Fanötöna ba Niha si no Mate​—Hana wa Tola Faduhu Dödöu?

Hadia fasala na so ba wangera-ngerada wa ifuli auri niha si no mate? Löʼö. Imane Faulo, ”Na ha ba götöda andre manötöna ita, khö Keriso, ba no numana ita, moroi ba niha böʼö fefu. Ba iadaʼe, ba no mususugi Keriso, moroi ba ngai zi mate, no si aʼa ia ba zi no mate andrö.” (I Korindro 15:19, 20) Faduhu sibai dödö Waulo wa so wanusugi niha si no mate börö me no tesusugi Yesu.a (Halöwö Zinenge 17:31) Daʼö mbörö wa iwaʼö Faulo wa Yesu andrö ”si aʼa” nisusugi moroi ba ngai zimate. Na Yesu zi oföna lasusugi, tatu manö so niha böʼö nisusugi baero daʼö.

Hadia danö böʼönia nasa wa faduhu dödöda so wanusugi? Yehowa yaʼia daʼö ”Lowalangi . . . si lö mofaya.” (Tito 1:2) Lö irai falimo Yehowa. Hadia ifabuʼu wa so wanusugi, aefa daʼö lö ifalua sa? Lö duhu daʼö.

Hadia mbörö wa isusugi Yehowa niha si no mate? Börö waʼomasinia. Imane Yobi, ”Hadia na mate niha, hadia ifuli auri? Ba muʼao enaʼö ndraʼugö ba utema liu; humulu enaʼö dödöu ba gomböila dangau andre.” (Yobi 14:14, 15) Faduhu sibai dödö Yobi na mate ia, isusugi ia Lowalangi. Hadia tebulö dödö Lowalangi? Imane Yehowa, ’lö si tebulö ndraʼo.’ (Maleakhi 3:6) Omasi Lowalangi wamaigi niha si no tesusugi, lö mofökhö, ba lasöndra waʼohau-hau dödö. Satua sebua faʼomasi manötöna ia enaʼö ifuli auri nononia si no mate. Na Lowalangi tenga ha manötöna ia, tobali so khönia waʼabölö ba wanusugi.​—Zinunö 135:6.

Ifatenge nononia Yehowa enaʼö fefu niha teʼefaʼö ira ba waʼamate. Hewisa dödö Yesu sanandrösa ba wanusugi? Fatua lö isusugi Lazaro, iʼila Yesu hewisa waʼabu dödö dalifusönia hegöi si fahuwu khönia, ba ”meʼe Yesu”. (Yohane 11:35) Ba ngaluo böʼö, falukha Yesu khö lakha mbanua moroi ba Naʼi si no mate ono, ”ba ahakhö dödönia, imane khönia: ’böi eʼe.’” Aefa daʼö, isusugi nono andrö. (Luka 7:13) Si ndruhu waʼabu dödö Yesu börö waʼamate. Omuso sibai dödönia na samuza inötö iheta fefu gabula dödö tobali faʼomuso dödö ba zi sagörö ulidanö!

Hadia so niha niʼomasiʼöu si no mate? Te ömane lö fanötöna saʼae ba niha si no mate. Tobali, no iwaʼö Lowalangi wa isusugi niha si no mate simane nifaluania khö Yesu. Omasi Lowalangi na öʼila waʼalua wanusi zi mate dania. Omasi Yehowa na so ndraʼugö ba luo daʼö ba wanemaʼö niha niʼomasiʼöu. Khalaigö atö hadia zalua ba zi so föna, lö irai fabali ita ba niha niʼomasiʼöda!

Imane Lionel, ”Ba gafuriata, ufahaʼö ndraʼodo sanandrösa ba wanusugi. Si ndruhunia lö khögu faʼafaduhu dödö sanandrösa ba wanusugi niwaʼö niha. Tobali, me no ufareso ba Zura Niʼamoniʼö awena aboto ba dödögu wa si ndruhu so wanusugi ba niha si no mate! Omasi sibai ndraʼo na falukhado khö duagu.”[2]

Hadia omasi ndraʼugö öʼila danö böʼönia nasa? Omasi ndra Samaduhuʼö Yehowa wangombakha khöu ba Zura Niʼamoniʼö hana wa faduhu dödöra sanandrösa ba wanusugi niha si no mate ba zi so föna.b