2 Moze
10 Imane Yehowa khö Moze, ”Ae falukhaisi Waraʼo. Utehegö tobali ia sabeʼe högö*+ simanö göi ndra sohalöwö khönia, enaʼö iʼila samösa dandra sahöli-höli dödö nifaluagu.+ 2 Ufalua daʼö enaʼö miʼila midunö-dunö ba ndraonomi hegöi ba maʼuwumi fefu wanguhuku sabölö-bölö nifaluagu ba niha Miserai awö dandra sahöli-höli dödö nifaluagu ba gotaluara.+ Ba daʼö dania aboto ba dödömi haniha Yehowa andrö.”
3 Ba mofanö Moze hegöi Aʼaroni wamalukhaisi Faraʼo ba lamane, ”Daʼa niwaʼö Yehowa Lowalangi niha Heberaiʼo: ’Hawaʼara nasa öʼoʼö niwaʼögu?+ Tehegö mofanö nono mbanuagu enaʼö lafosumange ndraʼo. 4 Na lö nasa ötehegö mofanö nono mbanuagu, uʼasogö ba danöu mahemolu damo soya. 5 Lahawui danö maʼasagörö irege lö oroma saʼae. Ahori laʼa zinanömi si lö tekiko ba deu esi hegöi eu ba mbenua khömi.+ 6 Afönu dania tamo fefu gödo razo, simanö göi nomo ndra sohalöwö khöu awö nono mbanuau. Abölö-bölö daʼa moroi ba zi no irai laʼila ira amau hegöi tuau me toröi ira ba daʼa.’”+ Aefa daʼö mofanö Moze faoma Aʼaroni föna Waraʼo.
7 Ba lamane ira sohalöwö khö Waraʼo, ”Hawaʼara tö nasa lafakao ita ira niha daʼa? Tehegö manö mofanö ira ba wamosumange Yehowa Lowalangira. Hadia lö öʼila wa no adudu Miserai?” 8 Ifuli zui ikaoni Moze hegöi Aʼaroni andrö Faraʼo. Imane khöra, ”Tola mofanö ami ba wamosumange Lowalangimi Yehowa. Hizaʼi, haniha manö zi möi?” 9 Imane Moze, ”Ahori möi fefu, he satua, he iraono, he ono matua hegöi ono alawe. Maʼohe göi mbiri-biri khöma awö zawi+ börö me mafalua gowasa khö Yehowa.”+ 10 Imane Faraʼo, ”Hadia miwalingagö fao khömi Yehowa ba utehegö mofanö ami hegöi iraonomi?+ Sindruhu wa so ba dödömi zi lö sökhi. 11 Lö utehegö! Börö me omasi ami wamosumange Yehowa, ibönö yaʼi nono matua zi möi, tebai möi fefu.” Aefa daʼö, ifofanö ira Faraʼo.
12 Andrö imane Yehowa khö Moze, ”Fazawa ziʼomö gamaudu Miserai, enaʼö tohare damo ba danö Miserai ba laʼa fefu zinanöra si lö tekiko ba deu esi.” 13 Ba ifazawa ziʼonia Moze ba gamaudu danö Miserai ba iʼasogö Yehowa nangi moroi ba gatumbukha si numalö ba soi daʼö, maʼö-maʼökhö ba sara wongi. Mahemolu sihulö wonginia, oya sibai damo nisaoʼö nangi. 14 Tohare damo soya ba lahawui danö Miserai.+ Tobali famakao damo andrö.+ Lö irai ba zilalö so damo soya simane daʼö ba lö göi irai so aefa daʼö. 15 Tebalu danö ba waʼoya damo, lua-luania ogömi soi daʼö. Ahori laʼa fefu zinanö, simanö göi mbua zinanö si toröi ba deu esi. Sagörö lö hadöi bulu ndruʼu sauri si toröi ba danö Miserai, he ba nowi hegöi ba döla geu.
16 Iʼanemaiʼö ifakaoniʼö Moze hegöi Aʼaroni andrö Faraʼo. Imane khöra, ”No fasala ndraʼo khö Lowalangimi Yehowa, simanö göi khömi. 17 Mibologö dödömi khögu, sakali daʼa yaʼi. Miʼangandrö khö Lowalangimi Yehowa enaʼö iböhöli wamakao si hokha mbugu andre.” 18 Ba mofanö ia* föna Waraʼo möi ia mangandrö khö Yehowa.+ 19 Ba ifaböʼöni lala nangi Yehowa irege tohare nangi moroi ba gaekhula. Iʼoloiʼö fefu damo andrö angi daʼö, iʼohe ba Nasi Soyo. Sambua lö si toröi damo ba danö Miserai. 20 Hizaʼi, itehegö Yehowa abeʼe högö*+ Waraʼo, ba lö itehegö Faraʼo na mofanö ndraono Gizaraʼeli.
21 Aefa daʼö, imane Yehowa khö Moze, ”Fazawa dangamö ba dalu mbanua enaʼö ihawui faʼogömi-gömi danö Miserai, irege lö oroma niha.” 22 Ifazawa dangania Moze ba dalu mbanua ba alua waʼogömi sabölö-bölö ba danö Miserai, tölu hari waʼara.+ 23 Lö laʼila nawöra ira niha Miserai ba lö laʼila mofanö ba zi tölu hari daʼö. Hizaʼi, lö tebulö haga ba zi toröi iraono Gizaraʼeli.+ 24 Imane Faraʼo khö Moze, ”Ofanö, ae fosumange Yehowa.+ Utehegö miʼohe ndraonomi. Hizaʼi, böi miʼohe mbiri-biri khömi awö zawi.” 25 Imane Moze, ”Tebai. Hasambalö ötehegö maʼohe guriföma enaʼö mabeʼe zumange nitunu awö zumange tanö böʼö khö Lowalangima Yehowa.+ 26 Maʼohe fefu guriföma. Tebai maröi zageu, börö me maʼogunaʼö ösa ba wamosumange Lowalangima Yehowa. Lö maʼila hezo so nibeʼema dania khö Yehowa. Awena maʼila na ofeta ndraʼaga ba daʼö.” 27 Ba itehegö abeʼe högö* Waraʼo Yehowa ba lö ifofanö ira Faraʼo.+ 28 Imane Faraʼo, ”Ofanö! Lö omasido uʼila ndraʼugö saʼae! Böi alui lala enaʼö falukha ita! Na öfuliʼö ba daʼa, hasambalö si mate ndraʼugö!” 29 Imane Moze, ”Lau. Lö saʼae möido ba daʼa.”