Sura ba Mbanua Niha Keriso ba Golose
1 Moroi khö Waulo, sinenge Keriso Yesu moloʼö ohitö dödö Lowalangi ba moroi khö dalifusöda Timoteo,+ 2 nifaʼema ba niha niʼamoniʼö ba Golose, yaʼia daʼö ira talifusö si lö faröi, si hasara tödö khö Keriso:
Yamitema waʼasökhi dödö sebua* hegöi faʼohahau dödö moroi khö Lowalangi, Amada.
3 Maʼandrö saohagölö khö Lowalangi, Ama Zoʼaya yaʼita Yesu Keriso ero na mangandröga salahimi, 4 börö me no marongo wamatimi khö Keriso Yesu hegöi faʼomasimi ba niha niʼamoniʼö fefu, 5 niʼokhögömi börö wanötöna nihenaigö khömi ba zorugo.+ No mirongo wanötöna andrö me teturiaigö duria somuso dödö moroi ba zindruhu 6 nifaʼema khömi. Mowua duria somuso dödö andrö ba teturiaigö misa ba zi sagörö ulidanö,+ simanö göi ba gotaluami iʼotarai me mirongo ba miʼila sibai hewisa zindruhunia waʼasökhi dödö sebua* moroi khö Lowalangi. 7 No mirongo khö Gefafera,+ awöma sawuyu niʼomasiʼöma, si lö faröi tobali enoni khö Keriso salahima. 8 Ifatunö göi khöma waʼomasi niʼoromaʼömi börö geheha niʼamoniʼö.
9 Börö daʼö, iʼotarai me marongo, lö maböhöli wangandrö salahimi+ enaʼö miʼokhögö waʼaboto ba dödö si tefaudu+ ba gohitö dödö Lowalangi hegöi faʼatua-tua, ba miʼila mitimba tödömi gofu hadia ia börö gehehania,+ 10 irege sinangea gamuatami föna Yehowa* ba tola miʼomusoiʼö dödönia, me lö miböhöli wamalua si sökhi ba monönö khömi waʼaboto ba dödö si tefaudu sanandrösa khö Lowalangi.+ 11 Yafahöna khömi waʼabölö moroi ba gehehania solakhömi,+ irege anau gölömi ba wanaögö fefu hadia ia si fao faʼebolo dödö ba faʼomuso dödö, 12 ba böi tebulö miʼandrö saohagölö khö Nama, me yaʼia zangumaʼö wa sinangea mitema gondröita nibeʼe ba niha niʼamoniʼö+ si so ba haga andrö.
13 No iʼorifi ita moroi ba waʼabölö zogömi-gömi+ ba no iʼohe ita barö wamatörö Nononia niʼomasiʼö. 14 Ononia andrö zangefaʼö yaʼita me tobali ia höli, eluahania no teʼefaʼö horöda.+ 15 Famaedo Lowalangi si lö oroma ia,+ siaʼa moroi ba nifazökhinia.+ 16 Börö ia wa tewöwöi fefu zi so ba zorugo hegöi ba gulidanö, he soroma he si lö oroma,+ he razo, sondröniaʼö, samatörö, ba si so kuaso. Tewöwöi fefu hadia ia ba khönia+ ba börö ia. 17 No so ia fatua lö so danö böʼö,+ börö ia wa tewöwöi fefu danö böʼö, 18 ba yaʼia högö ba mboto andrö, yaʼia daʼö banua niha Keriso.+ Yaʼia zi oföna, siaʼa nisusugi moroi ba gotalua niha si no mate,+ irege ha yaʼia manö zi oföna, 19 börö me omasi Lowalangi enaʼö moʼahonoa ia ba ngawalö hadia ia.+ 20 Baero daʼö, omasi Lowalangi na fefu hadia ia teʼatulöʼö khönia, he si so ba gulidanö, he si so ba zorugo,+ yaʼia daʼö fangatulö ba ndro Nononia+ niduwagö ba döla geu famakao.*
21 Me föna, no fandröndröu ami moroi khö Lowalangi, tobali udunia ami börö me mifatou-tou manö zi lö sökhi. 22 Iadaʼa, no teʼatulöʼö ami börö waʼamate Nononia ba mboto tanö, enaʼö teʼamoniʼö ami föna Lowalangi, lö sinegu, ba lö hadia ia niböbögö khömi.+ 23 Hewaʼae simanö, böi mifamalö-malö wamati,+ miʼaroʼö ami ba dete wondrasi andrö,+ lö mangiwa,+ lö mangoloi dödömi ba wanötöna nirongomi ba duria somuso dödö, si no muturiaigö ba gotalua niwöwöi Lowalangi ba gulidanö.+ Börö duria somuso dödö andrö wa tobali ndraʼo enoni, yaʼo sotöi Faulo.+
24 Iadaʼa, omuso dödögu hewaʼae tefakao ndraʼo börö ami.+ Utörö wamakao simane nitaögö Keriso, hizaʼi lö tola löʼö uʼasiwai wamakao andrö börö mbotonia,+ yaʼia daʼö banua niha Keriso.+ 25 Tobali ndraʼo sangai halöwö ba mbanua niha Keriso andre, simane si no ifaduhusi tödö khögu Lowalangi+ börö ami enaʼö moʼahonoa wamaduhuʼögu khömi taromali Lowalangi, 26 yaʼia daʼö si tobini niʼamoniʼö,+ si lö oroma ba niha gulidanö me götö*+ föna hegöi ba ngaʼötö niha si no numalö. Iadaʼa, no teʼombakhaʼö zi tobini andrö ba niha niʼamoniʼö.+ 27 Börö ira wa omasi Lowalangi iforomaʼö ba ngawalö soi hawaʼamolakhömi ba hawaʼebua mböli zi tobini niʼamoniʼö andrö,+ yaʼia daʼö Keriso si hasara tödö khömi, eluahania manötöna ami wefao khönia ba wanema lakhömi.+ 28 Yaʼia nituriaigöda, tafangelama ba tafahaʼö niha ba ngawalö waʼatua-tua, enaʼö tola taʼosaraʼö fefu dödö niha khö Keriso, moʼahonoa ira föna Lowalangi.+ 29 Daʼö mbörö wa uʼodödögö wohalöwö. Uforege börö wanolo gehehania sangabölöʼö yaʼo.+