Nisura Yohane
5 Aefa daʼö, so gowasa+ ba niha Yahudi, ba mofanö Yesu ba Yeruzalema. 2 Ahatö ba Mbawa Göli Mbiri-biri+ ba Yeruzalema, so sambua mbaʼa nidanö nifotöi Betesa ba li Heberaiʼo, no ifasui ia lima ngawua ewali nifosagö. 3 Ato niha sofökhö, sauʼa, sakela-kela hegöi sombuyu-mbuyu töla no lafadölö ira ba daʼö. 4* —— 5 So ba daʼö ndra matua si no 38 fakhe ba wökhö. 6 Me iʼila ia Yesu ba aboto ba dödönia wa no ara niha andrö ba wökhö, imane khönia Yesu, ”Hadia omasiʼö döhö?”+ 7 Imane niha sofökhö andrö, ”He Pa, lö hadöi sanolo yaʼo weʼamöi bakha ba mbaʼa nidanö andrö ero mukiba ia. Ero möi ndraʼo, no oföna möi niha böʼö.” 8 Imane khönia Yesu, ”Ozizio! Fazawa dufomö* ba ofanö.”+ 9 Iʼanemaiʼö döhö niha andrö, ifazawa dufonia ba mofanö ia.
Luo Sabato me luo daʼö. 10 Lamane ira niha Yahudi khönia, ”Luo Sabato maʼökhö. Tebai öfazawa dufomö.”+ 11 Imane khöra, ”Niha samadöhö yaʼo zangumaʼö khögu ba wamazawa tufogu ba mofanödo.” 12 Manofu ira, ”Haniha zangumaʼö khöu, ’Fazawa dufomö ba ofanö’?” 13 Hizaʼi lö aboto ba dödönia haniha zamadöhö yaʼia, börö me lö hadöi Yesu ba gotalua niha sato.
14 Aefa daʼö, falukha ira Yesu ba gosali ba imane khönia Yesu, ”No döhö ndraʼugö iadaʼa. Böi falua horö saʼae, enaʼö lö göna ndraʼugö zi töra moroi ba daʼö.” 15 Aefa daʼö, mofanö niha andrö ba ifatunö ba niha Yahudi wa Yesu zamadöhö yaʼia. 16 Daʼö mbörö wa fatuwu niha Yahudi khö Yesu, börö me ifalua daʼö ba luo Sabato. 17 Imane khöra, ”Lö aetu mohalöwö Namagu irugi maʼökhö, ba simanö göi ndraʼo.”+ 18 Börö daʼö, laʼalui lala ira niha Yahudi ba wamunu yaʼia. Moloʼö yaʼira, tenga ha isawö luo Sabato, hizaʼi ifagölösi ia khö Lowalangi+ börö me iwaʼö Amania Lowalangi.+
19 Imane khöra Yesu, ”Sindruhu-ndruhu niwaʼögu khömi, tebai ifalua Ono gofu hadia manö zomasi ia, na tenga khö Nama iʼila.+ Gofu hadia nifalua Nama, ifalua göi zimane daʼö Ono. 20 Iʼomasiʼö sibai Nononia Ama+ ba iforomaʼö fefu hadia ia nifaluania. Iforomaʼö nasa khö Nono halöwö sebua nifaluania enaʼö ahöli-höli dödö niha.+ 21 Simane Ama me isusugi zi mate ba iʼorifi ira,+ simanö göi Nono iʼorifi haniha manö zomasi ia.+ 22 Lö ihuku niha Ama, hizaʼi ibeʼe fefu ba danga Nono wanguhuku andrö,+ 23 enaʼö fefu niha lafosumange Nono simane famosumangera Ama. Haniha zi lö mamosumange Ono, lö ifosumange Nama samatenge yaʼia.+ 24 Sindruhu-ndruhu niwaʼögu khömi, gofu haniha zamondrongo yaʼo ba si faduhu tödö khö Nama samatenge yaʼo, isöndra waʼauri si lö aetu.+ Lö tehuku ia, hizaʼi aefa ia moroi ba waʼamate ba isöndra waʼauri.+
25 ”Sindruhu-ndruhu niwaʼögu, samuza inötö dania, ba no irugi inötö andrö iadaʼa, larongo dania li Nono Lowalangi niha si no mate, ba auri niha samondrongo yaʼia. 26 So waʼabölö khö Nama ba wameʼe faʼauri,*+ ba no ibeʼe göi khö Nono waʼabölö ba wameʼe faʼauri.+ 27 No ibeʼe göi Ama khönia kuaso ba wanguhuku+ börö me Ono niha ia.+ 28 Böi ahöli-höli dödömi ba daʼö, irugi inötö dania larongo linia dozi si so ba lewatö,+ 29 ba möi ira yawa. Samalua si sökhi tesusugi dania ba wanöndra faʼauri si lö aetu, ba samalua si lö sökhi tesusugi enaʼö tehuku.+ 30 Lö uʼila ufalua hadia ia zomasi dödögu. Uʼetuʼö huku moloʼö niwaʼö Nama, ba atulö wanguhuku nifaluagu andrö+ börö me lö uʼoʼö zomasi ndraʼo, hizaʼi somasi zamatenge yaʼo.+
31 ”Na ha yaʼo zamaduhuʼö sanandrösa khögu, lö atulö wamaduhuʼögu andrö.+ 32 Hizaʼi, so niha böʼö samaduhuʼö yaʼo, ba aboto ba dödögu wa atulö wamaduhuʼönia andrö sanandrösa khögu.+ 33 No mifatenge niha khö Yohane, ba no ibeʼe wamaduhuʼö satulö.+ 34 Sindruhunia lö moguna khögu wamaduhuʼö moroi ba niha, hizaʼi wa uwaʼö daʼa enaʼö tola teʼorifi ami. 35 Hulö wandru si hola-hola ia ba sohaga ba omasi ami mirasoi hagania ba zi sabata.+ 36 So khögu wamaduhuʼö sabölö moguna moroi ba wamaduhuʼö Yohane, yaʼia daʼö halöwö nibeʼe Namagu enaʼö uʼasiwai, halöwö nifaluagu iadaʼa. Daʼö zamaduhuʼö wa nifatenge Nama ndraʼo.+ 37 Ama andrö samatenge yaʼo, no göi ifaduhuʼö ndraʼo.+ Lö irai mirongo linia mazui miʼila khala-khalania,+ 38 ba lö ba dödömi fehedenia, börö me lö faduhu dödömi ba niha nifatengenia.
39 ”Miʼalui nösi Mbuku Niʼamoniʼö,+ börö me miwaʼö tödömi na mifalua daʼö misöndra waʼauri si lö aetu. Buku Niʼamoniʼö andrö zamaduhuʼö sanandrösa khögu,+ 40 hizaʼi lö miʼondrasi ndraʼo+ enaʼö misöndra waʼauri andrö. 41 Lö uʼalui lakhömi moroi ba niha, 42 hizaʼi aboto ba dödögu wa lö hadöi khömi faʼomasi khö Lowalangi. 43 Tohare ndraʼo ba döi Namagu, ba lö mitema ndraʼo. Na tohare niha böʼö ba döinia samösa, ba mitema ia. 44 Hezo wa tola faduhu dödömi na faoma mitema wamolakhömi andrö khö nawömi ba lö miʼalui wamolakhömi andrö moroi khö Lowalangi si ha sambua?+ 45 Böi miwaʼö tödömi ufobahulu ami föna Nama. Samobahulu yaʼami yaʼia daʼö Moze+ niha nifaduhusimi tödö. 46 Sindruhunia, na faduhu dödömi khö Moze, tatu faduhu dödömi khögu börö me so nisurania sanandrösa khögu.+ 47 Na lö faduhu dödömi ba nisurania, hewisa wa tola faduhu dödömi ba wehedegu?”