Faʼabu Dödö Börö Wangala

Imane Alona, ”Me urongo li zurune tandra wasuwöta, ataʼudo ba ulau moloi ubiniʼödo. Ba nahia daʼö abölö ataʼudo. Abölö lö sökhi me uʼagö baero, börö me lö hadöi nahia wamini ba daʼö. Ulau mofanö fao feʼe irege atata dölagu. Oya uʼogunaʼö ginötö enaʼö so khögu waʼahono dödö. Ifuli moli zurune zui.”

Fasuwöta ha sambua moroi ba ngawalö gabula dödö si tobali famunu. Duma-dumania, na göna ita fökhö sabölö-bölö mazui göna niha niʼomasiʼöda, no ta foʼamaedolagö daʼö hulö zi göna bom. Abula dödö tanö böʼö yaʼia daʼö hadia zalua ba zi so föna. So khöra waʼaombö-aombö dödö, ’Hadia onoda mazui ono niha böʼö, auri dania ba ginötö wasuwöta, faʼalösökhi, so taʼunöi talu mbanua, ba fökhö sabölö-bölö salio göna ba niha?’ Hewisa wanaögöda abula dödö salua andre?

Na taʼila alua zi lö sökhi, ”satua-tua, ba iʼila wamakao, ba ibiniʼö ia.” (Gamaedola 27:12) Hulö simane na tarorogö mbotoda, simanö göi na tarorogö dödöda awö gera-erada. Turia nirongoda mazui nifaigida ba tifi oya gambara waʼalösökhi si tola monönö faʼaombö-aombö dödöda hegöi iraono ba ginötö daʼa. Na lö tafaigi gambara zi lö sökhi eluahania tenga lö alua zi lö sökhi saʼae. Lö ifazökhi wangera-ngerada Lowalangi enaʼö taʼera-era zi lö sökhi. Moguna tafoʼösi wangera-ngerada, ”hadia zi duhu, . . . hadia zatulö, . . . hadia zohau-hau, . . . hadia zomasi ita.” Na tafalua daʼö, ”Lowalangi waʼohau-hau dödö” sameʼe khöda faʼahono dödö.​—Filifi 4:8, 9.

MOGUNA MANGANDRÖ

Famati saro zi tola manolo yaʼita enaʼö tola tataögö faʼaombö-aombö dödö. Ifarou ita Zura Niʼamoniʼö enaʼö, ”böi miförö, ba wangandrö andrö.” (I Fetero 4:7) Moguna taʼandrö khö Lowalangi enaʼö ibeʼe khöda waʼaro dödö ba faʼatua-tua ba wangaʼi angetula si sökhi, ba so khöda waʼafaduhu dödö ba, ”ifondro-ndrongo na so niʼandröda.”​—I Yohane 5:15.

Itutunö khöda Zura Niʼamoniʼö wa Afökha andrö, ”zalawa gulidanö” ba ”ba danga Gafökha so nösi gulidanö, maʼa fefu.” (Yohane 12:31; I Yohane 5:19) Daʼö mbörö wa ifahaʼö ita Yesu ba wangandrö, ”Efaʼöga ba Gafökha.” (Mataiʼo 6:13) Imane Alona, ”Ero na urongo li zurune, uʼandrö khö Yehowa enaʼö ibeʼe khögu waʼahono dödö. ”Aefa daʼö, ikaoni ndraʼo foʼomogu ba malau mangandrö. Si ndruhu-ndruhu wa fangandrö andrö zanolo yaʼaga.” Imane Zura Niʼamoniʼö, ”No ahatö Yehowa, ba zi angaröfi li yaʼia, fefu, ba zi angaröfi li Yaʼia soroi ba dödö.”​—Zinunö 145:18.

NITÖTÖNAMA BA ZI SO FÖNA

Me fahuhuo Yesu ba hili, ifahaʼö ndra nifahaʼönia enaʼö lalau mangandrö, ’Ya tohare wamatörömö’. (Mataiʼo 6:10) Famatörö Lowalangi zangeheta fefu gabula dödö si lö sökhi sagötö faʼara. Ba wamatörö Yesu, ”salawa waʼatulö,” ba Lowalangi ”sanenaŵa fanuwö irugi wondrege danö.” (Yesaya 9:6; Zinunö 46:10) ”Ba oya soi dania nifatunönia huhuo, ba he ba niha baero sabölö, irugi ba zaröu, ba yaʼia zangetuʼö huku .  . . Sambua lö soi saʼae solohe siʼöli, ba wanuwö soi böʼö; lö saʼae lafamaha ira ba wanuwö . . . Lö si keani yaʼia.” (Mikha 4:3, 4) Ohau-hau dödö zi sambua omo ”lalau nomo, ba laʼonahia göi; lafazökhi kabu nagu ba laʼa mbua.” (Yesaya 65:21) ”Ba samösa lö ba mbanua sangumaʼö: No gönado ’safökhö khögu.’”​—Yesaya 33:24.

Hewaʼae oya zi tola taʼaröuʼö ita ba ginötö iadaʼa, lö tola aheta ita ba ginötö si lö mudöna-döna. (Zangombakha 9:11) Ngaotu fakhe zi lalö irugi iadaʼa ato niha si sökhi si no mate börö wasuwöta, faʼalösökhi, hegöi fökhö. Hadia wanötöna ba niha si lö fasala?

Ngahönö niha si no mate nitörö tödö Lowalangi, ifuli tesusugi dania. Irugi iadaʼa, he no mate ira lö olifu Lowalangi, samuza inötö ”irugi mbaŵa dania, ba larongo linia dozi si so ba lewatö. Ba möi ira yawa.” (Yohane 5:28, 29) Imane Sura Niʼamoniʼö sanandrösa ba wanusugi, ”Si no möi sao nosoda, si no aro, si no abeʼe.” (Heberaiʼo 6:19) Lowalangi ”zangaroʼö famati ba niha fefu, wanusugi yaʼia [Yesu] moroi ba ngai zi mate.”​—Halöwö Zinenge 17:31.

Samalua somasi Yehowa iadaʼa göna khöra gabula dödö. Paul, Janet, hegöi Alona, tola lataögö gabula dödö salua khöra börö me no lahalö gangetula si sökhi, lahatöʼö ira ba wangandrö khö Lowalangi, ba mamati ira ba zi no ifabuʼu Daromali sanandrösa ba zi so föna. Ba ginötö göna abula dödö, ”Lowalangi wanötöna andrö, ba yamuhöna khömi fefu waʼomuso dödö ba faʼohau-hau dödö ba wamati andrö.”​—Roma 15:13.