Lala ba Wangogunaʼö Kefe

Moguna khöda gefe ba wombönökhi soguna ba nösi nomoda. (Gamaedola 30:8) Gofu hadia zalua, ”baʼa-baʼa zino göi ganaʼa”. (Zangombakha 7:12) Te abua ba zi no mongambatö wamatunö kefe, hizaʼi, böi kefe zangaʼasogö fasosota ba wongambatömi. (Efeso 4:32) Faoma mifaduhusi tödö nawömi, ba mihalö wahasara dödö hewisa wangogunaʼö kefe.

1 HAOGÖ WOMBAGI KEFE

HADIA NIWAʼÖ ZURA NIʼAMONIʼÖ: ”Haniha sa ba khömi, zedöna mangotomosi malige si lö dumadao ua mangerai balazo, na irugi ba wamalua yaʼia?” (Luka 14:28) Moguna so khömi wahasara dödö ba wangogunaʼö kefe. (Gamosi 3:3) Mihalö gangetula hadia zinangea miʼöli, ba ha waʼoya zaetu böli khömi. (Gamaedola 31:16) Böi miʼöli gama-gama ha börö me ebua gefemi. Böi moʼömö ami. Böi miʼöli zambö moroi ba gefe si so khömi.—Gamaedola 21:5; 22:7.

SI TOLA ÖFALUA:

• Na so zi toröi gefemi na no ahori mbaŵa, mihalö wahasara dödö hezo miʼogunaʼö gefe andrö

• Ba na ambö kefemi na no ahori mbaŵa, mihaogö wangerai kefemi enaʼö tola miʼalösi wowöli hadia ia. Duma-dumania, sökhi na mondrino samösa ami, moroi na miʼöli gömi baero

2 BÖI FAWINI TÖDÖ BA BÖI FATANDRO

HADIA NIWAʼÖ ZURA NIʼAMONIʼÖ: Moguna sibai ’na taʼalui zoguna khöda tenga ha ba zanehe Yehowa, ba zanehe niha göi’. (II Korindro 8:21) Fatunö khö woʼomou haʼuga gefe nisöndrau ba haʼuga göi zi no öʼogunaʼö.

Böi tebulö wa öfatunö khö ngambatöu na öhalö gangetula ba wangogunaʼö kefe. (Gamaedola 13:10) Daʼa zi tola mangohahauʼö tödömi ba wongambatö. Törö tödöu wa fangaluimö tenga ha khöu samösa tobali soguna ba nösi nomou fefu.—I Timoteo 5:8.

SI TOLA ÖFALUA:

• Mihalö wahasara dödö hawaʼebua gefe si tola miʼogunaʼö samösa, he lö mifatunö khö ngambatömi

• Miʼanemaiʼö mifatunö zoʼamakhaita ba gefemi, böi mibaloi wa so gabula dödö