Baŵa si Fulu

Ba gangowuloa, tola fao fefu ita ba wanunö hegöi ba wamaʼema bua gera-erada si no tahaogö tafaʼanö. Hizaʼi, so ösa ndra talifusöda sorasoi wa abua khöra wanunö ba gangowuloa mazui ba wameʼe bua gera-era. Hadia simane daʼö göi nirasoimö? Na yaʼia, nehegö ösa zi no irai alua si tola möi fanolomö. Ba ginötö manunö, so ösa zorasoi wa tola möi fanolora na manunö soroi ba dödö. Ohitö dödöda wa manunö ita ba gangowuloa yaʼia daʼö ba wanuno Yehowa. Börö daʼö, ba ginötö öfaʼanö waö-waö halöwö ba gangowuloa, öfaʼanö göi ndraʼugö ba zinunö niʼanunöisi. Fahaʼö ndraʼugö wanunö ba angeragö hadia gamakhaita ngawua wehede zinunö andrö ba duho nifatunö. Aefa daʼö, osambuaʼö dödöu ba nösi zinunö andrö ba böi öbusi tödö wa lö onekheʼö manunö. So ösa zorasoi wa abua khöra ba wameʼe bua gera-era. Hadia zanolo yaʼira? Laforege enaʼö asese ba wameʼe bua gera-era. Böi olifu ndraʼugö wa moguna adogo-dogo mbua gera-era nibeʼeu ba tefaudu ba wanofu nifaʼema. Omuso sibai dödö Yehowa na taforege wameʼe bua gera-erada ba gangowuloa. w22.04 7-8 ¶12-15

Ngawua wehede ’sanolo’ manandrösa ia ba niha si fagohi ba wameʼe fanolo ba niha siʼao sangandrö tolo. Khalaigö hewisa me fagohi Yehowa ba wanolo ono mbanuania si göna abula dödö. Daʼa zangoromaʼö wa omasi sibai Yehowa ba wanolo yaʼita. Börö wanolo Yehowa, andrö wa anau gölöda wanaögö abula dödö si fao faʼomuso dödö. Hadia manö lala niʼogunaʼö Yehowa ba wanolo yaʼita? Enaʼö taʼila wanema linia, datafareso mbuku Yesaya. Hadia mbörö? Börö me oya wamaʼeleʼö nisura Yesaya soguna ba nono mbanua Lowalangi iadaʼa. Baero daʼö, asese göi iʼogunaʼö Yesaya ngawua wehede salio aboto ba dödöda ba woʼamaedolagö Yehowa. Duma-dumania ba Yesaya faza 30. Ba faza daʼö, iʼogunaʼö duma-duma si sökhi Yesaya ba wanutunö hewisa wanolo Yehowa yaʼita (1) ifondrondrongo ba ibeʼe wanema li ba wangandröda, (2) ibeʼe khöda wanuturu lala ba (3) ibeʼe khöda howu-howu iadaʼa hegöi ba zi so miföna. w22.11 8-9 ¶2-3

Ba wehede Yesu ba mbanua niha Keriso si so ba Zimina hegöi ba Wiladefia, ifarou ira enaʼö böi ataʼu ira na göna ira famakao, börö me hasambalö tefahowuʼö waʼalöfaröira andrö. (Fam. 3:10) Datafaʼanö ita ba wanaögö famakao ba taʼanauʼö gölöda ba wanaögö yaʼia. (Mat. 24:​9, 13; 2 Ko. 12:10) Moloʼö buku Wamaʼeleʼö, hasambalö tefakao nono mbanua Lowalangi ba ”luo Zoʼaya”, yaʼia daʼö ba götöda iadaʼa. (Fam. 1:10) Ba Wamaʼeleʼö faza 12, itutunö khöda sanandrösa ba wasuwöta salua ba zorugo me no mufataro Yesu tobali Razo ba Wamatörö Lowalangi. Mikhaʼeli, yaʼia daʼö Yesu Keriso si no mangawuli ba zorugo, iʼohe ndra saradadunia ba wanuwö Satana awö ndra malaʼika si lö sökhi. (Fam. 12:​7, 8) Lua-luania, tekalaisi fefu nudu Lowalangi andrö ba tetiboʼö ira ba gulidanö. Börö daʼö, tefakao fefu niha sauri ba gulidanö.—Fam. 12:​9, 12. w22.05 5 ¶12-13

Hasambalö atulö wanguhuku nifalua Yehowa. Lö khönia faʼebua dödö zambuana. Ibeʼe wangefa ba niha tenga moloʼö sikhala, faʼebua gokhöta, faʼalawa faka, mazui faʼatua-tuara. (1 Sa. 16:7; Yak. 2:​1-4) Samösa lö niha si tola mamaso Yehowa mazui sameʼe khönia sölö-sölö. Lö irai ihalö gangetula börö wönu mazui faʼabao dödö. (2 Mo. 34:7) No sanguhuku fondrege zi sökhi Yehowa börö me sindruhu-ndruhu aboto ba dödönia ita hegöi salua khöda. (5 Mo. 32:4) Aboto ba dödö ndra sanura Buku Niʼamoniʼö Heberaiʼo wa tohude wangefaʼö sala nibeʼe Yehowa moroi ba wangefaʼö sala nibeʼe niha gulidanö. Itutunö sambua karya referensi wa itaria laʼogunaʼö ngawua wehede Heberaiʼo ”sanutunö fangefa nibeʼe Lowalangi ba niha samalua horö. Lö irai muʼogunaʼö ngawua wehede daʼö ba wanutunö fangefa nibeʼe niha ba nawönia niha”. Ha Yehowa zangokhögö kuaso ba wangefaʼö fefu horö nifalua zi samösa niha samalalini era-era. w22.06 4-5 ¶10-11

Na hatö yaʼugö zondrorogö iraonomö mazui tenga samosumange Yehowa woʼomomö, yafaduhu dödöu wa tola tobali ndraʼugö duma-duma wamati si möi famarou dödö niha si so ba zi fasuimö. Hewisa na hulö zaya-zaya gölö wamorege nifaluamö ba wamahaʼö iraonomö? Törö tödöu wa moguna ginötö ba wamahaʼö iraono. Na tatanö mbua zinanö, lö taʼila hadia tumbu dania danömö andrö mazui löʼö. Tenga yaʼita zotatugöi daʼö. Hewaʼae simanö, tatu lö tebulö tawuwui ba tarorogö ia börö me manötöna ita wa tumbu dania zinanö andrö. (Mrk. 4:​26-29) Simanö göi, börö me samösa ina ndraʼugö, te manofu-nofu dödöu hadia tola öfarou dödö ndraonomö wangai angetula si tefaudu. Sindruhu sa, onomö andrö dania zangai angetula hadia ifosumange Yehowa mazui löʼö. Tenga saʼae yaʼugö zotatugöi daʼö. Hewaʼae simanö, na lö tebulö öforege wamahaʼö yaʼira, no öbeʼe khöra ginötö enaʼö tedou ira ba wamati. w22.04 20 ¶16-17

Me lö nasa si faröi Zelomo khö Yehowa, iʼokhögö lala wangera-ngera si tefaudu sanandrösa ba waʼaurinia samösa. Me awuyu-wuyu ia, ifaduhuʼö si fao fangide-ngideʼö wa yaʼia andrö niha sambö tödö, ba iʼandrö wanuturu lala moroi khö Yehowa. (1 Ra. 3:​7-9) Me awena mamatörö ia, aboto göi ba dödö Zelomo wa tola möi famaʼala wayawasa andrö. Hizaʼi ba gafuriata, lö ifalua Selomo mene-mene nibeʼenia andrö. Ibörögö fayawa ia ba iʼosiwawöi goroisa Lowalangi. Duma-dumania, so goroisa sangumaʼö wa razo Heberaiʼo ’tebai ato woʼomonia faböi fandröndröu ia khö Lowalangi’. (5 Mo. 17:17) Iʼosiwawöi goroisa andrö Selomo irege so 700 woʼomonia ba 300 woʼomo ba döi, ba ato moroi ba gotaluara zi tenga samosumange Yehowa! (1 Ra. 11:​1-3) Me luo daʼö, te iwaʼö tödönia Selomo wa lö tobali famaʼalania nifaluania andrö. Hizaʼi ba gafuriata, itema lua-lua si lö sökhi börö me lö iʼoʼö goroisa Yehowa.—1 Ra. 11:​9-13. w22.05 23 ¶12

So sambua gangetula si tohude sinangea lahalö niha gulidanö ba götöda andre: Hadia latuhini Lowalangi Yehowa tobali Samatörö banua si yawa awö danö, mazui hadia latuhini nudunia si lö sökhi, yaʼia daʼö Afökha Satana? Tebai lawaʼö wa lö faʼawö dambai ira. Gofu hadia gangetula nihalöra, daʼö zotatugöi hadia lasöndra waʼauri si lö aetu mazui löʼö. (Mat. 25:​31-33, 46) Sagötö alua ”wamakao sabölö-bölö” dania, tebeʼe khöra dandra sangoromaʼö hadia teʼorifi ira mazui tehori. (Fam. 7:14; 14:​9-11; Hez. 9:​4, 6) Na no öfili wotuhini famatörö Yehowa, no öhalö gangetula si fao faʼatua-tua. Iadaʼa, tatu manö omasiʼö göi ötolo niha böʼö ba wangai angetula si tefaudu. Latema dania howu-howu niha si lö faröi ba wotuhini famatörönia. Moguna sibai tafahaʼö ita sanandrösa ba daʼö enaʼö itugu aro gangetulada ba wamosumange Yehowa si fao faʼalöfaröi. Baero daʼö, tola göi taʼogunaʼö hadia zi no tafahaʼö yaʼita andrö ba wanolo niha böʼö enaʼö tola lahalö gangetula si tefaudu ba lö tebulö lafosumange Yehowa. w22.05 15 ¶1-2

Moguna tafondrondrongo Yehowa, tenga si faʼudu khöda. Ihaogö wamondrondrongo Yobi me fahuhuo khönia Yehowa. Hulö imane khönia Lowalangi, ’Uʼokhögö kuaso sebua, ba ahori aboto ba dödögu fefu zalua khömö. Na simanö, hadia tebai urorogö ndraʼugö?’ Ba gafuriata, iforomaʼö Yobi wa iʼandrö sibai saohagölö ba waʼasökhi dödö Yehowa. Imane si fao fangide-ngideʼö, ”No irai irongo talingagu sanandrösa khöu, ba iadaʼa, ba no iʼila hörögu.” (Yob. 42:5) Me iwaʼö wehede daʼö Yobi, no modadao ia ba dete nawu, ahori akuba gulinia. Hewaʼae simanö, ifaduhuʼö Yehowa wa iʼomasiʼö ba omuso dödönia khö Yobi. (Yob. 42:​7, 8) Ba götöda andre, itaria göi laʼoʼaya ita niha ba lawaʼö tödöra wa yaʼita andre niha si lö eluaha. Tola manö laforege enaʼö tekiko döi si sökhi niʼokhögöda ero zamösana mazui laʼobousi organisasida. Moroi ba waö-waö Yobi, tola aboto ba dödöda wa faduhu dödö Yehowa wa lö faröi ita khönia hewaʼae na tataögö wanandraigö. w22.06 24 ¶15-16

So waʼomuso dödö ba zorugo na tehori dania Mbabilona Sebua. Hizaʼi, so zalua tanö böʼö sangaʼasogö faʼomuso dödö sabölö ebua. (Fam. 19:​1-3) Sindruhunia, daʼö zalua sabölö tohude ba mbuku Wamaʼeleʼö, yaʼia daʼö ’fangowalu Nono Mbiri-biri’. Fatua lö alua wasuwöta Hamagedo, no saʼae teʼowuloi ba zorugo fefu zi 144.000 niha. Hewaʼae simanö, tenga nasa daʼö ginötönia wamalua fangowalu Nono Mbiri-biri. (Fam. 21:​1, 2) Mufalua walöwa andrö na no aefa wasuwöta Hamagedo ba no tehori fefu nudu Lowalangi. (Si. 45:​3, 4, 13-17) Hadia zalua ba walöwa Nono Mbiri-biri? Teʼosambuaʼö zi samösa ira matua khö zi samösa ira alawe na no mangowalu ira. Simanö göi na alua walöwa Nono Mbiri-biri, teʼosambuaʼö Yesu Keriso si no tobali Razo khö ndra si 144.000, si no amaedola ”niʼowalu”. Iʼotarai daʼö, fao ira ba wamatörö ulidanö andre ba zi 1.000 fakhe faʼara.—Fam. 20:6. w22.05 17 ¶11-13

No ifaʼeleʼö Yesu wa ba ginötö safuria andre, ifataro dania ”zawuyu si lö faröi ba satua-tua” ba wangehenaigö gö ba wamati. (Mat. 24:45) Iʼogunaʼö sondröniaʼö yaʼita ngawawa nibayoini si lö atoto ba wameʼe ’gö ba wamati ba ginötö si tefaudu’ ba nono mbanua Lowalangi hegöi ba niha sadöni tödö. Laforege ba wamalua noro dödö si no tebeʼe khöra andrö. Lö lawaʼö tödöra wa yaʼira andrö samatörö famati niha böʼö. (2 Ko. 1:24) Hizaʼi, lafaduhuʼö wa Yesu Keriso zi tobali ”sondröniaʼö hegöi kafalo zaradadu” ba nono mbanua Lowalangi. (Yes. 55:4) Iʼotarai me döfi 1919, no lahenaigö ira sawuyu si lö faröi ngawalö publikasi sanolo niha sadöni tödö irege latema gö ba wamati. Ba ndröfi 1921, lafazökhi ira sawuyu si lö faröi mbuku The Harp of God (”Harafa Lowalangi”) sanutunö dane-dane wamahaʼö moroi ba Zura Niʼamoniʼö. Aefa daʼö, lafazökhi göi mbuku tanö böʼö. Hadia mbuku sanolo yaʼugö irege aboto ba dödöu ba öʼomasiʼö Namada si so ba zorugo? w22.07 10 ¶9-10

Yehowa andrö no Lowalangi soböwö sibai. Gofu hawaʼoya nibeʼemö khönia, ba hasambalö oya nasa nibeʼenia khömö. (Mrk. 10:​29, 30) Ibeʼe khöu waʼauri si sökhi, moʼeluaha waʼauriu, ba so khöu waʼomuso dödö hewaʼae toröiʼö ba gulidanö si lö sökhi andre. Famayagö idanö nifaluamö, awena famobörö daʼö. Tola anau gölöu wamosumange Yehowa, Ama niʼomasiʼöu sagötö faʼara. Itugu tedou waʼomasimö khö Yehowa ba lö tebulö auri ndraʼugö sagötö auri Yehowa, eluahania sagötö faʼara. Irugi iadaʼa, no oya ngawalö zi sökhi ba sangomusoiʼö tödöu nibeʼe Yehowa. Ba ginötö ölulu waʼaurimö ba tebayagö idanö, eluahania no öbeʼe wondrege zebua böli khönia. No öbeʼe khö Zokhö banua si yawa awö danö si lö niʼokhögönia, yaʼia daʼö folulu faʼauri soroi ba dödöu. (Yob. 1:8; 41:11; Amd. 27:11) Daʼö lala sabölö sökhi ba wangogunaʼö faʼauriu. w23.03 6 ¶16-17

Me itugu ebua-bua ndraʼugö, itugu ebua göi wehulu dödö ba wamalua faʼorudu, ba te so niha sondrönisi tödöu wamalua daʼö. Omasi Zatana na öʼoʼö gisö-isö dödömö andrö. Hizaʼi, hadia zanolo yaʼugö ba wolawa gisö-isö dödö daʼö? (1 Te. 4:​3, 4) Faʼema khö Yehowa nösi dödöu ba ginötö ölau mangandrö khönia. Andrö khönia enaʼö itolo ndraʼugö. (Mat. 6:13) Törö tödöu wa omasi Yehowa wanolo yaʼugö, tenga ba wanguhuku yaʼugö. (Si. 103:​13, 14) Böi tandraigö wangasiwai abula dödömö ha yaʼugö. Tutunö khö ndra satuamö hadia nirasoimö. Sindruhu wa abua khöda wanutunö ba niha böʼö hadia nirasoida, hizaʼi moguna sibai tafalua daʼö. Na öbaso Zura Niʼamoniʼö ba öʼangerönusi goi-goinia, tola aoha khömö wangai angetula sangomusoiʼö tödö Yehowa. Lö moguna khöu daftar hadia zi tola awö zi tebai börö me no aboto ba dödöu lala wangera-ngera Yehowa ba ngawalö hadia ia. w22.08 5 ¶10-12

Tatu manö, iʼonorogö tödö nösi nomonia si samösa högö yomo ba nomo ba wamönökhi soguna khöra. Na samösa högö ndraʼugö yomo ba nomo, te so khöu waʼaombö dödö na öʼangeragö hewisa lala ba wamönökhi soguna yomo ba nomo mazui ba wamuʼa okosi nomomi. Te göi ataʼu ndraʼugö na lö ösöndra halöwöu na laheta ndraʼugö moroi ba halöwöu iadaʼa. Mazui, te aombö dödöu ba woʼöna-önaiʼö faʼaurimö. No mofozu Zatana ba wangodela faʼataʼu simane daʼö irege ato niha samöhöli ba wamosumange Yehowa. Omasi Zatana na tawaʼö tödöda wa lö iʼameʼegö tödö ita Yehowa ba lö itolo ita ba wamönökhi soguna ba nösi nomoda. Lua-luania, tafalua gofu hadia manö enaʼö lö aheta ita moroi ba halöwöda, hewaʼae na lö tefaudu daʼö ba goi-goi Zura Niʼamoniʼö. w22.06 15 ¶5-6

Aboto göi ba dödöda wa yaʼia andrö Lowalangi ”sahakhö tödö . . . si sökhi böwö, lö alio mofönu ba fahöna waʼomasi si lö faröi ba faʼaduhu”. (2 Mo. 34:6) Iʼomasiʼö sibai göi waʼatulö Yehowa. (Yes. 61:8) Afökhö dödönia na iʼila tefakao ita, ba no itatugöi ginötö ba wangasiwai abula dödöda. (Yer. 29:11) No sahöli-höli dödöda daʼa! Daʼö sambua mbörö wa taʼomasiʼö sibai Yehowa! Dane-dane tanö böʼö wa taʼomasiʼö zindruhu yaʼia daʼö börö me oya mbua si sökhi nitemada me no taʼila zindruhu. Duma-dumania, sanandrösa ba dötönaföda ba zi so miföna. Simane sao sanaha enaʼö lö ahani göfa, tötönafö moroi ba Sura Niʼamoniʼö zanolo yaʼita enaʼö lö awuwu ita ba wanaögö abula dödö. Ba ayati maʼökhö andre, nitutunö Waulo yaʼia daʼö fanötöna niʼokhögö niha Keriso nibayoini sauri ba zorugo. Hizaʼi, moguna göi ia khö ndra niha Keriso sangokhögö fanötöna faʼauri si lö aetu ba gulidanö faradaiso. (Yoh. 3:16) Börö me taʼokhögö wanötöna faʼauri si lö aetu, itugu moʼeluaha waʼaurida. w22.08 15 ¶3-5

Faʼomasi zi tobali dane-dane ba waʼafaduhu dödö. Ba 1 Korindro faza 13, itutunö khöda mbua-bua niha sangokhögö faʼomasi. Bua-bua daʼö zanolo yaʼita ba wondrouʼö faʼafaduhu dödö khö ndra talifusöda. (1 Ko. 13:​4-8) Duma-dumania, ba ayati 4 iwaʼö wa niha sangokhögö ’faʼomasi andrö no sebolo tödö ba si sökhi tödö’. Ebolo sibai dödö Yehowa khöda, hewaʼae no tafalua horö. Tobali, moguna göi ebolo dödöda khö ndra talifusöda ba ginötö so wehedera mazui nifaluara sangafökhöiʼö tödöda. Iwaʼö göi ba ayati 5 wa niha sangokhögö faʼomasi ’lö ilau zi lö moadu ba lö iʼalui dana khönia’. Lö taʼalui dana khöda yaʼia na lö tatöngöni zala si no irai lafalua ira talifusöda. Imane ba Zangombakha 7:​9, ”Böi alio abao dödöu.” Taforege enaʼö simane famaigi Yehowa wamaigida yaʼira. Iʼomasiʼö ira Yehowa ba lö iʼosambuaʼö dödönia ba zalara. Moguna göi tafalua daʼö. (Si. 130:3) Moroi na taʼosambuaʼö dödöda ba zalara, abölö sökhi na taʼosambuaʼö dödöda ba mbua-buara si sökhi.—Mat. 7:​1-5. w22.09 3-4 ¶6-7

No ihaogö wanutunö khöda buku Danieli hadia manö dania zalua ba götö safuria. Duma-dumania, iwaʼö ba Danieli 12:1 wa Mikhaʼeli yaʼia daʼö Yesu Keriso, ’mozizio ia ba wangoʼawögö ono mbanua Lowalangi’. No alua wamaʼeleʼö andrö iʼotarai me döfi 1914 me tefataro Yesu tobali Razo ba Wamatörö Lowalangi ba zorugo. Ifaʼeleʼö göi Danieli wa ”maoso” dania Yesu ba ”ginötö waʼatosasa si lö irai alua iʼotarai me tefasindro zi sambua soi irugi ba götö daʼö”. Fehede ’inötö waʼatosasa’ yaʼia daʼö ’famakao sabölö-bölö’ nitötöi ba Mataiʼo 24:21. Ba gafuriata ginötö waʼatosasa andrö yaʼia daʼö ba Hamagedo, maoso dania Yesu ba wangoʼawögö ono mbanua Lowalangi. Ba mbuku Wamaʼeleʼö, ifotöi niha niʼoʼawögö Yesu andrö ”ngawawa sato . . . si no teʼorifi moroi ba wamakao sabölö-bölö”.—Fam. 7:​9, 14. w22.09 21 ¶4-5

Töi niha si no tesura ba mbuku daʼö tola nasa muheta. Amaedola no isura daʼö Yehowa faoma fetolo. (Fam. 3:5) Na lö faröi ita irugi gamozua, awena lö tebulö so döida ba mbuku daʼö amaedola zi no tesura ia faoma tawa fena. Sambua ngawawa döi niha nisura ba zura wangorifi yaʼia daʼö niha nibayoini nifili awö Yesu ba wamatörö ba zorugo. Simane niwaʼö zinenge sotöi Faulo khö ndra talifusönia ba Wilifi, no tesura döi niha nibayoini ba zura wangorifi. (Fil. 4:3) Hizaʼi, enaʼö lö tebulö so döira ba mbuku daʼö, moguna laforomaʼö waʼalöfaröi. Fatua lö mate ira mazui fatua lö alua wamakao sabölö-bölö, latema dania wamotandro safuria. Ba ginötö daʼö dania, amaedola zi no tesura döira faoma tawa fena si tebai muheta.—Fam. 7:3. w22.09 15 ¶3, 5; 16 ¶6

Te so niha sondrino ö somasiʼö. Hizaʼi, börö me aösö-aösö ndraʼugö mazui so niʼera-erau tanö böʼö, lua-luania ötölö manö gö daʼö ba lö örasoi hewisa waʼaminia. Me no aefa öʼa, ifuli maniasa ndraʼugö börö me lö ödaʼi-daʼi wemanga ba lö öhaogö worasoi waʼaminia. Na simanö, hadia no irai göi aösö-aösö ndraʼugö wombaso Sura Niʼamoniʼö irege lö aboto ba dödöu nösinia? Tobali, beʼe ginötöu ba wombaso Taromali Lowalangi. Khalaigö hadia zalua hegöi note wahuhuosa niha si so ba daʼö, ba angerönusi hadia nibasomö. Na öfalua daʼö, tola monönö waʼomuso dödömö. Yesu zamataro ira ’sawuyu si lö faröi ba satua-tua’ ba wohenaigö ö ba wamati ba ginötö si tefaudu. Buania, lö irai moʼamböta ita ba gö wamati. (Mat. 24:45) Taromali zi tobali dane-dane ba ngawalö gö wamati nihenaigö ndra sawuyu si lö faröi.—1 Te. 2:13. w22.10 7-8 ¶6-8

Ifangelama ita Sura Niʼamoniʼö ba ginötö safuria dania ato zangoʼaya. (2 Fe. 3:​3, 4) Terou dödöra wamalua daʼö börö me ”lafalua zi lö sökhi somasi dödöra”. (Yud. 7, 17, 18) Hewisa enaʼö lö tatörö lala niha sangoʼaya? Yaʼia daʼö na lö fariawö ita ba niha si fabuʼa-buʼa. (Si. 1:1) Eluahania, lö tafondrondrongo mazui tabaso ngawalö hadia ia nifazökhi niha sondröi sindruhu. Na lö mangelama ita, tola tedönisi dödöda irege tobali ita niha si fabuʼa-buʼa ba ibörötaigö aombö dödöda khö Yehowa hegöi ba wanuturu lala nibeʼe organisasinia. Enaʼö lö alua khöda zimane daʼö, datasofu khöda samösa, ’Hadia mukökö-kökö ndraʼo na so wanuturu lala si bohou mazui famohouni? Hadia uʼosambuaʼö dödögu ba zala nifalua ndra talifusö sondröniaʼö ba gangowuloa?’ Na iʼanemaiʼö tabulöʼö lala wangera-ngera simane daʼö, omuso dödö Yehowa ba nifaluada.—Amd. 3:​34, 35. w22.10 20 ¶9-10

Eheha Lowalangi zameʼe faʼabölö khö Hezekieli ba wamalua halöwö fanuriaigö ba niha ’sagabeʼe högö ba si lö moloʼö’ si so ba mbanua si toröi yaʼia. Imane Yehowa khö Hezekieli, ”Uʼabeʼeʼö mbawau simane faʼabeʼe mbawara ba uʼabeʼeʼö gangangomö simane faʼabeʼe gangangora. No ubaliʼö ndraʼugö simane intan, sabeʼe moroi ba gara alitö. Böi ataʼufi ira ba böi anizi wamaigi bawara.” (Hez. 3:​8, 9) Hulö na imane khönia Yehowa, ’Böi awuwu ndraʼugö börö waʼabeʼe högöra. Hasambalö utoloʼö.’ Aefa daʼö, ifazawa ia eheha Lowalangi, iʼohe ba mbanua si möi ia manuriaigö. Imane Hezekieli, ”Urasoi waʼabölö danga Yehowa.” Me no samigu teʼohe zamaʼeleʼö andrö ba daʼö, awena aboto ba dödönia duria sinangea ifaʼema. (Hez. 3:​14, 15) Lö ara, iʼandrö khönia Yehowa enaʼö möi ia ba ndraso. Ba daʼö ’möi ba dödönia geheha niʼamoniʼö’. (Hez. 3:​23, 24) Iadaʼa, no tefaʼanö Hezekieli ba wamörögö halöwönia. w22.11 4 ¶8-9

Oya sibai gabula dödö nitaögö zamaʼeleʼö sotöi Habakuki. Samuza inötö, aombö dödönia alai na lö iʼameʼegö tödö ia Yehowa. Börö daʼö, itutunö nösi dödönia khö Yehowa ba wangandrö. Ifondrondrongo Yehowa wangandrö soroi ba dödö nifaʼema nono mbanuania si lö faröi andrö. (Hab. 2:​2, 3) Me no iʼangerönusi hewisa wangefaʼö Yehowa ono mbanuania, ifuli omuso dödö Habakuki. Faduhu dödönia wa iʼameʼegö tödö ia Yehowa ba itolo ia wanaögö abula dödö. (Hab. 3:​17-19) Hadia wamahaʼönia khöda? Na alua khöu gabula dödö, angandrö khö Yehowa, ba tutunö khönia nösi dödöu. Aefa daʼö, andrö wanolo moroi khönia. Na öfalua daʼö, tola faduhu dödöu wa hasambalö ibeʼe khöu waʼabölö Yehowa enaʼö so khöu waʼanau gölö. Ba na örasoi wanolo moroi khönia, itugu aro wamatimö. Na lö tebulö öfalua halöwö ba wamati, lö hadöi abula dödö mazui faʼaombö dödö si tola mamabali yaʼugö khö Yehowa.—1 Ti. 6:​6-8. w22.11 15 ¶6-7

Yesu hegöi niha si lö sökhi si darua si so ba zingania lataögö waʼafökhö börö me lahuku mate ira ba döla geu famakao. (Luk. 23:​32, 33) Yaʼira si darua andrö laʼoʼaya Yesu. (Mat. 27:44; Mrk. 15:32) Hizaʼi, samösa moroi ba gotaluara ibulöʼö nifaluania. Imane, ”He Yesu, törö tödöu ndraʼo na möiʼö ba Wamatöröu.” Itema linia Yesu simane fehede ba ayati maʼökhö andre. (Luk. 23:​39-42) Fehede Yesu ba niha si lö sökhi andrö zamarou tödöda ba woʼangeragö hewisa dania waʼaurida ba Waradaiso. Tola taʼokhögö khala-khala si tefaudu sanandrösa ba Waradaiso na tafahaʼö ita ba zalua safönu faʼatulö me mamatörö Razo Selomo. Faduhu dödöda khö Yesu si no tobali Selomo sabölö ebua, wa falulu fohalöwö ia khö zi 144.000 ba wombulöʼö ulidanö andre tobali Faradaiso si sökhi. (Mat. 12:42) Baero daʼö, omasi göi ”mbiri-biri tanö böʼö” ba wangiʼila hadia zinangea lafalua enaʼö tola auri ira sagötö faʼara ba Waradaiso.—Yoh. 10:16. w22.12 8 ¶1; 9 ¶4

Ifaduhuʼö khöda Yesaya wa hasambalö ifondrondrongo Yehowa na muʼao ita khönia ba wangandrö fanolo. Imane nasa, ”Me no irongo, iʼanemaiʼö itema.” Ngawua wehede daʼa zamasugi ba dödöda wa omasi sibai Namada ba terou dödönia ba wanolo yaʼita. Börö me taʼila daʼa, andrö wa tola anau gölöda si fao faʼomuso dödö. Hasambalö ifondrondrongo Yehowa wangandrö nono mbanuania zamösana. Hezo tola taʼila daʼö? Ba faosatö siföföna ba Yesaya faza 30, iʼogunaʼö Yesaya ngawua wehede ”khömi” börö me ifanandrösa wehedenia Yehowa ba nono mbanuania si sambua ngawawa. Hizaʼi ba ayati 19, sindruhunia ifanandrösa wehedenia andrö ba nono mbanuania zamösana. Imane ba li sindruhunia, ”Lö saʼae meʼe ndraʼugö”; ”hasambalö ahakhö dödönia ndraʼugö”; ”na öʼandrö wanolo . . . iʼanemaiʼö itema.” Börö me Ama sebua faʼomasi Yehowa, andrö wa iʼameʼegö tödö ita zamösana Yehowa ba ifondrondrongo göi gangandröwada.—Si. 116:1; Yes. 57:15. w22.11 9 ¶5-6

Na lö taböhöli wanuriaigö hegöi ba wamahaʼö niha hewaʼae na lasaisi ita, hasambalö tarasoi waʼomuso dödö ba faʼohahau dödö. Me abad siföföna, lafaretakö ndra sinenge ira sangetuʼö huku ba niha Yahudi enaʼö laböhöli wanuriaigö. Hizaʼi, lahalö gangetula ira sinenge si lö faröi andrö ba woloʼö khö Lowalangi. Lö laböhöli wanuriaigö, ba daʼö zangaʼasogö khöra faʼomuso dödö. (Hal. 5:​27-29, 41, 42) Sindruhu sa, na lasaisi halöwö nifaluada, moguna mangelama ita ba wanuriaigö. Hizaʼi, na taforege enaʼö lö tebulö manuriaigö ita, hasambalö tarasoi waʼohahau dödö. Hadia mbörö? Börö me aboto ba dödöda wa no taʼomusoiʼö dödö Yehowa ba fao ita ba wamaʼema turia fangorifi niha. Yafaduhu dödöu, hewaʼae na so ita ba ginötö si basaki, tola tarasoi waʼohahau dödö. Ba ginötö simane daʼö, tatörö tödöda wa moguna sibai khöda waʼohahau dödö si otarai khö Yehowa. Odaligö ia na alua wökhö waba, bencana, mazui folohi. Böi röi organisasinia. Böi böhöli woʼangeragö tötönafö si sökhi sombaloi yaʼugö ba zi so miföna. Na öfalua daʼö, ’fao khöu Lowalangi waʼohahau dödö’.—Fil. 4:9. w22.12 21 ¶17-18

Moguna taforege wamalua daʼö. Duma-dumania, taforege sibai ba wangeheta khöda faʼafökhö dödö, faʼabao dödö, fönu hegöi amuata si lö sökhi tanö böʼö. (Ef. 4:​31, 32) Hizaʼi, lö aoha wamalua daʼö. Hadia mbörö? Börö me no tohöna mowaʼa ba dödöda ngawalö gamuata si lö sökhi. Duma-dumania, iwaʼö Sura Niʼamoniʼö wa so ösa niha ”salio mofönu” ba ”salio aukhu”. (Amd. 29:22) Niha sangokhögö amuata si lö sökhi simane daʼö, lö tebulö laforege ba wamalua fombulöʼö hewaʼae na no tebayagö ira idanö. (Rom. 7:​21-23) Na abua khöu ba wangeheta amuatamö si lö sökhi, angandrö khö Yehowa, yafaduhu dödömö wa hasambalö ifondrondrongo wangandrömö ba itolo ndraʼugö. (1 Yo. 5:​14, 15) Sindruhu sa, lö ifalua dandra sahöli-höli dödö Yehowa ba wangeheta amuata si lö sökhi. Hizaʼi, ibeʼe khöu wanolo enaʼö mofozu ndraʼugö ba wangeheta amuata si lö sökhi andrö. (1 Fe. 5:10) Baero daʼö, moguna göi öfalua hadia zi no öʼandrö. Böi falua hadia ia zi tola manusugi amuatau ba zilalö. Ba na ifuli tumbu ba gera-eramö gisö-isö dödö si lö tefaudu, anemaiʼö tiboʼö ia.—Fil. 4:8; Kol. 3:2. w23.01 10 ¶7, 9-10

Sambua lalada ba wangoromaʼö faʼomasi yaʼia daʼö na taturiaigö duria somuso dödö si fao faʼowölö-ölö. Tola manuriaigö ita ba niha si falukha khöda, ba lö tafaehu-faehusi soi hegöi mado, faʼebua gokhöta mazui faʼalawa sekola. Tefaudu daʼö ba gohitö dödö Yehowa ”enaʼö teʼorifi fefu niha ba lasöndra waʼaboto ba dödö si tefaudu sanandrösa ba zindruhu”. (1 Ti. 2:4) Omasi ita taforomaʼö waʼomasi khö Lowalangi hegöi Keriso, yaʼia daʼö na taʼomasiʼö ndra talifusöda. Taʼameʼegö tödö ba tatolo ira na alua khöra waʼabasaki. Tarara dödöra na mate niha niʼomasiʼöra, tafalukhaisi ira na mofökhö ira, ba taforege sibai ba wangabölöʼö yaʼira na so khöra waʼide-ide dödö. (2 Ko. 1:​3-7; 1 Te. 5:​11, 14) Böi tebulö mangandrö ita salahira börö me aboto ba dödöda wa ”mofaʼabölö wangandrö niha satulö”.—Yak. 5:16. w23.01 28-29 ¶7-8

Simane tuka samazökhi tomosa, moguna idouʼö waʼatua-tuania ero inötö. Simanö göi ita, moguna tadouʼö waʼatua-tuada ba wanolo hegöi ba wamarou tödö ndra talifusöda. Tola tatolo ira enaʼö anau gölöra wanaögö abula dödö na tatutunö khöra duma-duma niha sanau ölö ba götö föna. (Heb. 11:​32-35; 12:1) No tarorogö waʼatulö na tatutunö mbua-bua si sökhi niʼokhögö ndra talifusöda, lö tafaso enaʼö latemaʼö mbua gera-erada ba taforege wangasiwai fatitisa salua ba gotaluada. (Ef. 4:3) Tola göi taʼaroʼö ndra talifusöda ba wamati na tabeʼe khöra ayati si möi famarou dödö, tabeʼe khöra wanolo si tefaudu, ba tafarou dödö niha sawuwu famati. Tola tarasoi waʼomuso dödöda ba faʼahono dödö daʼö na tatolo ndra talifusöda enaʼö aro ira ba wamati. Tenga simane tomosa si tola adudu, bua nitemada moroi ba halöwö andre tola tarasoi ia sagötö faʼara! w22.08 22 ¶6; 25 ¶17-18

Enaʼö aboto ba dödöda nösi Daromali Lowalangi, iforomaʼö Yesu wa moguna tahaogö taʼangeragö hadia nibasoda. (Mat. 24:15) Eluahania, taʼogunaʼö wangera-ngerada enaʼö taʼila gamakhaita mazui faʼafaehu zi sambua bua gera-era moroi ba mbua gera-era tanö böʼö, ba moguna göi taʼila geluaha ngawua wehedenia. Simane niforomaʼö Yesu, sökhi na taʼogunaʼö wangera-ngerada ba wangiʼila salua si no mufaʼeleʼö ba Zura Niʼamoniʼö. Taʼogunaʼö göi wangera-ngerada ba ginötö tabaso faosatö tanö böʼö ba Zura Niʼamoniʼö enaʼö sindruhu-ndruhu tatema mbuania. Tola itolo ita Yehowa ba wangogunaʼö fangera-ngerada. Börö daʼö, andrö wanolo moroi khönia. Aefa daʼö, moguna öfaudugö nifaluamö simane fangandrömö. Hewisa lalania? Haogö osisiʼö hadia nibasomö, ba angeragö hadia gamakhaitania ba zi no aboto ba dödöu. Alui enaʼö aboto ba dödöu zi sambua ayati ba öʼila hadia wamahaʼönia khöu. (Heb. 5:14) Na öʼogunaʼö wangera-ngeramö ba ginötö öbaso Zura Niʼamoniʼö, tola itugu aboto ba dödömö nösinia. w23.02 10 ¶7-8

Khalaigö na so nawöu sameʼe khöu lukisan si no atua hizaʼi ebua sibai mbölinia. So ösa ba lukisan andrö zi no ibörögö agakuba, taʼunö ba no faböʼö maʼifu laʼa-laʼania. Hewaʼae simanö, miliar mböli lukisan andrö. Tatu örorogö sibai lukisan daʼö ba no sebua böli ia ba wamaigimö. Simane daʼö göi Yehowa, no ibeʼe khöda mbuala sebua böli, yaʼia daʼö faʼauri. Iforomaʼö Yehowa wa ebua sibai mböli waʼaurida me itehegö mate Nononia ba wangöhöli yaʼita. (Yoh. 3:16) Yehowa andrö Umbu waʼauri. (Si. 36:9) Imane sinenge sotöi Faulo, ”Börö ia wa auri ita, maliwa-liwa ita, ba so ita.” (Hal. 17:​25, 28) Börö daʼö, faʼaurida andre no buala moroi khö Lowalangi. Ba si fao faʼomasi, ihenaigö fefu zoguna khöda enaʼö lö tebulö auri ita. (Hal. 14:​15-17) Iadaʼa, lö ifalua dandra sahöli-höli dödö Yehowa ba wondrorogö faʼaurida. Hizaʼi, omasi ia na taforege ba wondrorogö botoda enaʼö lö mofökhö ba lö tebulö tafosumange ia.—2 Ko. 7:1. w23.02 20 ¶1-2

Taʼandrö saohagölö khö Yehowa börö me no ibeʼe khöda Zura Niʼamoniʼö. Iʼogunaʼö Zura Niʼamoniʼö Yehowa ba wameʼe khöda mene-mene sanolo yaʼita ba wanaögö abula dödö. Ibeʼe göi khöda dötönafö si sökhi ba zi so miföna. Ba sabölö moguna, iʼogunaʼö Zura Niʼamoniʼö ba wamatunö khöda sanandrösa ba gamuatania. Ba ginötö taʼangerönusi gamuata Yehowa si sökhi, terara dödöda. Ba tola tefarou ita enaʼö itugu fahuwu khönia. (Si. 25:14) Omasi Yehowa na aboto ba dödö niha haniha ia. Mböröta, iʼogunaʼö wangifi, angilata, hegöi ira malaʼika ba wangoromaʼö haniha ia sindruhunia. (4 Mo. 12:6; Hal. 10:​3, 4) Hizaʼi, na lö musura wangifi andrö, angilata, mazui nifaʼema ndra malaʼika, tatu tebai tafahaʼö ita iadaʼa. Andrö wa iʼogunaʼö ndra matua Yehowa ba wanura fehedenia ”ba zi sambua buku”. Börö me ”lala Lowalangi sindruhu andrö moʼahonoa”, daʼö mbörö wa faduhu dödöda wa lalania fahuhuo khöda tefaudu ba moguna khöda.—Si. 18:30. w23.02 2 ¶1-2

Tatugöi gohitö dödöu ba wamati. Fili gohitö dödö sangaʼaroʼö famatimö ba sanolo yaʼugö enaʼö tobali niha Keriso saro ba wamati. (Ef. 3:16) Duma-dumania, tola ödouʼö nasa ginötömö ba wamahaʼö yaʼugö samösa hegöi ba wombaso Sura Niʼamoniʼö. (Si. 1:​2, 3) Tola öʼaseseʼö wangandrö ba öfalua daʼö soroi ba dödö. Mazui, öforege enaʼö so khöu waʼatua-tua ba wamili hiburan hegöi ba wangogunaʼö inötö. (Ef. 5:​15, 16) Tola tobali ndraʼugö niha Keriso saro ba wamati na ötolo niha böʼö. Duma-dumania, tola ötolo ndra talifusöda si no atua hegöi si tebai boto ba mbanua niha Keriso si farahu yaʼugö. Tola ötolo ira ba wowöli soguna khöra hegöi ba wangogunaʼö perangkat elektronik. Tola göi öforomaʼö waʼomasi ba niha böʼö yaʼia na ötutunö khöra duria somuso dödö sanandrösa ba Wamatörö Lowalangi. (Mat. 9:​36, 37) Na tola, tatugöi gohitö dödöu ba wangai halöwö safönu inötö. w22.08 6 ¶16-17