Baŵa si Walu

Moloʼö ayati daʼa, na so niha sangoromaʼö moroi ba wehedera wa laʼataʼufi Yehowa ba laʼangerönusi döinia, inehe-nehegö ira Yehowa ba isura döira ba ”mbuku famasugi ba dödö”. Hana wa inehe-nehegö wehedera Yehowa? Börö me fehedera andrö zangoromaʼö ösi dödöra. Imane Yesu, ”Hadia zi no fahöna ba dödö, daʼö zalua ba mbewe.” (Mat. 12:34) Omasi Yehowa enaʼö fefu niha sangomasiʼö yaʼia lasöndra waʼowua-wua dödö ba gulidanö si bohou sagötö faʼara. Moguna taʼamoniʼö wehededa enaʼö itema zumange nibeʼeda Yehowa. (Yak. 1:26) Sasesenia, lö sökhi lagu wahuhuosa niha si lö mangomasiʼö Yehowa, ba asiliyawa ira na humede. (2 Ti. 3:​1-5) Tatu lö omasi ita tafalua zimane daʼö. Omasi ita na omuso dödö Yehowa ba wehededa. Hizaʼi, hewisa na tahaogö-haogö wehededa ba gangowuloa hegöi ba wanuriaigö, hizaʼi lö sökhi wehededa ba nösi nomoda? Hadia omuso dödö Yehowa khöda?—1 Fe. 3:7. w22.04 5 ¶4-5

Lowalangi zameʼe ba dödö dandru si fulu rozi ba urifö samuʼi andrö ba wangohori Babilona Sebua. Börö me ifarou dödö ngawalö soi Yehowa, laʼogunaʼö dania gurifö samuʼi soyo si hulö hola-hola galitö, yaʼia daʼö PBB, ba wanuwö hegöi ba wangohori fefu agama sofaya ba zi sagörö ulidanö. (Fam. 18:​21-24) Hadia zinangea tafalua? Moguna tatatugöi wa lö tebulö tafalua ”wamosumange sohau-hau ba si lö raʼiö moloʼö famaigi Lowalangi”. (Yak. 1:27) Böi tedönisi dödöda ba Mbabilona Sebua. Moguna tatimbagö wamahaʼönia sofaya, owasania si fatuwu ba Zura Niʼamoniʼö, goi-goinia si lö tefaudu sanandrösa ba gamuata, hegöi si toʼölö ifalua soʼamakhaita ba malaʼika si lö sökhi. Baero daʼö, böi taböhöli ba wamangelama niha enaʼö ’laheta ira’ moroi ba Mbabilona Sebua faböi fasala ira ba wamaigi Yehowa.—Fam. 18:4. w22.05 11 ¶17-18

Yaʼami satua, alui ginötö ba wamahaʼö iraonomö sanandrösa khö Yehowa hegöi ngawalö zi sökhi si no ifalua ba waʼaurimö. (5 Mo. 6:​6, 7) Moguna sibai öfalua daʼö, mendrua manö na tebai öfalua ero migu wamahaʼö ba Zura Niʼamoniʼö ba ndraonomö. Imane talifusöda ira alawe sotöi Christine, ”Ha fawaraö so ginötögu ba wanutunö soʼamakhaita ba wamati. Börö daʼö, ero na so ginötö, lö utaha-taha wamalua daʼö.” Moguna göi ödunö-dunö ngawalö zi sökhi sanandrösa ba organisasi Yehowa hegöi ira talifusöda ba wamati. Böi fatou-tou ndra satua sokubaloi enaʼö lö dania alawö ndraonomö ba wangondrasi yaʼira na moguna khöra wanolo. Forege wondrorogö faʼahono dödö yomo ba nomo. Böi tebulö foromaʼö wa öʼomasiʼö woʼomomö ira matua hegöi iraonomö. Na ödunö-dunö sanandrösa khö woʼomomö andrö, falua daʼö si fao faʼasökhi dödö ba famosumange. Moguna göi öfarou ndraonomö wamalua simane daʼö. Na öfalua daʼö, itugu ahono dödömi yomo ba nomo, ba itugu aoha ba ndraonomö wamahaʼö yaʼira sanandrösa khö Yehowa.—Yak. 3:18. w22.04 18 ¶10-11

Fehede Yesu ba mbanua niha Keriso ba Nefeso, daʼö zangoromaʼö wa no anau gölöra ba owölö-ölö ira ba wamosumange Yehowa hewaʼae na oya wanandraigö si göna ira. Hizaʼi, tenga saʼae simane me mböröta waʼomasira khö Yehowa. Börö daʼö, moguna laʼaroʼö waʼomasira khönia. Na lö lafalua daʼö, lö itema zumange nibeʼera Lowalangi. Simane daʼö göi ita iadaʼa. Atulö wa moguna taforomaʼö waʼanau gölö, hizaʼi moguna göi atulö gohitö dödöda ba wamalua daʼö. Tenga ha inehe-nehegö Lowalangi hadia nifaluada, hizaʼi inehegö göi hadia mbörö wa tafalua daʼö. Omasi ia na tafosumange ia börö me sindruhu-ndruhu taʼomasiʼö ba taʼameʼegö tödö ia. (Amd. 16:2; Mrk. 12:​29, 30) Moguna mangelama ita ba böi mörö ba wamati. Faböʼö göi zalua ba mbanua niha Keriso si so ba Zade. Me mböröta, owölö-ölö sibai ira ba wamosumange Lowalangi. Hizaʼi ba gafuriata, lö saʼae lafalua halöwö ba wamati. Börö daʼö, ifangelama ira Yesu enaʼö ’maoso’ ira. (Fam. 3:​1-3) Sindruhu sa, lö olifu Yehowa hadia zi no tafalua ba döinia.—Heb. 6:10. w22.05 3 ¶6-7

Iwaʼö Selomo wa tola taʼomusoiʼö dödöda ba halöwö nifaluada, ba ifotöi daʼö ”buala Lowalangi”. (Sango. 5:​18, 19) No irasoi samösa Selomo wa atulö wehede daʼö. Oya ifazökhi nomo, kabu nagu, kabu mbunga, hegöi baʼa nidanö. So göi ösa mbanua nifasindronia. (1 Ra. 9:19; Sango. 2:​4-6) Tatu omuso dödö Zelomo ba halöwö si no ifalua andrö. Hizaʼi, aboto ba dödönia wa lö ibönö daʼö ba wangokhögö faʼomuso dödö. Börö daʼö, oya göi halöwö ba wamati nifaluania. Duma-dumania, idöniaʼö halöwö famazökhi osali niʼogunaʼö ba wamosumange Yehowa. Mufalua wamazökhi osali andrö fitu fakhe waʼara! (1 Ra. 6:38; 9:1) Me no ifalua fefu daʼö, aboto ba dödönia wa sabölö moguna yaʼia daʼö halöwö ba wamati. Imane, ”Rahu-rahu moroi ba zi no muwaʼö andre fefu yaʼia daʼö: Ataʼufi Lowalangi sindruhu ba falua goroisania.”—Sango. 12:13. w22.05 22 ¶8

Ba Zura Niʼamoniʼö, ato duma-duma sanandrösa ba niha si no manema fangefaʼö sala moroi khö Yehowa. Haniha zi tumbu ba gera-eramö? Tola manö itörö tödöu Razo Manase. Yaʼia andrö niha si lö sökhi, samalua horö fondrege zebua föna Yehowa. Ifosumange nadu ba idöniaʼö wamalua famosumange faya. So ösa ndraononia nibununia tobali sumange Lowalangi niha baero. Baero daʼö, iʼohe ba gosali Yehowa nadu nifazökhinia. Imane Sura Niʼamoniʼö sanandrösa khönia, ”Oya zi lö sökhi nifalua Manase si möi fangafökhö dödö Yehowa.” (2 Ng. 33:​2-7) Hizaʼi, me ifalalini gera-erania Manase soroi ba dödö, iʼefaʼö zalania Yehowa. Baero daʼö, ifangawuli göi khönia Lowalangi dadaomania tobali razo. (2 Ng. 33:​12, 13) Tola manö öʼangeragö göi sanandrösa khö Razo Dawido si no hauga kali mamalua horö sebua föna Yehowa, simane amuata wohorö hegöi fabunusa. Hewaʼae simanö, me ifalalini gera-erania Dawido soroi ba dödö ba ifaduhuʼö wa no ifalua zala, iʼefaʼö göi zalania Yehowa. (2 Sa. 12:​9, 10, 13, 14) Börö daʼö, tola faduhu dödöda wa omasi Yehowa wangefaʼö salada. w22.06 3 ¶7

Itaria abua khöda wangaʼaroʼö tötönaföda. Tola manö taya khöda waʼebolo dödö ba wombaloi buʼusa li Lowalangi. Hizaʼi, börö me lö tebulö so Yehowa sagötö faʼara, daʼö mbörö wa faböʼö wamaiginia inötö moroi khöda. (2 Fe. 3:​8, 9) Hasambalö ifalua zi no ifabuʼu ba lala sabölö sökhi hewaʼae na tenga ba ginötö somasi ita ifalua daʼö. Hadia zanolo yaʼita ba wangaʼaroʼö tötönaföda ba lö mamalö tabaloi Yehowa si fao faʼebolo dödö? (Yak. 5:7) Enaʼö lö tebulö manötöna ita khö Yehowa, moguna mamati ita wa so ia ba hasambalö ”ibeʼe luo ba niha sangalui yaʼia soroi ba dödö”. (Heb. 11:​1, 6) Na sindruhu-ndruhu so Yehowa ba wamaigida, itugu faduhu dödöda wa hasambalö ifalua zi no ifabuʼu. Hewaʼae na lö taʼila Yehowa, hizaʼi tola ahatö ita khönia. Tola fahuhuo ita khönia ba wangandrö, ba faduhu dödöda wa ifondrondrongo wangandröda.—Yer. 29:​11, 12. w22.10 26-27 ¶11-13

Khalaigö atö zalua me luo daʼö. No modadao Yobi ba dete nawu ba lö tebulö irasoi waʼafökhö. (Yob. 2:8) Lawaʼö ira si fahuwu khönia wa yaʼia andrö tenga niha si sökhi, ba si lö eluaha fefu zi no irai ifalua ba zilalö. Amaedola noro sabua wanandraigö salua khönia andrö, ba hulö nihökha-hökha dödönia börö me no mate ndraononia. Ba wamobörö, ilau zi lö hede-hede Yobi. (Yob. 2:13) Te lawaʼö tödöra ira si fahuwu khönia wa ilau zi lö hede-hede börö me no iröi saʼae Lowalangi Yehowa. Hizaʼi, fasala lala wangera-ngera simane daʼö. Ba gafuriata, ifaöga ia Yobi ba ifaigi ndra si fahuwu sofaya andrö, ba imane khöra, ”Irege aetu nosogu, ba lö uböhöli waʼalöfaröigu!” (Yob. 27:5) Hadia zanolo Yobi irege anau gölönia ba lö mangiwa dödönia? Hewaʼae na irasoi waʼide-ide dödö, lö irai taya wanötönania wa hasambalö itolo ia Lowalangi sebua faʼomasi. Aboto ba dödönia wa hewaʼae na mate ia, hasambalö isusugi ia Yehowa.—Yob. 14:​13-15. w22.06 22 ¶9

Samazökhi banua si yawa awö danö, no ibeʼe khöda mbuala sebua böli yaʼia daʼö itehegö khöda mangandrö ita khönia. Angeragö atö: Tola tatutunö nösi dödöda khö Yehowa gofu hawaʼara manö ba gofu hadia li niʼogunaʼöda. Lö moguna fazazi ita khönia sakali fatua lö taʼondrasi ia ba wangandrö. Tola mangandrö ita khönia na so ita ba rumah sakit mazui bakha ba gurunga. Ba faduhu dödöda wa ifondrondrongo wangandröda Amada sebua faʼomasi. Tatu manö taʼandrö sibai saohagölö ba mbuala nibeʼenia andrö! Iʼandrö sibai saohagölö Razo Dawido mbuala fangandrö. Manunö ia khö Yehowa, ”Yahulö zumange somuhua wangandrögu, si no mufaʼanö tanö fönau.” (Si. 141:​1, 2) Ba götö Dawido, laʼogunaʼö zumange somuhua ira ere ba wamalua famosumange satulö ba lahaogö sibai wamaʼanö. (2 Mo. 30:​34, 35) Simane niha sangehaogö mamaʼanö sumange somuhua, simanö göi Dawido. Ihaogö iʼangeragö sibai hadia wehedenia na mangandrö ia khö Namania si so ba zorugo. Tatu omasi göi ita tafalua zimane daʼö enaʼö omuso dödö Yehowa ba wangandröda. w22.07 20 ¶1-2; 21 ¶4

Ha Yehowa zinangea molau balö. Lö nitehegö Yehowa khöda ba wolau balö na so zamalua sala khöda. (Rom. 12:​20, 21) Börö me lö moʼahonoa ita ba ambö faʼatua-tuada, andrö wa tebai tafalua wanguhuku satulö simane nifalua Lowalangi. (Heb. 4:13) Itaria göi lö taʼila tahalö gangetula si tefaudu börö waʼaukhu dödöda. Ibeʼe gehehania Yehowa khö Yakobo ba wanura, ”Fönu niha andrö, lö iʼasogö waʼatulö ba wamaigi Lowalangi.” (Yak. 1:20) Faduhu dödöda wa hasambalö ihalö gangetula si tefaudu Yehowa, ba ifalua huku satulö ba soʼahonoa. Na taʼefaʼö zala, daʼö zangoromaʼö faʼafaduhu dödöda wa hasambalö ifalua zatulö Yehowa. Na tatouʼö gabula dödöda ba danga Yehowa, no taforomaʼö waʼafaduhu dödö khönia wa hasambalö iheta fefu ngawalö zi lö sökhi niʼasogö horö. Ba gulidanö si bohou si no ifabuʼu, iheta waʼafökhö dödö si no irai tarasoi, ’lö saʼae itörö tödöda zi no numalö, ba lö saʼae irai tumbu ia ba dödöda’.—Yes. 65:17. w22.06 10-11 ¶11-12

Folohi salua khöda, daʼö zangoromaʼö wa no taʼoʼö duma-duma nibeʼe Yesu ba taʼomusoiʼö dödö Yehowa. (Mat. 5:​11, 12) Aboto ba dödöda wa börö Gafökha wa tola alua fefu ngawalö wolohi andre. Hizaʼi, lö irai möna ia ba wolawa Yesu! Itugu ato niha misa ba ngawalö soi samondrongo turia somuso dödö börö wanolo nibeʼe Yesu. Abula dödö tanö böʼö nitaögöda yaʼita sanuriaigö turia somuso dödö, yaʼia daʼö faʼafaböʼö ngawalö li. Hizaʼi, ba gangilata nibeʼe Yesu khö zinenge sotöi Yohane, ifaʼeleʼö wa ba ginötöda andre, teturiaigö duria somuso dödö ba niha fefu gofu hadia ia li niʼogunaʼöra. (Fam. 14:​6, 7) Hewisa waʼalua zi no tefaʼeleʼö andrö? Iadaʼa, taforege enaʼö itugu ato niha sanemaʼö turia sanandrösa ba Wamatörö Lowalangi. Ba situs web khöda, jw.org, oya ngawalö zi no tehenaigö si teʼodane-dane ba Zura Niʼamoniʼö töra ba zi 1.000 ngawalö li. Börö daʼö, ato niha ba zi sagörö ulidanö si tola mombaso yaʼia. Baero daʼö, buku siföföna niʼogunaʼöda ba wombaliʼö nifahaʼö, yaʼia daʼö Lala ba Wanöndra Faʼohahau Dödö Sagötö Faʼara!, no mutehegö mufoʼeluaha daʼö ba zi töra 700 ngawalö li. w22.07 9 ¶6-7

Ahakhö dödö Yesu ba niha gulidanö. Imane sinenge sotöi Mataiʼo, ”Na ifaigi niha sato, ahakhö dödönia börö me tefakao ba tetiboʼö ira hulö mbiri-biri si lö kubalo.” (Mat. 9:36) Hewisa göi dödö Yehowa? Imane Yesu, ”Simanö göi Namagu si so ba zorugo, lö omasi ia na tekiko fazamösa niha simane ono side-ide andre.” (Mat. 18:14) Sindruhu-ndruhu wa möi fondrara dödöda wehede daʼa! Na itugu aboto ba dödöda sanandrösa khö Yesu, itugu monönö göi waʼomasida khö Yehowa. Na fariawö ndraʼugö khö ndra talifusöda si no aro ba wamati si so ba gangowuloa, monönö waʼomasimö khö Yehowa ba tobali ndraʼugö niha saro ba wamati. Nehegö hawaʼomuso dödöra. Lö irai maniasa ira me no lahalö gangetula ba wamosumange Yehowa. Sofu hadia manö zi no irai alua khöra sagötö lahalö halöwö khö Yehowa. Andrö khöra wanuturu lala ba ginötö öhalö gangetula si tohude. Böi olifuʼö, ”na ato zanuturu lala, ba mofozu gohitö dödö”. w22.08 3 ¶6-7

Fefu ita hasambalö alua khöda gabula dödö. Hewaʼae simanö, tenga ha yaʼita zanaögö daʼö. Simane ama sebua faʼomasi, hasambalö irorogö ita Yehowa. Ahatö ia khöda, ifondrondrongo na taʼandrö khönia wanolo, ba omasi ia itolo ita. (Yes. 43:2) Faduhu dödöda wa hasambalö anau gölöda wanaögö abula dödö börö me no ihenaigö fefu zoguna khöda irege tola anau gölöda. No ibeʼe khöda mbuala fangandrö, Sura Niʼamoniʼö, ö ba wamati si fahöna hegöi faʼafatalifusöta safönu faʼomasi sanolo yaʼita ba ginötö si tefaudu. Taʼandrö sibai saohagölö me lö tebulö irorogö ita Amada si so ba zorugo! ”Börö ia wa omuso dödöda.” (Si. 33:21) No taforomaʼö wangandrö saohagölö na taʼogunaʼö fefu zi no ihenaigö Yehowa ba wanolo yaʼita. Moguna göi so nifaluada. Eluahania, böi tebulö tafalua zabölö sökhi ba woloʼö li Yehowa ba tafalua göi zatulö, irege irorogö ita sagötö faʼara! w22.08 13 ¶15-16

Iadaʼa abua ba niha wamaduhusi tödö awöra. Lö faduhu dödöra wa laʼameʼegö tödö ira dozi niha nifosumangera, simane sondröniaʼö ba politik, niha sagatua-tua, hegöi ira pebisnis. Baero daʼö, afatö göi dödöra khö ndra sondröniaʼö ba gereja. Ba börö me lawaʼö ira sondröniaʼö andrö wa laʼoʼö niwaʼö ba Zura Niʼamoniʼö, lö ahöli dödöda na ato niha si lö faduhu tödö göi ba Zura Niʼamoniʼö. Yaʼita ono mbanua Lowalangi, faduhu dödöda wa yaʼia andrö ”Lowalangi sindruhu” ba no si sökhi khöda fefu wamahaʼönia. (Si. 31:5; Yes. 48:17) Aboto ba dödöda wa tola mufaduhusi tödö Zura Niʼamoniʼö. Tatu fao dödöda ba mbua gera-era zi samösa niha satua-tua ba Zura Niʼamoniʼö: ”Lö irai fasala niwaʼö Zura Niʼamoniʼö ba hasambalö alua. Tola faduhu dödö nono mbanua Lowalangi wa sindruhu wehede Lowalangi börö me faduhu dödöra khönia.” w23.01 2 ¶1-2

Tola tatolo ba tafarou dödö ndra talifusöda, na taʼaroʼö wamatira khö Yehowa. So ösa ba gotaluara niʼoʼaya. Tanö böʼönia, göna ira fökhö sabölö-bölö mazui laforege ba wanaögö faʼafatö dödö. So göi zi no ara wombalo-baloi hawaʼara alua gamozua götö danö andre. Daʼö manö zanandraigö famati niha Keriso ba götöda. Daʼö göi gabula dödö nitaögö niha Keriso me abad siföföna. Iʼogunaʼö Zura Niʼamoniʼö Faulo ba wangaʼaroʼö famati ndra talifusönia. Duma-dumania, so niha Keriso Yahudi si lö mangila mameʼe fanema li na so nösi nomora si lö faduhu tödö sangumaʼö wa abölö tohude agama Yahudi moroi ba agama niha Keriso. Börö daʼö, tatu möi fangaro niha Keriso zura nifaʼoheʼö Waulo ba niha Heberaiʼo me luo daʼö. (Heb. 1:​5, 6; 2:​2, 3; 9:​24, 25) Daʼa dane-dane saro sanolo yaʼira enaʼö laʼila hadia wanema li nibeʼera ba nösi nomora si lö faduhu tödö. w22.08 23-24 ¶12-14

Ba gulidanö nifatörö Zatana andre, ato niha abua khöra ba wamaduhusi tödö niha böʼö. Alua daʼö börö me asese larasoi waʼafatö dödö ba nifalua ndra pengusaha, ira samatörö hegöi ira sondröniaʼö ba agama. So göi zi lö faduhu tödö khö nawöra, si falazi omo khöra mazui ba nösi nomora. Lö tokea ita na alua daʼa börö me no ifaʼeleʼö Sura Niʼamoniʼö wa ba ngaluo safuria andre ato niha si faröi, samöbögö si lö duhu ba si manga mböli. Amuatara fagölö simane amuata Zatana, samatörö ulidanö andre si tebai mufaduhusi tödö. (2 Ti. 3:​1-4; 2 Ko. 4:4) Yaʼita niha Keriso, aboto ba dödöda wa tola tafaduhusi tödö Yehowa. Faduhu dödöda wa iʼomasiʼö ita ba ’lö irai iröi’ zi fahuwu khönia. (Si. 9:10) Tola göi faduhu dödöda khö Yesu Keriso börö me no itehegö nosonia salahida. (1 Fe. 3:18) No göi tarasoi samösa wa tola taʼodaligö mene-mene si so ba Zura Niʼamoniʼö.—2 Ti. 3:​16, 17. w22.09 2 ¶1-2

Faʼomuso dödö sindruhu tenga faʼowua-wua dödö nirasoi ba zi sabata ba aefa daʼö taya. Hizaʼi, tola irasoi daʼö niha sandrohu faʼaurinia. Hewisa lalania? Itutunö daʼa Yesu ba Huhuo ba Hili. Imane, ”Yaʼahowu niha soʼameʼegö tödö soguna ba wamati.” (Mat. 5:3) Iʼila Yesu wa no tebeʼe wehulu dödö ba niha me muwöwöi ira enaʼö aboto ba dödöra ba lafosumange Zomböi yaʼira, Lowalangi Yehowa. Daʼö geluaha ”soguna ba wamati”. Börö me ”Lowalangi somuso tödö” Yehowa, andrö göi wa tola laʼokhögö waʼomuso dödö ira niha samosumange yaʼia. (1 Ti. 1:11) Hadia awena tarasoi waʼomuso dödö na lö abula dödö salua khöda? Löʼö. Ba huhuonia, iwaʼö Yesu wa ”niha sabu tödö” tola larasoi waʼomuso dödö. Iwaʼö göi Yesu wa ”niha nifakao ba zindruhu” tola larasoi waʼomuso dödö. (Mat. 5:​4, 10, 11) Ifahaʼö ita Yesu wa tola tarasoi waʼomuso dödö tenga börö me lö hadöi abula dödöda, hizaʼi börö me no tebönökhi zoguna khöda ba wamati ba taʼokhögö wahuwusa saro khö Lowalangi.—Yak. 4:8. w22.10 6 ¶1-3

Faʼatua-tua zanolo niha Keriso enaʼö iʼila hezo ’ginötö wa lö hede-hede ba inötö wahuhuosa’. (Sango. 3:7) So ngawua wehede si tohude ba zi hauga banua yaʼia daʼö ”Amaedola wirö na humede ba amaedola ganaʼa na tahonogö ita”. Eluahania, itaria abölö sökhi na talau zi lö hede-hede moroi na fahuhuo ita. Angeragö duma-duma daʼa. So samösa zatua sokubaloi si no ara mangai halöwö, asese laʼandrö khönia ba wangasiwai abula dödö salua ba mbanua niha Keriso tanö böʼö. Imane satua sokubaloi si so ba gangowuloa si fao yaʼia, ”Lö irai itutunö gabula dödö salua ba mbanua niha Keriso tanö böʼö.” Andrö wa lafosumange ia ira satua sokubaloi tanö böʼö si so ba mbanua niha Keriso si fao yaʼia. Itugu lafaduhusi tödö ia wa lö irai ifatunö rahasiara ba niha böʼö. Moguna tatörö zindruhu. Tola tafaduhusi tödö niha sanörö sindruhu börö me taʼila wa hasambalö iwaʼö zindruhu.—Ef. 4:25; Heb. 13:18. w22.09 12 ¶14-15

Ato niha si lö omasi mamondrongo na ”muʼao ba lala waʼatua-tua sindruhu”. (Amd. 1:20) Moloʼö Sura Niʼamoniʼö, so tölu ngawawa niha si lö omasi manemaʼö faʼatua-tua sindruhu yaʼia daʼö niha ”si lö faʼaboto ba dödö”, ”sangoʼaya”, ba ”niha si bodo”. (Amd. 1:​22-25) Niha ”si lö faʼaboto ba dödö” faduhu dödönia ba ngawalö nirongonia ba aoha sibai telimo ia. (Amd. 14:15) Asese falukha ita ba niha simane daʼö ba wanuriaigö. Duma-dumania, zuta niha nilimo ndra sondröniaʼö ba agama hegöi sondröniaʼö ba politik. So ösa ba gotaluara zi tokea börö me laʼila ba gafuriata wa no lalimo ira. Hizaʼi, niha nitötöi ba Gamaedola 1:​22, ifili samösa wa lö omasi ia iʼokhögö waʼaboto ba dödö. (Yer. 5:31) Lafalua zomasi-masi dödöra ba lö omasi ira laʼila hadia nifahaʼö Zura Niʼamoniʼö hegöi goi-goi si so ba daʼö. Tatu lö omasi ita taʼoʼö niha si lö omasi mangokhögö faʼaboto ba dödö!—Amd. 1:32; 27:12. w22.10 19-20 ¶5-7

Ibeʼe khöda wanuturu lala organisasi Lowalangi ba wolumöʼö yaʼita. Asese ifasugi ba dödöda enaʼö tabeʼe numero telefoda khö ndra satua sokubaloi ba taʼombakhaʼö hezo toröi ita. Na tafalua daʼö, tola latelefo ita na so zalua si lö mudöna-döna. Hadia no öfalua daʼö? Na so zalua si lö mudöna-döna, tola manö laʼandrö khöda enaʼö tahonogö manö ita ba nomo mazui laʼandrö khöda ba wondröi omoda. Te labeʼe göi khöda wanuturu lala sanandrösa ba wanöndra soguna khöda, mazui hewisa wanoloda niha böʼö ba hawaʼara zi bagania tafalua daʼö. Na lö moloʼö ita, tola manö tafaʼala waʼaurida hegöi faʼauri ndra satua sokubaloi si no mufataro ba wondrorogö yaʼita. (Heb. 13:17) Börö waʼalua bencana, fasuwöta, mazui faʼafawuka, ato ndra talifusöda sondröi omora ba laforege wamaudugö faʼaurira ba nahia si bohou. Iʼanemaiʼö lafalua halöwö ba wamati. Lö laböhöli ’wanuriaigö turia somuso dödö moroi ba daromali Lowalangi’, simane nifalua niha Keriso me götö föna si no muzawili börö wolohi. (Hal. 8:4) Börö wanuriaigö, tola laʼosambuaʼö dödöra ba Wamatörö Lowalangi, tenga ba gabula dödöra samösa. Buania, lö tebulö laʼokhögö waʼomuso dödö hegöi faʼohahau dödö. w22.12 19 ¶12-13

No sebua böli ita ba wamaigi Yehowa ero zamösana. Fatua lö ifatenge ndra sinengenia Yesu weʼamöi manuriaigö, itolo ira enaʼö lö khöra faʼatau na so wolohi. (Mat. 10:​29-31) Itutunö sanandrösa ba wofo sasese laʼila iraono Gizaraʼeli yaʼia daʼö siliwi. Ba götö Yesu ide-ide sibai böli ziliwi andrö. Hizaʼi, imane Yesu khö ndra nifahaʼönia, ”Na so ziliwi satoru ba danö, hasambalö iʼila Amami.” Imane nasa wangumaʼö, ”Abölö tohude ami moroi ba wofo andrö.” Ifaduhuʼö ba dödö ndra nifahaʼönia Yesu wa iʼameʼegö tödö ira Yehowa ero zamösana, börö daʼö lö moguna ataʼu ira na alua wolohi. Ba ginötö manuriaigö ira ba mbanua segebua hegöi ba mbanua side-ide, tatu itörö tödöra wehede Yesu na laʼila ziliwi. Börö daʼö, ero na öʼila wofo side-ide, törö tödömö wa iʼameʼegö tödö ndraʼugö Yehowa, börö me ’abölö tohude ndraʼugö moroi ba wofo andrö’. Börö me ituhini ndraʼugö Yehowa, lö tebulö so khöu waʼabarani na so wolohi. w23.03 18 ¶12

Itaria alua khöda gabula dödö. Duma-dumania, göna ita folohi moroi ba nösi nomoda mazui aheta ita ba halöwöda. Na no ara tataögö gabula dödö, tola manö taya wanötönada ba ide-ide dödöda. Iʼogunaʼö ginötö andrö Satana enaʼö aombö dödöda ba waʼomasi Yehowa khöda. Omasi Gafökha na tumbu ba wangera-ngerada wa börö Yehowa mazui organisasinia wa alua khöda gabula dödö. No irai alua zimane daʼö ba ndraono Gizaraʼeli ösa me so ira ba danö Miserai. Ba wamobörö, faduhu dödöra wa Yehowa zamataro Moze hegöi Aʼaroni ba wangefaʼö yaʼira moroi ba wangosawuyu. (2 Mo. 4:​29-31) Hizaʼi ba gafuriata me ifakao ira Faraʼo, latahigö Moze hegöi Aʼaroni ba gabula dödöra andrö. (2 Mo. 5:​19, 20) Latahigö nono mbanua Lowalangi si lö faröi. Alimagö sibai! Na no ara ötaögö gabula dödö, tutunö ba wangandrö nösi dödöu khö Yehowa, ba andrö wanolo moroi khönia. w22.11 15 ¶5-6

Tola isusugi niha si no mate Yehowa börö me yaʼia zameʼe khöda faʼauri. Ibeʼe waʼabölö khö zamaʼeleʼö sotöi Elia ba wanusugi ono lakha mbanua ba Zarefa. (1 Ra. 17:​21-23) Aefa daʼö, itolo zamaʼeleʼö sotöi Elisa ba wanusugi ono alawe moroi ba Zunema. (2 Ra. 4:​18-20, 34-37) Si dombua salua andrö hegöi fanusugi tanö böʼö si no musura ba Zura Niʼamoniʼö, daʼö zangoromaʼö wa tola isusugi niha si no mate Yehowa. Me so Yesu ba gulidanö, iforomaʼö wa no ibeʼe khönia waʼabölö Amania ba wamalua daʼö. (Yoh. 11:​23-25, 43, 44) Iadaʼa, no so Yesu ba zorugo ba no tebeʼe khönia ”fefu waʼabölö ba zorugo hegöi ba gulidanö”. Andrö wa tola ifalua mbuʼusa linia wa ”dozi si so ba lewatö” tesusugi ira ba tebeʼe khöra ginötö enaʼö auri ira sagötö faʼara.—Mat. 28:18; Yoh. 5:​26-29. w22.12 5 ¶10

Börö me latimbagö Hezekieli, daʼö geluahania no göi latimbagö Yehowa. Hewaʼae lö latemaʼö ia, hizaʼi ngawua wehede daʼö zameʼe faʼafaduhu dödö khönia wa tenga daʼö geluahania wa lö mofozu ia ba wamalua halöwönia. Ifaduhuʼö göi Yehowa khö Hezekieli, ba ginötö ifalua wanguhukunia, awena aboto ba dödö niha ”wa so samösa zamaʼeleʼö ba gotaluara”. (Hez. 2:5; 33:33) Fehede daʼö zondrara tödö Hezekieli ba sangabölöʼö yaʼia ba wamalua halöwönia. So khöda waʼabarani börö me taʼila wa Yehowa zamatenge yaʼita. Ifotöi göi ita ’samaduhuʼö’ khönia. (Yes. 43:10) Sindruhu wa no töi sebua daʼö khöda! Daʼö mbörö wa imane Yehowa khö Hezekieli,” Böi ataʼufi ira,” ba imane göi khöda Yehowa, ”Böi tokea ami.” (Hez. 2:6) Hana wa lö moguna taʼataʼufi nududa? Simane Hezekieli, Yehowa zamatenge yaʼita ba hasambalö itolo ita.—Yes. 44:8. w22.11 3-4 ¶4-5

Tatu taʼandrö sibai saohagölö khö ndra satua sokubaloi hegöi enoni si tola mufaduhusi tödö. Taʼandrö sibai saohagölö khö Yehowa me no ibeʼe khöda ndra talifusö si lö faröi ba wamönökhi soguna khöda ba wamati! Hizaʼi, hewisa wangoromaʼöda wa tola mufaduhusi tödö ita? Taʼomasiʼö ndra talifusöda ba taʼameʼegö tödö nifaluara. Hewaʼae simanö, moguna taʼokhögö wangera-ngera satulö ba lö taʼurusai rahasiara. So ösa niha ba mbanua niha Keriso me abad siföföna ”omasi ira lafatou-tou nawöra ba laʼurusai zi tenga urusara, ladunö-dunö zi tenga huhuora”. (1 Ti. 5:13) Tatu lö omasi ita tafalua zimane daʼö. Tola manö so niha sanutunö ösi dödönia ba iʼandrö khöda enaʼö böi tatutunö daʼö ba niha böʼö. Duma-dumania, so samösa dalifusöda ira alawe samatunö khöda wa mofökhö ia mazui so gabula dödönia tanö böʼö ba iʼandrö enaʼö lö tatutunö daʼö ba niha böʼö. Tatu taʼameʼegö tödö niʼandrönia khöda andrö. w22.09 10 ¶7-8

Ngawua wehede Yunani ”mibulöʼö lala wangera-ngerami” tola mufoʼeluaha tobali ”miʼehaogö mangawuli lala wangera-ngerami”. Niha sangehaogö omo, iʼehaogö fefu zi no tekiko, tenga ha asala ibeʼe gama-gama si sökhi ba nomo andrö. Simane daʼö göi, na omasi ita tabulöʼö lala wangera-ngerada, tenga ha asala tafalua ösa zi sökhi, hizaʼi moguna tafareso haniha ita zindruhunia ba tafalua wombulöʼö enaʼö sindruhu-ndruhu taʼoʼö goi-goi Yehowa. Börö daʼö, tenga ha sakali tafalua ia, hizaʼi moguna taʼaseseʼö. Dania na no moʼahonoa ita, tola taʼomusoiʼö dödö Yehowa sagötö faʼara. Hizaʼi iadaʼa, moguna taforege ba wamalua daʼö. Ba Roma 12:​2, ifatunö Faulo wa moguna tabulöʼö lala wangera-ngerada ba böi tatehegö tedönisi dödöda ba gulidanö andre enaʼö tola tafalua gohitö dödö Lowalangi. Börö daʼö, moguna tafareso ua sakali hadia tefaudu gangetula hegöi ohitö dödöda ba gohitö dödö Lowalangi mazui no tedönisi dödöda ba gulidanö andre. w23.01 8-9 ¶3-4

Hadia lö tebulö fao khöda Yehowa gofu hadia ia zalua khöda? Hadia yaʼia mbörö wa tola alua khöda zi lö sökhi enaʼö alua gohitö dödönia? Löʼö. Lö tefaudu daʼö ba nifahaʼö Zura Niʼamoniʼö. (Sango. 8:9; 9:11) Hizaʼi si no tatu, aboto ba dödö Yehowa zalua khöda ba ifondrondrongo na taʼandrö tolo khönia. (Si. 34:15; Yes. 59:1) Tola mofozu ita ibeʼe Yehowa ba wanaögö faʼabasaki. Hewisa lalania? Tola itolo ita Yehowa. Lalania, ibeʼe khöda wondrara dödö ba faʼabölö, sasesenia ba ginötö si tefaudu. (2 Ko. 1:​3, 4) Hadia itörö tödömö hewisa wameʼe Yehowa khöu fondrara dödö ba faʼabölö ba ginötö si tefaudu? Sasesenia, awena aboto ba dödöda wanolo moroi khö Yehowa na no tataluʼi mbaŵa waʼabasaki andrö. w23.01 17-18 ¶13-15

Urifö samuʼi fakhili ia ba gurifö samuʼi si fitu högö. Hizaʼi, urifö daʼa no oyo laʼa-laʼania simane hola-hola galitö. Yaʼia andre ”adu famaedo gurifö samuʼi”, ba lafotöi göi ia ”razo si walu”. (Fam. 13:​14, 15; 17:​3, 8) Itutunö buku Wamaʼeleʼö wa ”razo” daʼa no irai so ia me mböröta, aefa daʼö lö hadöi yaʼia, ba ifuli so ia ba gafuriata. Tefaudu daʼa ba Perserikatan Bangsa-Bangsa (PBB) sotuhini politik ba gulidanö andre! No irai so organisasi daʼa me mböröta, ba lafotöi ia Liga Bangsa-Bangsa. Aefa daʼö, lö yaʼia saʼae me alua Wasuwöta Gulidanö si II. Ba gafuriata, ifuli zui so organisasi daʼa ba lafotöi ia Perserikatan Bangsa-Bangsa. Urifö samuʼi mazui famatörö niha gulidanö, iforege wondrönisi tödö niha enaʼö lalawa Yehowa hegöi ono mbanuania. Amaedola laʼowuloi dania ”razo ba zi sagörö ulidanö” andre ba wasuwöta Hamagedo, yaʼia daʼö ”ngaluo wasuwöta sebua khö Lowalangi Fondrege Zabölö”.—Fam. 16:​13, 14, 16. w22.05 10 ¶10-11

Me ifahaʼö samösa ia Yesu ba wombaso gölu-gölu Mbuku Niʼamoniʼö, tofakha ba dödönia ba iʼomasiʼö Daromali Lowalangi. Ifalua göi hadia zi no ifahaʼö yaʼia. Duma-dumania, nehegö hadia zalua ba gosali me 12 fakhe ndröfi Yesu. Ahöli-höli dödö ndra sangila amakhoita ”börö me oya zaboto ba dödönia hegöi fanema li nibeʼenia”. (Luk. 2:​46, 47, 52) Tola aboto ba dödöda ba taʼomasiʼö Daromali Lowalangi na asese tabaso ia. Tola tafahaʼö ita ba wehede Yesu khö ndra sangila amakhoita, niha Farizaiʼo, hegöi niha Sadukaiʼo. Asese labaso Zura Niʼamoniʼö ira sondröniaʼö ba agama andrö, hizaʼi lö latema mbua ba nibasora. Ifatunö khöra Yesu tölu lala sinangea lafalua ba tobali fanolo khöda daʼö enaʼö (1) aboto ba dödöda nibasoda, (2) tasöndra girö-girö ba wamati, ba (3) tobali ita niha sabölö sökhi. w23.02 8-9 ¶2-3

Ngawalö dandrawa sinangea tatimbagö yaʼia daʼö simane fohokhaini ira alawe mazui ira matua, famadu-madu tuo, femanga-manga manö, fangogunaʼö fehede sangafökhöiʼö tödö niha, fariawösa ba niha si lö sökhi, famaigi pornografi, hiburan sangoromaʼö faʼalösökhi, hegöi hiburan tanö böʼö si lö tefaudu. (Si. 101:3) Iʼalu-alui ginötö Afökha ba wamakiko fahuwusada khö Yehowa. (1 Fe. 5:8) Na lö mangelama ita, tola idönisi dödöda hegöi fangera-ngerada Satana irege so khöda waʼafökhö dödö, falimosa, fakhögusa, fatuwu ita ba niha böʼö, fayawasa, ba so ba dödöda wolau balö. (Gal. 5:​19-21) Hizaʼi, na lö iʼanemaiʼö taheta ia, tola manö monönö daʼö bakha ba dödöda simane tanömö zinanö solangu ba tafalua horö. (Yak. 1:​14, 15) Sambua dandrawa si lö alio taʼila yaʼia daʼö fariawösa si lö sökhi. Moguna itörö tödöda wa tola manö fagölö gamuatada ba niha si fariawö khöda. (1 Ko. 15:33) Tatu omasi ita ba woloʼö mene-mene Yesu ba wonehegö yaʼita samösa. Daʼö mbörö wa lö fariawö ita ba niha si lö moloʼö goi-goi Yehowa. (Luk. 21:34; 2 Ko. 6:15) Aboto ba dödöda wa tobali tandrawa daʼö khöda ba moguna tatimbagö ia. w23.02 16 ¶7; 17 ¶10-11

Na itugu oya öfahaʼö ndraʼugö sanandrösa khö Yehowa, itugu ebua waʼomasimö khönia. Tatu, omasiʼö na lö tebulö ahatö ndraʼugö khö Yehowa sagötö faʼara, ba tola öfalua daʼö. Si fao faʼasökhi dödö ifatunö khöu wa tola öʼomusoiʼö dödönia. (Amd. 23:​15, 16) Tola öʼomusoiʼö dödönia tenga ha ba wehede, hizaʼi ba nifaluau. Tola öforomaʼö ba lala waʼaurimö wa sindruhu-ndruhu öʼomasiʼö Yehowa. No angetula sabölö sökhi daʼö si tola öhalö. Hadia zinangea öfalua ba wangoromaʼö wa öʼomasiʼö Yehowa? Si oföna, ölau mangandrö ba wolulu faʼaurimö khö Yehowa, Lowalangi sindruhu si hasambua. (Si. 40:8) Aefa daʼö, moguna öfabayagöʼö ndraʼugö idanö ba wangoromaʼö wa no ölulu waʼaurimö. Famayagö idanö no angetula si tohude ba solohe faʼomuso dödö. Iʼotarai daʼö, tenga ha khömö waʼaurimö hizaʼi khö Yehowa. (Rom. 14:8; 1 Fe. 4:​1, 2) Sindruhu sa, örasoi wa no angetula sebua daʼö. Hizaʼi törö tödömö, ba ginötö tebayagö idanö ndraʼugö sindruhunia no öhalö gangetula fondrege zi sökhi ba waʼaurimö. w23.03 5-6 ¶14-15