Daʼa Nahiada Wamosumange Lowalangi

1, 2. (a) Me götö föna, hezo nahia wamosumange Yehowa? (b) Hewisa dödö Yesu ba gosali Yehowa si so ba Yeruzalema? (c) Hadia nitutunöda ba duho daʼa?

ONO Mbanua Lowalangi me götö föna hegöi iadaʼa, so nahia niʼogunaʼöra ba wamosumange Lowalangi. Duma-dumania, ba ginötö ibeʼe Habeli zumange khö Yehowa, ifazökhi sambua naha wameʼe sumange. (I Moze 4:3, 4) Noakhi, Aberahamo, Izaʼaki, Yakobo, ba Moze lafazökhi naha zumange khö Lowalangi. (I Moze 8:20; 12:7; 26:25; 35:1; II Moze 17:15) Iʼombakhaʼö Yehowa khö ndraono Gizaraʼeli enaʼö lafazökhi nahia niʼamoniʼö. (II Moze 25:8) Ba gafuriata, ibeʼe goroisa khöra ba wamazökhi gosali. (I Razo 8:27, 29) Me no mangawuli ndraono Gizaraʼeli moroi ba Mbabeli, lö laböhöli weʼamöi ba gangowuloa zekola Daromali. (Mareko 6:2; Yohane 18:20; Halöwö Zinenge 15:21) Niha keriso me götö föna owulo ira ba nomo. (Halöwö Zinenge 12:12; I Korindro 16:19) Ba ginötö daʼa, ono mbanua Yehowa owulo ira ba wamomaha hegöi ba wamosumange Yehowa ba ngahönö Nahia Gorahua ba zi sagörö ulidanö.

² Iʼameʼegö tödö sibai Yesu gosali si so ba Yeruzalema. Faʼomasi Yesu gosali Lowalangi daʼö zamasugi ba dödö ndra nifahaʼönia wehede Zinunö Dawido, ”No iʼado fönu andrö ba nomomö.” (Zinunö 69:10; Yohane 2:17) Tenga simane osali ba Yeruzalema me föna, Nahia Gorahua Mbanua Lowalangi tenga ”omo Yehowa.” (II Ngaʼötö 5:13; 33:4) Hewaʼae simane daʼö, moguna taʼameʼegö tödö nahia wamosumangeda Lowalangi. Ba duho daʼa, tefatunö khöda goi-goi Zura Niʼamoniʼö ba wamahaʼö yaʼita hewisa gamuatada ba ginötö so ita ba Nahia Gorahua Mbanua Lowalangi, hewisa ba wororogöda nahia gorahua andre, hewisa lalada wameʼe gefe si no aoha gölö fameʼe soguna ba nahia gorahuada.a—Faigi zi no musura ba gahe zura.

TAʼAMEʼEGÖ TÖDÖ GANGOWULOADA

3-5. Hadia Nahia Gorahua Mbanua Lowalangi andrö ba hewisa dödöda sanandrösa ba gangowuloa?

³ Nahia Gorahua Mbanua Lowalangi yaʼia daʼö nahia waʼowulo ba wamosumange Yehowa. Angowuloa no buala sebua moroi khö Lowalangi, na möi ita ba gangowuloa itugu aro wahuwusada khö Yehowa. Ba gangowuloa khö Yehowa tasöndra waʼabölö ba fanuturu lala soguna khöda. Fondrege döi sebua khöda me no ikaoni ita Yehowa hegöi Yesu ba ”wemanga” ba mezania ero migu. (I Korindro 10:21) Böi taʼolifugö wa moguna sibai wogaoni andrö.

⁴ Iʼombakhaʼö khöda Yehowa wa moguna sibai wamosumange yaʼia ba böi taböhöli weʼamöi ba gangowuloa enaʼö tola tafarou dödö ndra talifusöda. (Baso Heberaiʼo 10:24, 25.) Börö me taʼameʼegö tödö Yehowa lö omasi ita na taröi gangowuloa. Na tafaʼanö ita fatua lö möi ba gangowuloa, no sambua lala ba wangandröda saohagölö khö Yehowa me no ibeʼe khöda gangowuloa.​—Zinunö 22:23.

⁵ Amuatada ba gangowuloa ba fondrorogöda Nahia Gorahua Mbanua Lowalangi daʼö zangoromaʼö wa tafosumange Yehowa. Omasi ita tafolakhömi döi Yehowa ba gamuatada, simane töi nisura ba Nahia Gorahua Mbanua Lowalangi.​—Faigi göi I Razo 8:17.

6. Hadia niwaö niha sangondrasi sanandrösa ba Nahia Gorahua Mbanua Lowalangi? (Faigi gambara ba ngaʼörö 27.)

⁶ Lafaigi-faigi niha böʼö nataʼameʼegö tödö Nahia Gorahua Mbanua Lowalangi. Duma-dumania, samösa ndra matua moroi ba Turki imane, ”Ahöli-höli dödögu wamaigi Nahia Gorahua Mbanua Lowalangi börö me sökhi ba lö taʼunö. Moadu wonukhara, maʼiki ira, ba sökhi wehedera khögu. Si ndruhu-ndruhu waʼahöli-höli dödögu.” Ibörögö möi ndra matua andre ba gangowuloada ba lö ara aefa daʼö tebayagö ia idanö. So sambua mbanua ba Indonesia, ira talifusöda lakaoni zi falazi omo khöra, Wali kota hegöi ira samatörö tanö böʼö ba wamaigi Nahia Gorahua Mbanua Lowalangi si bohou. Ahöli dödö Wali kota andre börö me iʼila Nahia Gorahua no baga-baga, sökhi wamazökhi yaʼia hegöi golayamania. Imane wangumaʼö, ”Faʼasökhi Nahia andre daʼö zangoromaʼö wa yaʼami niha samati.”

7, 8. Hewisa wangoromaʼöda wa tafosumange Yehowa ba ginötö so ita ba Nahia Gorahua Mbanua Lowalangi?

⁷ Yehowa zogaoni yaʼita waʼamöi ba gangowuloania, ba ifaigi-faigi gamuatada hegöi fonukhada. Na möi ita ba gangowuloa enaʼö moadu wonukhada hegöi amuatada. Iʼandrö khöda Yehowa enaʼö niha nikaonida hegöi talifusöda böʼö tola so waʼohahau dödö na möi ira ba Nahia Gorahua Mbanua Lowalangi. Lö omasi ita na lö taʼameʼegö tödö fefu gangowuloa simane lagu ba wonukhada, fa sms, fahuhuo mazui manga-manga ba ginötö gangowuloa. Baero daʼö, moguna khö zatua ba wamahaʼö iraonora enaʼö böi famai-mai ira ba Nahia Gorahua Mbanua Lowalangi.​—Zangombakha 3:1.

⁸ Me iʼila Yesu niha zamawa ba gosali, ilau mofönu ba ifofanö ira fefu. (Yohane 2:13-17) Nahia Gorahua Mbanua Lowalangi, daʼö nahia wamosumange Yehowa ba wamahaʼö yaʼita sanandrösa khönia, tenga nahia wamawa mazui nahia wamatunö kefe.​—Faigi göi Nehemia 13:7, 8.

TATOLO WAMAZÖKHI NAHIA GORAHUA MBANUA LOWALANGI

9, 10. Hewisa nono mbanua Yehowa wamazökhi Nahia Gorahua Mbanua Lowalangi ba hadia mbuania?

⁹ No laʼodödögö ono mbanua Yehowa ba zi sagörö ulidanö ba wamazökhi Nahia Gorahua Mbanua Lowalangi. Fefu ndra talifusöda si fao ba wamazökhi Nahia Gorahua andre lö lagazi. Barö zi 15 fakhe andre, 28.000 Nahia Gorahua Mbanua Lowalangi si no mufazökhi ba zi sagörö ulidanö mazui lima ngawua ero maʼökhö.

¹⁰ Angowuloa Yehowa laʼogunaʼö dolo tolo si no aoha gölö ni beʼe ira talifusöda ba zi sagörö ulidanö ba lafatenge ndra talifusöda si no toʼölö ba wamazökhi Nahia Gorahua Mbanua Lowalangi gofu hezo mbanua. Taʼoʼö goi-goi Zura Niʼamoniʼö si so faʼabölö tola latolo ndra talifusöda so amböta. (Baso II Korindro 8:13-15.) Hadia mbuania? Oya Nahia Gorahua Mbanua Lowalangi si no lafazökhi khö ndra talifusöda si no ambö-ambö.

11. Hadia niwaʼö ndra talifusöda me no so khöra Nahia Gorahua Mbanua Lowalangi, ba hewisa dödöu samösa?

¹¹ Lasura zura ira talifusöda moroi ba Kosta Rika, ”Hulö zangifi ndraʼaga me musindroga föna golayama Nahia Gorahua Mbanua Lowalangi! Hulö zi lö faduhu dödöma. Ha 8 hari wamazökhi Nahia Gorahua Mbanua Lowalangi andre! Tola mufalua fefu daʼa börö howu-howu moroi khö Yehowa, nihonogöi gangowuloa ba folulu fohalöwö moroi khö ndra talifusö fefu. Nahia andre no sambua buala sebua moroi khö Yehowa. Omuso sibai dödöma.” Omuso sibai dödöda me no tarongo ndra talifusöda laʼandrö saohagölö khö Yehowa ba zi no ifalua. Omuso dödöda börö me ira talifusöda ba zi sagörö ulidanö laʼokhögö Nahia Gorahua Mbanua Lowalangi. Ifahowuʼö Yehowa wamazökhi Nahia Gorahua Mbanua Lowalangi andre, ba me no awai wamazökhi yaʼia, ato niha sangöndrasi nahia gangowuloa ba lafahaʼö ira sanandrösa khö Yehowa.​—Zinunö 127:1.

12. Hewisa ndraʼugö samösa tola ötolo wamazökhi Nahia Gorahua Mbanua Lowalangi?

¹² Hewisa ndraʼugö samösa tola ötolo wamazökhi Nahia Gorahua Mbanua Lowalangi? Tola fao ndraʼugö ba wanolo yaʼia. Baero daʼö, fefu ita tola tabeʼe dolo tolo ba wamönökhi gefe niʼogunaʼö. Na falulu fohalöwö ita ba halöwö daʼa tola omuso dödöda, ba tefolakhömi döi Yehowa. Na tabeʼe dolo tolo si no aoha gölö fameʼe ba wamazökhi Nahia Gorahua, no taʼoʼö nifalua nono mbanua Lowalangi me götö föna.​—II Moze 25:2; II Korindro 9:7.

TAHAOGÖ NAHIA GORAHUA MBANUA LOWALANGI

13, 14. Hadia niwaʼö Zura Niʼamoniʼö sanandrösa ba wangehaogö Nahia Gorahua Mbanua Lowalangi enaʼö sökhi ba moadu?

¹³ Lowalangi nifosumangeda Lowalangi niʼamoniʼö, ba omasi ia na fefu nifaluada oi niʼangenanöi. Börö daʼö, tarorogö Nahia Gorahua Mbanua Lowalangi böi taʼunö ba moadu. (Baso I Korindro 14:33, 40.) Enaʼö lö taʼunö ba teʼamoniʼö ita simane Yehowa, tenga ha nahia wamosumange Yehowa nihaogöda, fangera-ngerada, amuata si sökhi, moguna göi tahaogö mbotoda.​—Famaʼeleʼö 19:8.

¹⁴ Na tahaogö Nahia Gorahua Mbanua Lowalangi, lö alawö ita takaoni niha ba gangowuloada. Aefa daʼö, tola laʼila niha wa si ndruhu-ndruhu tafalua hadia zi no tafahaʼö ita sanandrösa ba gulidanö si bohou si lö taʼunö. Tola laʼila wa tafosumange Lowalangi niʼamoniʼö, so baliʼö gulidanö andre dania tobali waradaiso si sökhi.​—Yesaya 6:1-3; Famaʼeleʼö 11:18.

15, 16. (a) Hana wamoguna tahaogö Nahia Gorahua Mbanua Lowalangi? (b) Hewisa ndra satua sokubaloi ba wotatugöira ginötö wangehaogö Nahia Gorahua Mbanua Lowalangi ba hadia zi tola tafalua ero samösa?

¹⁵ Faböʼö-böʼö wangera-ngera niha sanandrösa ba wangehao andre. Hadia mbörö? Börö me faböʼö mbanua si tumbu ira. Tanö böʼönia toröi ira ba nahia sambö idanö mazui lö fakake niʼogunaʼö ba wangehao. Hizaʼi, gofu hezo toröi ita mazui hadia niwaʼö niha khöda sanandrösa ba wangehao andre, moguna sibai tahaogö Nahia Gorahua Mbanua Lowalangi enaʼö sökhi ba moadu. Ba daʼö nahia wamosumange Yehowa.​—V Moze 23:14.

¹⁶ Na omasi ita lö taʼunö Nahia Gorahua Mbanua Lowalangi, moguna latatugöi ginötö wangehaogö yaʼia. Satua sokubaloi ba mbanua niha keriso moguna lafaigi hadia no tehenaigö fefu fakake niʼogunaʼö ba wangehaogö Nahia Gorahua. So zinange muhaogö ero migu ba so göi zi lö asese muhaogö. Moguna fao ita fefu ba wangehaogö Nahia gangowuloada.

TAROROGÖ NAHIA GORAHUA MBANUA LOWALANGI

17, 18. (a) Hadia zi tobali famahaʼö khöda moroi ba nono mbanua Yehowa me föna ba wangehao osali? (b) Hana wa moguna tarorogö Nahia Gorahua Mbanua Lowalangi?

¹⁷ Tarorogö Nahia Gorahua Mbanua Lowalangi ba tahaogö na so zi tekiko. Ono mbanua Lowalangi me götö föna lafalua göi simane daʼö. Duma-dumania, ba ginötö wamatörö Razo Yoasi moroi ba Yehuda, laʼowuloi gefe ba laʼohe ba gosali. Ibeʼe fareta razo khö gere enaʼö laʼogunaʼö gefe andrö ba wangehao osali. (II Razo 12:4, 5) Töra 200 fakhe aefa daʼö, Razo Yosia ifalua zimane daʼö.​—Baso II Ngaʼötö 34:9-11.

¹⁸ So ndra talifusöda Panitia cabang laʼila wa so zi lö wondrorogö Nahia Gorahua Mbanua Lowalangi. So ndra talifusöda si lö mangila mangehaogö Nahia Gorahua mazui lö hadöi kefe ba wangehaogö yaʼia. Hizaʼi, na lö tarorogö tola manö tekiko ba tobali fangoʼaya ba niha. Tenga si möi duma-duma si sökhi daʼa. Tobali, na tarorogö Nahia Gorahua Mbanua Lowalangi ndrege zi tola ita, tefolakhömi döi Yehowa ba no taʼameʼegö tödö dolo tolo nibeʼe ndra talifusöda fefu.

19. Hadia nifaluada ba wangoromaʼö wa taʼameʼegö tödö nahia wamosumange Yehowa?

¹⁹ Nahia Gorahua Mbanua Lowalangi no sambua nahia nibeʼe khö Yehowa. Nahia Gorahua Mbanua Lowalangi tenga okhöta zi samösa niha mazui okhöta mbanua niha keriso. Ba zi no tafatunö andre, itolo ita goi-goi Zura Niʼamoniʼö enaʼö taʼameʼegö tödö Nahia Gorahua andre. Börö me tafosumange Yehowa, moguna göi taʼameʼegö tödö gangowuloa hegöi Nahia Gorahua. Omasi ita na tabeʼe dolo tolo si no aoha gölö fameʼe enaʼö itugu monönö Nahia Gorahua Mbanua Lowalangi ba taʼodödögö sibai enaʼö tahaogö ba tarorogö. Simane nifalua Yesu, taʼoromaʼö waʼomasida ba taʼameʼegö tödö nahia wamosumange Yehowa.​—Yohane 2:17.