Sara Timoteo
5 Böi tegu ndra matua salawa döfi faoma fehede sabeʼe.+ Haogö woʼamenesi yaʼia hulö simane amamö, ba si bohou ebua hulö dalifusöu matua, 2 ira alawe satua hulö simane inamö, ira alawe sawuyu döfi hulö dalifusöu alawe si fao bua-bua sohau-hau.
3 Ameʼegö tödö* zindruhu-ndruhu lakha mbanua.*+ 4 Na so nononia mazui maʼuwunia, yaʼira andrö zi oföna mondrorogö ösi nomora+ ba wangoromaʼö famosumange Lowalangi soroi ba dödö ba lasulöni waʼasökhi nifalua zatuara, nenera hegöi tuara,+ börö me daʼö zomasi Lowalangi.+ 5 Khö Lowalangi manötöna zindruhu-ndruhu lakha mbanua ba si no laröi ba waʼatosasa,+ ba lö laböhöli wangandrö bongi maʼökhö.+ 6 Hizaʼi, lakha mbanua sangogunaʼö faʼaurinia ba wolohi faʼomasi nösi, sindruhunia hulö zi no mate ia hewaʼae auri ia nasa. 7 Andrö, böi böhöli wameʼe khöra fanuturu lala* andre enaʼö lö teʼailasi ira. 8 Na so zi lö mangaʼasogö soguna ba nösi nomonia, no iʼosilöʼögö wamati ba abölö waʼalösökhinia moroi ba niha si lö mamati.+
9 Lakha mbanua sinangea musura töi enaʼö böi ambö 60 fakhe, ha samösa woʼomonia me mböröta, 10 teturia ia wamalua si sökhi.+ Duma-dumania, ba wangebuaʼö iraono,+ lö abua gölönia wanemaʼö tome,+ isasai gahe niha niʼamoniʼö,*+ itolo niha si tosasa,+ ilulu waʼaurinia ba wamalua amuata si sökhi.
11 Böi sura döi lakha mbanua sawuyu döfi nasa, börö me hasambalö mangowalu ira na alua khöra wangisö nösi irege tobali taha-tahara ba wangai halöwö Keriso, 12 irege fasala ira börö me no lasawö mbuʼusa lira ba wamati moroi ba wamobörö. 13 Mendrua manö, toʼölö ira dania ba walöhalöwö ba möi laʼanöröi nomo zoʼomo misa. Aefa daʼö, omasi ira lafatou-tou nawöra ba laʼurusai zi tenga urusara,+ ladunö-dunö zi tenga huhuora. 14 Börö daʼö, omasido na mangowalu lakha mbanua sawuyu döfi,+ moʼono ira,+ larorogö nösi nomora, ba lö lafonaha wehede niha sanandrawaisi ba wangobousi töira. 15 Sindruhunia, so lakha mbanua si no elungu ba woloʼö Satana. 16 Na so ba nösi nomo ndra alawe samati zi no tobali lakha mbanua, daʼö zanolo yaʼia faböi tobali noro dödö mbanua niha Keriso enaʼö latolo zindruhu-ndruhu lakha mbanua.*+
17 Ira satua sokubaloi si sökhi ba wondröniaʼö,+ enaʼö lafosumange ira dua winaeta.+ Töra-töra zerege tödö ba wangombakha hegöi ba wamahaʼö taromali Lowalangi.+ 18 So sambua ayati sangumaʼö, ”Böi böbö mbawa zawi samöbörö gandru,”+ ba, ”Sinangea na itema luonia sohalöwö.”+ 19 Böi fondrondrongo na so zamobahulu ira satua sokubaloi, baero na so darua mazui datölu zamaduhuʼö.+ 20 Mitegu+ föna niha sato zi lö mamöhöli mamalua horö+ si tobali famangelama ba danö böʼö göi.* 21 Föna Lowalangi ba föna Keriso Yesu hegöi ira malaʼika si no mufili, ubeʼe khömi goroisa enaʼö miʼoʼö wanuturu lala andre ba böi so wanahö-nahö tödö ba faʼebua dödö zambuana.+
22 Böi alio manö öfataro* zi samösa niha,+ enaʼö lö öluʼi horönia. Rorogö ndraʼugö enaʼö böi raʼiö.
23 Böi ha idanö manö öbadu, hizaʼi badu maʼifu nagu ba dalumö andrö börö me asese mofökhöʼö.
24 So zamalua horö soroma ba niha sato irege lahuku ia, ba so göi horö sawena oroma ba gafuriata.+ 25 Simanö göi, so gamuata si sökhi niʼila niha sato,+ ba na so zi lö oroma, tebai mubiniʼö manö.+