HADIA ÖʼILA?
Hewisa wangogunaʼö kara fogili wakhe me föna?
Laʼogunaʼö gara ba wogili fakhe enaʼö tobali hamo ba wamazökhi kue. Ero maʼökhö ira alawe ma sawuyu, laʼogunaʼö gara andre ba wogili fakhe. Me götö föna li gara ba wogili fakhe terongo ero maʼökhö.—II Moze 11:5; Yeremia 25:10.
Fogili wakhe andrö (lösu) nisöndra moroi ba danö Miserai. Labeʼe wakhe yawa ba dete gara sanau ba si no aoko maʼifu, tola göi lafotöi ia fogili wakhe faoma tanga. Aefa daʼö, ibalö duhini danö so gili fakhe no igogohe gara side-ide niʼogunaʼö ba wogili. La fagaölö-gaölö gara side-ide yawa ba dete gara sanau ba wodekha fakhe. Faʼabua gara wodekha yaʼia daʼö 2 kilo mazui 4 kilo. Na laʼogunaʼö tobali fakake wamunu, tola mate niha.—Zanguhuku 9:50-54.
Halöwö ba wogili fakhe andre moguna sibai ba waʼauri niha ero maʼökhö ba zi sambu-sambua omo me föna. Daʼö mbörö wa lö tetehegö ba ginötö Zura Niʼamoniʼö wangai kara wogili fakhe tobali famuʼa woʼömö. Imane ba V Moze 24:6, ”Böi lahalö gade lösu, ba he ha halu.”
Hadia geluaha wehede ”so ba dötöʼa nama”?
Sura Niʼamoniʼö zangombakha khöda wa Yesu ”si so ba dötöʼa Nama.” (Yohane 1:18, Sura Niʼamoniʼö NW) Fehede daʼa zangombakha khöda wa ahatö sibai Yesu khö Lowalangi. Fehede daʼa manandrösa ba lagu wedadao niha Yehuda si toʼölö lafalua na manga ira.
Ba götö Yesu, mudadao niha Yehuda ba wemanga lafasui meza. Lafaolo högöra ba laʼaröuʼö gahera moroi ba meza. No latendroʼö ira ba dandraya ba no labeʼe dalinga ziʼura kabera. Na simanö wedadaora tola lafaliwa dangara kambölö. Börö me fefu zi manga no latendroʼö dötöʼara ba dandraya ba no labeʼe dalinga ziʼura kabera ba no lafatambai dandraya andrö wedadao. Andrö wa so zangumaʼö ”no so högönia ba dötöʼa nawönia si so furinia, andrö wa tola lawaʼö no ’mörö ia ba dötöʼa’ niha böʼö.”
Sambua töi sebua na so niha sahatö khö zokhö omo ba ginötö manga. Ba gafuriata wasa nifalua Yesu, ”samösa nifahaʼö niʼomasiʼö Yesu” sotöi Yohane sanendroʼö yaʼia ba dötöʼa Yesu. Me manofu Yohane khö Yesu ’itendroʼö ia Yohane ba dötöʼa Yesu.’—Yohane 13:23-25; 21:20.