Baŵa si Lima

Me no aefa iʼila Yohane ngawawa si so ba zorugo, iʼila göi ”ngawawa sato sibai”. Tebai muʼerai waʼato niha si farahu ba ngawawa andrö, tenga simane ngawawa si 144.000 niha. Haniha ira andrö? Imane Yohane, ”Yaʼira andrö si no teʼorifi moroi ba wamakao sabölö-bölö. No lasasai nukhara sebua ba laʼafusiʼö ba ndro Nono Mbiri-biri.” (Fam. 7:14) Na no aefa teʼorifi ”ngawawa sato sibai” moroi ba wamakao sabölö-bölö, latema dania howu-howu sahöli-höli dödö ba gulidanö andre. (Si. 37:​9-11, 27-29; Amd. 2:​21, 22; Fam. 7:​16, 17) Gofu hezo so dania auri ita, he ba zorugo hegöi ba gulidanö, hadia takhalaigö wa so ita ba waʼalua zi no mututunö ba Wamaʼeleʼö faza 7? Moguna tafalua daʼö. No inötö sahöli-höli dödö daʼö ba nono mbanua Lowalangi si farahu ba zi dombua ngawawa no mege! Ba ginötö daʼö, hasambalö tarasoi waʼomuso dödö börö me no tahalö gangetula ba wotuhini famatörö Yehowa. w22.05 16 ¶6-7

Ba ginötö öhalö gangetula sebua, tatu manö öʼohe daʼö ba wangandrö börö me öʼila wa moguna khöu waʼatua-tua. (Yak. 1:5) Imane Razo Selomo, ”Faʼatua-tua zabölö moguna.” (Amd. 4:7) Tatu manö, tenga faʼatua-tua moroi ba niha gulidanö nitutunö Zelomo andre, hizaʼi faʼatua-tua si otarai khö Lowalangi Yehowa. Hadia tola möi fanoloda waʼatua-tua si otarai khö Lowalangi ba wanaögö ngawalö gabula dödö salua khöda iadaʼa? Tatu manö. Hewisa lala enaʼö tola taʼokhögö waʼatua-tua? Sambua lala si tola tafalua yaʼia daʼö tafahaʼö ita ba tafalua mene-mene moroi khö ndra matua si darua sangokhögö faʼatua-tua sahöli-höli dödö. Si oföna yaʼia daʼö Selomo. Imane Sura Niʼamoniʼö, ”Ibeʼe Lowalangi waʼatua-tua khö Zelomo, fangiʼila hegöi faʼaboto ba dödö sebua simane faʼoya gawu ba zinga nasi.” (1 Ra. 4:29) Si dua yaʼia daʼö Yesu, ira matua fondrege zatua-tua si no irai auri ba gulidanö. (Mat. 12:42) No ifaʼeleʼö Sura Niʼamoniʼö sanandrösa khö Yesu, ”Afönu khönia geheha Yehowa. Andrö wa so khönia waʼatua-tua [ba] faʼaboto ba dödö fondrege zebua.”—Yes. 11:2. w22.05 20 ¶1-2

Tola tatatugöi ba takhamö gohitö dödöda ba wamati hewaʼae na no alawa ndröfida. Nehegö atö duma-duma dalifusöda sotöi Beverley, samösa talifusöda ira alawe si 75 fakhe. No göna ia fökhö sabölö-bölö irege tebai mofanö ia. Hewaʼae simanö, omasi ia ifalua wondrege zi sökhi ba wogaoni niha enaʼö laʼondrasi Wanörö Tödö. Börö daʼö, itatugöi hadia manö gohitö dödö somasi ia ikhamö. Me mofozu Beverley ba wogamö ohitö dödönia andrö, omuso sibai dödönia. Börö wamorege nifaluania, itugu terou dödö ndra talifusöda tanö böʼö ba wanuriaigö. Iʼameʼegö tödö sibai Yehowa halöwö nifalua ndra talifusöda si no alawa döfi hewaʼae na lö oya zi tola lafalua. (Si. 71:17) Tatugöi gohitö dödö si tola ökhamö. Douʼö mbua-bua sangomusoiʼö tödö Yehowa. Douʼö waʼonekhemö enaʼö itugu oya zi tola öfalua khö Yehowa hegöi ba organisasinia. Alui lala enaʼö itugu oya nifaluamö ba wanolo ira talifusöda. Börö howu-howu moroi khö Yehowa, tola ”oroma waʼatedoumö ba niha fefu”.—1 Ti. 4:15. w22.04 27 ¶18-19

Hewisa na so nonomö sangumaʼö wa lö omasi ia ifosumange Yehowa, hewaʼae na no öforege wanolo yaʼia? Böi waʼö tödöu wa lö mofozu ndraʼugö wamalua noro dödöu tobali satua. No ibeʼe ginötö Yehowa ba niha fefu ba wangai angetula samösa, tefarahu ba daʼö nonomö andrö. Börö daʼö, tola ihalö gangetula onomö andrö hadia omasi ia ifosumange Yehowa mazui löʼö. Böi taya wanötönau wa ifuli ia dania ba zi so miföna. Törö tödöu gamaedola sanandrösa ba nono selungu. (Luk. 15:​11-19, 22-24) Oya sibai gamuata si lö sökhi nifalua nono matua andrö. Hizaʼi ba gafuriata, mangawuli ia. Yaʼami ira satua, no tebeʼe khömi noro dödö si tohude ba wangebuaʼö iraonomi tobali samosumange Yehowa. (Si. 78:​4-6) Tenga halöwö saoha daʼö. Masuno ami soroi ba dödö börö me lö tebulö miforege wanolo iraonomi enaʼö laʼomasiʼö Yehowa ba laʼoʼö niwaʼönia, tola faduhu dödömi wa omuso dödö Namada sebua faʼomasi si so ba zorugo.—Ef. 6:4. w22.05 30-31 ¶16-18

Enaʼö terorogö wahasara dödö hegöi faʼatulö ba mbanua niha Keriso, moguna tabeʼe wondrege zi sökhi moloʼö si sagu khöda zamösana. Nehegö atö duma-duma ndra niha Keriso me abad siföföna. No faböʼö-böʼö zi tola lafalua hegöi halöwö nibeʼe khöra. (1 Ko. 12:​4, 7-11) Hizaʼi, lö labaliʼö daʼö famoto wahasara dödöra mazui fahindri ira khö nawöra. Ibeʼe khöra mene-mene Faulo enaʼö falulu fohalöwö ira ”ba wangotomosi boto Keriso”. Imane Faulo khö ndra niha Nefeso, ”Na sökhi wohalöwö ndroto-ndroto, daʼö zanolo boto andrö enaʼö tedou irege aro ba waʼomasi.” (Ef. 4:​1-3, 11, 12) Fefu niha soloʼö mene-mene nibeʼe Waulo andrö no larorogö wahasara dödö hegöi faʼatulö ba mbanua niha Keriso. Daʼö göi nirasoida iadaʼa ba mbanua niha Keriso si farahu yaʼita. Halö gangetula enaʼö lö öfaedo-faedogö ndraʼugö ba niha böʼö. Hizaʼi, fahaʼö ndraʼugö ba duma-duma nibeʼe Yesu ba forege woloʼö amuatania. Angeragö duma-duma nono mbanua Lowalangi si lö faröi me götö föna hegöi iadaʼa. Na lö öböhöli wameʼe fondrege zi sökhi, tola faduhu dödöu wa ’tenga sa si lö atulö Lowalangi irege olifu ia halöwöu’. (Heb. 6:10) Iʼameʼegö tödö fefu wamorege nifaluamö soroi ba dödö ba wamosumange yaʼia. w22.04 14 ¶15-16

Taʼandrö sibai saohagölö me taʼila wa lö nibeʼe khöda noro dödö ba wotatugöi hadia tola teʼefaʼö horö zi samösa niha mazui löʼö. Ha Yehowa zotatugöi daʼö. Hizaʼi, so göi gangetula si tola tahalö. Hadia daʼö? Te so samösa niha si no mamalua sala khöda, ba tola manö no horö sebua nifaluania andrö. He na iʼandrö khöda wangefa mazui löʼö, tola tahalö gangetula ba wangefaʼö sala niha daʼö. Eluahania, lö saʼae mofönu ita mazui abao dödöda khönia. Tatu manö, moguna khöda ginötö hegöi famorege, mendrua manö na afökhö sibai khöda nifaluania andrö. Moloʼö sambua artikel ba Menara Pengawal 15 Mbaŵa si Siwa 1994, na taʼefaʼö horö zi samösa niha, tenga daʼö geluahania wa fao dödöda ba horö nifaluania. Imane ba artikel daʼö, ”Ba niha Keriso, mangefaʼö sala eluahania itouʼö ba danga Yehowa fefu ngawalö zalua. Ha yaʼia Zanguhuku fondrege zatulö ba zi sagörö banua awö danö, ba hasambalö ifalua wanguhuku satulö ba ginötö si tefaudu.” w22.06 9 ¶6-7

Ifabuʼu Yehowa wa ba götöda andre, hasambalö iʼowuloi niha moroi ba ngawalö soi, mado, hegöi li, ba iʼosambuaʼö ira ba wamosumange satulö. Ba götöda andre, mufotöi ira ”ngawawa sato sibai”. (Fam. 7:​9, 10) Yaʼira andre ira matua, ira alawe, hegöi iraono moroi ba ngawalö mado, li, hegöi waö-waö waʼauri si faböʼö-böʼö. Teʼosambuaʼö ira ba nösi nomo ba wamati safönu fahasara dödö ba zi sagörö ulidanö. (Si. 133:1; Yoh. 10:16) Lö tebulö lafaʼanö ira ba wanutunö ba niha böʼö dötönafö niʼokhögöra sanandrösa ba gulidanö si bohou. (Mat. 28:​19, 20; Fam. 14:​6, 7; 22:17) Na farahu ndraʼugö ba ngawawa sato sibai, tatu örasoi wa no sebua böli dötönafö niʼokhögömö sanandrösa ba zi so miföna. Omasi Gafökha ba wanayaigö fanötönada. Ohitö dödönia yaʼia daʼö enaʼö faduhu dödöda wa lö iʼameʼegö tödö ita Yehowa ba lö ifalua hadia zi no ifabuʼu. Na mofozu Zatana ba wanayaigö fanötönada, tola manö taya waʼaterou dödöda ba taböhöli wamosumange Yehowa. w22.06 20-21 ¶2-3

Tötönafö zanolo yaʼita enaʼö lö mangiwa dödöda na alua khöda gabula dödö si no amaedola mbade, faduhu dödöda wa hasambalö so dania ginötö si sökhi ba zi so miföna. Böi olifu ita wamangelama niwaʼö Yesu wa hasambalö göna ita folohi. (Yoh. 15:20) Na taʼangerönusi mbuʼusa li Yehowa khöda ba zi so miföna, daʼö zanolo yaʼita enaʼö lö taböhöli wamosumange yaʼia. Nehegö hewisa dötönafö niʼokhögö Yesu tobali fanolonia ba wondrorogö faʼalöfaröi hewaʼae iʼila wa itaögö waʼamate safökhö. Ba ngaluo Wendrakose me 33 M, itötöi sinenge sotöi Fetero wamaʼeleʼö si so ba mbuku Zinunö sanandrösa ba waʼahono dödö nirasoi Yesu börö dötönafönia, imane: ”Afönu fanötöna waʼaurigu. Börö me lö öröi ndraʼo ba Lewatö, mazui ötehegö khö zawuyumö si lö faröi laʼila waʼatekiko. . . . No öʼomusoiʼö dödögu weʼaso tanö fönau.” (Hal. 2:​25-28; Si. 16:​8-11) Iʼokhögö dötönafö saro wa hasambalö isusugi ia Lowalangi ba irasoi waʼahono dödö börö me ifuli teʼosambuaʼö ia khö Namania si so ba zorugo.—Heb. 12:​2, 3. w22.10 25 ¶4-5

Samuza inötö, so darua ndra sinenge sotöi Yakobo hegöi Yohane, laʼandrö khö ninara enaʼö iʼandrö khö Yesu ba wameʼe khöra dadaoma sabölö tohude ba Wamatörö Lowalangi. (Mat. 20:​20, 21) Daʼö zangoromaʼö wa Yakobo hegöi Yohane so khöra gamuata faʼasiliyawa, ba omasi ira na yaʼira zabölö tohude moroi ba niha böʼö. (Amd. 16:18) Me laʼandrö ira Yakobo hegöi Yohane dadaoma si tohude khö Yesu, tenga ha yaʼira zangoromaʼö amuata si lö sökhi. Nehegö hadia zalua khö ndra sinenge tanö böʼö me larongo daʼö. Imane Sura Niʼamoniʼö, ”Me larongo daʼö ira nifahaʼö si dafulu, mofönu ira khö zi darua si fatalifusö andrö.” (Mat. 20:24) Yakobo, Yohane ba simanö göi ndra sinenge tanö böʼö, abölö-bölö sibai wabuʼa-buʼasara. Hadia nifalua Yesu me iʼila wa lö moʼahonoa ndra sinengenia? Lö mofönu ia, ba lö göi imane wangumaʼö wa iʼalui niha böʼö si so fangide-ngideʼö, ba si so faʼomasi si tobali fangali ndra sinengenia. Hizaʼi, iʼamenesi ira si fao faʼebolo dödö börö me iʼila wa sindruhunia omasi ira wamalua satulö. (Mat. 20:​25-28) Lö tebulö iforomaʼö waʼasökhi dödö khö ndra nifahaʼönia. w23.03 28-29 ¶10-13

Oya ngawalö zi sökhi si no öfalua ba zilalö. Owölö-ölö ndraʼugö wamahaʼö yaʼugö ba Zura Niʼamoniʼö te ba zi no hauga fakhe. Faduhu dödöu wa Sura Niʼamoniʼö andrö Taromali Lowalangi. Ba sabölö tohude, aboto ba dödöu ba öʼomasiʼö Zamaʼanö Sura Niʼamoniʼö andrö. Itugu tedou waʼomasimö khö Yehowa irege öhalö gangetula ölulu waʼaurimö khönia ba öbayagö ndraʼugö idanö. Sindruhu-ndruhu no angetula si sökhi daʼö! Tatu manö, no oya wanandraigö salua khöu fatua lö tebayagö ndraʼugö idanö. Hizaʼi, me no itugu ebua-bua ndraʼugö, so nasa wanandraigö si bohou salua khöu. Iforege Satana enaʼö lö saʼae öʼomasiʼö Yehowa ba lö öfosumange ia. (Ef. 4:14) Böi tehegö alua zimane daʼö! Hewisa enaʼö lö faröi ndraʼugö khö Yehowa ba tola öfalua mbuʼusa limö khönia? Böi böhöli foromaʼö waʼatedou, ’odödögö enaʼö moʼahonoa waʼaboto ba dödö’ niʼokhögömö.—Heb. 6:1. w22.08 2 ¶1-2

Yatobali ndraʼugö niha si tola mufaduhusi tödö yomo ba nomo. Ero samösa ösi nomo, moʼömö ira ba wondrorogö enaʼö lö larongo niha böʼö na so gabula dödö salua yomo ba nomora. Duma-dumania, so sambua zi toʼölö ifalua talifusöda ira alawe si möi famaʼiki woʼomonia ira matua. Hadia itutunö daʼö ba niha böʼö irege aila woʼomonia ira alawe? Tatu manö löʼö. Iʼomasiʼö woʼomonia ba lö ifalua zi möi fangafökhö dödönia. (Ef. 5:33) Omasi göi ndra si bohou ebua na lafosumange ira. Moguna aboto ba dödö ndra satua daʼa. Lö laʼailasi ndraonora ba lö latutunö föna niha böʼö na so zala nifalua ndraonora. (Kol. 3:21) Moguna göi mangelama ndraono enaʼö lö latutunö ba niha böʼö zalua yomo ba nomo si möi fangaila nösi nomora tanö böʼö. Na laforege ira ösi nomo ba wondrorogö enaʼö lö latutunö ba niha böʼö zalua yomo ba nomora, no larorogö wahasara dödö. w22.09 10 ¶9

Fahuhuo Yehowa khö Yobi, ifasugi ba dödönia waʼatua-tua hegöi faʼomasi niforomaʼönia ba gomböila dangania. Oya itutunö sanandrösa ba gurifö sahöli-höli dödöda. (Yob. 38:​1, 2; 39:​9, 13, 19, 27; 40:15; 41:​1, 2) Iʼogunaʼö göi nono matua si lö faröi sotöi Elihu ba wangaʼaroʼö hegöi ba wondrara tödö Yobi. Ifaduhuʼö khönia Elihu wa lö tebulö ifahowuʼö Yehowa niha sanau ölö ba wamosumange yaʼia. Hizaʼi, ifarou göi Gelihu Yehowa ba wameʼe mene-mene safönu faʼomasi khö Yobi. Itolo Yobi enaʼö lö iʼosambuaʼö dödönia ba gabula dödö salua khönia. Ifasugi ba dödö Yobi wa alawa nasa Yehowa moroi ba niha gulidanö börö me Yehowa andrö Somböi banua si yawa awö danö. Ibeʼe göi Yehowa halöwö khö Yobi. Iʼandrö khönia enaʼö mangandrö ia salahi zi datölu si fahuwu khönia si no mamalua sala. (Yob. 42:​8-10) Iadaʼa, hewisa Yehowa wanolonia yaʼita na alua khöda gabula dödö? Iadaʼa, lö fahuhuo khöda Yehowa simane nifaluania khö Yobi. Hizaʼi, iʼogunaʼö Daromalinia Sura Niʼamoniʼö ba wahuhuosa khöda.—Rom. 15:4. w22.08 11 ¶10-11

Ba mbanua niha Keriso ba Roma, so ba daʼö niha Keriso Yahudi hegöi niha Keriso si tenga Yahudi. Börö me tenga barö Goroisa Moze so ira, so zangumaʼö wa lö moguna laʼoʼö goroisa sanandrösa ba wemanga gö. (Mrk. 7:19) Iʼotarai daʼö, so ösa niha Yahudi sangumaʼö wa tola laʼa fefu ngawalö gö. Hizaʼi, so göi zangumaʼö wa tebai lafalua daʼö. Ha börö-börö daʼa, aboto wahasara dödö ba mbanua niha Keriso. Andrö wa iʼamenesi ira Faulo ba wondrorogö faʼatulö. Itolo ndra talifusönia Faulo enaʼö laʼila hadia manö lua-luania khöra zamösana hegöi ba mbanua niha Keriso na lafalua daʼö. (Rom. 14:​19, 21) Ifaudugö göi waʼaurinia enaʼö lö tobali ia fangala ba niha böʼö. (1 Ko. 9:​19-22) Tola göi tafarou dödö niha böʼö ba tarorogö waʼatulö na tataha dödöda enaʼö lö tafaso niha böʼö ba woloʼö somasi ita na alua gabula dödö. w22.08 22 ¶7

Na omasi ita takhamö gohitö dödö ba wangai halöwö khö Yehowa, moguna taforege ba wamalua daʼö. Simanö göi na omasi ita tagohi waʼatulö, ba si fao faʼebolo dödö itolo ita Yehowa ba wangoromaʼö faʼatedou wamalua bua-bua daʼö ero maʼökhö. (Si. 84:​5, 7) Si fao faʼomasi, ifasugi ba dödöda Yehowa wa faʼatulö andrö tenga noro dödö. (1 Yo. 5:3) Hizaʼi, no sambua folumöʼö daʼö ba moguna ia khöda ero maʼökhö. Datatörö tödöda fakake wasuwöta ba wamati nitutunö Waulo. (Ef. 6:​14-18) Hadia zolumöʼö tödö zi samösa saradadu? Yaʼia daʼö ”baru siʼöli waʼatulö dödö”, si no amaedola goi-goi satulö khö Yehowa. Simane baru siʼöli solumöʼö tödö zaradadu, tola göi ilumöʼö dödöda fondrege zabakha goi-goi satulö andrö khö Yehowa. Daʼö mbörö wa moguna sibai tafake fefu fakake wasuwöta farahu ba daʼö mbaru siʼöli faʼatulö dödö!—Amd. 4:23. w22.08 29 ¶13-14

Ba zi hauga ribu fakhe silalö, no ibeʼe wanuturu lala ba niha Taromali Lowalangi. Hewisa enaʼö lö tebulö so Daromali Lowalangi ofeta iadaʼa? Itatugöi Yehowa enaʼö mufuli musali Daromalinia andrö. Hewaʼae na lö moʼahonoa niha sanali yaʼia, hizaʼi lahaogö laʼosisiʼö wamalua halöwö andrö. Duma-dumania, samösa niha satua-tua isura sanandrösa ba Mbuku Niʼamoniʼö Heberaiʼo, ”Tola mumane wa lö hadöi tanö böʼö nifazökhi iʼotarai me föna irugi iadaʼa nihaogö ba wangosisiʼö.” Tola faduhu dödöda wa fehede nibasoda iadaʼa ba Zura Niʼamoniʼö tefaudu ia ba zomasi ifaʼema khöda Yehowa. ”Fefu mbuala si sökhi ba soʼahonoa” tohare daʼö moroi khö Yehowa. (Yak. 1:17) Taromali Lowalangi no buala sabölö sökhi nibeʼe Yehowa khöda. Na mamuala khöda niha böʼö, tola taʼila hawaʼasökhi niha daʼö ba wangiʼilania yaʼita hegöi soguna khöda. Simanö göi ita, oya taʼila sanandrösa khö Yehowa moroi ba Zura Niʼamoniʼö, buala nibeʼenia khöda. Tola taʼila hawaʼasökhi ia ba wangiʼilania yaʼita hegöi soguna khöda. w23.02 2-3 ¶3-4

Khalaigö hawaʼomuso dödöda na ibörögö tesusugi niha ba gulidanö ba Wamatörö Keriso si Saribu Fakhe! Fefu niha, omasi ira ifuli falukha ba nösi nomora si no mate mazui khö zi fahuwu khöra. Irasoi göi zimane daʼö Yehowa. (Yob. 14:15) Tobali, ba ginötö tesusugi dania ira, fefu niha omuso dödöra. ’Niha satulö’ si tesura töi ba zura wangorifi, ”tesusugi dania [ira] ba wanöndra faʼauri si lö aetu”. (Hal. 24:15; Yoh. 5:29) Tola manö na no aefa Hamagedo dania, ato niha niʼomasiʼöda nisusugi. Aefa daʼö, ’niha si lö atulö’ mususugi dania ira enaʼö tehuku. Yaʼira andrö niha si lö irai manöndra faʼaboto ba dödö sanandrösa khö Yehowa mazui si lö irai mamosumange yaʼia. Fefu niha nisusugi, oya nasa zinangea lafahaʼö yaʼira, he niha satulö hegöi niha si lö atulö. (Yes. 26:9; 61:11) Daʼö mbörö wa mufalua wamahaʼö sabölö tohude sagötö sejarah.—Yes. 11:10. w22.09 20 ¶1-2

Iforomaʼö Yehowa wa abölö tohude waʼasalawania moroi ba gangowuloa ndra samatörö si so ba gulidanö andre. Duma-dumania iʼoʼawögö ndraono Gizaraʼeli ba arakhagö larabu fefu Danö Amabuʼula. (Yos. 11:​4-6, 20; 12:​1, 7, 24) No hauga kali iforomaʼö Yehowa wa yaʼia andrö Samatörö Fondrege Zalawa! No irai isuno samösa ia Razo Nebukanesa moroi ba Mbabilona börö waʼabölö, kuaso hegöi lakhömi niʼokhögönia. Lö ifaduhuʼö wa ha Yehowa zinangea mufosumange. Andrö wa ibözi ia Lowalangi irege owöhö. Me no aefa döhö ia, ’ifolakhömi Lowalangi Fondrege Zalawa’ ba ifaduhuʼö wa ”lö tebulö so wamatörö [Yehowa] götö-götö waʼara”. Imane nasa, ”Lö hadöi si tola manaisi yaʼia mazui sanofu nifaluania.” (Dan. 4:​30, 33-35) Imane sanura Sinunö, ”Yaʼahowu soi sangolowalangigö Yehowa; yaʼahowu nono mbanua si no ifili tobali tana khönia.” (Si. 33:12) Daʼa zi tobali dane-dane saro khöda ba wondrorogö faʼalöfaröida khö Yehowa! w22.10 15-16 ¶13-15

Oya wamaʼeleʼö Zura Niʼamoniʼö si no alua sameʼe faduhu dödöda wa buʼusa li Lowalangi sanandrösa ba zi so miföna hasambalö alua. Tarasoi simane nirasoi zanura sinunö me imane khö Yehowa, ”Humulu dödögu ba wombaloi fangorifi andrö moroi khöu, börö me taromalimö andrö dötönafögu.” (Si. 119:81) Iʼogunaʼö Zura Niʼamoniʼö Yehowa ba wameʼe khöda ’tötönafö si sökhi ba zi so miföna’. (Yer. 29:11) Lö teʼodane-dane dötönaföda ba wamorege nifalua niha gulidanö, hizaʼi teʼodane-dane ia ba mbuʼusa li Yehowa. Yalötebulö tafahaʼö ita ba wamaʼeleʼö si so ba Zura Niʼamoniʼö enaʼö itugu faduhu dödöda ba Daromali Lowalangi. Hadia zangoromaʼö wa tola mufaduhusi tödö Zura Niʼamoniʼö? Nehegö hadia mbua nirasoi niha si no moloʼö mene-mene Zura Niʼamoniʼö. (Si. 119:​66, 138) Duma-dumania, so ösa wongambatö sarakhagö fabali ba zilalö, hizaʼi iadaʼa owua-wua dödöra ba wongambatö. Ba owua-wua göi dödö ndraonora börö me niha Keriso zatuara sangomasiʼö ba soʼameʼegö tödö yaʼira.—Ef. 5:​22-29. w23.01 5 ¶12-13

Törö tödöu hadia manö mbua si no ötema börö me no ifalua mbuʼusa linia Lowalangi simane si no tesura ba Daromalinia. Duma-dumania, no ifabuʼu Yesu wa hasambalö ibönökhi zoguna khöu Amania si so ba zorugo. (Mat. 6:​32, 33) Ifaduhuʼö göi Yesu wa hasambalö ibeʼe khöu geheha niʼamoniʼö Yehowa na öʼandrö khönia. (Luk. 11:13) No ifalua mbuʼusa linia andrö Yehowa. Te itörö tödöu mbuʼusa linia tanö böʼö si no ifalua. Duma-dumania, ifabuʼu khöu wa iʼefaʼö zalamö, ibeʼe khöu wondrara dödö, ba ibönökhi zoguna khöu ba wamati. (Mat. 6:14; 24:45; 2 Ko. 1:3) Na öʼangerönusi hadia manö zi no ifalua khöu Lowalangi, itugu aro dötönaföu wa hasambalö ifalua zi no ifabuʼu ba zi so miföna. Imane sanura buku Zinunö, ”Yaʼahowu niha . . . sanötöna khö Yehowa Lowalanginia, . . . Lowalangi si lö faröi.”—Si. 146:​5, 6. w22.10 27 ¶15; 28 ¶17

Hadia no alua wamaʼeleʼö sanandrösa ba wamohouni famosumange satulö ba götöda iadaʼa? Noa! Iʼotarai me 1919, zuta niha niʼefaʼö moroi ba Mbabilona Sebua yaʼia daʼö agama sofaya ba zi sagörö ulidanö. Teʼohe ira ba waradaiso wamati, nahia sabölö sökhi moroi ba danö amabuʼula me götö ndraono Gizaraʼeli. (Yes. 51:3; 66:8) Iʼotarai me 1919, no larasoi ira niha nibayoini hewisa waʼauri ba waradaiso wamati andrö. Ba gafuriata, niha sangokhögö tötönafö faʼauri ba gulidanö yaʼia daʼö ’biri-biri tanö böʼö’, larasoi göi waradaiso wamati ba fahöna howu-howu nitemara moroi khö Yehowa. (Yoh. 10:16; Yes. 25:6; 65:13) Faradaiso wamati andrö so ia ba zi sagörö ulidanö. Gofu hezo toröi ita ba gulidanö andre, tola farahu ita ba waradaiso wamati na lö tebulö tatuhini wamosumange satulö. w22.11 11-12 ¶12-15

Yehowa andrö ”Lowalangi irugi zi lö aetu”, eluahania lö tebulö so ia. (Yes. 40:28) Hadia abua khöu wangokhögö faʼaboto ba dödö sanandrösa ba daʼö? Ato niha zorasoi simane daʼö. Imane Elihu sanandrösa khö Lowalangi, ”Tebai muʼerai ndröfinia.” (Yob. 36:26) Na lö aboto ba dödöda zi sambua ngawalö, tenga daʼö geluahania wa lö atulö daʼö. Duma-dumania, lö aboto sibai ba dödöda hewisa wa tola so listrik, hizaʼi tenga daʼö geluahania wa lö hadöi listrik. Simane daʼö göi, yaʼita niha gulidanö, lö aboto sibai ba dödöda hewisa wa lö tebulö so Yehowa. Hizaʼi, tenga daʼö geluahania wa Yehowa andrö tenga Lowalangi irugi zi lö aetu. Lö tebulö so Zomböi yaʼita, hewaʼae aboto ba dödöda daʼö mazui löʼö. (Rom. 11:​33-36) Yaʼia ’zamologö banua si yawa’. Börö daʼö, no so ia fatua lö mufazökhi luo hegöi banua si yawa awö danö.—Yer. 51:15. w22.12 2-3 ¶3-4

Itaria laʼandrö khöda ba wosalahini niha böʼö ba wangandrö. Duma-dumania, samösa dalifusöda ira alawe samahaʼö niha ba Zura Niʼamoniʼö, te iʼandrö khö dalifusöda ira alawe si fao khönia ba wamaʼema fangandrö. Hizaʼi, te abölö sökhi na ba gafuriata ifaʼema wangandrönia talifusöda andrö börö me lö iʼila sibai niha nifahaʼö andrö. Börö daʼö, tola ifaudugö wangandrönia moloʼö soguna khö niha nifahaʼö ba Zura Niʼamoniʼö. Tola manö muʼandrö khö zi samösa talifusöda ira matua ba wamaʼema fangandrö na inötö mufalua gangowuloa mazui na möi manuriaigö. Ira talifusöda samaʼema fangandrö, moguna itörö tödöra hadia gohitö dödö wa mufalua gangowuloa andrö. Tebai laʼogunaʼö ginötö wangandrö ba woʼamenesi mazui ba wamaʼema angombakhata ba mbanua niha Keriso. Ba zi hawaʼoya mbanua niha Keriso, laʼogunaʼö lima menit ginötö ba wanunö hegöi ba wangandrö. Börö daʼö, tebai ’anau wangandrö’ dalifusöda samaʼema fangandrö, mendrua manö na awena mubörögö gangowuloa andrö.—Mat. 6:7. w22.07 24 ¶17-18

No ifaʼeleʼö Yesu wa alua ”ngawalö wökhö” ba ngaluo safuria, gofu hezo so. (Luk. 21:11) Daʼö mbörö wa lö tokea ita na alua wökhö waba. Lö tebulö tarasoi waʼohahau dödö. Tola göi taʼoʼö mene-mene niwaʼö Yesu ba niha sauri ba ngaluo safuria andre me imane, ”Böi miʼataʼufi.” Börö wökhö waba, lö taʼila tafalua halöwöda simane si toʼölö. Hizaʼi, böi tehegö tobali taha-tahau daʼö ba wamalua famahaʼö samösa mazui ba weʼamöi ba gangowuloa. Tola öfahaʼö ndraʼugö khö ndra talifusöda si lö faröi hewaʼae na lataögö gabula dödö si fagölö. Tola öʼila zalua khöra andrö ba publikasi mazui video nihenaigö organisasi. w22.12 17 ¶4, 6

Yosefo andrö ono niʼomasiʼö khö Yakobo, ba laʼila daʼö ira gaʼania. (1 Mo. 37:​3, 4) Lua-luania, afökhö dödöra khö Yosefo. Samuza inötö, lafamawa Yosefo ba niha Midiano. Laʼohe ia ba Miserai, faʼaröunia ngaotu kilometer moroi ba nahia si toröi yaʼia. Ba daʼö, lafamawa zui ia khö Wotifa, kafalo zanaro khö Waraʼo. Tebulö waʼauri Yosefo ba zi lö arara. Mege, ono niʼomasiʼö ia khö namania. Iadaʼa, tobali ia sawuyu niha Miserai! (1 Mo. 39:1) So ginötönia alua khöda waʼabasaki ”si toʼölö alua ba niha”. (1 Ko. 10:13) Mazui, alua khöda waʼabasaki börö me tobali ita nifahaʼö Yesu. Duma-dumania, te laʼoʼaya ita, lasaisi, mazui lafakao ita börö wamatida. (2 Ti. 3:12) Hizaʼi, gofu hadia ia waʼabasaki salua khöu, tola mofozu ndraʼugö ibeʼe Yehowa. w23.01 14-15 ¶3-4

Itaria tarasoi wa moguna fahuhuo ita ba niha sangafökhöiʼö tödöda. Hizaʼi, fatua lö tafalua daʼö, moguna taʼangeragö wanofu-nofu andre: ’Hadia sindruhu-ndruhu aboto ba dödögu zalua?’ (Amd. 18:13) ’Hadia iʼodödögö niha daʼö ba wangafökhöiʼö tödögu?’ (Sango. 7:20) ’Hadia no irai ufalua zala simane nifaluania?’ (Sango. 7:​21, 22) ’Na fahuhuodo khönia, hadia tola teʼasiwai gabula dödö andrö, mazui hadia itugu ebua?’ Na taʼangeragö wanofu-nofu simane daʼö, tola aboto ba dödöda wa sindruhunia tola taʼolifugö zala niha daʼö börö me taʼomasiʼö ia. Fefu ita taforomaʼö wa yaʼita andre sindruhu-ndruhu soloʼö khö Yesu börö me taforomaʼö waʼomasi si lö mangalui tana khöda khö ndra talifusöda hewaʼae na lö moʼahonoa ira. Na tafalua daʼö, tola tatolo niha böʼö enaʼö aboto ba dödöra wa ira Samaduhuʼö Yehowa no agama satulö, ba omasi ira farahu khöda ba wamosumange Yehowa, Lowalangi sebua faʼomasi. Yalötebulö taforomaʼö waʼomasi khö nawöda zamösana. w23.03 31 ¶18-19

Sura Niʼamoniʼö zangoromaʼö amuata Yehowa sabölö tohude, yaʼia daʼö faʼomasi. Börö me iʼomasiʼö ita Yehowa, lö oya sibai nitutunönia khöda enaʼö lö afökhö högöda. (Yoh. 21:25) Oroma waʼomasi Yehowa ba lalania wahuhuosa khöda ba Zura Niʼamoniʼö. Börö me iʼameʼegö tödö ita, lö ibeʼe khöda daftar sanau sibai ba wamatörö lala waʼaurida ofeta ba wondrege zide-ide. Hizaʼi, itolo ita ba wangai angetula si sökhi me ibeʼe waö-waö waʼauri, famaʼeleʼö sadöni dödöda, hegöi mene-mene soguna khöda. Daʼö mbörö wa taʼomasiʼö Lowalangi soroi ba dödö, tenga börö me no ifaso ita. Sura Niʼamoniʼö zangoromaʼö khöda wa iʼameʼegö tödö ita Yehowa. Hadia dandrania? Ba Daromalinia, oya zi no irai alua ba niha ”simane yaʼita” nitutunö ba Zura Niʼamoniʼö. Börö daʼö, tola tafahaʼö ita ba zi no irai alua khöra. (Yak. 5:17) Ba sabölö moguna, nehegö hewisa wamaigi Yehowa niha na so zalua khöra simane salua khöda irege aboto ba dödöda ”wa safönu faʼomasi Yehowa ba sahakhö tödö”.—Yak. 5:11. w23.02 6 ¶13-15

Mubörötaigö buku safuria ba Zura Niʼamoniʼö faoma fehede, ”Daʼa nifaʼeleʼö Yesu Keriso, nitemania moroi khö Lowalangi ba wangoromaʼö khö ndra sawuyu Lowalangi ngawalö zi lö ara tö alua.” (Fam. 1:1) Tatu manö, daʼö mbörö wa adöni sibai dödöda ba wonehegö ngawalö zalua ba gulidanö andre, ba taʼalui hadia moʼamakhaita daʼö ba nifaʼeleʼö Zura Niʼamoniʼö. Tola göi terou sibai dödöda wanutunö daʼö khö ndra talifusöda. Ba ginötö tadunö-dunö sanandrösa ba nifaʼeleʼö Zura Niʼamoniʼö, tebai tatahö-tahö manö mazui tatatugöi hadia zi tobali rahu-rahunia. Hadia mbörö? Börö me lö omasi ita na aboto wahasara dödö ba gangowuloa ha börö mbua gera-erada. Duma-dumania, te tarongo hewisa zondröniaʼö ba gulidanö andre na ladunö-dunö lala wangasiwaira abula dödö salua, hegöi fangoʼozuira faʼatulö ba faʼahono dödö. Moroi na tahalö rahu-rahu wa salua andrö tefaudu simane nifaʼeleʼö ba 1 Tesalonika 5:​3, moguna taʼalui hadia gangombakhata nifaʼanö ba publikasi si bohou mufazökhi. Na taʼodaligö publikasi nifazökhi organisasi Yehowa, hasambalö so khöda wahasara dödö ba ’ha sambua gera-erada’ khö ndra talifusöda.—1 Ko. 1:10; 4:6. w23.02 16 ¶4-5

Ba wamaigi Yesu, sindruhu, fangide-ngideʼö, hegöi faʼatulö andrö no tohude sibai. Na öʼomasiʼö zindruhu hegöi faʼatulö, tola öʼomasiʼö Yesu Keriso, börö me lö khönia faʼataʼu ba wamaduhuʼö sindruhu. (Yoh. 18:37) Baero daʼö, ifahaʼö niha enaʼö laʼokhögö wangide-ngideʼö. Hewisa wamaluania daʼö? Tobali duma-duma Yesu ba wangoromaʼö fangide-ngideʼö. Duma-dumania, lö tebulö ifolakhömi Namania, tenga yaʼia samösa. (Mrk. 10:​17, 18; Yoh. 5:19) Hewisa dödöu na öʼangeragö wangide-ngideʼö niʼokhögö Yesu? Tatu tefarou dödöu ba wangomasiʼö yaʼia, ba öʼoʼö duma-dumania. Hana wa so khö Yesu wangide-ngideʼö? Börö me iʼomasiʼö ba iʼoʼö Namania sangokhögö fangide-ngideʼö. (Si. 18:35; Heb. 1:3) Moʼahonoa woloʼö Yesu gamuata Yehowa. Daʼa zamarou yaʼugö ba wangomasiʼö yaʼia. w23.03 3-4 ¶6-7

Itutunö khöda Sura Niʼamoniʼö wa so dombua ngawawa dania niha nisusugi ba tebeʼe khöra ginötö ba wangokhögö faʼauri si lö aetu ba gulidanö, yaʼia daʼö ’niha satulö’ hegöi ’niha si lö atulö’. ’Niha satulö’ eluahania niha si lö faröi ba wamosumange Yehowa me auri ira. Hizaʼi, ’niha si lö atulö’ lö irai lafosumange Yehowa me auri ira. Tobali, börö me tesusugi dania zi dombua ngawawa andre, hadia daʼö geluahania wa tesura döira ba zura wangorifi? Fatua lö mate ira, no tesura döira ba zura wangorifi. Hadia muheta döira ba zura andrö me mate ira? Löʼö, börö me ”auri” nasa ira ba wamaigi Yehowa. Imane Sura Niʼamoniʼö, ”[Yehowa andrö] Lowalangi niha sauri, tenga Lowalangi niha si mate. Auri sa ira fefu ba wamaiginia.” (Luk. 20:38) Eluahania, ba ginötö tesusugi dania niha satulö andrö ba gulidanö, so döira ba zura wangorifi hewaʼae na ha faoma ”fetolo” wanura yaʼia.—Luk. 14:14. w22.09 16 ¶9-10

Omasi Yehowa na omuso dödö niha siföföna sotöi Adamo ba niwöwöi Lowalangi. Me iwöwöi Gadamo, ibeʼe nahia waʼatoröi si sökhi yaʼia daʼö Kabu Edena. Ibeʼe halöwö khö Gadamo ba wondrorogö hegöi ba wangeboloʼö kabu andrö. (1 Mo. 2:​8, 9) No halöwö si sökhi daʼö! Omuso dödö Gadamo me iʼila moliwiö zinanö ba teboka mbowo mbunga. Ba iʼandrö khönia Yehowa ba wamatörö töi gurifö. (1 Mo. 2:​19, 20) Sindruhunia, tola ifalua samösa daʼö Yehowa, hizaʼi ibeʼe halöwö daʼö khö Gadamo. Fatua lö ifatörö döi ngawalö gurifö, ihaogö inehegö Adamo hewisa gurifö andrö hegöi lagura. Omuso sibai dödö Gadamo ba halöwönia. Daʼö zanolo yaʼia enaʼö aboto ba dödönia waʼatua-tua Namania. Fefu niwöwöi Namania no sadöni dödö ba si sökhi famaigi. w23.03 15 ¶3

Inggris-Amerika niʼamaedolagö tete kahe nadu sebua andrö, daʼö kuaso gulidanö safuria nifaʼeleʼö Zura Niʼamoniʼö. (Dan. 2:​31-33) Lö hadöi kuaso gulidanö tanö böʼö si tobali fangalinia. Ba Hamagedo, tohare Wamatörö Lowalangi ba wangohori kuaso gulidanö andre hegöi famatörö niha gulidanö maʼafefu. (Fam. 16:​13, 14, 16; 19:​19, 20) Hadia gunania khöda wamaʼeleʼö andrö? Ibeʼe khöda dandra-tandra tanö böʼö famaʼeleʼö Danieli sangoromaʼö wa no auri ita ba götö safuria. Töra 2.500 fakhe silalö, no ifaʼeleʼö Danieli na no aefa dania mamatörö Mbabilona, so öfa tö kuaso gulidanö samatörö ba ebua sibai lua-luania ba nono mbanua Lowalangi. Itutunö göi famaʼeleʼö Danieli wa Kuaso Gulidanö Inggris-Amerika, daʼö kuaso safuria moroi ba zi öfa kuaso gulidanö andrö. Tobali ba zi lö ara tö, tohare Wamatörö Lowalangi ba wangohori famatörö niha, ba mamatörö ia ba zi sagörö ulidanö. Tatu möi fondrara dödöda daʼö ba ibeʼe khöda dötönafö. w22.07 4 ¶9; 5 ¶11-12