Böi Aetu-aetu Taʼangerönusi Waʼomasi Yehowa si Lö Mamalö-malö

1, 2. (a) Hana wa faduhu dödöu wa iʼomasiʼö Yehowa nono mbanuania? (b) Me ifazökhi Yehowa niha gulidanö hadia nibeʼenia?

HANA wa faduhu dödöu wa iʼomasiʼö Yehowa nono mbanuania? Fatua lö ötema li ba zinofu andre, angeraigö duma-duma daʼa: ba zi haʼuga fakhe faʼara labeʼe wondrara dödö khö dalifusöda sotöi Taylene, enaʼö böi talafo iʼabusi tödö zi lö ikhamö faʼabölönia. Imane Taylene, ”Na lö iʼomasiʼö ndraʼo Yehowa tatu manö lö eluaha mene-mene nibeʼenia”. Imane göi Brigitte, ”Me mate woʼomogu ira matua so darua ndraonogu si tobali noro dödögu. Sambua gabula dödö sebua ba wangebuaʼö iraono ba gulidanö nifatörö Gafökha andre, mendrua manö me lö hadöi foʼomogu. Faduhu dödögu ’lö iröi ndraʼo Yehowa’ ibeʼe wanuturu lala ba waʼaurigu.” (I Korindro 10:13) Samösa dalifusöda sotöi Sandra, göna khönia wökhö sabölö-bölö si lö dalu-dalu. Ba gangowuloa sebua so samösa dalifusöda ira alawe sangondrasi Sandra ba wameʼe fondrara dödö. Imane foʼomo Sandra, ”Hewaʼae lö maʼila haniha dalifusöda andrö, hizaʼi iʼameʼegö tödö hadia zalua khöma irege terara dödöma. Faʼomasi nifalua ndra talifusöda, daʼö zangoromaʼö wa iʼomasiʼö ndraʼaga Yehowa.”

² Ifazökhi Yehowa niha gulidanö enaʼö faoma laʼomasiʼö nawöra. Hizaʼi, itaria ide-ide dödöda ba ginötö göna ita fökhö, faʼambö-ambö ba zoguna mazui so niha si lö omasi mamondrongo turia somuso dödö niʼombakhaʼöda. Na tumbu ba dödöda wa lö saʼae iʼomasiʼö ita Yehowa, moguna tatörö tödöda wa iʼameʼegö tödö ita Yehowa ba wanolo yaʼita. Na lö faröi ita khö Yehowa ba lö iröi ita.​—Yesaya 41:13; 49:15.

3. Hezo taʼila wa iʼomasiʼö ita Yehowa?

³ Ira talifusöda si no tafatunö andre, faduhu dödöra wa itolo ira Yehowa ba ginötö göna abula dödö. Simanö göi ita, faduhu dödöda wa iʼomasiʼö ita Yehowa. (Zinunö 118:6, 7) Ba duho daʼa, so öfa ngawalö zi tola mangoromaʼö khöda wa iʼomasiʼö ita Yehowa. (1) Ba niwöwöinia, (2) Sura Niʼamoniʼö, (3) Fangandrö, ba (4) Höli. Na taʼangerönusi fefu zi sökhi nifalua Yehowa, daʼa zi tola manolo yaʼita ba wangandrö saohagölö khönia ba taʼomasiʼö ia.​—Baso Zinunö 77:12, 13.

TAʼANGERÖNUSI FEFU NIWÖWÖI YEHOWA

4. Hadia zi tobali famahaʼö khöda ba ngawalö fefu niwöwöi Yehowa?

⁴ Na tafaigi fefu niwöwöi Yehowa, ba daʼö taʼila waʼebua waʼomasinia khöda. (Roma 1:20) Duma-dumania, iwöwöi Yehowa gulidanö, ibeʼe fefu hadia ia zoguna khöda enaʼö tola tasöndra waʼauri. (Zangombakha 9:7) Samösa dalifusöda sotöi Catherine si toröi ba Kanada, omasi sibai ia ngawalö niwöwöi Yehowa. Imane wangumaʼö, ”Si ndruhu wa ahöli-höli dödögu ba wamaigi fefu niwöwöi Lowalangi ba gulidanö andre simane bunga, ngawalö gurifö ba tanö böʼönia. Iʼoromaʼö waʼomasinia khöda Yehowa ba ngawalö niwöwöinia.” Omasi Yehowa fefu nifazökhinia, ba iʼandrö göi enaʼö taʼomasiʼö niwöwöinia.​—Halöwö Zinenge 14:16, 17.

5. Hewisa wangoromaʼö Yehowa faʼomasinia ba ginötö iwöwöi ita?

⁵ Iwöwöi ita Yehowa ba ibeʼe waʼabölö ba wamalua halöwö si tola mangomusoiʼö tödöda. (Zangombakha 2:24) Ibeʼe Yehowa halöwö ba niha enaʼö lanönöi gulidanö ba larorogö fefu niwöwöi Yehowa. (I Moze 1:26-28) Ibeʼe khöda gamuata si sökhi Lowalangi enaʼö tola taʼoʼö ia!​—Efeso 5:1.

ANDRÖ SAOHAGÖLÖ DAROMALI LOWALANGI

6. Hadia nidunö-dunö Zura Niʼamoniʼö sanandrösa khö Yehowa?

⁶ Ibeʼe Zura Niʼamoniʼö khöda Yehowa, börö waʼomasinia. Idunö-dunö khöda Zura Niʼamoniʼö hewisa dödö Lowalangi ba niha gulidanö. Duma-dumania, Sura Niʼamoniʼö zangombakha khöda hewisa dödö Yehowa ba ndraono Gizaraʼeli me asese lö lafalua goroisania. Imane ba Zinunö 78:38, ”Ba yaʼia, ba sahakhö tödö, iʼefaʼö lalöra andrö ba lö ifakiko ira; asese iʼalösi wönunia, ba lö iforege wamaosi tödönia.” Na taʼangerönusi ayati daʼa, aboto ba dödöda waʼebua waʼomasi Yehowa khöda. Faduhu dödöda so so ba dödönia ita.​—Baso I Fetero 5:6, 7.

7. Hadia mbörö wa taʼameʼegö tödö Zura Niʼamoniʼö?

⁷ Hadia mbörö wa taʼameʼegö tödö Zura Niʼamoniʼö? Börö me daʼö lala Yehowa wahuhuosania khöda. Hulö zatua ba ndraono na asese fahuhuo ira, itugu aro waʼomasi ba fahuwusa ba gotaluara. Simanö göi Yehowa iʼomasiʼö ita simane ononia. Hewaʼae lö irai falukha ita khönia, hizaʼi tola fahuhuo ia khöda ba Zura Niʼamoniʼö. Moguna tafondro-ndrongo hadia niwaʼönia! (Yesaya 30:20, 21) Na tabaso Zura Niʼamoniʼö so khöda waʼaboto ba dödö ba taʼodaligö Yehowa sameʼe fanuturu lala ba wolumöʼö yaʼita.​—Baso Zinunö 19:8-12; Gamaedola 1:33.

8, 9. Hadia gamuata Yehowa si tobali fondrara dödö khöda? Beʼe duma-duma moroi ba Zura Niʼamoniʼö.

⁸ Omasi Yehowa enaʼö taʼila wa iʼomasiʼö ita. Tenga daʼö nifaigi Yehowa falö moʼahonoada, tobali si sökhi nifaluada. (II Ngaʼötö 16:9) Datafaigi waʼomasi Yehowa khö Razo Yozafati moroi ba Yehuda. Ihalö gangetula si lö baga Razo Yozafati ba fao ia khö Ahabi Razo ndraono Gizaraʼeli ba wanuwö ndrawa Ramoti ba danö Gileadi. So 400 niha samaʼeleʼö sofaya khö Razo Ahabi ba lamane wangumaʼö möna ira. Ifatenge Mikha Yehowa ba wamangelama Razo Yozafati ba Razo Ahabi, na fao ira ba wasuwöta andrö ha sambölö kala ira. Mate Razo Ahabi ba wasuwöta ba teʼorifi Yozafati simane nifaʼeleʼö Yehowa. Ifatenge Yehu Yehowa ba woʼamenesi Yozafati ba gangetula si fasala nihalönia. Imane Yehu, ”Ba maʼifu zui musöndra khöu zi sökhi.”​—II Ngaʼötö 18:4, 5, 18-22, 33, 34; 19:1-3.

⁹ Fatua lö alua daʼö, Razo Yozafati ifatenge ndraono Lewi ba Ere enaʼö möi ira ba wamahaʼö niha Yehuda sanandrösa ba goroisa Yehowa, irege ato niha lafahaʼö ira sanandrösa khö Yehowa. (II Ngaʼötö 17:3-10) Hewaʼae ba gafuriatania ihalö gangetula si lö baga Yozafati, lö irai iʼolifugö Yehowa gamuata si sökhi nifaluania. Daʼa sambua fondrara dödö khöda börö me itaria tafalua zala. Natafalua zi sökhi ba wamosumange Yehowa, iʼomasiʼö ita ba lö olifu ia hadia zi sökhi si no tafalua.

TAʼANDRÖ SAOHAGÖLÖ ME NO TETEHEGÖ KHÖDA WANGANDRÖ

10, 11 (a) Hana wa no sambua buala sebua wangandrö andrö? (b) Hadia lala niʼogunaʼö Yehowa ba wanema li wangandröda? (Faigi gambara ba ngaʼörö 9.)

¹⁰ Samösa zatua sebua faʼomasi ibeʼe ginötönia ba wamondro-ndrongo na fahuhuo ndraononia. Omasi ia iʼila hadia zi so ba dödö ndraononia. Simanö göi Yehowa, ifondro-ndrongo na mangandrö ita khönia. Sambua buala sebua khöda na fahuhuo ita khönia!

¹¹ Tola mangandrö ita khö Yehowa ero inötö. Yaʼia andrö si fahuwu khöda ba omasi ia ifondro-ndrongo na mangandrö ita. Imane Taylene, ”Gofu hadia zi so ba dödömö tola öfatunö khönia.” Ba ginötö taʼombakhaʼö khö Yehowa nösi dödöda, tola manö ibeʼe wanema li moroi ba Zura Niʼamoniʼö, buku si no tehenaigö mazui moroi khö ndra talifusöda ba wamati. Ifondro-ndrongo Yehowa wangandrö soroi ba dödö, iʼila hadia nösi dödöda hewaʼae lö laʼila niha. Daʼö zangoromaʼö wa lö aetu waʼomasi Lowalangi khöda na ifondro-ndrongo wangandröda.

12. Hana wa moguna tafahaʼö ita ba duma-duma wangandrö ba Zura Niʼamoniʼö? Beʼe duma-duma.

¹² So ba Zura Niʼamoniʼö duma-duma wangandrö. Ba mbongi wamahaʼö ba nomo, tola tafahaʼö ita sanandrösa ba wangandrö. Na taʼangerönusi duma-duma wangandrö nono mbanua Yehowa me föna, tola itugu sökhi wangandröda. Duma-dumania, me mangandrö Yona si fao faniasa ba dalu giʼa. (Yona 1:17–2:10) Fangandrö Zelomo soroi ba dödö me iʼamoniʼö gosali. (I Razo 8:22-53) Duma-duma wangandrö nibeʼe Yesu. (Mataiʼo 6:9-13) Sabölö moguna, ”Mibokai khö Lowalangi, ba wangandrö.” Lua-luania, ”Irorogö dödömi, awö gera-erami faʼohahau dödö andrö, khö Lowalangi.” Böi mamalö-malö taʼandrö saohagölö khö Yehowa.​—Filifi 4:6, 7.

ANDRÖ SAOHAGÖLÖ HÖLI SI NO IBEʼE

13. Hadia dötönaföda me no ibeʼe Yehowa khöda höli?

¹³ No ibeʼe khöda höli Yehowa, ”enaʼö auri ita”. (I Yohane 4:9) Sanandrösa waʼomasi Lowalangi andre, imane Faulo, ”Noa sa mate Keriso, me luo lö abeʼe ita na, salahi zi no mangerogö Lowalangi. Ba si lö lokha lö mate niha salahi zatulö, ba zi sökhi, ba ma taʼila tola mate ia. Ba iʼoromaʼö waʼomasinia ita Lowalangi, me no mate salahida Keriso, me samazökhi horö ita na.” (Roma 5:6-8) Höli andre no buala sebua moroi khö Lowalangi, andrö wa tola ahatö ita khönia.

14, 15. Hadia guna höli ba (a) Niha nibayoini? (b) Niha keriso si so fanötöna ba gulidanö?

¹⁴ Börö höli andrö nibeʼe Yehowa, niha nibayoini larasoi samösa waʼomasinia. (Yohane 1:12, 13; 3:5-7) Me no tebayoini eheha ira ba tobali ono Lowalangi. (Roma 8:15, 16) Börö me so zi toröi nasa ba gulidanö, hana wa iwaʼö Faulo ”famaʼaso yaʼita ba mbanua zorugo, ba khö Keriso Yesu”? (Efeso 2:6) No ibeʼe Yehowa khöra waʼauri si lö aetu ba zorugo.​—Efeso 1:13, 14; Kolose 1:5.

¹⁵ Niha si lö mubayoini tola tobali si fahuwu khö Lowalangi ira na so khöra wamati ba höli si no ibeʼe. Tobali ono Lowalangi ira ba lasöndra waʼauri si lö aetu ba waradaiso. Höli no sambua waʼomasi Lowalangi ba niha fefu. (Yohane 3:16) Na lö faröi ita khö Yehowa, ibeʼe khöda waʼauri si lö aetu! Taʼandrö saohagölö khö Yehowa me no ibeʼe khöda höli tandra waʼomasinia khöda.

SULÖNI WAʼOMASI YEHOWA

16. Na taʼangerönusi fefu waʼomasi Lowalangi, hadia nifaluada?

¹⁶ Tebai taʼerai waʼomasi Yehowa khöda. Imane Dawido, ”Ba no sebua sibai böli geraʼerau khögu, yaʼugö Lowalangi, soya sibai gahonoania! Na uʼerai enaʼö, ba no oya, moroi ba ngawua nene.” (Zinunö 139:17, 18) Na taʼangerönusi fefu waʼomasi Lowalangi daʼö zamarou yaʼita wangomasiʼö yaʼia.

17, 18. Hadia manö lala nifaluada ba wangoromaʼö faʼomasida khö Yehowa?

¹⁷ Oya zi tola tafalua ba wangoromaʼö faʼomasida khö Yehowa. Duma-dumania, owölö-ölö ita wanuriaigö Banua Lowalangi. (Mataiʼo 24:14; 28:19, 20) Lö faröi ita na göna fanandraigö. (Baso Zinunö 84:12; Yakobo 1:2-5.) Hewaʼae na alua khöda wanandraigö sabölö-bölö si tebai tataögö, faduhu dödöda wa hasambalö itolo ita Yehowa börö me iʼomasiʼö ita.​—Zinunö 56:9.

¹⁸ Börö me taʼomasiʼö Yehowa, daʼö zamarou yaʼita ba woʼangerönusi fefu hadia ia zi no iwöwöi. Taʼoromaʼö waʼomasida khö Yehowa na lö faröi ita ba wamomaha ba Zura Niʼamoniʼö. Na asese mangandrö ita khö Yehowa, itugu aro wahuwusada khönia. Na taʼangerönusi höli si no ibeʼe Yehowa, itugu tedou waʼomasida khönia. (I Yohane 2:1, 2) Oya lala tanö böʼö nasa ba wangoromaʼö faʼomasida khö Yehowa.