Nisura Yohane
21 Aefa daʼö, ifuli iforomaʼö ia Yesu khö ndra nifahaʼönia ba Nasi Diberia. Daʼa zalua me iforomaʼö ia. 2 Owulo ndra Simoni Fetero, Toma (nifotöi si Faero),+ Natanaʼeli+ moroi ba Gana ba Galilaia, ono Zebedaiʼo,+ ba darua ndra nifahaʼö tanö böʼö. 3 Imane khöra Simoni Fetero, ”Damöido fandriala.” Lamane khönia, ”Faoga awöu.” Möi ira ba dundraha, hizaʼi sara wongi lö ahulu ira.+
4 Me arakhagö moluo, mozizio Yesu ba zinga gawu. Lö laʼila ira nifahaʼö wa Yesu daʼö.+ 5 Imane khöra Yesu, ”He yaʼami iraonogu, hadia so göda* khömi ba daʼö?” Lamane, ”Löʼö!” 6 Imane Yesu, ”Mifazaumba ndriala tanö ba gambölö dundraha, ba misöndra dania giʼa.” Lafazaumba ndriala ba tebai lasöbi mangawuli börö waʼoya gahuluara.+ 7 Imane nifahaʼö niʼomasiʼö Yesu+ khö Wetero, ”Hiza Zoʼaya!” Me irongo Simoni Fetero wa Soʼaya daʼö, ifazaumba ia ba nasi lö baru-baru, no iböbö ba löwi-löwinia mbarunia tanö baero. 8 Hizaʼi, laʼoʼö ia ira nifahaʼö tanö böʼö faoma tundraha side-ide, ba ladöni göi ndriala safönu iʼa börö me ahatö ira ba gawu, ha mato 90 meter* iʼotarai daʼö.
9 Me no larugi zinga gawu, laʼila so mato hauga rozi giʼa hegöi roti ba dete mbo galitö. 10 Imane khöra Yesu, ”Miʼohe mato hauga rozi giʼa si no misöndra andrö.” 11 Möi ba dundraha Zimoni Fetero ba isöbi ndriala ba gawu. Afönu ndriala andrö iʼa segebua, so 153 rozi. Hewaʼae simanö, lö asika ndrialara. 12 Imane Yesu, ”Miʼaine, milau manga.” Lö si barani manofu khönia, ”Haniha ndraʼugö?” börö me laʼila wa yaʼia andrö Soʼaya. 13 Ihalö Yesu roti hegöi iʼa, ibeʼe öra. 14 No medölu kali+ iʼoromaʼö ia Yesu khö ndra nifahaʼönia me no tesusugi ia moroi ba gotalua zi mate.
15 Me no aefa manga ira sihulö wongi, imane Yesu khö Zimoni Fetero, ”He Simoni ono Yohane, hadia abölö öʼomasiʼö ndraʼo moroi ba daʼa fefu?” Imane Simoni, ”He Soʼaya, tatu manö öʼila wa uʼomasiʼö ndraʼugö.” Imane khönia Yesu, ”Beʼe gö nono mbiri-birigu.”+ 16 Ifuli manofu khönia Yesu ba zi mendrua kali, ”He Simoni ono Yohane, hadia öʼomasiʼö ndraʼo?” Imane Simoni, ”He Soʼaya, tatu manö öʼila wa uʼomasiʼö ndraʼugö.” Imane Yesu, ”Kubaloi nono mbiri-birigu.”+ 17 Isofu zui khönia Yesu ba zi medölu kali, ”He Simoni ono Yohane, hadia öʼomasiʼö ndraʼo?” Abu dödö Wetero börö me no tölu kali isofu khönia Yesu, ”Hadia öʼomasiʼö ndraʼo?” Andrö imane, ”He Soʼaya, yaʼugö zabölö mangila. No aboto ba dödöu wa uʼomasiʼö ndraʼugö.” Imane Yesu, ”Beʼe gö nono mbiri-birigu.+ 18 Sindruhu-ndruhu niwaʼögu khöu, me ono matua ndraʼugö, tola öfake samösa mbarumö ba mofanöʼö gofu hezo manö zomasi dödöu. Hizaʼi, na no atua ndraʼugö öʼoroʼö dangamö, aefa daʼö niha böʼö zamobaru yaʼugö ba laʼoheʼö ba nahia si lö omasiʼö.” 19 Wa iwaʼö daʼö, ba wangoromaʼö hewisa dania waʼamate nitörö Wetero si möi famolakhömi Lowalangi. Me no aefa iwaʼö daʼö imane khönia Yesu, ”Böi böhöli woloʼö yaʼo.”+
20 Ifaigi furi Fetero ba iʼila so zoloʼö-loʼö yaʼira moroi furi, yaʼia daʼö nifahaʼö niʼomasiʼö Yesu,+ si dadao ba zingania ba mbongi me manga ira ba sanofu khönia, ”He Soʼaya, haniha dania zi manga mbölimö?” 21 Me iʼila Fetero nifahaʼö andrö, isofu khö Yesu, ”Hewisa göi dania ia andrö Soʼaya?” 22 Imane khönia Yesu, ”Na omasido so manö ia irege toharedo, hana wa öhalö fökhö högöu daʼö? Yaʼugö, böi böhöli woloʼö yaʼo.” 23 Tehöngö wehede Yesu andrö ba gotalua ndra talifusö wa lö mate nifahaʼö andrö. Sindruhunia sa lö niwaʼö Yesu wa lö mate nifahaʼö andrö, hizaʼi imane, ”Na omasido so manö ia irege toharedo, hana wa öhalö fökhö högöu daʼö?”
24 Nifahaʼö andrö+ zamaduhuʼö ba sanura daʼa fefu, ba aboto ba dödöda wa atulö wamaduhuʼönia.
25 Sindruhunia, oya nasa danö böʼö nifalua Yesu, hizaʼi na muzara-zara wanura yaʼia, imane tödögu lö itaha ulidanö andre gölu-gölu zura andrö.+