Baŵa si Felendrua

Omasi sibai zalawa faka ba Gaitiofia na tebayagö idanö ia. Hizaʼi, hadia no ifaʼanö ia ba wangai angetula si tohude andrö? Nehegö: Möi ia ”wamosumange Lowalangi ba Yeruzalema”. (Hal. 8:27) Tatu manö no ifalalini agamania ba no farahu ia ba agama Yahudi. No göi ifahaʼö ia sanandrösa khö Yehowa moroi ba Mbuku Niʼamoniʼö Heberaiʼo. Hizaʼi, omasi ia nasa ba wamahaʼö yaʼia. Me falukha Wilifo khö zalawa faka andre ba lala, iʼila ia Filifo me ibaso gölu-gölu zura Yesaya. (Hal. 8:28) Daʼö mbörö wa ifahaʼö ia nasa. Aröu lala itörö iʼotarai Gaitiofia numalö ba Yeruzalema ba wamosumange Yehowa ba gosali. Itolo zalawa faka ba Gaitiofia andrö Filifo enaʼö aboto ba dödönia ösa zindruhu si tohude, duma-dumania haniha Mesia. (Hal. 8:​34, 35) Börö me iʼomasiʼö Yehowa hegöi Ononia, tefarou dödönia ba wangai angetula si tohude yaʼia daʼö ifabayagöʼö ia idanö tobali soloʼö khö Yesu Keriso. Me oroma wa no ifaʼanö ia salawa faka andrö, daʼö mbörö wa ibayagö ia idanö Filifo. w23.03 8-9 ¶3-6

Na lö tatörö zindruhu, tebai taʼomusoiʼö dödö Yehowa. (Amd. 6:​16, 17) Hewaʼae na ato niha sangaohasi ba dödö falimosa, lö tebulö taʼoʼö lala wangera-ngera Yehowa sanandrösa ba daʼö. (Si. 15:​1, 2) Baero walimosa, tebai göi tabiniʼö ösa zindruhu na so nifatunöda irege fasala niha böʼö wangai rahu-rahu moroi ba wehededa. Moguna göi böi tafatou-tou niha. (Amd. 25:23; 2 Te. 3:11) Na öʼila wa ibörögö ahole huhuomi ba wamatou-tou niha böʼö, alui lala ba wombulöʼö tuho huhuomi enaʼö möi famarou dödömi. Ba gulidanö andre, ato niha sangogunaʼö fehede si lö sökhi. Börö daʼö, moguna taforege enaʼö omuso dödö Yehowa ba wehededa. Na sökhi wehededa ba ginötö möi ita manuriaigö, na so ita ba gangowuloa, hegöi na fahuhuo ita ba niha böʼö, hasambalö ifahowuʼö ita Yehowa. Na no ihori gulidanö si lö sökhi andre dania, itugu aoha khöda wamolakhömi yaʼia ba wehededa.—Yud. 15. w22.04 9 ¶18-20

Na taʼangeragö hawaʼebua waʼomasi Yehowa hegöi Yesu khöda, tatu tefarou dödöda ba wangomasiʼö yaʼira. (1 Yo. 4:10) Itugu taʼomasiʼö ira na tafahaʼö ita wa mate Yesu salahida zamösana. Aboto ba dödö zinenge sotöi Faulo daʼö, andrö wa iʼandrö saohagölö. Imane ba niha Galatia, ’Ono Lowalangi si no mangomasiʼö yaʼo ba sameʼe faʼaurinia ba khögu.’ (Gal. 2:20) Börö me so höli, tola idöni ndraʼugö Yehowa tobali si fahuwu khönia. (Yoh. 6:44) Khalaigö atö, iʼila Yehowa zi sökhi si so ba waʼaurimö, ba ebua sibai mböli nibeʼenia ba wangöhöli yaʼugö tobali si fahuwu khönia. Tatu toröi-röi ba dödömö na öʼangeragö zimane daʼö, ba tola itugu öʼomasiʼö Yehowa hegöi Yesu. Börö daʼö sofu khöu samösa: ’Hadia zi tola ufalua börö waʼomasigu khö Yehowa hegöi Yesu?’ Faʼomasida khö Lowalangi hegöi Keriso zamarou yaʼita ba wangomasiʼö niha böʼö.—2 Ko. 5:​14, 15; 6:​1, 2. w23.01 28 ¶6-7

Iʼogunaʼö Zura Niʼamoniʼö Yehowa ba wanolo ono mbanuania enaʼö ’fao ba wamosumange yaʼia’. Oya faosatö Zura Niʼamoniʼö nihaogö wanura, irege ha niha sangokhögö fangide-ngideʼö zangila eluahania. (Luk. 10:21) Ba zi sagörö ulidanö, ato sibai zombaso Sura Niʼamoniʼö. Hewaʼae simanö, ha niha si so fangide-ngideʼö zi tola mangila eluaha nösi Zura Niʼamoniʼö ba samalua hadia zi no lafahaʼö yaʼira. (2 Ko. 3:​15, 16) Hadia zangoromaʼö faʼatua-tua Yehowa? Iʼogunaʼö Zura Niʼamoniʼö Yehowa tenga ha ba wamahaʼö ono mbanuania maʼafefu. Hizaʼi, iʼogunaʼö göi daʼö ba wamahaʼö hegöi ba wondrara tödöda ero zamösana. Ba ginötö tabaso Zura Niʼamoniʼö, tola tarasoi wa iʼameʼegö tödö ita Yehowa ero zamösana. (Yes. 30:21) Hadia no irai öbokai Zura Niʼamoniʼö ba öbaso ayati si tefaudu, hulö na khöu musura daʼö? Moguna Zura Niʼamoniʼö ba niha si zuta faʼato. Hizaʼi, hewisa wa tola tefaudu sibai nösinia andrö ba zoguna khöu? Tola tefaudu ia börö me Sura Niʼamoniʼö andrö moroi khö Yehowa, si tebai musuʼa waʼatua-tuania.—2 Ti. 3:​16, 17. w23.02 4-5 ¶8-10

Yaʼita niha Keriso sindruhu, tatu taʼomasiʼö sibai Yehowa. Omasi ita tafalua wondrege zi sökhi ba wamosumange yaʼia. Hizaʼi, enaʼö tola tafalua daʼö, moguna tatatugöi gohitö dödöda ba wamati. Duma-dumania, tadouʼö mbua-bua niha Keriso, tafahaʼö ita ba nekhe-nekhe danga si bohou, ba taʼalui lala ba wanolo ira talifusöda. Hana wa terou dödöda ba wondrouʼö yaʼita ba wamati? Si oföna, omasi ita taʼomusoiʼö dödö Namada sebua faʼomasi si so ba zorugo. Omuso dödö Yehowa na taʼogunaʼö waʼatua-tua hegöi faʼabölöda ba wamosumange yaʼia. Baero daʼö, terou dödöda ba wondrouʼö yaʼita ba wamati enaʼö tola itugu oya nifaluada ba wanolo ira talifusöda. (1 Te. 4:​9, 10) Gofu hawaʼara no so ita ba zindruhu, tola nasa tadouʼö ita ba wamati. w22.04 22 ¶1-2

Hasambalö terou dödö kuaso politik ba gulidanö andre ba wanuwö Babilona Sebua, yaʼia daʼö agama sofaya ba zi sagörö ulidanö. Daʼö dania zalua ba wamobörö wamakao sabölö-bölö. Hadia terou dödö niha sato wangai angetula ba wamosumange Yehowa börö zalua andrö? Löʼö. Itutunö Famaʼeleʼö faza 6 wa lö lalumöʼö ira khö Yehowa sagötö mbaŵa waʼabasaki andrö. Hizaʼi, laʼalui wolumöʼö ba zi no amaedola hili, yaʼia daʼö kuaso politik hegöi lala wogale ba gulidanö andre. Börö me lö lahalö gangetula ba wotuhini Famatörö Lowalangi, tobali ira udu Yehowa. (Luk. 11:23; Fam. 6:​15-17) Sagötö wamakao sabölö-bölö dania, hasambalö laforomaʼö ono mbanua Yehowa si lö faröi wa faehu ira moroi ba niha böʼö. Ha yaʼira dania ngawawa samosumange Lowalangi Yehowa ba gulidanö andre, ba lö omasi ira latuhini ”gurifö samuʼi”.—Fam. 13:​14-17. w22.05 16-17 ¶8-9

Tenga ha turia si sökhi sanandrösa ba Wamatörö Lowalangi zinangea laturiaigö ono mbanua Yehowa. (Mat. 24:14) Moguna göi latuhini halöwö nifalua ndra malaʼika si no mututunö ba Wamaʼeleʼö faza 8 irugi 10. Laʼombakhaʼö ira malaʼika andrö ngawalö wamakao si göna niha sanimbagö Famatörö Lowalangi. Simanö göi, lö laböhöli ira Samaduhuʼö Yehowa wangombakha wa hasambalö ihuku gulidanö si lö sökhi andre Lowalangi. Muʼamaedolagö duria wanguhuku andrö simane ’teu esi ba teu alitö’. (Fam. 8:​7, 13) Moguna aboto ba dödö niha wa no ahatö gamozua andrö enaʼö labulöʼö lala waʼaurira ba teʼefaʼö ira ba ngaluo wönu Yehowa. (Zef. 2:​2, 3) Hizaʼi, ato niha si fatuwu ba duria nifaʼemada. Börö daʼö, moguna khöda waʼabarani ba wamaʼema turia andrö. Sagötö alua wamakao sabölö-bölö, hasambalö itugu abeʼe duria wanguhuku safuria nifaʼemada.—Fam. 16:21. w22.05 6-7 ¶18-19

Nehegö nirasoi niha Keriso si no mongambatö sawena tobali satua. Sagötö zi hauga fakhe, te asese larongo huhuo sanandrösa ba wangebuaʼö iraono. Hizaʼi iadaʼa, itugu moguna khöra goi-goi Zura Niʼamoniʼö andrö börö me no so ndraonora sinangea laʼebuaʼö. No noro dödö sebua daʼö! Tatu manö, na no tebulö zalua ba waʼaurida, tebulö göi lala wangera-ngerada sanandrösa ba goi-goi Zura Niʼamoniʼö sasese tarongo. Sambua daʼa zi tobali dane-dane wa lö tola löʼö tabaso ba taʼangerönusi Zura Niʼamoniʼö ’sandrohu faʼaurida’, simane niʼandrö Yehowa khö ndra razo ba götö ndraono Gizaraʼeli mböröta. (5 Mo. 17:19) Yaʼami ira satua, no tebeʼe khömi noro dödö si tohude ba wamahaʼö iraonomi sanandrösa khö Yehowa. Hizaʼi, lö ibönö na ha asala no mifatunö ba ndraonomi waʼaboto ba dödö sanandrösa khö Lowalangida. Moguna göi mitolo ira enaʼö laʼomasiʼö Lowalangi. w22.05 26 ¶2-3

Lö ibönö na ha asala maniasa ita ba horö nifaluada. So zi lö tola löʼö tafalua. Fatua lö ihalö gangetula Yehowa ba wangefaʼö sala, niʼangeragönia yaʼia daʼö hadia no ibulöʼö lala waʼaurinia si samösa niha mazui löʼö. Eluahania, moguna iröi lala waʼaurinia si lö sökhi ba itörö lala waʼauri si tefaudu ba zomasi Yehowa. (Yes. 55:7) Moguna göi ibulöʼö wangera-ngerania ba iʼoʼö lala wangera-ngera Yehowa. (Rom. 12:2; Ef. 4:23) Lö tola löʼö ihalö gangetula enaʼö lö saʼae iʼangeragö mazui ifalua gamuata si lö sökhi nifaluania ba zilalö. (Kol. 3:​7-9) Börö me mamati ita ba höli si no ibeʼe Keriso, daʼö zi tobali dane-dane khö Yehowa ba wangefaʼö salada hegöi ba wangamoniʼö yaʼita moroi ba horö. Na iʼila Yehowa wa no taforege wombulöʼö lala waʼaurida, hasambalö ibeʼe khöda wangefa si teʼodane-dane ba höli.—1 Yo. 1:7. w22.06 6 ¶16-17

Iʼotarai mböröta, niha gulidanö andre asese lafakao nawöra. (Sango. 8:9) Duma-dumania, ato niha sangogunaʼö kuasora ba lala si fasala, ato zamalua si lö sökhi, so ndraono sekola samakao ba sangoʼaya awöra ba kelas, ba so ösa niha samakao ösi nomora samösa. Börö daʼö, lö tokea ita na ato niha sataʼu ba nawöra niha. Hewisa lala Zatana ba wangodela faʼataʼu andrö? Iʼodela Satana waʼataʼuda ba nawöda niha enaʼö taböhöli weʼamöi manuriaigö ba lö saʼae taʼoʼö li Yehowa. Ifarou dödö ndra samatörö ba wanaisi halöwöda hegöi ba wamakao yaʼita. (Luk. 21:12 ) No afönu gulidanö Zatana andre turia si lö atulö hegöi fangobousi sanandrösa khö ndra Samaduhuʼö Yehowa. Niha si faduhu tödö ba daʼö, te laʼoʼaya ita mazui laforege ba wamaʼala yaʼita. (Mat. 10:36) Hadia ahöli-höli dödöda na alua daʼö? Löʼö. No iʼotarai me abad siföföna iʼogunaʼö lala simane daʼö Satana ba wanuwö ono mbanua Lowalangi.—Hal. 5:​27, 28, 40. w22.06 16 ¶10-11

Haniha zi farahu ba ”niha sato” nitolo ba woloʼö sindruhu? Yaʼira andrö niha nisusugi, niha niʼefaʼö moroi ba Hamagedo mazui te iraono sawena tumbu dania ba gulidanö si bohou. Ba gangohorita Wamatörö si Saribu Fakhe, moʼahonoa fefu niha sauri ba gulidanö. Moguna tatörö tödöda, hewaʼae no moʼahonoa zi samösa niha tenga daʼö geluahania wa hasambalö isöndra waʼauri si lö aetu. Moʼahonoa Gadamo faoma Khawa mböröta. Hizaʼi, enaʼö lasöndra waʼauri si lö aetu moguna laforomaʼö wa laʼoʼö nifakhoi Yehowa. Alimagö sibai, lö moloʼö ira. (Rom. 5:12) Börö me moʼahonoa fefu niha ba gangohorita zi 1.000 fakhe, hadia lö faröi ira fefu ba wotuhini famatörö Yehowa sagötö faʼara? Mazui so niha si faröi simane Adamo faoma Khawa? Ba daʼa taʼila wa moguna iforomaʼö waʼalöfaröi si samösa niha. w22.09 22-23 ¶12-14

Na öʼila fefu zalua ba gulidanö andre, hadia abua khömö ba wondrorogö fangera-ngera satulö? Iadaʼa, ato niha zi lö saʼae mangoromaʼö faʼomasi yomo ba nomo. Itugu lö sökhi göi niha, afaito, ba ha tana khöra laʼalui. Baero daʼö, ato niha si lö saʼae faduhu tödö khö ndra samatörö. Hizaʼi, na taʼila fefu daʼö, itugu faduhu dödöda wa no ahatö gamozua gulidanö andre. Hadia mbörö? Börö me fagölö sibai gamuata niha iadaʼa simane si no ifaʼeleʼö Sura Niʼamoniʼö sanandrösa ba ”ngaluo safuria”. (2 Ti. 3:​1-5) Fefu niha sangokhögö fangide-ngideʼö, tola laʼila wa sindruhu-ndruhu no alua zi no mufaʼeleʼö andrö. Ba faʼalua zi no tefaʼeleʼö andrö, daʼö zangoromaʼö wa no ibörögö mamatörö Yesu Keriso tobali Razo ba Wamatörö Lowalangi. Baero daʼö, oya nasa wamaʼeleʼö tanö böʼö soʼamakhaita ba Wamatörö Lowalangi, ba alua fefu daʼö ba ngaluo safuria andre. Simane akhökhöla gambara si no muʼosambuaʼö, famaʼeleʼö daʼa zanolo yaʼita enaʼö taʼila wa lö ara tö tohare gamozua andrö simane nifabuʼu Yehowa. w22.07 2 ¶1-2

Sagötö pandemi, tatema göi wanuturu lala si tefaudu sanandrösa ba wamalua fanuriaigö hegöi feʼamöi ba gangowuloa. Lö ara me no alua pandemi, ibörögö taʼogunaʼö Internet ba wamalua angowuloa, angowuloa ba zi sambua wilayah, hegöi angowuloa ba zi sambua regional. Arakhagö fefu halöwö fanuriaigö nifaluada taʼogunaʼö zura hegöi telefo. Sindruhu-ndruhu no ifahowuʼö halöwö nifaluada Yehowa. Oya gödo ndraha sangombakha wa monönö waʼato zanuriaigö ba mbanua si toröi yaʼira. So göi ndra talifusöda sanuriaigö sanöndra faʼomuso dödö ba halöwö fanuriaigö nifaluara sagötö pandemi. So zorasoi wa talafo oya wanuturu lala nibeʼe organisasi sagötö pandemi andre. Hizaʼi, no hauga kali tarasoi mbuania börö me taʼoʼö wanuturu lala nibeʼera andrö. Na taʼangerönusi hewisa Yesu ba wondröniaʼö ira nifahaʼönia si fao faʼomasi, itugu faduhu dödöda wa gofu hadia zalua ba zi so miföna, lö irai iröi ita Yehowa hegöi Ononia.—Heb. 13:​5, 6. w22.07 13 ¶15-16

Na mangandrö ita tenga ha asala tasuno manö Yehowa, hizaʼi terou göi dödöda ba wangandrö saohagölö khönia ba ngawalö zahöli-höli dödö si no ihenaigö. Duma-dumania, tola tafaʼema khönia wangandrö saohagölö ba ngawalö laʼa-laʼa mbunga si no ifazökhi, ngawalö gö sami si no ibeʼe, hegöi faʼomuso dödö niʼokhögöda börö me so zi fahuwu khöda. Ibeʼe khöda daʼö Amada sebua faʼomasi enaʼö omuso dödöda ba oya danö böʼö nasa nihenaigönia khöda. (Si. 104:​12-15, 24) Sabölö tohude yaʼia daʼö taʼandrö saohagölö börö me fahöna gö ba wamati si no ihenaigö hegöi tötönafö niʼokhögöda dania ba zi so miföna. Alio sibai olifu ita wangandrö saohagölö khö Yehowa ba ngawalö zi no ifalua khöda. Hadia zanolo yaʼita enaʼö lö olifu ita wangandrö saohagölö khönia? Tola tasura hadia manö niʼandröda khö Yehowa ba tafaigi ero inötö hewisa wameʼenia fanema li ba niʼandröda andre. Aefa daʼö, taʼandrö khönia saohagölö wanolo si no ibeʼe.—Kol. 3:15. w22.07 22-23 ¶8-9

Lö obönö na ha tafahaʼö manö ita ba zindruhu. Enaʼö tatema mbuania, moguna taʼaurifagö daʼö. Eluahania, tafalua ba waʼaurida hadia zi no tafahaʼö yaʼita. Na tafalua daʼö, tarasoi waʼomuso dödö sindruhu. (Yak. 1:25) Hewisa wotatugöida wa no taʼaurifagö zindruhu? So samösa dalifusöda sameʼe bua gera-era, iwaʼö wa moguna taʼangeragö hadia manö zindruhu si no tafalua ba hadia nasa zinangea tadouʼö. Imane Faulo, ”Enaʼö tedou ita simane si no tafalua barö daʼa.” (Fil. 3:16) Angeragö hadia mbua nitemada na taforege enaʼö ’lö taböhöli wanörö lala sindruhu’! Itugu sökhi waʼaurida, ba tola göi taʼomusoiʼö dödö Yehowa hegöi ira talifusöda si sara lala wamati. (Amd. 27:11; 3 Yo. 4) Daʼa dane-dane sabölö sökhi wa taʼomasiʼö ba taʼaurifagö zindruhu ba waʼaurida. w22.08 19 ¶16-18

Hewisa wangoromaʼö ndra satua sokubaloi wa laʼomasiʼö Yehowa hegöi Yesu? Sambua lala si tola lafalua yaʼia daʼö na laʼameʼegö tödö zoguna khö mbiri-biri Yesu. (1 Fe. 5:​1, 2) Ifatunö Yesu khö Wetero wa moguna sibai daʼö. Me no aefa iʼosilöʼögö Yesu tölu kali, tatu omasi sibai Wetero ba wangoromaʼö faʼomasinia khö Yesu. Me no aefa tesusugi Yesu, manofu ia khö Wetero, ”He Simoni ono Yohane, hadia öʼomasiʼö ndraʼo?” Tatu omasi sibai Wetero ba wamalua hadia ia ba wangoromaʼö faʼomasinia khö Zokhö yaʼia. Imane khönia Yesu, ”Kubaloi nono mbiri-birigu.” (Yoh. 21:​15-17) Sindruhu sa, sagötö faʼauri Wetero lö tebulö irorogö mbiri-biri Yesu. Ifalua daʼö ba wangoromaʼö faʼomasinia khö Yesu. Hewisa wangoromaʼömi yaʼami satua sokubaloi wa omasi ami miʼoʼö mene-mene nibeʼe Yesu khö Wetero? Tola miforomaʼö wa miʼomasiʼö Yehowa hegöi Yesu na mifalua wokubaloi ba miforege ba wanolo niha si no ara mamöhöli wangai halöwö ba wamati, enaʼö mangawuli ira khö Yehowa.—Hez. 34:​11, 12. w23.01 29 ¶10-11

Böi so ba gera-erada wa lö hadöi soʼameʼegö tödö famorege si no tafalua. Tola möi famaʼalau daʼö, börö me ifatumbuʼö ba dödömö wa tebai ölawa gisö-isö dödö si fasala. Sindruhunia no iwaʼö Sura Niʼamoniʼö, ”Na göna ami fanandraigö, ifaigi lala enaʼö tola anau gölömi ba wanaögö yaʼia.” Börö daʼö, hewaʼae abölö sibai gisö-isö dödö si fasala, hizaʼi tola ölawa ia börö wanolo moroi khö Yehowa. Törö tödöu, börö me lö moʼahonoa ndraʼugö, tola manö ba zi sambua inötö ifuli so ba wangera-ngeramö gisö-isö dödö si fasala. Hizaʼi na alua daʼö, anemaiʼö timbagö ia. Simane Yosefo, iʼanemaiʼö moloi ia me idönisi dödönia foʼomo Wotifa. (1 Mo. 39:12) Böi awuwu ndraʼugö ba wolawa isö-isö dödö si fasala! w23.01 12-13 ¶16-17

Amuata Yehowa yaʼia daʼö faʼatulö. (5 Mo. 32:4) Lö ebua dödö zambuana niha si so faʼatulö, ba simane daʼö Yehowa. (Hal. 10:​34, 35) Hadia dandrania? No tesura Zura Niʼamoniʼö ba ngawalö li. Fawuʼuli Yehowa wa ba götö safuria, ”fahöna” dania ”waʼaboto ba dödö” si so ba Zura Niʼamoniʼö, ba ato niha zangokhögö faʼaboto ba dödö sindruhu andrö. (Dan. 12:4) Tola fahöna waʼaboto ba dödö sindruhu andrö börö wamoʼeluaha, famazökhi, ba famazaewe Sura Niʼamoniʼö hegöi publikasi si teʼodane-dane ba Zura Niʼamoniʼö. Hizaʼi, Sura Niʼamoniʼö nifazökhi nono mbanua Yehowa tola taʼokhögö ia ba lö muʼandrö mböli. No mufoʼeluaha ia ba zi töra 240 ngawalö li. Buania, niha moroi ba ngawalö soi tola aboto ba dödöra duria somuso dödö sanandrösa ba Wamatörö Lowalangi fatua lö tohare gamozua götö danö andre. (Mat. 24:14) Omasi Lowalangi na ato niha zanöndra faʼaboto ba dödö sanandrösa khönia, yaʼia daʼö na labaso Daromalinia. Daʼa zangoromaʼö wa so khönia waʼatulö ba iʼomasiʼö ita fefu. w23.02 5 ¶11-12

Hadia öʼomasiʼö zatulö? Tatu manö. Hizaʼi, fefu ita lö moʼahonoa ba na lö mangelama ita tola manö tedönisi gera-erada ba lala wangera-ngera gulidanö sanandrösa ba zatulö. (Yes. 5:20) Ira sondröniaʼö ba agama me götö Yesu, lawaʼö tödöra wa no lafalua zatulö. Hizaʼi, itegu ira Yesu börö me lafaso niha böʼö ba woloʼö niwaʼöra ba lafazökhi goi-goira samösa sanandrösa ba zatulö hegöi si lö atulö. (Sango. 7:16; Luk. 16:15) Simane daʼö göi niha ba götöda. Lafazökhi goi-goira samösa ba lawaʼö tödöra wa no lafalua zatulö. So khöra waʼasiliyawa, lahuku nawöra ba abölö sökhi ira moroi ba niha böʼö ba wamaigira. Lö omasi Yehowa ba niha simane daʼö. Tenga niha satulö ira ba wamaiginia. Famalua satulö eluahania tafalua zi sökhi moloʼö famaigi Lowalangi Yehowa. Ba Zura Niʼamoniʼö, ngawua wehede ’famalua satulö’ eluahania tafaudugö waʼaurida ba goi-goi salawa, yaʼia daʼö goi-goi Yehowa. w22.08 27 ¶3-5

Faduhu dödö Yesu khö ndra nifahaʼönia hewaʼae na itaria lafalua zala. (Yoh. 15:16) Duma-dumania, me möi Yakobo hegöi Yohane khö Yesu ba wangandrö dadaomara ba Wamatörö Lowalangi, lö isofu khöra Yesu hadia gohitö dödöra ba wamosumange Yehowa mazui itimbagö ira tobali sinengenia. (Mrk. 10:​35-40) Ba gafuriata, me laraʼu Yesu, laröi ia ira nifahaʼönia. (Mat. 26:56) Hewaʼae simanö, lö irai taya waʼafaduhu dödö Yesu khöra. Iʼila wa lö moʼahonoa ira, hizaʼi ”lö tebulö iʼomasiʼö ira irugi gamozua”. (Yoh. 13:1) Me no aefa tesusugi Yesu, ibeʼe halöwö sebua khö ndra sinengenia si lö faröi si 11 ba wondröniaʼö halöwö fombaliʼö nifahaʼö hegöi ba wondrorogö biri-birinia sebua böli. (Mat. 28:​19, 20; Yoh. 21:​15-17) Ba sindruhu wa tola mufaduhusi tödö ndra sinenge si lö moʼahonoa andrö. Lö faröi ira ba wamosumange Yehowa irugi waʼamatera. Tatu manö, tobali duma-duma si sökhi khöda Yesu ba wamaduhusi tödö niha si lö moʼahonoa. w22.09 6 ¶12

Na faduhu dödöda wa iʼomasiʼö ita Yehowa ba faʼawö ia khöda, tebai ifetaʼu ita Satana. Nehegö duma-duma zanura Sinunö 118, sanaögö ngawalö gabula dödö sabua ba waʼaurinia. Ato sibai zi faʼudu khönia, ba so ösa moroi ba gotaluara ndra sondröniaʼö (ayati 9, 10). Itaria, abua sibai khönia wanaögö abula dödönia andrö (ayati 13). Ba no irai ibeʼe khönia wotu sabeʼe Yehowa (ayati 18). Hewaʼae simanö, tola imane ba zinunönia, ”Lö ataʼu ndraʼo.” Hadia mbörö wa irasoi waʼahono dödö ba lö khönia faʼataʼu? Hewaʼae no ibeʼe khönia wotu Yehowa, aboto ba dödönia wa iʼomasiʼö sibai ia Amania andrö si so ba zorugo. Gofu hadia zalua khönia, faduhu dödönia wa iʼomasiʼö ia Lowalanginia ba ibeʼe wanolo. (Si. 118:29) Moguna faduhu dödöda wa iʼomasiʼö ita Yehowa ero zamösana. Na tafaduhusi tödö daʼö, tola talawa zi tölu ngawalö waʼataʼu nirasoi niha sato, yaʼia daʼö: (1) faʼataʼu na lö tebönökhi zoguna ba nösi nomo, (2) faʼataʼu ba niha, ba (3) faʼataʼu ba waʼamate. w22.06 15 ¶3-4

Moguna taʼofönaiʼö wamosumange Yehowa ba waʼaurida. No sinangea tafosumange Yehowa börö me yaʼia Zomböi yaʼita. (Fam. 4:11; 14:​6, 7) Börö daʼö, sabölö taʼofönaiʼö ba waʼaurida yaʼia daʼö ba wamosumange yaʼia ba lala somasi ia, ”moloʼö fanuturu lala moroi ba geheha niʼamoniʼö ba tefaudu ba zindruhu”. (Yoh. 4:​23, 24) Na eheha niʼamoniʼö zameʼe khöda fanuturu lala, tola tafosumange ia moloʼö sindruhu si so ba Daromalinia. Moguna göi taʼofönaiʼö wamosumange Yehowa hewaʼae na lö latehegö halöwö nifaluada ba mbanua si toröi yaʼita. Iadaʼa, töra 100 ndra talifusöda nibeʼe ba gurunga börö me tobali ira Samaduhuʼö Yehowa. Hewaʼae simanö, lö tebulö omuso dödöra börö me laforege wamalua si tola lafalua ba wangandrö, ba wamahaʼö yaʼira hegöi ba wamahaʼö niha böʼö sanandrösa khö Lowalangi ba Famatörönia. Na lafakao ita mazui laʼoʼaya, tola tarasoi waʼomuso dödö börö me taʼila wa hasambalö fao khöda Yehowa ba ifahowuʼö ita.—1 Fe. 4:14. w22.10 9 ¶13

Ba mbuku Gamaedola, no ibeʼe mene-mene si sökhi si tola mangaʼazökhi faʼaurida. Nehegö dombua duma-duma moroi ba mene-mene andrö. Si oföna, yaʼahono dödöu ba zi no so. Ba Gamaedola 23:​4, 5, ibeʼe khöda mene-mene si sökhi andre, ”Böi eregesi dödöu ba wolohi faʼakayo. . . . Awena sibai öʼila ia ba no taya, faʼakayomö andrö ibologö gafinia hulö moyo ba muhombo ia ba dalu mbanua.” Ato niha si kayo hegöi si numana samorege ba wangalui kefe. Daʼö mbörö wa asese sibai lafalua zi möi famakiko mbotora, töi si sökhi hegöi fahuwusara ba niha böʼö. (Amd. 28:20; 1 Ti. 6:​9, 10) Si dua, angeragö fatua lö fahuhuoʼö. Na lö mangelama ita ba wehededa tola manö alua gabula dödö sebua. Imane ba Gamaedola 12:​18, ”Hulö nikhu gari wehede si lö fakhamö muʼangeragö, hizaʼi lela niha satua-tua tobali dalu-dalu.” Enaʼö tola taʼokhögö wahuwusa si sökhi, böi tadunö-dunö zala nifalua niha böʼö.—Amd. 20:19. w22.10 21 ¶14; 22 ¶16-17

Moguna sindruhu-ndruhu aboto ba dödö Hezekieli duria nifaʼemania irege daʼö zamarou tödönia ba wanuriaigö. Aefa daʼö, alua zahöli-höli dödö. Iwaʼö Hezekieli wa ”hulö wewani waʼami” gölu-gölu zura daʼö. (Hez. 3:3) Hadia mbörö? Ba wamaigi Hezekieli, halöwö niʼokhögönia ba wosalahini Yehowa andrö no sambua töi sebua ba tobali fangomuso dödönia. (Si. 19:​8-11) Iʼandrö sibai saohagölö börö me no ifaduhusi tödö ia Yehowa tobali samaʼeleʼö khönia. Ba gafuriata, imane Yehowa khö Hezekieli, ”Fondrondrongo fefu niwaʼögu ba tanö ba dödöu.” (Hez. 3:10) Iʼandrö khönia Yehowa enaʼö itanö ba dödönia fefu zi no tesura ba gölu-gölu zura andrö, ba ihaogö woʼangerönusi. Na ifalua daʼö, itugu aro wamatinia. Ösi gölu-gölu zura andrö turia sabeʼe si lö tola löʼö ifaʼema ba niha. (Hez. 3:11) Börö me aboto ba dödö Hezekieli ba faduhu dödönia duria nibeʼe Lowalangi khönia, daʼö mbörö wa möi ia manuriaigö ba iʼasiwai halöwö nibeʼe khönia. w22.11 6 ¶12-14

Na so waʼatebulö salua ba organisasi si tola manandraigö faʼalöfaröimö, hadia nifaluamö? Tuhini soroi ba dödö na so waʼatebulö ba organisasi. Sagötö wofanö ndraono Gizaraʼeli ba danö si mate, ngaʼötö Gahati zolohe tawöla amabuʼula föna niha sato. (4 Mo. 3:​29, 31; 10:33; Yos. 3:​2-4) No halöwö si tohude sibai daʼö! Hizaʼi, me no toröi ndraono Gizaraʼeli ba Danö Amabuʼula, faböʼö saʼae zalua. Lö saʼae mufawuʼa-wuʼa Dawöla. Tebulö halöwö ngaʼötö Gahati. (1 Ng. 6:​31-33; 26:​1, 24) Lö irai tesura ba Zura Niʼamoniʼö wa so ngaʼötö Gahati si kökö-kökö mazui laʼandrö halöwö sabölö sökhi. Omasi ira wamalua halöwö si bohou, hewaʼae na abölö tohude halöwöra ba zilalö. Hadia wamahaʼönia? Moguna soroi ba dödö tatuhini na so waʼatebulö ba organisasi Yehowa, mendrua manö na molua-lua daʼö ba halöwöda. Okhögö waʼomuso dödö gofu hadia ia halöwö nibeʼe khöu. Törö tödöu, wa tola ebua mbölimö föna Yehowa tenga börö halöwöu, hizaʼi börö me öʼoʼö nifakhoinia. w22.11 23 ¶10-11

Iʼodödögö wangalui Faulo Onesiforo. Ba me no isöndra, iʼalui lala ba wameʼe fanolo hewaʼae na tola manö teʼala waʼaurinia. Hadia wamahaʼönia khöda? Böi tataha wameʼe fanolo khö ndra talifusöda nifakao ha börö waʼataʼuda ba niha. Dataforege wamalua sabölö sökhi ba wangoʼawögö hegöi ba wanolo yaʼira. (Amd. 17:17) Moguna sibai khöra waʼomasi hegöi fanolo moroi khöda. Angeragö hewisa ndra talifusöda ba Rusia me latolo ndra talifusö niʼomasiʼöra si no mubeʼe ba gurunga. Me so ösa zedöna muʼetuʼö huku, ato ndra talifusöda zi möi ba gödo zanguhuku ba wotuhini yaʼira. Hadia wamahaʼönia khöda? Na muböbögö zi lö duhu khö ndra talifusöda si so noro dödö, laraʼu mazui lafakao ira, böi ataʼu ita. Mangandrö ita salahira, taʼameʼegö tödö nösi nomora, ba taʼalui lala si tefaudu ba wanolo yaʼira.—Hal. 12:5; 2 Ko. 1:​10, 11. w22.11 17 ¶11-12

No tebeʼe noro dödö khö ndra satua sokubaloi ba wangabölöʼö hegöi ba wondrara tödö ndra talifusöda ba wamati. (1 Fe. 5:2) Na alua bencana, si oföna lafalua ira satua sokubaloi yaʼia daʼö ba wotatugöi hadia lö hadia ia khö ndra talifusöda, hadia ibönö göra, nukhara hegöi nahia waʼatoröira. Hizaʼi, hewaʼae na no hauga waŵa me no aefa bencana andrö, tola manö moguna nasa muʼabölöʼö ba murara dödö ndra talifusöda andrö ba wamati. (Yoh. 21:15) Imane Harold, samösa anggota Panitia Ndraha si no irai mamalukhaisi ira talifusöda si göna bencana, ”Moguna khöra ginötö enaʼö tola alö waʼabu dödöra. Te no simane si toʼölö waʼaurira, hizaʼi tola manö itaria itörö tödöra nösi nomora mazui si fahuwu khöra si no mate. Itörö göi tödöra gama-gamara sebua böli si no taya, mazui faʼabasaki si no latörö. Ba ginötö simane daʼö, no sinangea na ifuli abu dödöra. Tenga daʼö geluahania wa lö hadöi famatira.” Moguna laʼoʼö ira satua sokubaloi mene-mene ba ’wege-ege awö zege-ege’.—Rom. 12:15. w22.12 22 ¶1; 24-25 ¶10-11

Moguna taforege ba wamalua satulö. Si fao faʼoböwö, ibeʼe khöda gehehania Yehowa ba wanolo yaʼita. Tola tasöndra wanuturu lala moroi ba geheha niʼamoniʼö na tafahaʼö ita ba Daromali Lowalangi. Tatema göi waʼabölö moroi ba geheha andrö na taʼondrasi gangowuloa. Ba daʼö tola fariawö ita khö ndra talifusöda samorege ba wamalua satulö. Tatu möi fangaro wamatida daʼö. (Heb. 10:​24, 25; 13:7) Baero daʼö, moguna mangandrö ita khö Yehowa soroi ba dödö. Taʼandrö khönia wanolo ba wolawa falömoʼahonoada. Hasambalö itolo ita Yehowa, ibeʼe khöda gehehania enaʼö lö tebulö taforege wamalua daʼö. Sindruhu sa, hewaʼae no tafalua fefu daʼö, tola manö lö saheta khöda gisö-isö dödö si fasala. Hizaʼi, itolo ita Yehowa enaʼö böi taʼoʼö gisö-isö dödö si fasala andrö. Na no asese tafalua halöwö ba wamati, hadia nasa zinangea tafalua? Moguna taforege wamalua satulö ba böi taböhöli. w23.01 11 ¶13-14

Sindruhu sa, Sura Niʼamoniʼö tenga buku wanuturu lala soguna ba mbotoda. Hizaʼi, tola iforomaʼö khöda lala wangera-ngera Yehowa sanandrösa ba mbotoda. Duma-dumania, iʼamenesi ita Sura Niʼamoniʼö enaʼö tafandröndröu ita moroi ba ngawalö zamakiko botoda. (Sango. 11:10) Iwaʼö Sura Niʼamoniʼö wa tebai oluʼa-luʼa ita mazui talafo oya tabadu duo. Tola möi famaʼala mbotoda daʼö awö nosoda. (Amd. 23:20) Omasi Yehowa na so khöda wanaha tödö ba ginötö tatatugöi hadia niʼa mazui nibaduda ba hawaʼoya taʼa mazui tabadu ia. (1 Ko. 9:25) Tola taforomaʼö wa taʼameʼegö tödö mbuala faʼauri moroi khö Lowalangi na taʼogunaʼö wangera-ngera si sökhi ba wangai angetula sanandrösa ba mbotoda. (Si. 119:​99, 100; Amd. 2:11) Duma-dumania, tahaogö taʼangeragö hadia niʼada. Na so gö somasi ita, tatu lö taʼa daʼö na tobali fökhöda. No göi taforomaʼö wa so khöda wangera-ngera si sökhi na tatatugöi enaʼö obönö ginötö wemöröda, asese faʼolahraga ita, ba tarorogö mbotoda hegöi omoda. w23.02 21 ¶6-7

Hewisa enaʼö tola ösöndra girö-girö ba wamati ba ginötö öbaso Zura Niʼamoniʼö? Nehegö atö hadia niwaʼö ba 2 Timoteo 3:16, 17. Moloʼö ayati daʼö, ”fefu nösi Mbuku Niʼamoniʼö . . . moguna ia” (1) ba wamahaʼö, (2) ba wangotuʼö, (3) ba wangaʼazökhi, ba (4) wamomaha yaʼita. Tola ötema mbua si öfa ngawalö andre, hewaʼae ba mbuku si lö asese öbaso ba Zura Niʼamoniʼö. Na öbaso Zura Niʼamoniʼö, angeragö hadia wamahaʼö nisöndramö sanandrösa khö Yehowa, ohitö dödönia, mazui goi-goi nibeʼenia. Angeragö göi hewisa wa moguna ayati andrö ba wangotuʼö. Alui hewisa wa tobali fanolomö ayati andrö ba wangiʼila hegöi ba wanimbagö isö-isö dödö mazui amuata si fasala, ba hewisa enaʼö lö faröiʼö khö Yehowa. Nehegö hewisa wa moguna ayati andrö ba wangaʼazökhi, mazui ba wangadölöʼö lala wangera-ngera si fasala. Duma-dumania bua gera-era niha nifalukhaisimö ba wanuriaigö. Ba angerönusi hewisa wa moguna ayati andrö ba wamomaha yaʼugö ba woloʼö lala wangera-ngera Yehowa. Na öfalua fefu daʼö, hasambalö ösöndra ngawalö girö-girö ba wamati, irege itugu oya mbua nitemau ba wombaso Sura Niʼamoniʼö. w23.02 11 ¶11

Ba mbuku Danieli, so sambua wamaʼeleʼö sangoromaʼö wa no ibörögö mamatörö Yesu ba gangohorita zi fitu götö. Hadia tola taʼila hamega sindruhunia alua zi möi fangomuso dödö andrö? (Dan. 4:​10-17) Si ”fitu götö” fagölö ira zi 2.520 fakhe. Tebörögö ginötö daʼö me 607 SM, me tohare niha Mbabilona ba wokalaisi razo safuria ba Yeruzalema si no tobali salahi wamatörö Yehowa. Ba teʼasiwai ginötö daʼö me döfi 1914 M me tohare ”zindruhu zokhö”, yaʼia daʼö Yesu nifataro Yehowa tobali Razo ba Wamatörö Lowalangi. (Hez. 21:​25-27) Hadia gunania khöda wamaʼeleʼö andrö? Na no aboto ba dödöda wamaʼeleʼö sanandrösa ba zi ”fitu götö”, itugu aro waʼafaduhu dödöda wa hasambalö ifalua mbuʼusa linia Yehowa ba ginötö si no itatugöi. Me mböröta, no itatugöi hawaʼara ibörögö tefasindro Wamatörönia, ba alua daʼö tefaudu ba ginötö si no itatugöi. Börö daʼö, faduhu dödöda wa hasambalö göi ifalua wamaʼeleʼö tanö böʼö ba ginötö si no itatugöi. Sindruhu wa alua ngaluo Yehowa ba ginötö si ”no muhonogöi”!—Hab. 2:3. w22.07 3 ¶3-5