ULIDANÖ SAFÖNU ABULA DÖDÖ

3 | Rorogö Gamakhaita si Sökhi ba Niha Böʼö

HANA WA MOGUNA

Börö me afönu abula dödö gulidanö andre, itugu ato niha sorasoi faʼaombö-aombö dödö. Lua-luania, lö saʼae larorogö gamakhaita si sökhi ba niha niʼomasiʼöra.

Laʼoniagö ira ba lö fahuwu ira ba nawö-awöra.
Ato niha si no mongambatö si faʼudu-udu manö.
Ato zatua si lö moʼameʼegö tödö iraonora.

Sinangea Öʼila

Ba götö sabua fanaögö andre, tola molua-lua wahuwusamö ba kesehatan-mö, ba wangera-ngera hegöi ba mboto.
Tola manö fawuka gera-erada ba gulidanö safönu abula dödö andre, ba tola iʼasogö gabula dödö si lö mudöna-döna yomo ba zi sambua omo.
Ba zi lö öʼila, tola manö so waʼafatö dödö hegöi faʼataʼu ba ndraonomö börö duria si lö sökhi niʼilara mazui nirongora.

Si Tola Öfalua

Imane Sura Niʼamoniʼö: ”Sindruhu si fahuwu lö tebulö waʼomasinia ero inötö ba tobali talifusö ia ba ginötö waʼatosasa.”—Amaedola 17:17.

Angeragö haniha zi fahuwu khöu si tola manolo yaʼugö hegöi sameʼe bua gera-era si sökhi soguna khöu. Na lö olifu ndraʼugö wa so nawömö soʼameʼegö tödö yaʼugö, tola anau gölömö ba wanaögö abula dödö salua.

LALA BA WANAÖGÖ—Fanuturu Lala

Hewaʼae na ötaögö gabula dödö, tola möi fanolomö wanuturu lala andre ba wondrorogö amakhaita si sökhi ba niha böʼö

AROʼÖ WONGAMBATÖU

Aroʼö wongambatöu

Imane Sura Niʼamoniʼö: ”Sökhi zi darua moroi na ha samösa . . . Na alabu zi samösa, ba tola ifazawa ia awönia.” (Sangombakha 4:9, 10) Moguna falulu fohalöwö woʼomo ira matua hegöi foʼomo ira alawe hulö simane pilot hegöi kopilot ba göfa sihombo si fagölö, tenga simane si darua pilot ba göfa sihombo si faböʼö si fasuwö.

Na fawuka wangera-ngeramö, böi lau mbakhu dödöu khö ngambatöu. Taha dödöu.
Si löʼö-löʼönia sakali samigu, fahuhuosi khö ngambatöu hadia manö gabula dödö si tola alua khömi. Hizaʼi, ohitö dödömi yaʼia daʼö ba wangasiwai abula dödö salua, tenga fatahi-tahi ba wangalui haniha zi sala.
Faoma mibeʼe ginötömi khö nawömi ba wamalua halöwö somasi ami.
Mifuli mitörö tödömi fefu zi sökhi si no irai mitörö ba zilalö. Te tola mifuli mifaigi koda me mangowalu ami mazui ngawalö zi sökhi si no irai alua ba waʼaurimi.

”Itaria lö fahasara dödö khö woʼomo ira matua hegöi ira alawe. Hizaʼi tenga daʼö geluahania tebai saʼae falulu fohalöwö ira. Tola lahalö wahasara dödö ba wangai angetula, ba falulu fohalöwö ira wamalua angetula daʼö.”—David.

ROROGÖ WAHUWUSAU

Rorogö wahuwusau

Böi ha asala ötema wanolo moroi khö ndra awö-awöu, hizaʼi tandraigö angeragö hadia göi wanolo si tola öbeʼe khöra. Na öfarou dödö niha böʼö, hasambalö göi wa tefarou dödöu.
Ero maʼökhö, tola ötelefo mato hadauga ndra awömö ba wanofu hewisa duriara.
Sofu-sofu haniha nawömö sanaögö abula dödö si fakhili ba zalua khömö, ba sofu khöra hewisa lalara wanaögö salua andrö.

”Si fahuwu faoma laʼameʼegö tödö nawöra. Ba ginötö göna ita abula dödö si no amaedola mbade, tola latolo ita ira awöda. Tola labeʼe khöda wanuturu lala enaʼö lö tebulö so ita ba lala sindruhu, hewaʼae na itaria no aboto ba dödöda niwaʼöra andrö.”—Nicole.

YATOBALI NDRAʼUGÖ SATUA SOʼAMEʼEGÖ TÖDÖ IRAONOMÖ

Yatobali ndraʼugö satua soʼameʼegö tödö iraonomö

Imane Sura Niʼamoniʼö: ”Yamuʼalioʼö wamondrongo, böi yamufahulö wehede.” (Yakobo 1:19) Ba wamobörö, te lö omasi ndraonomö wanutunö niʼaombösira tödö mazui sataʼu ira. Hewaʼae simanö, tandraigö fondrondrongo ira si fao faʼebolo dödö. Na öfalua daʼö, tola manö latutunö nösi dödöra khöu.

Beʼe ginötöu ba haogö lagu wahuhuosamö enaʼö aoha ba ndraonomö wanutunö ösi dödöra. So ndraono somasi manutunö ösi dödönia ba ginötö si tefaudu, duma-dumania na möi manörö-nörö.
Tatugöi enaʼö lö talafo oya lafaigi duria si lö sökhi iraonomö.
Fatunö ba ndraonomö hadia manö zi no öfalua ba wondrorogö yaʼira enaʼö lö teʼala waʼaurira.
Mifatunö hadia zinangea mifalua na so zalua si lö mudöna-döna, ba mifaogö ndraonomi na mifadumaisi daʼö enaʼö aboto ba dödöra hadia zinangea lafalua.

”Fahuhuo ba ndraonomö, ba tehegö khöra wanutunö ösi dödöra. Tola manö so zi tobali börö waʼataʼura, faʼaombö dödöra mazui sangandrö fönura. Börö daʼö, fatunö khöra wa simane daʼö göi ndraʼugö, ba tutunö hewisa lalamö ba wolawa fangera-ngera simane daʼö.”—Bethany.