Nisura Mareko
4 Ibörögö mamahaʼö Yesu ba zinga nasi. Ato sibai niha sowulo ba zingania. Modadao ia ba dundraha, ifandröndröu ia moroi ba ngöfi ba toröi ba gawu niha sato.+ 2 Ibörögö oya nifahaʼönia khöra si fao amaedola.+ Me mamahaʼö ia imane,+ 3 ”Mifondrondrongo! So samösa zohalöwö ba danö samazaewe tanömö zinanö.+ 4 Me ifazaewe danömö andrö, so ösa zaekhu ba lala, ba ahori laʼa fofo. 5 So göi zaekhu ba dete gara, si lö aweʼe-weʼe tambu. Iʼanemaiʼö moliwiö zinanö andrö börö me lö abakha dambunia.+ 6 Hizaʼi, aleu ba waʼaukhu zino börö me lö abakha waʼania. 7 So göi zaekhu ba gotalua ndruʼu sodoi. Börö waʼabölö ndruʼu sodoi, ikabi zinanö andrö irege lö mowua.+ 8 So göi zaekhu ba danö si sökhi. Tumbu danömö andrö, itugu ebua ba ibörögö oya mbua. So zowua si 30, 60, mazui 100 winaeta.”+ 9 Inönö nasa wangumaʼö, ”Si so talinga, yamufondrondrongo.”+
10 Me hatö samösa ia, so ösa ndra nifahaʼö hegöi ira sinengenia si 12 sanofu eluaha gamaedola daʼö.+ 11 Imane khöra Yesu, ”No mubeʼe khömi waʼaboto ba dödö ba wangiʼila si tobini niʼamoniʼö andrö+ ba Wamatörö Lowalangi, hizaʼi ba niha böʼö ha amaedola labeʼe khöra.+ 12 Börö daʼö hewaʼae lafaigi, ba lö laʼila. Hewaʼae larongo, ba lö laʼila geluaha. Lö lafuli ira khö Lowalangi ba lö göi teʼefaʼö horöra.”+ 13 Itohugö wangombakha, ”Na lö miʼila geluaha gamaedola daʼa, hewisa wa tola aboto ba dödömi fefu gamaedola tanö böʼö?
14 ”Tanömö zinanö andrö yaʼia daʼö taromali Lowalangi.+ 15 So niha simane tanömö zinanö saekhu ba zinga lala. Lö ara me no larongo duria andrö, tohare Zatana,+ ihalö duria si no tetanö ba dödöra.+ 16 So göi zi hulö danömö saekhu ba dete gara. Lö ara me no larongo duria andrö, latemaʼö si fao faʼomuso dödö.+ 17 Hizaʼi, lö mowaʼa zinanö andrö ba dödöra, ba lö anau gölö. Me göna ira famakao mazui fanandraigö börö duria andrö, lö mamati ira saʼae. 18 Tanö böʼönia, hulö danömö saekhu ba gotalua ndruʼu sodoi, yaʼia daʼö niha samondrongo turia andrö,+ 19 hizaʼi lö mowua börö me ikabi ia faʼaombö dödö+ ba gulidanö* andre, falimosa ganaʼa+ hegöi isö-isö dödö+ ba wangalui soya ngawalö. Daʼö zondrönisi tödöra. 20 Ba gafuriata, tanömö nifazaewe ba danö si sökhi, yaʼia daʼö niha samondrongo turia andrö, itemaʼö soroi ba dödö ba mowua. So zowua si 30, 60, mazui 100 winaeta.”+
21 Imane khöra nasa, ”Na mutunu wandru, lö labeʼe barö raga-raga* mazui barö farate. Hizaʼi, labeʼe yawa ba naha wandru enaʼö ihagaini fefu.+ 22 Si tobini ahori oroma, ba nibalugö ahori tebokai.+ 23 Si so talinga, yamufondrondrongo.”+
24 Aefa daʼö imane khöra, ”Miʼameʼegö tödö hadia nirongomi.+ Hawaʼoya nibeʼemi simane daʼö göi waʼoya mitema, ba tola töra moroi ba daʼö. 25 Ba zi so, ba tenönö khönia nasa,+ ba zi löʼö, ba laheta khönia zi so khönia andrö.”+
26 Itohugö wangumaʼö, ”Famatörö Lowalangi andrö amaedola niha samazaewe tanömö zinanö. 27 Ero bongi mörö ia, ba maoso ia ba zihulö wongi. Gasa-gasa daʼö moliwiö danömö andrö ba tedou waʼalawa, ba lö aboto ba dödönia hewisa waʼalua daʼö. 28 Tanö andrö mbörö wa mowua zinanö. Si oföna töla, aefa daʼö ngalai, awena bua gandru sasoso. 29 Na no asoso gandru, isabi döla me no irugi inötö wamasi.”
30 Imane nasa, ”Hezo tola mufaomagö Wamatörö Lowalangi andrö, mazui hadia gamaedola si tola taʼogunaʼö ba wanutunö yaʼia? 31 Hulö simane hunö sesawi.* Me lafazawili ba danö, ha daʼa hunö fondrege zide-ide moroi ba gotalua danömö si so ba gulidanö.+ 32 Hizaʼi, me no mufazawili, tumbu hunö daʼö tobali ebua moroi ba danömö sayu tanö böʼö ba iʼasogö ndraha segebua irege mangazuni wofo ba telumöʼö ira moroi ba haga zino.”
33 Oya iʼogunaʼö gamaedola+ simane daʼö na ifahaʼö daromali, ndrohu-ndrohu zaboto ba dödöra. 34 Lö fahuhuo ia khöra na tenga amaedola. Hizaʼi, awena ifatunö geluaha na fao ira ndra nifahaʼönia.+
35 Me luo daʼö, me bongi, imane khö ndra nifahaʼönia, ”Miʼaine, mofanö ita yefo.”+ 36 Me no iwaʼö ba niha sato enaʼö mangawuli ira, laʼohe ia ira nifahaʼönia ba dundraha, ba so dundraha tanö böʼö si fao khöra.+ 37 Ba zi lö mudöna-döna, alua mbade sabölö-bölö. Ibözi dundraha bade andrö ba arakhagö afönu idanö.+ 38 No mörö Yesu, manandraya ia furi ba dundraha. Lasusugi ia ba lamane khönia, ”He Samahaʼö, hadia lö ba dödöu wa arakhagö mate ita?” 39 Maoso ia, aefa daʼö itenawa nangi andrö ba imane ba nasi, ”Böi hede-hede! Honogöʼö!”+ Tebato nangi ba ahono sibai. 40 Imane khö ndra nifahaʼönia, ”Hana wa ataʼu sibai ami? Hadia lö hadöi famatimi?” 41 Hizaʼi, oi so waʼataʼura ba faoma lamane, ”Haniha sindruhunia niha daʼa? Angi hegöi asi laʼoʼö linia.”+