Hadia Aboto ba Dödöu Wa Moguna Wamahaʼö Niha Böʼö?

1, 2. Hana wa moguna tafahaʼö niha böʼö ba wangai halöwö teokratis?

OYA ginötö niʼogunaʼö Yesu ba wanuriaigö Mbanua Lowalangi. Hewaʼae simanö, oya göi iʼogunaʼö ginötönia ba wamahaʼö ndra nifahaʼönia. Itutunö khöra hewisa lala ba wamahaʼö hegöi ba wokubaloi mbiri-biri Lowalangi. (Mataiʼo 10:5-7) Simanö göi Filifo, oya ginötö iʼogunaʼö ba wanuriaigö. Hizaʼi, iʼbeʼe göi ginötönia ba wamahaʼö ononia alawe ba wamalua halöwö daʼö. (Halöwö Zinenge 21:8, 9) Iadaʼa, moguna tafahaʼö niha böʼö. Hadia mbörö?

² Ba mbanua niha Keriso ba zi sagörö ulidanö, ato sanuriaigö si bohou si lö mubayagö idanö. Moguna lafahaʼö ira. Tatolo ira enaʼö aboto ba dödöra wa moguna sibai labaso ba lafahaʼö ira samösa ba Zura Niʼamoniʼö. Moguna göi tafahaʼö ira hewisa lala ba wanuriaigö hegöi ba wamahaʼö turia somuso dödö. Ira matua sawena mubayagö idanö moguna lafahaʼö ira tobali enoni hegöi satua sokubaloi. Fefu niha ba mbanua niha Keriso tola labeʼe wanolo khö ndra sanuriaigö sibohou andre.​—Gamaedola 4:2.

FAHAʼÖ SANURIAIGÖ SI BOHOU LALA WAMAHAʼÖ BA ZURA NIʼAMONIʼÖ

3, 4. (a) Hewisa Waulo ba wamakhai famahaʼö ba Daromali hegöi fanuriaigö si sökhi? (b) Hadia zinangea tafalua fatua lö tafarou niha nifahaʼöda ba wamahaʼö ia samösa ba Zura Niʼamoniʼö?

³ Fefu nono mbanua Yehowa moguna labaso ba lafahaʼö ira ba Zura Niʼamoniʼö, enaʼö laʼila gohitö dödö Lowalangi. Itutunö Faulo khö ndra dalifusö ba Kolose wa moguna sibai daʼa imane, ”Mangandröga salahimi, maʼandrö, enaʼö tehöna khömi waʼaboto ba dödömi zomasi ia.” Hadia mbörö wa moguna labaso ba lafahaʼö ira ba Daromali? Börö me daʼa zameʼe faʼatua-tua ba sanolo yaʼira enaʼö aboto ba dödöra hewisa ’enaʼö amuata dana khö Zoʼaya gamuatara, fa böi si lö omasi ia’. Tola göi lafalua ”fefu ngawalö mbua-bua si sökhi” nibeʼe Yehowa khöra, si oföna sanandrösa ba wanuriaigö turia somuso dödö. (Kolose 1:9, 10) Andrö, na tafahaʼö niha ba Zura Niʼamoniʼö, moguna tatolo ira enaʼö aboto ba dödöra wa na labaso ba lafahaʼö ira ba Zura Niʼamoniʼö ero maʼökhö, tola tefarou dödöra ba wamosumange Yehowa.

⁴ Tebai tatolo niha nifahaʼöda enaʼö iʼila hadia guna wamahaʼö samösa ba Zura Niʼamoniʼö, na lö oföna tafalua daʼö. Sindruhunia, na tabaso ba taʼangerönusi Zura Niʼamoniʼö ero maʼökhö, tola tarasoi gunania ba waʼaurida hegöi ba halöwö fanuriaigö. Duma-dumania, na so wanofu sabua ba wanuriaigö, tola taʼogunaʼö Zura Niʼamoniʼö ba wameʼe fanema li. Mazui, ba ginötö tabaso waʼanau gölö Yesu, Faulo ba tanö böʼönia ba wanuriaigö, tola tefarou ita ba wanuriaigö hewaʼae so wanandraigö. Na tatutunö ba niha böʼö hadia zi no tafahaʼö ba hadia gunania khöda, tola tafarou ira enaʼö lafahaʼö ira ba Zura Niʼamoniʼö irege lasöndra göi gunania simane nirasoida.

5. Beʼe wanuturu lala hewisa wanolo niha nifahaʼöda ba wamahaʼö yaʼia samösa ba Zura Niʼamoniʼö si ero maʼökhö.

⁵ Tola manofu ndraʼugö, ’Hewisa lala wamahaʼö niha nifahaʼögu ba wamahaʼö Zura Niʼamoniʼö ero maʼökhö?’ Tola öforomaʼö hewisa lala wamaʼanö mbuku niʼogunaʼömi ba wamahaʼö. Tola öfarou ia ba wombaso gonönöta ba mbuku Hadia Nifahaʼö Zura Niʼamoniʼö Khöda? hegöi ba wombaso ayatinia. Aefa daʼö, tola öforomaʼö khönia lala wamaʼanö mbuku ba gangowuloa enaʼö tola ibeʼe mbua gera-erania. Farou ia wombaso ero so mbuku Manuriaigö mazui Sadarlah! si bohou. Tola göi öforomaʼö lala wangalui fanema li moroi ba wanofu Zura Niʼamoniʼö. Duma-dumania, ba wangogunaʼö Watchtower Library mazui PERPUSTAKAAN ONLINE Manuriaigö. Na omasi ifalua ngawalö lala andre, tola owua-wua dödönia ba omasi ifahaʼö ia nasa.

6. (a) Hewisa wanoloda si samösa niha enaʼö tedou waʼomasinia ba Zura Niʼamoniʼö soroi ba dödö? (b) Hadia mbuania ba niha nifahaʼöda na itema wamahaʼö ba Zura Niʼamoniʼö si fao faʼomuso dödö?

⁶ Ba ginötö tafahaʼö zi samösa niha, omasi ita na aboto ba dödönia wa moguna sibai Zura Niʼamoniʼö börö me daʼö zanolo yaʼia enaʼö aboto ba dödönia sanandrösa khö Yehowa. Moroi na tafaso ia, sökhi na taforomaʼö khönia hewisa enaʼö owua-wua dödönia ba wamahaʼö. Na itugu oya ifahaʼö ia ba Zura Niʼamoniʼö, tola fagölö dödönia simane nirasoi sanura zinunö sanunö, ”Faʼohahau dödö, na faböbö ndraʼo khö Lowalangi, khö Zoʼaya, Yehowa manötöna ndraʼo.” (Zinunö 73:28) Lö tola löʼö ibeʼe wanolo eheha Yehowa ba niha somasi fahuwu khönia.

FAHAʼÖ SANURIAIGÖ SI BOHOU LALA BA WANURIAIGÖ HEGÖI BA WAMAHAʼÖ

7. Hewisa wamahaʼö Yesu ba wamaʼema turia somuso dödö? (Faigi gambara ba wamobörö wamahaʼö.)

⁷ Oya wamahaʼö si tola tahalö moroi ba nifalua Yesu ba wamahaʼö ndra nifahaʼönia. Idönisi ira Yesu ba weʼamöi manuriaigö ba laʼila hewisa me ifahaʼö niha Yesu. Ibeʼe göi khöra wanuturu lala si tohude sanandrösa ba lala weʼamöi manuriaigö. (Mataiʼo, faza 10)^[1] (Faigi gonönöta.) Ba zi lö arara, lahalö wamahaʼö ira nifahaʼönia hewisa lala nifalua Yesu ba wamahaʼö zindruhu ba niha. (Mataiʼo 11:1) Datatutunö dombua lala ba wamahaʼö sanuriaigö si bohou ba wanuriaigö.

8, 9. (a) Hewisa lala wamahaʼö Yesu ba niha zamösana ba ginötö manuriaigö ia? (b) Hewisa woloʼöda duma-duma Yesu ba wamahaʼö niha sawena möi manuriagö?

⁸ Lala wahuhuosa ba niha. Tenga ha föna niha sato manö fahuhuo Yesu. Asese göi fahuhuo ia ba niha zamösana ba no ihaogö wahuhuosa khöra. Duma-dumania, fahuhuo ia khö samösa ira alawe zanaʼu idanö ba mbaʼa ba zinga mbanua Sikhara. (Yohane 4:5-30) Fahuhuo göi Yesu khö Mataiʼo Lewi, sangai mbeo, ba ikaoni enaʼö tobali nifahaʼönia. Itema mataiʼo wogaoni andre, ba gafuriata ikaoni Yesu hegöi niha böʼö fao manga ba nomonia. Ba daʼö, fahuhuo Yesu föna niha sato.​—Mataiʼo 9:9; Luka 5:27-39.

⁹ No ihaogö-haogö Yesu fahuhuo khö Natanaʼeli, hewaʼae so wangera-ngera si lö sökhi khö Natanaʼeli sanandrösa ba niha soroi ba Nazareta. Börö me no ihao-gö wahuhuosa Yesu khönia, ibulöʼö wangera-ngerania khö Yesu, niha Nazareta. Andrö omasi ia na oya ifahaʼö ia khö Yesu. (Yohane 1:47-52) Moroi ba duma-duma nibeʼe Yesu, tola tahalö wamahaʼö wa na tahaogö wahuhuosada ba niha si fao faʼahono, abölö omasi ira wamondro-ndrongo hadia nifaʼemada.^[2] [Faigi gonönöta.] Na tafahaʼö sanuriaigö si bohou lala wahuhuosa simane daʼö, tatu abölö owua-wua dödöra ba wanuriaigö.

10-12. (a) Hewisa Yesu ba wondrouʼö faʼomasi niha somasi mamondro-ndrongo turia somuso dödö? (b) Hewisa wanoloda niha sawena möi manuriagö enaʼö tobali ira samahaʼö Zura Niʼamoniʼö satua-tua?

¹⁰ Fahaʼö niha somasi mamondro-ndrongo. Oya sibai halöwö Yesu. Hizaʼi, na so zomasi mamondro-ndrongo yaʼia, ibeʼe ginötönia ba wamahaʼö yaʼira sanandrösa ba ngawalö hadia ia. Duma-dumania, samuza maʼökhö ato niha si no owulo ba zinga nidanö ba wamondro-ndrongo famahaʼö moroi khö Yesu. Andrö, möi Yesu hegöi Wetero ba dundraha ba wamahaʼö yaʼira andrö. Aefa daʼö, ifahaʼö göi Wetero. Ifalua dandra sahöli-höli dödö Yesu irege oya isöndra giʼa Wetero. Aefa daʼö imane khö Fetero, ”Iʼotarai daʼe, ba samaʼuʼu niha ndraʼugö.” Fetero hegöi ira awönia ”laʼohe baene dundraha, laröi fefu hadia ia” ba laʼoʼö Yesu.​—Luka 5:1-11.

¹¹ Omasi göi Nikodemo na oya ifahaʼö ia khö Yesu. Hizaʼi, börö me ba Sanhedrin mohalöwö ia, ataʼu ia ba wehede niha na laʼila wa fahuhuo ia khö Yesu. Andrö ba zi bongi iʼondrasi Yesu. Lö ifofanö ia Yesu, hizaʼi ibeʼe ginötönia ba wanutunö sindruhu khönia. (Yohane 3:1, 2) Omasi Yesu ibeʼe ginötönia ba wamahaʼö sindruhu hegöi ba wangaʼaroʼö famatira. Iadaʼa, moguna tabeʼe ginötöda wamalukhaisi niha ba ginötö si tefaudu khöra, ba moguna göi taʼogunaʼö ginötöda ba wanolo yaʼira enaʼö aboto ba dödöra Zura Niʼamoniʼö.

¹² Ba ginötö fao ita khö zanuriaigö si bohou ba halöwö fanuriaigö, tola tafahaʼö ira enaʼö lafuli lafalukhaisi niha somasi mamondro-ndrongo nifaʼemara. Tola tafaogö ira khöda ba ginötö tafuli tafalukhaisi hegöi ba wamahaʼö niha ba Zura Niʼamoniʼö. Na tafalua daʼö, tola lafahaʼö ira hewisa lala ba wamahaʼö niha böʼö ba omuso dödöra börö me lafahaʼö niha ba zindruhu sanandrösa khö Yehowa. Hizaʼi, daʼa zamarou yaʼira enaʼö lafuli lafalukhaisi niha si no irai fahuhuo khöra hegöi ba wamahaʼö yaʼira ba Zura Niʼamoniʼö. Lafahaʼö ira göi enaʼö labologö dödöra ba böi awuwu ira hewaʼae lö aoha khöra wamalukhaisi niha ba nomo.​—Galatia 5:22; faigi kotak ”Lö Awuwu Ia.”

FAHAʼÖ NIHA SANURIAIGÖ SI BOHOU BA WANOLO TALIFUSÖ BA WAMATI

13, 14. (a) Hadia wamahaʼö si tola öhalö moroi ba duma-duma niha somasi mohalöwö salahi niha böʼö ba Zura Niʼamoniʼö? (b) Hadia lala si tola öfalua ba wamahaʼö niha sawena möi manuriagö mazui si bohou ebua ba wanolo dalifusö ba wamati?

¹³ Omasi Yehowa na ono mbanuania faoma laʼomasiʼö nawöra simane faʼomasi ba nösi nomo, ba falulu fohalöwö ira. (Baso Luka 22:24-27; I Fetero 1:22.) Itutunö Zura Niʼamoniʼö wa ibeʼe Yesu fefu zi so khönia, simane nosonia salahi niha böʼö. (Mataiʼo 20:28) Doreka ”si no fahöna bua-bua si sökhi, ba oya ibeʼe ameʼela ba zi numana”. (Halöwö Zinenge 9:36, 39) Maria ”si no erege tödö” ba wanolo ndra talifusö ba Roma. (Roma 16:6) Hewisa wanoloda niha böʼö enaʼö aboto ba dödöra wa moguna sibai wamalua si sökhi khö ndra talifusö ba wamati?

¹⁴ Tola tadönisi niha sanuriaigö si bohou ba wamalukhaisi niha salawa ndröfi mazui niha sofökhö. Ba ginötö möi zatua ba wamalukhaisi niha, tola laʼohe ndraonora na tefaudu ginötönia. Ira satua sokubaloi göi tola ladönisi zi bohou ebua mazui sanuriaigö si bohou ba wamalua halöwö simane wameʼe gö ba niha zagalawa ndröfi mazui ba wangehaogö nomora. Na laʼila ira si bohou ebua mazui sanuriaigö si bohou wa faoma laʼomasiʼö nawöra ba wamati, tola tefarou ira göi ba wamalua daʼö. Duma-dumania, me manuriaigö samösa satua sokubaloi ba zi sambua mbanua, asese molombase ia ba nomo ndra talifusöda si so ba daʼö. Samösa si bohou ebua sasese fao khönia ihalö wamahaʼö moroi ba duma-duma zi sökhi andre, ba tefarou ia ba woʼangeraigö hadia zi tola ifalua ba wanolo ndra talifusö ba wamati.​—Roma 12:10.

15. Hana wa moguna laʼameʼegö tödö ira satua sokubaloi ba waʼatedou ndra matua ba mbanua niha Keriso?

¹⁵ Ibeʼe Yehowa halöwö khö ndra matua ba wamahaʼö Daromali ba mbanua niha Keriso. Andrö, moguna lafahaʼö ira lala wamahaʼö si sökhi ba ginötö lafaʼema huhuo. Na satua sokubaloi ndraʼugö, fondro-ndrongo na so enoni samahaʼö yaʼia ba wamaʼema huhuo, ba tolo ia ba wondroʼuʼö faʼatua-tuania. (Nehemia 8:8)^[3]—Faigi gonönöta.

16, 17. (a) Hadia nifalua Waulo enaʼö itugu tedou Timoteo? (b) Hewisa satua sokubaloi wamahaʼö niha sinangea tobali gubalo ba mbanua niha Keriso?

¹⁶ Moguna ato ndra matua nifahaʼö enaʼö tobali gubalo ba gangowuloa. Ifahaʼö Timoteo Faulo ba ifarou ia enaʼö ifahaʼö niha böʼö göi. Imane Faulo, ”Ba yaʼabeʼe ndraʼugö, ba waʼebua dödö andrö, ba khö Keriso Yesu. Ba hadia nirongou khögu, ba zi no ato ba mbörö, daʼö faʼema ba niha si lö faröi, si tola mamahaʼö dania niha böʼö göi.” (II Timoteo 2:1, 2) Oya wamahaʼö nihalö Timoteo khö Waulo si tobali satua sokubaloi hegöi sinenge, simane hewisa lala enaʼö atua-tua ba wanuriaigö hegöi lala ba wanolo dalifusö ba mbanua niha Keriso.​—II Timoteo 3:10-12.

¹⁷ Oya iʼogunaʼö ginötö Faulo ba wamahaʼö Timoteo, börö me omasi ia na itugu moʼahonoa tefahaʼö Timoteo. (Halöwö Zinenge 16:1-5) Ira satua sokubaloi tola laʼoʼö Waulo, na ladönisi enoni sinangea wangai halöwö ba wefao khöra ba wokubaloi. Na lafalua simane daʼö, tola lahalö wamahaʼö ira enoni moroi khö ndra satua sokubaloi ba wamahaʼö niha böʼö, lala wanaha tödö si fao faʼomasi, hegöi lala wangodaligö Yehowa ba ginötö lakubaloi mbiri-birinia.​—I Fetero 5:2.

MOGUNA SIBAI WAMAHAʼÖ

18. Hana wa moguna khöda wamahaʼö niha böʼö ba wangai halöwö khö Yehowa?

¹⁸ Ba götö safuria andre, ato sanuriaigö si bohou zinangea lafahaʼö enaʼö atua-tua ba wanuriaigö. Ato göi ndra matua zinangea lafahaʼö ba wangai halöwö ba mbanua niha Keriso. Omasi Yehowa na fefu nono mbanuania latema wamahaʼö si sökhi, ba ibeʼe halöwö sebua khöda ba wanolo sanuriaigö si bohou. Andrö, moguna taforege wamahaʼö niha böʼö, simane nifalua Yesu hegöi Faulo. Moguna ato tafahaʼö niha, börö me oya nasa nifaluada ba halöwö wanuriaigö, fatua lö tohare luo andrö.

19. Hana wa faduhu dödömö wa tola mofozu na owölö-ölö ndraʼugö ba wamahaʼö niha böʼö ba wangai halöwö khö Yehowa?

¹⁹ Moguna tabeʼe ginötö ba taforege wamahaʼö sanuriaigö si bohou. Hizaʼi, faduhu dödöda wa itolo ita Yehowa hegöi Yesu enaʼö taʼila hewisa lala si sökhi ba wamahaʼö niha böʼö. Tatu owua-wua dödöda ba ginötö taʼila niha nifahaʼöda ”laforege ba latehegö waʼaurira” ba mbanua niha Keriso mazui ba wanuriaigö. (I Timoteo 4:10, NW) Iadaʼa, moguna göi taforege enaʼö tedou ita ba wamati, wondrouʼö mbua-bua niha Keriso, hegöi itugu ahatö ita khö Yehowa.