2 Moze
4 Imane Moze, ”Hewisa na lö faduhu dödöra ba lö lafondrondrongo niwaʼögu?+ Tola manö lawaʼö, ’Hewisa wa no falukha ami Yehowa?’” 2 Imane Yehowa, ”Hadia zi so ba dangamö?” Imane Moze, ”Siʼo.” 3 Aefa daʼö imane Lowalangi, ”Fazaumba daʼö tou ba danö.” Ba ifazaumba ziʼo daʼö Moze tou ba danö ba tobali ulö.+ Ba moloi Moze, ifandröndröu ia moroi ba gulö andrö. 4 Imane Yehowa, ”Raʼu gulö daʼö ba gogohe giʼonia.” Andrö, iraʼu gulö daʼö Moze ba tobali siʼo ba dangania. 5 Ifuli imane Lowalangi, ”Falua daʼö enaʼö faduhu dödöra wa Yehowa Lowalangi ndra tuara, Lowalangi Gaberahamo, Lowalangi Gizaʼaki, ba Lowalangi Yakobo+ zi no mangondrasi yaʼugö.”+
6 Imane zui khönia Yehowa, ”Tandraigö beʼe dangau bakha ba mbarumö.” Ba ibeʼe dangania Moze bakha ba mbarunia. Me ifuli iheta ba no afönu dangania bou auri, afusi hulö esi.+ 7 Ba imane khönia Lowalangi, ”Fuli beʼe dangau bakha ba mbarumö.” Ba ibeʼe dangania Moze bakha ba mbarunia. Me ifuli iheta ba no döhö dangania! 8 Imane Lowalangi, ”Na lö faduhu dödöra khöu, mazui lö laʼameʼegö tödö dandra sahöli-höli dödö si oföna, hasambalö lafondrondrongo niwaʼöu na laʼila dandra sahöli-höli dödö si mendrua.+ 9 Hizaʼi, na no dua kali öfalua dandra sahöli-höli dödö ba lö faduhu dödöra nasa ba lö lafondrondrongo wehedeu, halö nidanö moroi ba Nungo Nidanö Nilo ba duwagö ba dete danö sabeʼe. Tobali do dania nidanö daʼö.”+
10 Imane Moze khö Yehowa, ”Bologö dödöu khögu Yehowa, lö onekhe fahuhuo genonimö andre, iʼotarai me mböröta hegöi me no fahuhuoʼö khögu. Fadöʼö-döʼö ligu na fahuhuo ndraʼo.”*+ 11 Imane Yehowa, ”Haniha zamazökhi bawa niha? Haniha mbörö wa tebai mohede niha, afiso, balunö, mazui tola iʼila? Yaʼo Yehowa zamalua daʼö. 12 Börö daʼö, ofanö! Utolo dania ndraʼugö* ba ginötö fahuhuoʼö. Yaʼo zamahaʼö yaʼugö hadia zinangea öwaʼö.”+ 13 Ba imane, ”Bologö dödöu khögu Yehowa, fatenge manö niha böʼö, gofu haniha zomasiʼö.” 14 Ba mofönu Yehowa khö Moze imane, ”Hadia tenga so gaʼamö Aʼaroni+ niha Lewi andrö? Uʼila wa onekhe ia fahuhuo. Ba lala so ia iadaʼa, möi ifalukhaisi ndraʼugö. Na iʼila ndraʼugö, tatu omuso dödönia.+ 15 Fahuhuo khönia ba fatunö fefu niwaʼögu khöu mege.+ Yaʼo dania zanolo yaʼami ba ginötö fahuhuo ami.+ Ufahaʼö dania ami hadia zinangea mifalua. 16 Yaʼia zi tobali salahimö ba wahuhuosa ba ndraono Gizaraʼeli, ba hulö Lowalangi ndraʼugö khönia.*+ 17 Ohe ziʼo daʼö ba ogunaʼö ia ba wamalua tandra sahöli-höli dödö.”+
18 Börö daʼö, mangawuli Moze khö namania matuania sotöi Yetero+ ba imane, ”Hadia tola mangawuli ndraʼo ba Miserai ba wamaigi ira talifusögu? Möido ufaigi ira na lö hadia ia khöra.” Imane Yetero, ”Tola, yaʼugö ba lala he.” 19 Aefa daʼö imane Yehowa khö Moze ba Midiano, ”Angawuli ba Miserai. No ahori mate niha sedöna mamunu yaʼugö mböröta.”+
20 Iʼohe woʼomonia Moze awö ndraononia matua. Ibeʼe ira yawa ba hulu galide ba mofanö ira ba Miserai. Iʼohe göi ziʼonia Moze simane niwaʼö Lowalangi sindruhu khönia. 21 Imane Yehowa khö Moze, ”No ubeʼe khöu waʼabölö ba wamalua tandra sahöli-höli dödö. Na no örugi dania Miserai, foromaʼö khö Waraʼo dandra sahöli-höli dödö andrö.+ Utehegö dania tobali ia sabeʼe högö*+ ba lö itehegö mofanö nono mbanuagu.+ 22 Fatunö khö Waraʼo, ’No iwaʼö Yehowa, ”Iraono Gizaraʼeli andrö onogu siaʼa, ono matua.+ 23 Uwaʼö khöu, tehegö mofanö ndraonogu enaʼö lafosumange ndraʼo. Na lö ötehegö mofanö ira, ubunu nonomö, ono siaʼa.”’”+
24 Ba lala ba gamaudu nahia si toröi yaʼia, iʼondrasi ia Yehowa+ ba edöna ibunu.+ 25 Börö daʼö, ihalö gara satarö Sifora+ ba wosuna ononia. Ifazaumba guli wamatua nono daʼö ba gahenia* ba imane, ”Marafule si no togule do ndraʼugö khögu.” 26 Ba ifofanö ia Lowalangi. Me luo daʼö imane Sifora, ”Marafule si no togule do,” börö wosuna andrö.
27 Ba fahuhuo Yehowa khö Gaʼaroni, ”Aeʼe ba danö si mate ba falukhaisi Moze.”+ Ba mofanö Gaʼaroni wamalukhaisi Moze ba hili nifili Lowalangi sindruhu,+ aefa daʼö fatalagu bagi ira. 28 Ifatunö Moze khö Gaʼaroni fefu niwaʼö Yehowa khönia+ hegöi tandra sahöli-höli dödö nifaluania dania.+ 29 Aefa daʼö, mofanö Moze hegöi Aʼaroni, laʼowuloi fefu zondröniaʼö ba ndraono Gizaraʼeli.+ 30 Ifatunö khöra fefu Aʼaroni niwaʼö Yehowa khö Moze. Lö ara, ifalua dandra sahöli-höli dödö+ föna niha sato ba daʼö. 31 Ba faduhu dödö niha sato.+ Me lafatunö khöra wa iʼameʼegö tödö Yehowa ndraono Gizaraʼeli+ ba anehe ia wamakao si göna khöra,+ laʼanemaiʼö latuhi danö.