Ifili Moze Wamosumange Yehowa

Ba Miserai, ösi nomo Yakobo lafotöi ira iraono Gizaraʼeli. Me no mate Yakobo faoma Yosefo, so Waraʼo si bohou tobali samatörö. Ataʼu ia na itugu abölö ndraono Gizaraʼeli moroi ba niha Miserai. Andrö ibaliʼö sawuyunia ndraono Gizaraʼeli. Ifaso ira ba wamazökhi batu-bata ba laforege wohalöwö ba danö. Hewaʼae simanö, itugu tedou waʼato ndraono Gizaraʼeli. Lö omasi Waraʼo. Börö daʼö, ifabunuʼö fefu nono matua sawena tumbu ba ndraono Gizaraʼeli. Khalaigö atö hewisa waʼataʼu ndraono Gizaraʼeli!

Samösa ndra alawe Gizaraʼeli sotöi Yokhebe, so nononia side-ide ono matua ba no siga-siga. Enaʼö telumöʼö nononia andrö ihaogö ibeʼe ba raga-raga, aefa daʼö ibiniʼö raga-raga daʼö ba gotalua zukhu ba Nungo Nidanö Nilo. Iʼagö ba daʼö gaʼa nono sawuyu andrö sotöi Miriya ba wamaigi-maigi hadia zalua.

Aefa daʼö möi mondri nono Waraʼo ono alawe ba nungo nidanö andrö, ba iʼila raga-raga daʼö. Me laʼila so bakha nono sawuyu sege-ege, ahakhö dödönia. Manofu khönia Miriya imane, ’Hadia moguna ukaoni samösa ndra alawe samaenu ono daʼa khöu?’ Fao dödö nono Waraʼo ono alawe andrö. Tobali, ifuli tohare Miriya faoma inania Yokhebe. Imane ono Waraʼo ono alawe khö Yokhebe, ’Ohe nono daʼa ba faenu ia khögu, ba ubeʼe gaziu.’

Me no ebua nono daʼö, iʼohe ia Yokhebe khö nono Waraʼo ono alawe. Ifotöi ia ono Waraʼo ono alawe andrö, Moze. Ibaliʼö hulö nononia samösa. Laʼebuaʼö Moze tobali ono Waraʼo ba tola isöndra hadia manö zomasi ia. Hizaʼi, lö irai olifu Moze khö Yehowa. Aboto ba dödönia wa yaʼia iraono Gizaraʼeli tenga niha Miserai. Andrö ihalö gangetula ba wamosumange Yehowa.

Me no irugi 40 fakhe Moze, omasi ia wanolo iraono Gizaraʼeli. Me iʼila niha Miserai no ibözi samösa ndraono Gizaraʼeli si möi sawuyu, tohare Moze ibözi niha Miserai andrö irege mate. Ibiniʼö gamatela niha daʼö Moze ba gawu. Me iʼila daʼö Faraʼo, iʼalui lala wamunu Moze. Hizaʼi moloi Moze ba danö Midiano. Ba daʼö ilumöʼö ia Yehowa.