Dua Ngaʼötö
19 Lö ara, mangawuli Yozafati razo Yehuda andrö ba gödo razo si so ba Yeruzalema ba lö hadia ia khönia.*+ 2 Möi Yehu+ ono Hanani+ ba wangondrasi Razo Yozafati ba imane khönia, ”Hadia tefaudu na ötolo niha si lö sökhi?+ Hadia sinangea öʼomasiʼö niha si lö mangomasiʼö Yehowa?+ Daʼö mbörö wa mofönu khöu Yehowa. 3 Hizaʼi, so zi sökhi niʼila Lowalangi ba waʼaurimö,+ me öhori döla-döla niʼamoniʼö* ba soi andre ba no öfaʼanö dödöu* ba wangalui Lowalangi sindruhu.”+
4 Ba Yeruzalema manö toröi Yozafati, ba möi ia ifuli ifalukhaisi nono mbanuania ba Mbere-seba irugi mbanua si so ba hili Geferai,+ ba wolohe yaʼira mangawuli khö Yehowa Lowalangi ndra tuara.+ 5 Ifataro göi ndra sanguhuku ba soi andrö maʼasagörö, ba mbanua nifoʼöli si so ba Yehuda.+ 6 Imane khö ndra sanguhuku andrö, ”Miʼonorogö tödö halöwömi, börö me tobali ami sanguhuku khö Yehowa, tenga ba niha. Fao ia khömi na mihalö gangetula.+ 7 Miʼataʼufi Yehowa.+ Mihaogö-haogö gamuatami, börö me lö ifalua zi lö atulö Yehowa Lowalangida,+ lö ebua dödö zambuana ia+ ba lö itema zölö-sölö.”+
8 Ba Yeruzalema, ifataro göi ösa Yozafati niha Lewi hegöi ere, so goi ösa zondröniaʼö ba nösi nomo zatua ira matua moroi ba gotalua ndraono Gizaraʼeli, enaʼö tobali ira sanguhuku khö Yehowa ba wangasiwai amadöniwa ba mbanua Yeruzalema.+ 9 Ibeʼe khöra goroisa, ”Daʼa zinangea mifalua khö Yehowa si fao faʼataʼu, lö faröi ba soroi ba dödö: 10 Ero na so dalifusömi si toröi ba mbanua solohe amadöniwa sanandrösa ba wabunusa,+ mazui sanandrösa ba zi sambua huku, fareta, amakhoita hegöi angetula, mifasugi ba dödöra enaʼö lö lafalua zala föna Yehowa. Na löʼö, hasambalö mofönu ia khömi hegöi khö ndra talifusömi. Daʼö zinangea mifalua enaʼö lö fasala ami. 11 Yaʼe Gamaria, kafalo gere sondröniaʼö yaʼami. Yaʼia dania zanolo yaʼami enaʼö miʼila zomasi Yehowa+ ba ngawalö hadia ia fefu. Sebadia ono Zimaʼeli zondröniaʼö niha Yehuda ba ngawalö zoʼamakhaita khö razo, ba niha Lewi dania zamaigi-maigi yaʼami. Böi miʼataʼufi wamalua halöwömi. Yafao Yehowa ba niha samalua si sökhi.”*+