2 Moze
22 ”Na so zanagö sawi mazui biri-biri, aefa daʼö ibunu mazui ifamawa, hasambalö ibeʼe wogati. Na itagö sageu zawi, ba lima ngaʼeu ibeʼe fogati. Na biri-biri, ba öfa ngaʼeu ibeʼe fogati.+
2 (”Na so zanagö+ ba zi bongi ba laʼila ia, aefa daʼö laböbözi irege mate, lö moʼömö do niha samöbözi yaʼia. 3 Na alua daʼö ba waʼatumbu luo, moʼömö do niha samöbözi yaʼia.)
”Sanagö andrö hasambalö ibeʼe wogati. Na lö hadöi khönia famuʼa, lafamawa ia tobali sawuyu, daʼö wogati. 4 Na itagö zawi, kalide, mazui biri-biri ba lö si mate nasa, khönia so, ibeʼe wogati dua winaeta.
5 ”Na so zolohe urifönia ba nowi mazui ba kabu nagu ba wemanga duʼu, ba na ilulu gurifönia andrö ba nowi niha böʼö, hasambalö ibeʼe wogati, yaʼia daʼö bua zinanö si sökhi mazui kabu nagu khönia.
6 ”Na so zamewuaʼö alitö ba akhozi ndruʼu irege göna mbua nowi mazui sinanö si lö muteu bua awö mbenua maʼasagörö, hasambalö ibeʼe wogati ba zi no akhozi.
7 ”Na so zangiröʼö kefe mazui gama-gamania khö nawönia, ba no latagö gama-gama daʼö ba nomo nawönia, ba na musöndra zanagö yaʼia, ibuʼa sanagö andrö dua kali winaeta.+ 8 Hizaʼi na lö lasöndra zanagö yaʼia, laʼohe föna Lowalangi sindruhu*+ nawönia andrö ba wangalui hadia yaʼia zangai mazui tenga.* 9 Na so zamöbögö khö nawönia wa no ibiniʼö zi tenga okhötania, simane sawi, kalide, biri-biri, baru, mazui gofu hadia manö gama-gama si no taya, möi ira föna Lowalangi sindruhu+ ba wotatugöi haniha zokhö sindruhunia. Lowalangi zamatunö haniha zi sala ba ibeʼe wogati niha daʼö dua kali winaeta.+
10 ”Na so zondröi kalide, sawi, biri-biri, mazui urifö tanö böʼö khö nawönia, ba lö ara mate gurifö daʼö, mesokho mazui latagö me tefaudu lö sangila, 11 ba möi ba hölu nawönia andrö föna Yehowa wa tenga börö ia. Itema hölunia sokhö urifö andrö ba lö ibeʼe wogati awönia.+ 12 Ba na latagö gurifö daʼö, ibeʼe wogati khö zokhö yaʼia dua kali winaeta. 13 Ba na utu ndruʼu zi manga, lö moguna ibuʼa. Hizaʼi iʼohe gamatela si tobali tandra.
14 ”Na so zamiza urifö nawönia ba mesokho gurifö daʼö mazui mate, ba lö hadöi niʼila zokhö, hasambalö ibeʼe wogati. 15 Hizaʼi na so ba daʼö zokhö yaʼia, lö moguna ibeʼe wogati. Na niʼokosi, awai nibuʼania ha okosi.
16 ”Na so zorayu ono alawe si lö nasa famatua ba lafalua horö, hasambalö ihalö nono alawe daʼö ba ibuʼa mböwö.+ 17 Ba na lö omasi nama nono alawe daʼö ibeʼe nihalö nononia, lö tola löʼö ibuʼa mböwö si no mutatugöi.
18 ”Ira alawe si fakelemu hasambalö mibunu.+
19 ”Dozi sohoröni urifö hasambalö mibunu.+
20 ”Niha sameʼe sumange nitunu khö lowalangi tanö böʼö na tenga khö Yehowa hasambalö mibunu.+
21 ”Böi falua zi lö sökhi ba niha si fatewu ba böi mifakao ira+ börö me si fatewu ami mböröta ba danö Miserai.+
22 ”Böi mifakao lakha mbanua mazui si lö ama si lö ina.+ 23 Na mifakao ira ba mangandrö tolo ira khögu, hasambalö ufondrondrongo.+ 24 Mofönu sibai ndraʼo ba ubunu ami faoma föda. Tobali lakha mbanua woʼomomi ba si lö ama ndraonomi.
25 ”Böi mihalö nono gefe na lafiza gefemi niha si numana* ba nono mbanuagu. Böi mibaliʼö ami lekato.+
26 ”Na so zoʼömö khömi ba mihalö mbarunia sebua tobali gade,+ mifangawuli mbarunia andrö fatua lö aekhu luo. 27 Ha daʼö mbarunia enaʼö lö oʼafu ia.* Na lö öfuli, ba hadia ifake na mörö ia?+ Na mangandrö tolo ia khögu, hasambalö ufondrondrongo börö waʼahakhö dödögu.+
28 ”Böi miʼelifi* Lowalangi+ mazui ira sondröniaʼö ba soimi.+
29 ”Böi aombö dödömi wameʼe sumange khögu mbua nowi, fanikha, ba bua nagu si no fahöna andrö khömi.+ Mibeʼe khögu nonomi siaʼa.+ 30 Daʼa nifaluami ba ziaʼa nono zawi si matua mazui biri-biri khömi:+ Böi mifabali ia khö ninania sagötö zi fitu hari. Ba mibeʼe khögu ba ngaluo si walu.+
31 ”Yatobali ami banua niʼamoniʼö khögu.+ Böi miʼa nagole gurifö nisasawi gutu ndruʼu.+ Mibeʼe manö ia ö nasu.