼera-era hadia dania niwaʼömi ba wamuʼa fehedera,+ 15 börö me yaʼo zamofaʼatua-tua yaʼami enaʼö miʼila hadia zinangea miwaʼö. Hewaʼae no hasara dödö zi faʼudu khömi, tebai lalawa mazui ladaʼawaini ami.+ 16 Labeʼe ami ba danga zanguhuku ira satuami, gaʼami, akhimi, si fahatö khömi mazui si fahuwu khömi. So ösa nibunura moroi ba gotaluami.+ 17 Fatiu dödö niha khömi börö döigu.+ 18 Hizaʼi, lö taya zara mbu ba högömi.+ 19 Na anau gölömi, ba teʼorifi ami.+
20 ”Na miʼila so zaradadu samasui Yeruzalema,+ eluahania daʼö lö ara tö tedudugö Yeruzalema.+ 21 Niha si so ba Yudea enaʼö moloi ia ba hili,+ si so bakha ba mbanua enaʼö ilau mofanö, ba si so ba mbanua si fasui böi yamöi ira ba daʼö, 22 börö me daʼö ginötö wanguhuku* enaʼö itörö fefu zi no tesura. 23 Alai ndra alawe sanabina ba si so ono sawuyu ba ginötö daʼö!+ Börö me alua wamakao sabölö-bölö ba mbanua andre ba tehuku ira. 24 So zi mate ba wöda ba so niʼohe tobali sawuyu ba mbanua böʼö misa.+ Nihundra-hundra soi böʼö* dania Yeruzalema irugi ginötö si no mutatugöi ba soi böʼö.*+
25 ”Simanö göi, so dandra ba luo, ba mbaŵa, hegöi ba ndröfi.+ Tefakao sibai fefu soi ba gulidanö, ba lö laʼila hadia zinangea lafalua börö ugu-ugu nasi sabölö-bölö. 26 Atata döla niha börö waʼataʼu ba börö me lakhalaigö hadia zalua ba gulidanö. Modögö waʼabölö si so ba dalu mbanua. 27 Aefa daʼö, laʼila dania waʼatohare Nono niha+ ba lawuo si fao faʼabölö hegöi lakhömi sebua.+ 28 Hizaʼi, na ibörögö alua daʼö fefu, miʼosindro ba mifaöga mbawami börö me lö ara tö ginötö wangefaʼö yaʼami.”
29 Aefa daʼö ifatunö Yesu gamaedola böʼö, ”Mifaigi atö döla geu ara hegöi eu tanö böʼö.+ 30 Na ibörögö mobulu, aboto ba dödömi wa no ahatö mbaŵa lökhö. 31 Simanö göi, na miʼila alua daʼö fefu, yaʼaboto ba dödömi wa lö ara tö tohare Wamatörö Lowalangi. 32 Sindruhu niwaʼögu, lö ahori mate niha si sagötö andre irege alua daʼö fefu.+ 33 Awuʼa mbanua ba awuʼa danö, hizaʼi lö tebulö niwaʼögu sagötö faʼara.+
34 ”Miʼangelama, böi tobali noro dödö sabua khömi wemanga-manga, famadu-madu,+ ba faʼaombö dödö ba waʼauri,+ enaʼö böi tokea ami na tohare ginötö andrö 35 hulö dandrawa.+ Ihawui fefu zi so ba gulidanö maʼasagörö. 36 Börö daʼö, miʼangelama+ ba miʼangandrö+ enaʼö tola teʼorifi ami moroi ba ngawalö zalua andrö dania, ba mosindro ami föna Nono niha.”+
37 Ba zi maʼökhö mamahaʼö Yesu ba gosali, ba zi bongi mofanö ia ba mbanua andrö ba toröi ia ba Hili Zaitu. 38 Sihulö wongi sibai, tohare niha ba gosali wamondrongo famahaʼönia.